The Lay of the Mist-sons

Nach der St. Galler Handschrift (Fassung “B”)
herausgegeben von Hermann Reichert, 2005, 2017

Inhalt
Buoch I
LINK
1. Âventüre	von den Nibelungen Wie Griemhild träumte.
2. Âventüre	von Sîvride Von Siegfried und wie er erzogen wurde.
3. Âventüre	wie Sîvrit ze Wormze kom Wie Siegfried nach Worms kam.
4. Âventüre	wie er mit den Sahsen streit Wie Siegfried mit den Sachsen stritt.
5. Âventüre	wie Sîvrit Kriemhilt êrste gesach Wie Siegfried Griemhild zuerst sah.
6. Âventüre	wie Gunthêr gên Islande nâch Prünhilt vuor Wie Gunther nach Isenland fuhr, um Brunhild zu gewinnen.
7. Âventüre	wie Gunthêr Prünhilde gewan Wie Gunther Brunhild gewann.
8. Âventüre	wie Sîvrit nâch den Nibelungen vuor Wie Siegfried zu den Nibelungen fuhr.
9. Âventüre	wie Sîvrit gesant wart Wie Siegfried nach Worms gesandt wurde.
10. Âventüre	wie Prünhilt ze Wormze enpfangen wart Wie Brunhild zu Worms empfangen wurde.
11. Âventüre	wie Sîvrit heim ze lande mit sînem wîbe kom Wie Siegfried mit seinem Weib heimkehrte.
12. Âventüre	wie Gunthêr Sîvriden zuo der hôhgezît bat Wie Gunther Siegfried zu einem Hofgelage einlud.
13. Âventüre	wie si ze der hôhgezît vuoren Wie sie zum Hofgelage fuhren.
14. Âventüre	wie die küneginne ein ander schulten Wie die Königinnen aneinander gerieten.
15. Âventüre	wie Sîvrit verrâten wart Wie Siegfried verraten wurde.
16. Âventüre	wie Sîvrit erslagen wart Wie Siegfried erschlagen wurde.
17. Âventüre	wie Sîvrit beklaget und begraben wart Wie Siegfried beklagt und begraben wurde.
18. Âventüre	wie Sigemunt wider ze lande vuor Wie Siegmund wieder heimkehrte.
19. Âventüre	wie der Nibelunge hort ze Wormez kom Wie der Nibelungenschatz nach Worms kam.
Buoch II
20. Âventüre	wie künec Ezel ze Burgonden nâch Kriemhilde sande Wie König Etzel bei den Burgundern um Griemhild anhielt.
21. Âventüre	wie Kriemhilt gên den Hiunen vuor Wie Griemhild zu den Hunnen reiste.
22. Âventüre	wie si zen Hiunen wart enphangen Wie Griemhild bei den Hunnen empfangen wurde.
23. Âventüre	wie Kriemhilt ir leit gedâht ze rechen Wie Griemhild sich vornam, ihr Leid zu rächen.
24. Âventüre	wie Werbel und Swemmel die botschaft wurben Wie Werbel und Schwemmel die Botschaft überbrachten.
25. Âventüre	wie die künege zuo den Hiunen vuoren Wie die Könige zu den Hunnen fuhren.
26. Âventüre	wie Gelfrât erslagen wart von Dankwarte Wie Dankwart Gelfrat erschlug.
27. Âventüre	wie si ze Bechelâren kômen Wie der Markgraf die Könige empfing.
28. Âventüre	wie Kriemhilt Hagenen enphie Wie Kriemhild Hagen empfing.
29. Âventüre	wie Hagene und Volkêr vor Kriemhilde sal sâzen Wie er nicht vor ihr aufstand.
30. Âventüre	wie si der schiltwaht phlâgen Wie Volker und Hagen Schildwacht standen.
31. Âventüre	wie die hêrren ze kirchen giengen Wie die Herren zur Kirche gingen.
32. Âventüre	wie Blœdel mit Dancwart an der herberge streit Wie Blödel erschlagen wurde.
33. Âventüre	wie Dancwart diu mære ze hove sînen hêrren brâhte Wie Dankwart seinen Königen die Nachricht brachte.
34. Âventüre	wie si die tôten abe wurfen Wie sie die Toten hinabwarfen.
35. Âventüre	wie Îrinc erslagen wart Wie Iring erschlagen wurde.
36. Âventüre	wie diu künegîn den sal vereiten liez Wie die Königin den Saal anzünden ließ.
37. Âventüre	wie der marcgrâve Rüedegêr erslagen wart Wie Rüdiger erschlagen wurde.
38. Âventüre	wie hêrn Dietrîches man alle erslagen wurden Wie Dietrichs Recken alle erschlagen wurden.
39. Âventüre	wie Gunthêr unde Hagene unde Kriemhilt wurden erslagen Wie Gunther, Hagen und Kriemhild erschlagen wurden.

BUOCH I

von den Nibelungen
{ 1 }
Wie Griemhild träumte.

0
(C)

Uns ist in alten mæren wunders vil geseit
von helden lobebæren, von grôzer arbeit,
von vröuden, hôchgezîten, von weinen und von klagen,
von küener recken strîten müget ir nu wunder hœren sagen.

Es wuohs in Burgonden ein vil edel magedîn,
daz in allen landen niht schœners möchte sîn,
Kriemhilt geheizen. Si wart ein schœne wîp.
dar umbe muosen degene vil verliesen den lîp.

1½
(C)

Der minneclîchen meide triuten wol gezam
ir muoten küene recken, niemen was ir gram.
Âne mâzen schœne sô was ir edel lîp:
der juncvrouwen tugende zierten anderiu wîp.

Ir pflâgen drie künege edel und rîch,
Gunthêr unde Gêrnôt, die recken lobelîch,
und Gîselhêr der junge, ein ûz erwelter degen.
Diu vrouwe was ir swester, die fürsten hetens in ir pflegen.

Die hêrren wâren milte, von arde hôhe erborn,
mit kraft unmâzen küene, die recken ûz erkorn.
Dâ zen Burgonden, sô was ir lant genant.
Si vrumten starkiu wunder sît in Etzelen lant.

Ze Wormeze bî dem Rîne si wonten mit ir kraft.
In diente von ir landen vil stolziu ritterschaft
mit lobelîchen êren unz an ir endes zît.
Si ersturben sît jæmerlîche von zweier edelen vrouwen nît.

Ein rîchiu küneginne, vrou Uote ir muoter hiez.
ir vater, der heiz Dancrât, der in diu erbe liez
sît nâch sînem lebene, ein ellens rîcher man,
der ouch in sîner jugende grôzer êren vil gewan.

Die drie künege wâren, als ich gesaget hân,
von vil hôhem ellen. In wâren undertân
ouch die besten recken, von den man hât gesaget,
starc und vil küene, in scharpfen strîten unverzaget.

Daz was von Tronege Hagene und ouch der bruoder sîn,
Dancwart der vil snelle, von Metzen Ortwîn,
die zwêne marcgrâven Gêre und Eckewart,
Volkêr von Alzeye, mit ganzem ellen wol bewart.

Rûmolt der kuchenmeister, ein tiuwerlîcher degen,
Sindolt und Hûnolt, dise hêrren muosen pflegen
des hoves und der êren, der drîer künege man.
Si heten noch manegen recken, des ich genennen niene kan.

Dancwart, der was marschalc, dô was der neve sîn
truhsæze des küneges, von Metzen Ortwîn.
Sindolt, der was schenke, ein ûz erwelter degen.
Hûnolt was kamerære. Si kunden hôher êren pflegen.

Von des hoves krefte und von ir wîten kraft,
von ir vil hôhen werdekeit und von ir ritterschaft,
der die hêrren pflâgen mit vröuden al ir leben,
des enkunde iu ze wâre niemen gar ein ende geben.

In disen hôhen êren troumte Kriemhilde,
wie si zuge einen valken, starc, schœn und wilde,
den ir zwêne aren erkrummen, daz si das muoste sehen,
ir enkunde in dirre werlde leider nimmêr geschehen.

Den troum si dô sagete ir muoter Uoten.
Sine kunde es niht bescheiden baz der guoten:
„Der valke, den dû ziuhest, daz ist ein edel man.
In enwelle got behüeten, dû muost in schiere verloren hân.“

„Waz saget ir mir von manne, vil liebiu muoter mîn?
Âne recken minne, sô wil ich immer sîn.
Sus schœn ich wil belîben unz an mînen tôt,
daz ich von mannes minne sol gewinnen nimmêr nôt.“

„Nû versprich ez niht ze sêre“, sprach aber ir muoter dô.
„Soltû immer herzenlîche zer werlde werden vrô,
daz geschiht von mannes minne. Dû wirst ein schœne wîp,
ob dir noch got gefüeget eins rehte guoten ritters lîp.“

„Die rede lât belîben“, sprach si, „vrouwe mîn,
ez ist an manegen wîben vil dicke worden schîn,
wie liebe mit leide ze jungest lônen kan.
Ich sol si mîden beide, sône kan mir nimmêr missegân.“

Kriemhilt in ir muote sich minne gar bewac.
Sît lebte diu vil guote vil manegen lieben tac,
daz sine wesse niemen, den minnen wolde ir lîp.
Sît wart si mit êren eins vil küenen recken wîp.

Der was der selbe valke, den si in ir troume sach,
den ir beschiet ir muoter. Wie sêre si daz rach
an ir næhsten mâgen, die in sluogen sint!
Durch sîn eines sterben starp vil maneger muoter kint.

von Sîvride
{ 2 }
Von Siegfried und wie er erzogen wurde.

Dô wuohs in Niderlanden eins vil edelen küneges kint,
des vater, der hiez Sigemunt, sîn muoter Sigelint,
in einer rîchen bürge, wîten wol bekant,
nidene bî dem Rîne. Diu was ze Santen genant.

Sîvrit was geheizen der snelle degen guot.
Er versuochte vil der rîche durch ellenthaften muot.
Durch sînes lîbes sterke er reit in manegiu lant.
Hey, waz er sneller degene sît zen Burgonden vant!

In sînen besten zîten, bî sînen jungen tagen,
man mohte michel wunder von Sîvride sagen,
waz êren an im wüehse, und wie schœne was sîn lîp.
Sît heten in ze minne diu vil wætlîchen wîp.

Man zôch in mit dem vlîze, als im daz wol gezam.
Von sîn selbes muote waz tugende er an sich nam!
Des wurden sît gezieret sînes vater lant,
daz man in ze allen dingen sô rehte hêrlichen vant.

Er was nû sô gewahsen, daz er ze hove reit.
Die liute in sâhen gerne. Manec vrouwe und manec meit
im wunschten, daz sîn wille in immer trüege dar.
Holt wurden im genuoge. Des wart der hêrre wol gewar.

Vil selten âne huote man rîten lie daz kint.
In hiez mit kleidern zieren Sigemunt und Sigelint.
Sîn pflâgen ouch die wîsen, den êre was bekant.
Des mochte er wol gewinnen beide liute unde lant.

Nû was er in der sterke, daz er wol wâfen truoc.
Swes er dar zuo bedorfte, des lac an im genuoc.
Er begunde mit sinnen werben schœniu wîp.
Die trûten wol mit êren des küenen Sîvrides lîp.

Dô hiez sîn vater Sigemunt künden sînen man,
er wolde hôchgezîte mit lieben vriunden hân.
Diu mære man dô fuorte in ander künege lant.
Den vremden und den kunden gap er ross und guot gewant.

Swâ man vant deheinen, der ritter solde sîn
von art der sînen mâge, diu edelen kindelîn
diu ladete man zuo dem lande durch die hôchgezît.
Mit dem jungen künege swert genâmen si sît.

Von der hôchgezîte man mohte wunder sagen.
Sigemunt unde Sigelint, die mohten wol bejagen
mit guote michel êre. Des teilte vil ir hant.
Des sach man vil der werden nû zin rîten in daz lant.

Vier hundert swertdegene, die solden tragen kleit
mit samt Sîvride. Vil manec schœniu meit
von werke was unmüezec, wan si im wâren holt.
Vil der edelen steine die vrouwen leiten in daz golt,

die si mit porten wolden würken ûf ir wât
den jungen stolzen recken. Des newas niht rât.
Der wirt der hiez dô sidelen vil manegen küenen man
ze einen sunewenden, dâ sîn sun Sîvrit wol ritters namen gewan.

Dô gie ze einem münster vil manec rîcher kneht
und manec edel ritter. Die wîsen heten reht,
daz si den tumben dienten, als in was ê getân.
Si heten kurzewîle und ouch vil maneger vröuden wân.

Got man dô zen êren eine messe sanc.
Dô huop sich von den liuten vil michel der gedranc,
dâ si ze ritter wurden nâch ritterlîcher ê
mit alsô grôzen êren, daz wætlîch immer mêr ergê.

Si liefen, dâ si funden gesatelt manec marc
in hove Sigemndes. Der bûhurt wart sô starc,
daz man erdiezen hôrte palas und sal.
Die hôchgemuoten degene, die heten grœzlîchen schal.

Von wîsen und von tumben man hôrte manegan stôz,
daz der schefte brechen gein den lüften dôz.
Trunzûne sach man vliegen für den palas dan
von maneges recken hende. Daz wart mit vlîze getân.

Der wirt der bat ez lâzen. Dô zôch man diu marc.
Man sach ouch dâ zebrochen vil manege buckel starc,
vil der edelen steine gevellet ûf daz gras
ab liehten schildes spangen. Von hürten daz geschehen was.

Dô giengens wirtes geste, dâ man in sitzen riet.
Vil der edelen spîse si von ir müede schiet,
und wîn der aller beste, des man in vil getruoc.
Den vremden und den kunden bôt man êren genuoc.

Swie vil si kurzewîle pflâgen al den tac,
vil der varender diete ruowe sich bewac.
Si dienten nâch der gâbe, die man dâ rîche vant.
Des wart mit lobe gezieret allez Sigemundes lant.

Der hêrre, der hiez lîhen Sîvrit den jungen man
lant und bürge, als er hete ê getân.
Sînen swertgenôzen, den gap dô vil sî hant.
Dô liebte in diu reise, daz si kômen in daz lant.

Diu hôchgezît, diu werte unz an den sibenden tac.
Sigelint diu rîche nâch alten siten pflac
durch ir suns liebe teilen rôtez golt.
Si kundez wol gedienen, daz im die liute wâren holt.

Vil lützel man der varnder armen dâ vant.
Ross und kleider, daz stoup in von der hant,
sam si ze lebene heten niht mêr deheinen tac.
Ich wæn, ie ingesinde sô grôzer milte gepflac.

Mit lobelîchen êren schiet sich diu hôchgezît.
Von den rîchen hêrren hôrte man wol sît,
daz si den jungen wolden ze eime hêrren hân.
Des engerte niht hêr Sîvrit, der vil wætlîche man.

Sît daz noch beide lebten, Sigemunt und Sigelint,
niht wolde tragen krône ir beider liebez kint.
Doch wolder wesen hêrre für allen den gewalt,
des in den landen vorhte der degen küen und balt.

wie Sîvrit ze Wormze kom
{ 3 }
Wie Siegfried nach Worms kam.

Den hêrren müeten selten deheiniu herzen leit.
Er hôrte sagen mære, wie ein schœniu meit
wære in Burgonden, ze wunsche wolgetân,
von der er sît vil vröuden und ouch arbeit gewan.

Diu ir unmâzen schœne was vil wîten kunt,
und ir hôchgemüete zuo der selben stunt
an der juncvrouwen sô manec helt ervant.
Ez ladete vil der geste in daz Gunthêres lant.

Swaz man der werbenden nâch ir minne sach,
Kriemhilt in ir sinne ir selber nie verjach,
daz si deheinen wolde ze eime trûte hân.
Er was ir noch vil vremde, dem si wart sider undertân.

Dô gedâhte ûf hôhe minne daz Sigelinde kint.
Ez was ir aller werben wider in ein wint.
Er mohte wol verdienen schœner vrouwen lîp.
Sît wart diu edele Kriemhilt des küenen Sîvrides wîp.

Im rieten sîne mâge und genuoge sîne man,
sît er ûf stæte minne wolde tragen wân,
daz er dan eine würbe, diu im möhte zemen.
Dô sprach der küene Sîvrit: „Sô wil ich Kriemhilden nemen,

Die schœnen juncvrouwen von Burgonden lant,
durch ir unmâzen schœne. Das ist mir wol bekannt,
nie keiser wart sô rîche, der wolde haben wîp,
im zæme wol ze minnen der rîchen küneginne lîp.“

Disiu selben mære gehôrte Sigemunt.
Ez reiten sîne liute, dâ von wart im kunt
der wille sînes kindes was im harte leit,
daz er werben wolde die vil hêrlîchen meit.

Ez gevriesch ouch Sigelint, des edelen küneges wîp.
Si hete grôze sorge um ir kindes lîp,
wan si wol erkande Gunthêren und sîne man.
Den gewerp man dem degene sêre leiden began.

Dô sprach der küene Sîvrit, „Vil lieber vater mîn,
ân edeler vrouwen minne wolde ich immer sîn,
ich enwürbe, dar mîn herze vil grôze liebe hât,
swaz iemen reden kunde, des ist deheiner slahte rât.“

„Und wiltû niht erwinden“, sprach der künec dô,
„sô bin ich dîns willen wærlîchen vrô
und wil dir ez helfen enden, sô ich aller beste kan.
Doch hât der künec Gunthêr vil manegen hôchverten man.

Ob ez ander niemen wære wan Hagene der degen,
der kan mit übermüete der hôchverte pflegen,
daz ich des sêre fürhte, es müge uns werden leit,
ob wir werben wellen die vil hêrlichen meit.“

„Waz mac uns daz gewerren?“, sprach dô Sîvrit,
„Swaz ich vriuntlîche niht ab in erbit,
daz mac sus erwerben mit ellen dâ mîn hant.
Ich trûwe an in ertwingen beide liute und lant.“

Dô sprach der fürste Sigemunt: „Dîn rede, diu ist mir leit.
Wan würden disiu mære ze Rîne geseit,
dûne dorftest nimmêr gerîten in daz lant,
Gunthêr und Gêrnôt, die sint mir lange bekant.

Mit gewalte niemen erwerben mac die maget“,
sô sprach der künec Sigemunt, „daz ist mir wol gesaget.
Wilt aber dû mit recken rîten in daz lant,
ob wir iht haben vriunde, die werdent schiere besant.“

„Des enist mir niht ze muote“, sprach aber Sîvrit,
„daz mir sulen recken ze Rîne volgen mit
durch deheine hervart, daz wære mir vil leit,
dâ mit ich solde ertwingen die vil wætlîchen meit.

Si mac wol sus erweben dâ mîn eines hant.
Ich wil selbe zwelfte in Gunthêres lant.
Dar sult ir mir helfen, vater Sigemunt.“
Dô gap man sînen degenen ze kleidern grâ und bunt.

Dô vernam ouch disiu mære sîn muoter Sigelint.
Si begunde trûren um ir liebez kint.
Daz vorhte si verliesen von Gunthêres man.
Diu edele küneginne vil sêre weinen began.

Sîvrit der hêrre gie, dâ er si sach.
Wider sîne muoter er gûetlîche sprach:
„Vrouwe, ir sult niht weinen durch den willen mîn.
Jâ wil ich ân sorge vor allen wîganden sîn.

Und helfet mir der reise in Burgonden lant,
daz ich und mîne recken haben sölch gewant,
daz alsô stolze helde mit êren mügen tragen.
Des will ich iu genâde mit triuwen wærlîchen sagen.“

„Sît dû niht wil erwinden“, sprach vrou Sigelint,
„sô hilf ich dir der reise, mîn einigez kint,
mit der besten wæte, die ritter ie getruoc,
dir und dînen gesellen. Ir sult ir füeren genuoc.“

Dô neic der küneginne Sîvrit, der junge man.
Er sprach: „Ich wil zer verte niemen mêr hân
niuwan zwelf recken. Den sol man prüeven wât.
I wil daz sehen gerne, wiez um Kriemhilde stât.“

Dô sâzen schœne vrouwen naht und tac,
daz lützel ir deheiniu ruowe gepflac,
unze man geworhte die Sîvrides wât.
Er wolde sîner reise haben deheiner slahte rât.

Sîn vater hiez im zieren sîn ritterlîch gewant,
dâ mit er wolde rûmen daz Sigemundes lant,
und ir vil liehten brünne, die wurden ouch bereit,
und ir vesten helme, ir schilde schœn und breit.

Dô nâhete in ir reise zen Burgonden dan.
Um si begunde sorgen wîp und man,
ob si immer komen solden heim wider in daz lant.
Die helde in heizen soumen beide wâfen und gewant.

Ir ross, diu wâren schœne, ir gereite goldes rôt.
lebte iemen übermüeter, des enwas niht nôt,
denne wære Sîvrit und die sîne man.
Urloubes er dô gerte zuo den Burgonden dan.

In werten trûreclîchen der künec und sîn wîp.
Er trôste minneclîchen dô ir beider lîp.
Er sprach: „Ir sult niht weinen durch den willen mîn.
immer âne sorge sult ir mînes lîbes sîn.“

Ez was leit den recken. Ez weinte ouch manec meit.
Ich wæn, in hete ir herze rehte daz geseit,
daz in sô vil der vriunde dâ von gelæge tôt.
Von schulden di dô klageten. Des gie in wærlîche nôt.

An dem sibenden morgen ze Wormez ûf den sant
riten die vil küenen. Allez ir gewant
was von rôtem golde, ir gereite wol getân.
Ir ross in giengen ebene, des küenen Sîvrides man.

Ir schilde wâren niuwe, lieht unde breit,
und vil schœn ir helme, dâ ze hove reit
Sîvrit der vil küene in Gunthêres lant.
Man gesach an helden nie sô hêrlîch gewant.

Diu ort ir swerten giengen nider ûf den sporn.
Ez fuorten scharpfe gêren die ritter ûz erkorn.
Sîvrit, der fuorte ir einen wol zweier spannen breit,
der zuo sînen ecken vil harte vreislîchen sneit.

Die golt varwen zoume fuortens an der hant,
sîdlîniu fürbüege. Sus kômens in daz lant.
Daz volc si allenthalben kapfen an began.
Dô liefen in engegene vil der Gunthêres man.

Die hôchgemuoten recken, ritter und kneht,
die giengen zuo den hêrren, daz was michel reht,
und enpfiengen dise geste in ir hêrren lant
und nâmen in die mœre mit den schilden von der hant.

Diu ross si wolden dannen ziehen an gemach.
Sîvrit der vil küene, wie snelle er dô sprach:
„Lât uns stân die mœre, mir und mînen man.
Wir wellen schiere hinnen. Des ich vil guoten willen hân.

Swem sîn kunt diu mære, der sol mich niht verdagen:
wâ ich den künec vinde, daz sol man mir sagen,
Gunthêren den vil rîchen ûz Burgonden lant.“
Dô sagte ez im ir einer, dem ez rehte was bekant:

„Welt ir den hêrren vinden, daz mac vil wol geschehen.
In jenem sale wîten, dâ hân ich in gesehen
bî den sînen helden. Da sult ir hine gân.
Dâ muget ir bî im vinden vil manegen hêrlîchen man.“

Nû wâren dem künege diu mære geseit,
daz dâ komen wæren ritter vil gemeit,
die füorten wîze brünne und hêrlîch gewant.
Sine erkande niemen in der Burgonden lant.

Den künec des hete wunder, von wannen kœmen dar
Die hêrlîchen recken in wæte lieht gevar,
und mit sô guoten schilden, niuwe und breit.
daz im daz sagte niemen, daz was Gunthêre leit.

Des antwurte dem künege von Metzen Ortwîn,
rîch und küene mohte er wol sîn:
„Sît wir ir niht erkennen, nû sult ir heizen gân
nâch mînem œheim Hagenen. Den sult ir si sehen lân.

Dem sint kunt diu rîche und ouch diu vremden lant.
Sint im die hêrren kunde, daz tuot er uns bekant.“
Der künec bat in bringen und die sînen man.
Man sach in hêrlîche mit recken hin ze hove gân.

Waz sîn der künec wolde, des vrâgte Hagene.
„Ez sint in mînem hûse unkunde degene,
die niemen hie bekennet. Habt ir si ie gesehen,
des sult ir mir, hêr Hagene, der rehten wârheite jehen.“

„Daz tuon ich“, sprach Hagene. Zeinem venster er dâ gie.
Sin ouge er dô wenken zuo den gesten lie.
Wol behagte im ir geverte und ouch ir gewant.
Si wâren im vil vremde in der Burgonden lant.

Er sprach, von swannen kœmen die recken an den Rîn,
ez möhten selbe fürsten oder fürsten boten sîn.
Ir ross, diu wæren schœne, ir kleider harte guot.
Von swannen daz si füeren, si wæren hôchgemuot.

Alsô sprach dô Hagene: „Ich wil des wol verjehen,
swie ich Sîvriden nie mêr habe gesehen,
sô wil ich wol gelouben, swie ez dar umbe stât,
daz ez sî der recke, der dort sô hêrlîch gât.

Er bringet niuwe mære her in ditze lant.
Die küenen Nibelunge sluoc des heldes hant,
Schilbunc und Nibelungen, diu rîchen küneges kint.
Er vrumte starkiu wunder mit sîner grôzen krefte sint.

Dâ der helt aleine ân alle helfe reit,
er vant vor einem berge, daz ist mir wol geseit,
bî Nibelunges horde vil manegen küenen man.
Die wâren im ê vremde, unz er ir kunde dâ gewan.

Hort der Nibelunges, der was gar getragen
ûz einem holem berge. Nû hœret wunder sagen,
wie in wolden teilen der Nibelunge man.
Daz sach der degen Sîvrit. Den helt ez wunderen began.

Er kom zuo zin sô nâhen, daz er die helde sach,
und ouch in die degene. Ir einer drunder sprach:
„Hie kumt der starke Sîvrit, der helt von Niderlant.“
Vil seltsæniu mære er an den Nibelungen vant.

Den recken wol enpfiengen Schilbunc und Nibelunc.
Mit gemeinem râte die edelen fürsten junc
den schatz in bâten teilen den wætlîchen man,
und gerten des mit vlîze. Der hêrre loben inz began.

Er sach sô vil gesteines, sô wir hœren sagen,
hundert kanzwegene ez möhten niht getragen,
noch mê des rôten goldes von Nibelunge lant.
Daz solde in allez teilen des küenen Sîvrides hant.

Dô gâben si im ze miete daz Nibelunges swert.
Sie wâren mit dem dienste vil übele gewert,
den in dâ leisten solde Sîvrit, der helt guot.
Er enkundez niht verenden, sie wâren zornec gemuot.

Si heten dâ ir vriunde zwelf küene man,
daz starke risen wâren. Waz kundez si vervân?
Die sluoc sît mit zorne diu Sîvrides hant,
und recken siben hundert twanc er von Nibelunge lant

mit dem guoten swerte, daz hiez Balmunc.
Durch die starken vorhte vil manec recke junc
die sie zem swerte heten und an den küenen man
daz lant zuo den bürgen si im tâten undertân.

Dar zuo die rîchen künege, die sluoc er beide tôt.
Er kom von Albrîche sît in grôze nôt.
Der wânde sîne hêrren rechen dâ zehant,
unz er die grôzen sterke sît an Sîvride vant.

Dône kunde im niht gestrîten daz starke getwerc.
Alsam die lewen wilde si liefen an den berc,
dâ er die tarnkappen sît Albrîche an gewan.
Dô was des hordes hêrre Sîvrit, der vreislîche man.

Die dâ torsten vehten, die lâgen alle erslagen.
Den schatz, den hiez er balde füeren und tragen,
dâ in dâ vor dâ nâmen die Nibelunge man.
Albrîch der vil starke dô die kamern gewan.

Er muose im sweren eide, er diente im sô sîn kneht.
Aller hande dinge was er im gereht.“
Sô sprach von Tronege Hagene: „Daz hât er getân.
Alsô grôzer krefte nie mêr recke gewan.

Noch weiz ich an im mêre, daz mir ist bekant:
einen linttrachen, den sluoc des heldes hant.
Er badete sich in dem bluote. Sîn hût wart hurnîn.
Des snîdet in kein wâfen. Daz ist dicke worden schîn.

Wir suln den hêrren enpfâhen deste baz,
daz wir iht verdienen des jungen recken haz.
Sîn lîp, der ist sô küene, man sol in holden hân.
Er hât mit sîner krefte sô manegiu wunder getân.“

100

Dô sprach der künec rîche: „Du maht wol haben wâr.
Nû sich, wie degenlîche er stât in strîtes vâr,
er und die sînen degene, der vil küene man.
Wir sulen im engegene hin nider zuo dem recken gân.“

101

„Daz muget ir“, sprach dô Hagene, „wol mit êren tuon.
Er ist von edelem künne, eines rîchen küneges sun.
Er stât in der gebære, mich dunket, wizze Krist,
ez ensîn niht kleiniu mære, dar umb er her geriten ist.“

102

Dô sprac der künec des landes: „Nû sî uns willekomen!
Er ist edel und küene, daz hân ich wol vernomen,
des sol ouch er geniezen in Burgonden lant.“
Dô gie der hêrre Gunthêr, dâ der Sîvriden vant.

103

Der wirt und sîne recken enpfiengen sô den gast,
daz in an ir zühten vil wênec iht gebrast.
Des begunde in nîgen der wætlîche man,
daz si in heten grüezen sô rehte schône getân.

104

„Mich wunderrt dirre mære“, sprach der künec zehant,
„von wannen ir, edel Sîvrit, sît komen in ditze lant,
oder waz ir wellent werben ze Wormez an den Rîn.“
Dô sprach der gast zem künege: „Daz so iuch unverdaget sîn.

105

Mir wart gesaget mære in mînes vater lant,
daz hie bî iu wæren, daz hete ich gerne erkant,
die küensten recken, des hân ich vil vernomen,
die ie künec gewünne. Dar umbe bin ich her bekomen.

106

Ouch hœre ich iu selben der degenheite jehen,
daz man künec deheinen küener habe gesehen.
Des redent vil die liute über elliu disiu lant.
Nû wil ich niht erwinden, unz ez mir werde bekant.

107

Ich bin ouch ein recke und solde krône tragen.
Ich wil daz gerne füegen, daz si von mir sagen,
daz ich habe von rehte liuhte und lant.
Dar umbe sol mîn êre und ouch mîn houbet wesen pfant.

108

Nû ir sît sô küene, als mir ist geseit,
sône ruoche ich, ist daz iemen liep oder leit,
ich wil an iu ertwingen, swaz ir müget hân.
Land unde bürge, daz sol mir werden undertân.

109

Den künec hete wunder und sîne man alsam
umbe disiu mære, diu er hie vernam,
daz er des hete willen, er næme im sîniu lant.
Daz hôrten sîne degene. Dô wart in zürnen bekant.

110

„Wie hete ich daz verdienet“, sprach Gunthêr der degen,
„des mîn vater lange mit êren hât gepflegen,
daz wir daz solden verliesen von iemannes kraft?
Wir liezen übele schînen, daz wir ouch pflegen ritterschaft.“

111

„Ine wil es niht erwinden“, sprach aber der küene man,
„ez enmüge von dînen ellen dîn lant den vride hân,
ich wil es alles walden. Und ouch diu erbe mîn,
erwirbest dûz mit sterke, diu sulen dir undertænec sîn.

112

Dîn erbe und ouch daz mîne sulen gelîche ligen.
Sweder unser einer am andern mac gesigen,
dem sol ez allez dienen, diu liute und ouch diu lant.“
Daz widerredete Hagene und Gêrnôt zehant.

113

„Wir hân des niht gedingen“, sprach dô Gêrnôt,
„daz wir iht lande ertwingen, daz iemen drumbe tôt
gelige vor heldes handen. Wir haben rîchiu lant,
diu dienent uns von rehte. Ze niemen sint si baz bewant.“

114

Mit grimmigem muote dâ stuonden vriunde sîn.
Dô was ouch dar under von Metzen Ortwîn.
Der sprach: „Disiu suone, diu is mir harte leit.
Iu hât der starke Sîvrit unverdienet widerseit.

115

Ob ir und iuwer bruoder hete niht die wer,
und ob er danne fuorte ein ganzez küneges her,
ich trûte wol erstrîten, daz der küene man
diz starkez übermüeten von wâren schulden müese lân.“

116

Daz zurnde harte sêre der helt von Niderlant.
Er sprach: „Sich sol vermezzen niht wider mich dîn hant.
Ich bin ein künec rîche, sô bistû küneges man.
Jâne dorfen mich dîn zwelve mit strîte nimmêr bestân!“

117

Nâch swerten rief dô sêre von Metzen Ortwîn.
Er mohte Hagenen swester sun von Tronege vil wol sîn.
Daz der sô lange dagete, daz was dem künege leit.
Dô understuondez Gêrnôt, der ritter küen und gemeit.

118

Er sprach ze Ortwîne: „Lât iuwer zürnen stân!
Uns enhât der hêrre Sîvrit sölches niht getân,
wir enmugenz noch wol scheiden mit zühten, deist mîn rât,
und haben in ze vriunde. Daz uns noch lobelîcher stât.“

119

Dô sprach der starke Hagene: „Uns mac wol wesen leit,
allen dînen degenen, daz er ie gereit
durch strîten her ze Rîne. Er solde ez haben lân.
Im heten mîne hêrren sölcher leide niht getân.“

120

Des antwurte Sîvrit, der kreftige man:
„Müet iuch daz, hêr Hagene, daz ich gesprochen hân.
sô sol ich lâzen kiesen, daz die hende mîn
wellent vil gewaltec hie zen Burgonden sîn.“

121

„Daz sol ich eine wenden“, sprach aber Gêrnôt.
Allen sînen degenen reden er verbôt
iht mit übermüete, des im wære leit.
Dô gedâhte ouch Sîvrit an die hêrlîchen meit.

122

„Wie zæme uns mit iu strîten?“ sprach aber Gêrnôt.
„Swaz helde nû dar under müese ligen tôt,
wir hetens lützel êre, und ir vil kleinen vrum.“
Des antwurte im dô Sîvrit, des künec Sigemundes sun:

123

„War umbe bîtet Hagene und ouch Ortwîn,
daz er niht gâhet strîten mit den vriunden sîn,
der er hie sô manegen zen Burgonden hât?“
Si muosen rede vermîden. Daz was Gêrmôtes rât.

124

„Ir sult uns wesen willekomen“, sô sprach daz Uoten kint,
„mit iuwern gesellen, die mit iu komen sint!
Wir sulen iu gerne dienen, ich und die mâge mîn.“
Dô hiez man den gesten schenken den Gunthêres wîn.

125

Dô sprach der wirt des landes: „Alles, daz wir hân,
geruochet irs nâch êren, daz sî iu undertân,
und sî mit iu geteilet lîp und guot.“
Dô wart der hêrre Sîvrit ein lützel sanfter gemuot.

126

Dô hiez man in gehalten allez ir gewant.
Man suochte herberge, die besten die man vant,
Sîvrides knehten. Man schuof in guot gemach.
Den gast man sît vil gerne dâ zen Burgonden sach.

127

Man bôt im michel êre dar nâch ze manegen tagen,
tûsent stunden mêre dann ich iu kan gesagen.
Daz hete versolt sîn ellen. Ir sult gelouben daz,
in sach vil lützel iemen, der im wære gehaz.

128

Sich vlizzen kurzewîle die künege und ouch ir man,
sô was er ie der beste. Swes man dâ began,
des enkunde im gevolgen niemen, sô michel was sîn kraft,
sô si den stein wurfen oder schuzzen den schaft.

129

Swâ sô bî den vrouwen durch ir höveschheit
kurzewîle pflâgen die ritter vil gemeit,
dâ sach man ie vil gerne den helt von Niderlant.
Er hete ûf hôhe minne sîne sinne gewant.

130

Swes man ie begunde, des was sîn lîp bereit.
Er truoc in sînem sinne ein minnelîche meit,
und ouch in ein diu vrouwe, die er noch nie gesach,
diu im in heinlîche vil dicke güetlîchen sprach.

131

Swenne ûf dem hove wolden spilen dâ diu kint,
ritter und knehte, daz sach vil dicke sint
Kriemhilt durch diu venster, diu küneginne hêr.
Deheiner kurzewîle bedorfte si in den zîten mêr.

132

Wesse er, daz in sæhe, die er in hezen truoc,
dâ hete er kurzewîle immer von genuoc.
Sæhen si sîniu ougen, daz Sigelinde kint,
daz in durch herzenliebe trûte manec vrouwe sint.

133

Swenne er bî den helden ûf dem hove stuont,
alsô noch die liute durch kurzewîle tuont,
sô stuont sô minneclîche daz Sigelinde kint,
daz in durch herzenliebe trûte manec vrouwe sint.

134

Er gedâhte ouch manege zîte: „wie sol daz geschehen,
daz ich die maget edele mit ougen mügen sehen,
die ich von herzen minne, und lange hân getân?
Diu ist mir noch vil vremde. Des muoz ich trûric stân.“

135

Sô ie die künege rîche riten in ir lant,
sô muosen ouch die recken mit in al zehant.
Dâ mite muose ouch Sîvrit. Daz was der vrouwen leit.
Er leite ouch von ir minne dicke michel arbeit.

136

Sus wonte er bî den hêrren, daz ist al wâr,
in Gunthêres lande volleclîch ein jâr,
daz er die minneclîchen die zîte niene gesach.
Dâ von im sît vil liebe und ouch vil leide geschach.

wie er mit den Sahsen streit
{ 4 }
Wie Siegfried mit den Sachsen stritt.

137

Nû nâhten vremdiu mære in Gunthêres lant
von boten, die in verre wurden dar gesant
von unkunden recken, die in truogen haz.
Dô sie die rede vernâmen, leit was in wærlîche daz.

138

Die wil ich iu nennen: ez was Liudegêr
ûzer Sahsen lande, ein rîcher fürste hêr,
und ouch von Tenemarke der künec Liudegast.
Die brâhten in ir reise vil manegen hêrlîchen gast.

139

Ir boten komen wâren in Gunthêres lant,
die sîne widerwinnen beten dar gesant.
Dô vrâgete man der mære die unkunden man.
Man hiez die boten balde ze hove für den künec gân.

140

Der gruozte si vil schône. Er sprach: „Sît willekomen!
Wer iuch her habe gesendet, des enhân ich niht vernomen.
Daz sult ir lâzen hœren“, sprach der künec guot.
Do vorhten si vil sêre den grimmen Gunthêres muot.

141

„Welt ir, künec, erlouben, daz wir iu mære sagen,
diu wir iu dâ bringen, sône sul wir niht verdagen,
wir nenne iu die hêrren, die uns her habent gesant.
Liudegast und Liudegêr, die wellent suochen her enlant.

142

Ir habt ir zorn verdienet. Jâ hôrten wir wol daz,
daz iu die hêrren beide tragent grôzen haz!
Sie wellent herverten ze Wormez an den Rîn.
In hilfet vil der degene, daz wizzet ûf die triuwe mîn.

143

Inre zwelf wochen diu reise muoz geschehen.
Habt ir iht guoter vriunde, daz lâzen balde sehen,
die iu vriden helfen die bürge und iuwer lant.
Hie wirt von in verhouwen vil manec helm und rant.

144

Oder welt ir mit in dingen, sô enbietet ez in dar.
Sône rîtent iu sô nâhen niht die manegen schar
der iuwer starken vîande ûf herzenlîchiu leit,
dâ von verderben müezen vil guote ritter gemeit.“

145

„Nû bîtet eine wîle“, sprach der künec guot,
„unz ich mich baz versinne. Ich künd iu mînen muot.
Hân ich getriuwer iemen, diene sol ich niht verdagen.
Disiu starken mære sol ich mînen vriunden klagen.“

146

Gunthêre dem vil rîchen wart leide genuoc.
Die rede er tougenlîchen in sînem herzen truoc.
Er hiez gewinnen Hagenen und ander sîne man
und bat ouch harte balde ze hove nâch Gêrnôte gân.

147

Dô kômen die besten, swaz man der dâ vant.
Er sprach: „Man wil uns suochen her in unser lant
mit starken herverten. Daz lât iu wesen leit!“
Des antwurte Gêrnôt, ein ritter küen und gemeit:

148

„Daz wer êt wir mit swerten“, sô sprach Gêrnôt,
„dâ sterbent wan die feigen. Die lâzen ligen tôt.
Dar umb ich niht vergezzen mac der êren mîn.
Die unsern vîande suln uns willekomen sîn!“

149

Dô sprach von Tronege Hagene: „Daz endunket mich niht guot.
Liudegast und Liudegêr, die tragent übermuot.
Wir mugen uns niht besenden in sô kurzen tagen“,
sô sprach der küene recke. „Wan müge ir ez Sîvride sagen?“

150

Die boten herbergen hiez man in die stat.
Swie vîent man in wære, vil schône ir pflegen bat
Gunthêr der rîche, daz was wol getân,
unz er ervant an vriunden, wer im dâ wolde gestân.

151

Dem künege in sînen sorgen was iedoch vil leit.
Dô sach in trûrende ein ritter vil gemeit.
der niht mohte wizzen, waz im was geschehen.
Dô bat er im der mære den künec Gunthêr verjehen.

152

„Mich nimt des michel wunder“, sprach dô Sîvrit,
„wie habt ir sô verkêret die vrœlîchen sit,
der ir mit uns nû lange habt al her gepflegen?“
Des anwurte im dô Gunthêr, der vil zierlîche degen:

153

„Jâne mac ich allen liuten die swære niht gesagen,
die ich muoz tougenlîche in mînem herzen tragen!
Man sol stæten vriunden klagen herzen nôt.“
Diu Sîvrides varwe wart dô bleich und rôt.

154

Er sprach zuo dem künege: „Ine hân iu niht verseit.
Ich sol iu helfen wenden elliu iuwer leit.
Welt ir vriunde suochen, der sol ich einer sîn,
und trûwez wol volbringen mit êren an daz ende mîn.“

155

„Nû lôn iu got hêr Sîvrit, diu rede dunket mich guot.
Und ob mir nimmêr helfe iuwer ellen getuot,
ich vröu mich doch der mære, daz ir mir sît sô holt.
Leb ich deheine wîle, ez wirdet umb iuch wol versolt.

156

Ich wil iuch lâzen hœren, war umb ich trûrec stân.
Von boten mîner vîande ich daz vernomen hân,
daz si mich wellen suochen mit herverten hie.
Daz getâten uns noch degene her zuo disen landen nie.“

157

„Daz lât iuch ahten ringe“, sprach dô Sîvrit,
„und senftet iuwerem muote. Tuot, des ich iuch bit!
Lât mich iu erwerben êre unde vrumen
und bittet iuwer degene, daz si iu ouch ze helfe kumen.

158

Swenne iuwer starken vîande zir helfe möhten hân
drîzec tûsent degene, sô wolde ich si bestân,
und hete ich niuwan tûsent. Des lât iuch an mich.“
Dô sprach der künec Gunthêr: „Daz dien ich immer umbe dich.“

159

„Sô heizet mir gewinnen tûsent iuwer man,
sît daz ich der mînen bî mir niht enhân
niuwan zwelf recken. Sô wer ich iuwer lant.
Iu sol mit triuwen dienen immer Sîvrides hant.

160

Des sol uns helfen Hagene und ouch Ortwîn,
Dancwart und Sindolt, die lieben recken dîn.
Ouch sol dâ mit rîten Volkêr, der küene man,
der sol den vanen füeren. Baz ichs niemen engan.

161

Und lât die boten rîten heim in ir hêrren lant.
Daz si uns sehen schiere, daz tuo man in bekant,
sô daz unser bürge müezen vride hân.“
Dô hiez der künec besenden beide mâge und man.

162

Die boten Liudegêres ze hove giengen dô.
Daz si ze lande solden, des wâren si vil vrô.
Dô bôt in rîche gâbe Gunthêr, der künec guot,
und schuof in sîn geleite. Des stuont in hôhe der muot.

163

„Nu sagt“, sprach dô Gunthêr, „den starken vîanden mîn,
si mugen mit ir reise wol dâ heime sîn.
Wellen aber si mich suochen her in mîniu lant,
mir enzerinne mîner vriunde, in wirt arbeit erkant.“

164

Den boten rîche gâbe man dô für truoc.
Der hete in ze gebene Gunthêr genuoc.
Diene torsten versprechen die Liudegêres man,
dô si urloup genâmen. Si schieden vrœlîche dan.

165

Dô die boten wâren ze Tenemarke komen,
und der künec Liudegast hete daz vernomen,
wie si von Rîne kœmen, als im daz wart geseit,
ir starkez übermüeten, daz was im wærlîchen leit.

166

Si sagten, daz sie heten vil manegen küenen man.
Ouch sâhen si dar under einen recken stân,
der was geheizen Sîvrit, ein helt ûz Niderlant.
Ez leidete Liudegaste, als er daz mære rehte erevant.

167

Dô die von Tenemarke ditze hôrten sagen,
dô îlten si der vriunde deste mêr bejagen,
unz daz hêr Liudegast sîner küenen man
zweinzec tûsent degene zuo sîner reise gewan.

168

Dô besande ouch sich von Sahsen der künec Liudegêr,
unze si vierzec tûsent heten unde mêr.
mit den si wolden rîten in Burgonden lant.
Dô hete ouch sich hie heime der künec Gunthêr besant

169

mit den sînen mâgen und sîner bruoder man,
die si wolden füeren durch urliuge dan,
und ouch die Hagenen recken. Des gie den helden nôt.
dar umbe muosen degene sider kiesen den tôt.

170

Si vlizzen sich der reise, dô si wolden dan.
Den vanen muose leiten Volkêr, der küene man,
alsô si wolden rîten von Wormez über Rîn.
Hagene von Tronege, der muose scharmeister sîn.

171

Dâ mite reit ouch Sindolt und Hûnolt,
die wol gedienen kunden daz Gunthêres golt.
Dancwart, Hagenen bruoder, und ouch Ortwîn,
die mohten wol mit êren in der herverte sîn.

172

„Hêr künec, nû sî hie heime“, sprach dô Sîvrit,
„sît daz iuwer recken mir wellent volgen mit,
belîbet bî den vrouwen und traget hôhen muot!
Ich trûwe iu wol behüeten beidiu êre unde guot.

173

Die iuch dâ wolden suochen ze Wormez an den Rîn,
daz wil ich wol behüeten, si mügen dâ heime sîn.
Wir sulen in gerîten sô nâhen in ir lant,
daz in ir übermüeten werde in sorgen erwant.“

174

Von Rîne si durch Hessen mit ir helden riten
gegen Sahsen lande. Dâ war sît gestriten.
Mit roube und ouch mit brande wuosten si daz lant,
daz ez den fürsten beiden wart mit arbeit bekant.

175

Si kômen ûf die marke. Die knehte zogten dan.
Sîvrit der vil starke vrâgen des began:
„Wer sol des gesindes uns nû hüeten hie?“
Jâne wart den Sahsen geriten schedelîcher nie.

176

Si spâchen: „Lât die tumben hüeten ûf den wegen
den küenen Dancwarten. Der ist ein sneller degen.
Wir verliesen deste minre von Liudegêres man.
Lât in und Ortwînen hie die nâchhuote hân!“

177

„Sô wil ich selbe rîten“, sprach Sîvrit der degen,
„und wil der warte gegen den vîanden pflegen,
unz ich rehte ervinde, wâ die recken sint.“
Dô wart gewâfent schiere der schœnen Sigelinden kint.

178

Daz volc bevalch er Hagenen, dô er wolde dan,
und Gêrnôte, dem vil küenen man.
Dô reit er eine dannen in der Sahsen lant.
Des wart von im verhouwen des tages manec helmbant.

179

Dô sach er her daz grôze, daz ûf dem velde lac,
daz wider sîner helfe mit unfuoge wac.
Des was wol vierzec tûsent oder dannoch baz.
Sîvrit in hôhem muote sach vil vrœlîche daz.

180

Dô hete ouch sich ein recke gein den vîanden dar
erhaben ûf die warte, der was ze vlîze gar.
Den sach der hêrre Sîvrit, und in der küene man.
Ieweder dô des andern mit nîde hüeten began.

181

Ich sag iu, wer der wære, der der warte pflac:
ein liehter schilt von golde im vor der hende lac.
Ez was der künec Liudegast, der huote sîner schar.
Dirre gast vil edele sprancte vil hêrlîchen dar.

182

Nû hete ouch in hêr Liudegast vîentlîch erkorn.
Ir ross si nâmen beide zen sîten mit den sporn.
Si neigten ûf die schilde die schefte mit ir kraft.
Des wart der künec rîche mit grôzen sorgen behaft.

183

Diu ross nâch stiche truogen diu rîchen küneges kint
beide für ein ander, sam si wæte ein wint.
Mit zoumen wart gewendet vil ritterlîche dan.
Mit swerten ez versuochten die zwêne grimmige man.

184

Dô sluoc der hêrre Sîvrit, daz al daz velt erdôz.
Dô stoup ûz dem helme sam von brenden grôz
die fiuwer rôten vanken von des heldes hant.
Ir ietweder den sînen an dem andern vant.

185

Ouch sluoc im hêr Liudegast vil manegen grimmen slac.
Ir ietweders ellen ûf schilden vaste lac.
Dô heten dar gehüetet wol drîzec sîner man.
Ê daz im die kœmen, den sic doch Sîvrit gewan

186

mit drîen starken wunden, die er dem künege sluoc
durch eine wîze brünne, diu was guot genuoc.
Daz swert an sînen ecken brâhte ûz wunden bluot.
Des muose der künec Liudegast haben trûrigen muot.

187

Er bat sich leben lâzen und bôt im sîniu lant
und sagte im, daz er wære Liudegast genant.
Dô kômen sîne recken. Die heten wol gesehen.
waz dâ von in beiden ûf der warte was geschehen.

188

Er wolde in füeren dannen. Dô wart er an gerant
von drîzec sînen mannen. Dô werte des heldes hant
sînen rîchen gîsel mit ungefüegen slegen.
Sît tet schaden mêre der vil zierlîche degen.

189

Die drîzec er ze tôde vil werlîche sluoc.
Er liez ir leben einen. Balde er reit genuoc
und sagte hin diu mære, waz hie was geschehen.
Ouch mohte mans die wârheit an sînem rôten helme sehen.

190

Den von Tenemarke was vil grimme leit,
ir hêrre was gevangen. Dô in daz wart geseit,
man sagte ez sînem bruoder. Toben er began
von ungefüegem zorne, wand im was leide getân.

191

Liudegast der recke was gefüeret dan
von Sîvrides gewalte zuo Gunthêres man.
Er bevalch in Hagenen. Dô in daz wart geseit,
daz ez der künec wære, dô was in mæzlîche leit.

192

Man hiez den Burgonden ir vanen binden an.
„Wol ûf!“ sprach Sîvrit, „Hie wirt mêr getân,
ê sich der tac verende. Sol ich haben den lîp,
daz müet in Sahsen lande vil manec wætlîchez wîp.

193

Ir helde von dem Rîne, ir sult mîn nemen war.
Ich kan iuch wol geleiten in Liudegêres schar.
Sô seht ir helme houwen von guoter helde hant.
Ê daz wir wider wenden, in wirdet sorge bekant.“

194

Zen rossen gâhte Gêrnôt und sîne man.
Den vanen zucte balde der starke spileman,
Volkêr der hêrre. Dô reit er vor der schar.
Dô was ouch daz gesinde ze strîte hêrlîchen gar.

195

Si fuorten doch niht mêre niuwan tûsent man,
dar über zwelf recken. Stieben dô began
die molten von den strâzen. Si riten über lant.
Dâ sach man von in schînen vil manegen hêrlîchen rant.

196

Dô wâren ouch die Sahsen mit ir scharn komen,
mit swerten wol gewahsen, daz hân ich sît vernomen.
Diu swert, diu sniten sêre den helden an der hant.
Dô wolden si den gesten weren bürge und lant.

197

Der hêrren scharmeister daz volc dô fuorte dan.
Dô was ouch komen Sîvrit mit den sînen man,
die er mit im brâhte ûzer Niderlant.
Des tages war in sturme vil manec bluotigiu hant.

198

Sindolt und Hûnolt und ouch Gêrnôt,
die sluogen in dem strîte vil manegen helt tôt,
ê si daz rehte erfunden, wie küene was ir lîp.
Daz muose sît beweinen vil manec edel wîp.

199

Volkêr und Hagene und ouch Ortwîn,
die laschten ime strîte vil maneges helmes schîn
mit vliezendem bluote, die sturmküene man.
Dâ wart von Dancwarte vil michel wunder getân.

200

Die von Tenemarke versuochten wol ir hant.
Dô hôrte man von hurte erdiezen manegen rant
und ouch von scharpfen swerten, der man dâ vil gesluoc.
Die strîtküenen Sahsen tâten schaden dâ genuoc.

201

Dô die von Burgonden drungen in den strît,
von in wart erhouwen vil manec wunde wît.
Dô sach man über setele vliezen daz bluot.
Sus wurben nâch den êren die ritter küene unde guot.

202

Man hôrte dâ lûte erhellen den helden an der hant
diu vil scharpfen wâfen, dô die von Niderlant
drungen nâch ir hêrren in die herten schar.
Si kômen degenlîche mit samt Sîvride dar.

203

Volgen der von Rîne niemen man im sach.
Man mohte kiesen vliezen den bluotigen bach
durch die liehten helme von Sîvrides hant,
unz er Liudergêren vor sînen hergesellen vant.

204

Drî widerkêre hete er nû genomen
durch daz her anz ende. Nû was Hagene komen,
der half im wol ervollen in sturme sînen muot.
Des tage muose ersterben vor in manec ritter guot.

205

Dô der starke Liudegêr Sîvriden vant,
und daz er alsô hôhe truoc an sîner hant
den guoten Balmungen und ir sô manegen sluoc,
des wart der hêrre zornec und grimmic genuoc.

206

Dô wart ein michel dringen und grôzer swerte klanc,
dâ ir ingesinde zuo zein ander dranc.
Dô versuochten sich die recken beide deste baz.
Die schar begunden wîchen. Sich huop dâ grœzlîcher haz.

207

Dem vogte von den Sahsen was daz wol geseit,
sîn bruoder was gevangen. Das was im harte leit.
Wol wesser, daz ez tæte daz Sigelinde kint.
Man zêch ez Gêrnôte. Vil wol ervant erz sint.

208

Die slege Liudegêres, die wâren alsô starc,
daz Sîvride under satele strûchte daz marc.
Dô sich daz ross erholte, der küene Sîvrit,
der gewan in dem sturme einen vreislîchen sit.

209

Des half um wol Hagene und ouch Gêrnôt,
Dancwart und Volkêr. Des lac ir vil dâ tôt.
Sindolt und Hûnolt und Ortwîn der degen,
die kunden in dem strîte zem tôde manegen nider legen.

210

In sturme ungescheiden wâren die fürsten hêr.
Dô sach man über helme vliegen manegen gêr
durch die liehten schilde von der helde hant.
Man sach dâ var nâch bluote vil manegen hêrlîchen rant.

211

In dem starken sturme erbeizte manec man
nider von den rossen. Ein ander liefen an
Sîvrit der vil küene und ouch Liudegêr.
Man sach dâ schefte vliegen und manegen scharpfen gêr.

212

Dô vlouc daz schiltgespenge von Sîvrides hant.
Den sich gedâhte erwerben der helt von Niderlant
an den küenen Sahsen, der man vil wunder sach.
Hey, waz dâ liehter ringe der küene Dancwart zerbrach!

213

Dô hete der hêrre Liudegêr ûf einem schilde erkant
gemâlet eine krône vor Sîvrides hant.
Wol wesse er, daz ez wære der kreftige man.
Der helt zuo sînen vriunden dô lûte rüefen began:

214

„Geloubet iuch des sturmes, alle mîne man!
Sun den Sigemundes ich hie gesehen hân.
Sîvriden den starken hân ich hie bekant.
In hât der übele tiuvel her zen Sahsen gesant.“

215

Die vanen hiez er lâzen in dem sturme nider.
Vrides er dô gerte. Des werte man in sider,
doch muose er werden gîsel in Gunthêres lant.
Daz hete an im betwungen des küenen Sîvrides hant.

216

Mit gemeinem râte sô liezen si den strît.
Dürkel vil der helme und ouch der schilde wît.
si leiten von den handen. Swaz sô man der vant,
die truogen bluotes varwe von der Burgonden hant.

217

Sie viengen swen si wolden, des heten si gewalt.
Gêrnôt und Hagene, die recken vil balt,
die wunden hiezen bâren. Si fuorten mit in dan
gevangen zuo dem Rîne fünf hundert werlîcher man.

218

Die sigelôsen recken ze Tenemarke riten.
Dône heten ouch die Sahsen sô hôhe niht gestriten,
daz man in lobes jæhe. Daz was den helden leit.
Dô wurden ouch die veigen von vriunden sêre gekleit.

219

Sie hiezen daz gewæfen wider soumen an den Rîn.
Ez hete wol geworben mit den helden sîn
Sîvrit der recke. Der hete ez guot getân,
des im jehen muosen alle Gunthêres man.

220

Gegen Wormez sande der hêrre Gêrnôt.
Heim zuo sînem lande den vriunden er enbôt,
wie gelungen wære im und sînen man.
Ez heten die vil küenen wol nâch êren getân.

221

Die garzûne liefen. Von den wart ez geseit.
Dâ vröuten sich vor liebe, die ê dâ heten leit,
dirre lieben mære, die in dâ wâren komen.
Dâ wart von edelen vrouwen michel vrâgen vernomen,

222

wie gelungen wære des rîchen küneges man.
Man hiez der boten einen für Kriemhilde gân.
Daz geschach vil tougen. Jâne torste si über lût,
wan si hete dar under ir vil liebez herzen trût.

223

Dô sie den boten komende zir kemenâten sach.
Kriemhilt die schœne vil güetlîchen sprach:
„Nû sag an liebiu mære! Jâ gip ich dir mîn golt!
Tuost dûz âne liegen, ich wil dir immer wesen holt.

224

Wie schiet ûz dem strîte mî bruoder Gêrnôt
und ander mîne vriunden? Ist uns iht maneger tôt?
Oder wer tet dâ daz beste? Daz solt dû mir sagen.“
Dô sprach der bote schiere: „Wir heten niender keinen zagen.

225

Ze ernste und ze strîte reit niemen alsô wol,
vil edeliu küneginne, sît ichz iu sagen sol,
sô der gast vil edele ûzer Niderlant.
Dâ worhte michel wunder des küenen Sîvrides hant.

226

Swaz die recken alle in strîte hânt getân,
Dancwart und Hagene und ander sküneges man,
swaz si striten nâch êren, daz is gar ein wint
unz eine an Sîvriden, des künec Sigemundes kint.

227

Si vrumten in dem sturme der helde vil erslagen,
doch möhte iu daz wunder niemen wol gesagen,
waz dâ worhte Sîvrit. Swenne er ze strîte reit,
den vrouwen an ir mâgen tet er diu grœzlîchen leit.

228

Ouch muoste dâ belîben maneger vrouwen trût.
Sîne slege man hôrte ûf helmen alsô lût,
daz si von wunden brâhten daz vliezende bluot.
Er ist an allen tugenden ein ritter küen unde guot.

229

Swaz dâ hât begangen von Metzen Ortwîn!
Swaz er ir mohte erlangen mit dem swerte sîn,
die muosen wunt belîben oder meistec tôt.
Dâ tet iuwer bruoder die aller grœzisten nôt,

230

diu immer in den stürmen kunde sîn geschehen.
Man muoz der wârheite den ûz erwelten jehen:
die stolzen Burgonden habent sô gevarn,
daz si vor allen schanden ir êre kunnen wol bewarn.

231

Man sach dâ vor ir handen vil manegen satel blôz,
dâ von liehten swerten daz velt sô lûte erdôz.
Die recken von dem Rîne, die habent sô geriten,
daz ez ir vîanden wære bezzer vermiten.

232

Die küenen Tronegære, die vrumten grôziu leit,
dô mit volkes kreften daz her ze samne reit.
Dâ vrumte manegen tôten des küenen Hagenen hant.
Des vil ze sagene wære her ze Burgonden lant.

233

Sindolt und Hûnolt, die Gêrnôtes man,
und Rûmolt der küene, die hânt sô vil getân.
daz ez Liudegêre mac immer wesen leit,
daz er den dînen mâgen ze Rîne hete widerseit.

234

Strît den aller hœhsten, der iender dâ geschach,
ze jungest und zem êrsten, den ieman gesach,
den tet vil willeclîche diu Sîvrides hant.
Er bringet rîche gîsel in daz Gunthêres lant.

235

Die twanc mit sînen ellen der wætlîche man,
des ouch der künec Liudegast muoz den schaden hân,
und ouch von Sahsen lande sîn bruoder Liudegêr.
Nû hœret mîniu mære, edeliu küneginne hêr.

236

Si hât gevangen beide diu Sîvrides hant.
Nie sô manegen gîsel man brâhte in ditze lant,
sô von sîn schulden nû kumt an den Rîn.“
Ir kunden disiu mære nimmêr liebe sîn.

237

„Man bringet der gesunden fünf hundert oder baz,
und der verchwunden, vrouwe, wizzet daz,
wol ahzec rôte bâre her in unser lant.
Die meistec hât verhouwen des starken Sîvrides hant.

238

Die durch übermüeten widersagten an den Rîn,
die müezen nû gevangen die Gunthêres sîn.
Die bringet man mit vröuden her in ditze lant.“
Dô erblüete ir liehtiu varwe, dô si diu mære rehte ervant.

239

Ir schœnez antlüze, daz wart rôsen rôt,
dô mit liebe was gescheiden ûz der grôzen nôt
der wætlîche recke, Sîvrit, der junge man.
Si vröute ouch sich ir vriunde. Daz was von schulden getân.

240

Dô sprach diu minneclîche: „Dû hâst mir wol geseit.
Dû solt haben dar umbe ze miete rîchiu kleit
und zehen marc von golde. Die heiz ich dir tragen.“
Des mac man sölchiu mære rîchen vrouwen gerne sagen.

241

Man gap im sîne miete, daz golt und ouch diu kleit.
Dô gie an diu venster vil manec schœniu meit.
Si warten ûf die strâzen. Rîten man dô vant
vil der hôchgemuoten in der Burgonden lant.

242

Dâ kômen die gesunden, die wunden tâten sam.
Si mohten grüezen hœren von vriunden âne scham.
Der wirt gein sînen gesten vil vrœlîche reit.
Mit vröuden was verendet daz sîn vil grœzlîche leit.

243

Dô enpfie er wol die sîne, die vremden tet er sam,
wan dem rîchen künege anders niht gezam
wan danken güetlîche den, die im wâren komen,
daz si den sic nâch êren in sturme heten genomen.

244

Gunthêr bat im mære von sînen vriunden sagen,
wer im an der reise ze tôde wære erslagen.
Dô hete er verloren niemen niuwan sehzec man.
Verklagen man die muose, sô sî nâch helden was getân.

245

Die gesunden brâhten zerhouwen manegen rant,
von helme vil verschrôten, in Gunthêres lant.
Daz volc erbeizte nidere für des küneges sal
ze liebem antpfange. Man hôrte vrœlîchen schal.

246

Dô hiez man herbergen die recken in die stat.
Der künec sîner geste vil schône pflegen bat.
Er hiez der wunden hüeten, und schaffen guot gemach.
Wol man sîe tugende an sînen vîanden sach.

247

Er sprach ze Liudegaste: „Nû sît mir willekomen!
Ich hân von iuwern schulden vil grôzen schaden genomen.
Der wirt mir nû vergolten, ob ich gelücke hân.
Got lône mînen vriunden, si hânt liebe getân.“

248

„Ir muget in gerne danken“, sprach dô Liudegêr,
„alsô hôher gîsel gewan nie künec mêr.
Umbe schœne huote wir geben michel guot,
daz ir genædeclîche an iuwern vîanden tuot.“

249

„Ich wil iuch beide lâzen“, sprach er, „ledec gân.
Daz mîne vîande hie bî mir bestân,
des wil ich haben bürgen, daz si mîniu lant
iht rûmen âne hulde.“ Des bôt Liudegêr die hant.

250

Man brâhte si ze ruowe und schuof in ir gemach.
Den wunden man gebettet vil güetlîchen sach.
Man schancte den gesunden met und guoten wîn,
dô kunde daz gesinde nimmêr vrœlîcher sîn.

251

Ir zerhouwen schilde behalten man dô truoc.
Vil bluotiger setele, der was dâ genuoc.
Die hiez man verbergen, daz weinten niht diu wîp.
Dâ kom hermüede maneges guoten ritters lîp.

252

Der künec pflac sîner geste vil grœzlîche wol.
Der vremden und der kunden diu lant wâren vol.
Er bat der sêre wunden vil güetlîche pflegen.
Dô was ir übermüeten vil harte ringe gelegen.

253

Die erzenîe kunden, den bôt man rîchen solt,
silber âne wâge, dar zuo daz liehte golt,
daz si die helde nerten nâch der strîtes nôt.
Dar zuo der künec den gesten gâbe grœzlîchen bôt.

254

Die wider heim ze hûse heten reise muot,
die bat man noch belîben, alsô man vriunden tuot.
Der künec dô gie ze râte, wie er lônte sînen man.
Si heten sînen willen nâch grôzen êren getân.

255

Dô sprach der hêrre Gêrnôt: „Man sol si rîten lân.
Über sehs wochen sî in daz kunt getân,
daz si komen widere ze einer hôchgezît.
Sô ist ir maneger geheilet, der nû vil sêre wunder lît.“

256

Dô gerte ouch urloubes Sîvrit von Niderlant.
Dô der künec Gunthêr den willen sîn ervant,
er bat in minneclîche noch bî im bestân.
Niuwan durch sîne swester schœne, sône wære ez nimmêr getân.

257

Dar zuo was er ze rîche, daz er iht næme solt.
Er hete daz wol verdienet. Der künec was im holt,
sam wâren sîne mâge, die heten daz gesehen,
waz von sînen kreften in dem strîte was geschehen.

258

Durch der schœnen willen gedâhte er noch bestân,
ob er si gesehen möhte. Sît wart ez getân.
Wol nâch sînem willen wart im diu maget bekant.
Sît reit er vrœlîche in daz Sigemundes lant.

259

Der wirt hiez ze allen zîten ritterschefte pflegen.
Daz tet dô willeclîchen vil manec junger degen.
Die wîle hiez er sidelen vor Wormez ûf den sant
den, die im komen solden zuo der Burgonden lant.

260

In den selben zîten, dô si nû solden komen,
dô hete diu schœne Kriemhilt diu mære wol vernomen,
er wolde hôchgezîte durch liebe vriunde hân.
Dô wart vil michel vlîzen von schœnen vrouwen getân

261

mit wæte und mit gebende, daz si dâ solden tragen.
Uote diu vil rîche diu mære hôrte sagen
von den stolzen recken, die dâ solden komen.
Dô wart ûz der valde vil rîcher kleider genomen.

262

Durch ir kinde liebe hiez si bereiten kleit.
Dâ mite wart gezieret vil manec vrouwe und manec meit,
und vil der junge recken ûz Burgonden lant.
Ouch hiez si vil den vremden prüeven hêrlîch gewant.

wie Sîvrit Kriemhilt êrste gesach
{ 5 }
Wie Siegfried Griemhild zuerst sah.

263

Man sach si tegelîchen nû rîten an den Rîn,
die zer hôchgezîte gerne wolden sîn.
Die durch des küneges liebe kômen in daz lant,
den bôt man sümelîchen ross und hêrlîch gewant.

264

In was ir gesidele allen wol bereit,
den hœhsten und den besten, als uns daz ist geseit,
zwein und drîzec fürsten, dâ zer hôchgezît.
Dâ zierten sich engegene die schœnen vrouwen wider strît.

265

Ez was dâ vil unmüezec Gîselhêr daz kint.
Die geste mit den kunden, vil güetelîch sint
die enpfienc er und Gêrnôt, und ouch ir beider man.
Jâ gruozten sie die degene, als ez nâch êren was getân.

266

Vil golt rôter setele si fuorten in daz lant.
Zierlîche schilde und hêrlîch gewant
brâhten si ze Rîne zuo der hôchgezît.
Manegen ungesunden sach man vrœlîchen sît.

267

Die in den betten lâgen und heten wunden nôt,
die muosen des vergezzen, wie herte was der tôt.
Die siechen ungesunden muosen si verklagen.
Si vröuten sich der mære gein der hôchgezîte tagen,

268

wie si leben wolden dâ zer wirtschaft.
Wunne âne mâze mit vröuden überkraft
heten al die liute, swaz man ir dâ vant.
Des huop sich michel vröude über al daz Gunthêres lant.

269

An einem pfingxtmorgen sach man füre gân
gekleidet wunneclîche vil manegen küenen man,
fünf tûsent oder mêre, dâ zer hôchgezît.
Sich huop diu kurzewîle an manegem ende wider strît.

270

Der wirt der hete die sinne, im was daz wol erkant,
wie rehte herzenlîche der helt von Niderlant
sîne swestern trûte, swie er si niene gesach,
der man sô grôzer schœne vor all juncvrouwen jach.

271

Dô sprach zuo dem künege der degen Ortwîn:
„Welt ir mit vollen êren zer hôchgezîte sîn,
sô sult ir lâzen schouwen diu wunneclîchen kint,
die mit sô grôzen êren hie zen Burgonden sint.

272

Waz wære mannes wunne, des vröute sich sîn lîp,
ez entæten schœne megede und hêrlîchiu wîp?
Lâzet iuwer swester für iuwere geste gân!“
Der rât, der was ze liebe manegem helde getân.

273

„Des wil ich gerne volgen“, sprach der künec dô.
Alle, die ez erfunden, die wârens harte vrô.
Er enbôt ez vrowen Uoten und ir tohter wolgetân,
daz si mit ir megeden hin ze hove solden gân.

274

Dô wart ûz den schrînen gesuochet guot gewant.
Swaz man in der valde der edelen wæte vant,
die bouge mit den porten, des was in vil bereit.
Sich zierte vlîzeclîche vil manec wætlîchiu meit.

275

Vil manec recke tumber des tages hete muot,
daz er an ze sehene den vrouwen wære guot,
daz er dâ für niht næme eins rîchen küneges lant.
Si sâhen die vil gerne, die si nie heten bekant.

276

Dô hiez der künec rîche mit sîner swester gân,
die ir dienen solden, wol hundert sîner man,
ir und sîner mâge. Die truogen swert enhant.
Daz was daz hovegesinde von der Burgonden lant.

277

Uoten die vil rîchen, die sach man mir ir komen.
Diu hete schœne vrouwen geselleclîch genomen
wol hundert oder mêre. Die truogen rîchiu kleit.
Ouch gie dâ nâch ir tohter vil manec wætlîchiu meit.

278

Von einer kemenâten sach man si alle gân.
Dô wart vil michel dringen von helden dar getân,
die des gedingen heten, ob kunde daz geschehen,
daz si die maget edele solden vrœlîche sehen.

279

Nû gie diu minneclîche, alsô der morgen rôt
tuot ûz den trüeben wolken. Dâ schiet von maneger nôt,
der si dâ truoc in herzen, und lange hete getân.
Er sach die minneclîchen nû vil hêrlîchen stân.

280

Jâ lûhte ir von ir wæte vil manec edel stein.
Ir rôsen rôtiu varwe vil minneclîchen schein.
Ob iemen wünschen solde, der kunde niht gejehen,
daz er ze dirre werlde hete iht schœners gesehen.

281

Sam der liehte mâne vor den sternen stât,
der schîn sô lûterlîche ab den wolken gât,
dem stuont si nû gelîche vor maneger vrouwen guot.
Des wart dâ wol gehœhet den zieren helden der muot.

282

Die rîchen kamerære sach man vor ir gân.
Die hôchgemuoten degene, diene wolden daz niht lân,
sine drungen, dâ si sâhen die minneclîchen meit.
Sîvride dem hêrren wart beide liep und leit.

283

Er dâhte in sînem muote: „Wie kunde daz ergân,
daz ich dich minnen solde? Daz ist ein tumber wân.
Sol aber ich dich vremeden, sô wære ich sanfter tôt.“
Er wart von den gedanken vil dicke bleich und rôt.

284

Dô stuont sô minneclîche daz Sigemundes kint,
sam er entworfen wære an ein permint
von guotes meisters listen. Alsô man im jach,
daz man helt deheinen nie sô schœnen gesach.

285

Die mit den vrouwen giengen, die hiezen von den wegen
wîchen allenthalben. Daz leiste manec degen.
Diu hôhe tragenden herzen vröuten manegen lîp.
Man sach in hôhen zûhten manec hêrlîchez wîp.

286

Dô sprach von Burgonden der hêrre Gêrnôt:
„Der iu sînen dienest sô güetlîchen bôt,
Gunthêr, vil lieber bruoder, dem sult ir tuon alsam
vor allen disen recken. Des râtes ich nimmêr mich gescham,

287

ir heizet Sîvride zuo mîner swester kumen.
Daz in diu maget grüeze, des habe wir immer vrumen.
Diu nie gegrüezte recken, diu sol in grüezen pflegen.
Dâ mit wir haben gewunnen den vil zierlîchen degen.“

288

Dô giengens wirtes mâge, dâ man den helt vant.
Si sprâchen zuo dem recken ûzer Niderlant:
„Iu hât der künec erloubet, ir sult ze hove gân.
Sîn swester sol iuch grüezen, daz ist zen êren iu getân.“

289

Der hêrre in sînem muote was des vil gemeit.
Dô truoc er ime herzen liep âne leit,
daz er sehen solde der schœnen Uoten kint.
Mit minneclîchen tugenden si gruozte Sîvride sint.

290

Dô si den hôchgemuoten vor ir stênde sach,
dô erzunde sich sîn varwe. Diu schœne maget sprach:
„Sît willekomen, hêr Sîvrit, ein edel ritter guot!“
Dô wart im von dem gruoze vil wol gehœhet der muot.

291

Er neic ir vlîzeclîche. Bî der hende si in vie.
Wie rehte minneclîche er bî der vrouwen gie!
Mit lieben ougen blicken ein ander sâhen an
der hêrre und ouch diu vrouwe. Daz wart vil tougenlîch getân.

292

Wart iht dâ vriuntlîche getwungen wîziu hant
von herzenlieber minne, daz ist mir niht bekant.
Doch enkan ich niht gelouben, daz es wurde lân.
Si hete im holden willen kunt vil schiere getân

293

Bî der summer zîte und gein des meien tagen
dorfte er in sînem herzen nimmêr mêr getragen
sô vil der hôhen vröude, denn er dâ gewan,
dô im diu gie enhende, die er ze trûte wolde hân.

294

Dô gedâhte manec recke: „Hey, wære mir sam geschehen,
daz ich ir gienge nebene, sam ich in hân gesehen,
oder bî ze ligene! Daz lieze ich âne haz.“
Ez engediente noch nie recke nâch einer küneginne baz.

295

Von swelcher künege lande die geste kômen dar,
die nâmen al gelîche niuwan ir zweier war.
Ir wart erloubet küssen den wætlîchen man.
Im wart in al der werlde nie sô liebe getân.

296

Der künec von Tenemarke, der sprach sâ ze stunt:
„Dises vil hôhen gruozes lît maneger ungesunt,
des ich vil wol enpfinde, von Sîvrides hant.
Got enlâz in nimmêr mêre kommen in mîniu küneges lant!“

297

Man hiez dô allenthalben wîchen von den wegen
der schœnen Kriemhilde. Manegen küenen degen
sach man gezogenlîche zer kirchen mit ir gân.
Sît wart von ir gescheiden der vil wætlîche man.

298

Dô gie si zuo dem münster. Ir volgete manec wîp.
Dô was ouch sô gezieret der küneginne lîp,
daz dâ hôher wünsche vil maneger wart verlorn.
Si was dâ ze ougenweide vil manegem recken erkorn.

299

Vil kûme erbeite Sîvrit, daz man dâ gesanc.
Er mohte sînen sælden des immer sagen danc,
daz im diu was sô wæge, die er in herzen truoc.
Ouch was er der schœnen holt von schulden genuoc.

300

Dô si kom ûz dem münster, sam er hete ê getân,
man bat den degen küenen wider zuo zir gân.
Alrêst begunde im danken diu minneclîche meit,
daz er vor manegem helde sô rehte hêrlîchen streit.

301

„Nû lôn iu got, hêr Sîvrit“, sprach daz vil schœne kint,
„daz ir daz habt verdienet, daz iu die recken sint
sô holt mit richten triuwen, als ich si hœre jehen!“
Dô begunde er minneclîche an vroun Kriemhilden sehen.

302

„Ich sol in immer dienen“, alsô sprach der degen,
„und enwil mîn houbet nimmêr ê gelegen,
ich enwerbe nâch ir willen, sol ich mîn leben hân
daz ist nâch iuwern hulden, mîn vrou Kriemhilt, getân.“

303

Inre tagen zwelven der tage al ieslîch
sach man bî dem degene die maget lobelîch,
sô si ze hove solde vor ir vriunden gân.
Der dienst wart dem recken durch grôze liebe getân.

304

Vröude und wunne, vil grœzlîchen schal,
sach man aller tegelîch vor Gunthêres sal,
dar ûz und ouch dar inne, von manegem küenen man.
Ortwîn und Hagene vil grôzer wunder began.

305

Swes iemen pflegen wolde, des wâren si bereit
mit volleclîcher mâze, die helde vil gemeit.
Des wurden von den gesten die recken wol bekant.
Dâ von sô was gezieret allez Gunthêres lant.

306

Die dâ wunde lâgen, die sach man für gân.
Si wolden kurzewîle mit dem gesinde hân,
schirmen mit den schilden und schiezen manegen schaft.
Des hulfen in genuoge. Si heten grœzlîche kraft.

307

In der hôchgezîte, der wirt, der hiez ir pflegen
mit der besten spîse. Er hete sich bewegen
aller slahte schande, die ie künec gewan.
Man sach in vriuntlîche zuo den sînen gesten gân.

308

Er sprach: „Ir guoten recken, ê daz ir scheidet hin,
sô nemt ir mîne gâbe! Alsô stât mîn sin,
daz ichz immer diene, versmâhet iu niht mîn guot.
Daz wil ich mit iu teilen, des hân ich willigen muot.“

309

Die von Tenemarke, die sprâchen sâ zehant:
„Ê daz wir wider rîten, heim in unser lant,
wir gern stæter suone. Des ist uns recken nôt.
Wir hân von iuwern degenen manegen lieben vriunt tôt.“

310

Liudegast geheilet sîner wunden was.
Der vogt von den Sahsen nâch strîte wol genas.
Etelîche tôten si liezen dar enlant.
Dô gie der künec Gunthêr, dâ er Sîvriden vant.

311

Er sprach zuo dem recken: „Nû râtet, wie ich tuo.
Die unsern widerwinnen, die wellent rîten vruo
und gerent stæter suone an mich und mîne man.
Nû râtâ degen Sîvrit, waz dich des dunke guot getân!

312

Waz mir die hêrren bieten, daz wil ich dir sagen:
swaz fünf hunder mœre goldes möhten getragen,
daz gæben si mir gerne, wolde ich si ledec lân.“
Dô sprach der starke Sîvrit: „Daz wære vil übele getân.

313

Ir sult si ledeclîchen hinnen lâzen varn,
und daz die recken edele mêre wol bewarn
vîentlîchez rîten her in iuwer lant,
des lât iu geben sicherheit hie der beider hêrren hant.“

314

„Des râtes wil ich volgen.“ Dâ mit si giengen dan.
Den sînen vîanden wart daz kunt getân,
ir goldes gerte niemen, daz si dâ buten ê.
Dâ heime ir lieben vriunden was nâch den hermüeden wê.

315

Manege schilde volle man dar schatzes truoc.
Er teilte es âne wâge den vriunden sîn genuoc,
bî fünf hundert marken und etslîchen baz.
Gêrnôt der vil küene, der riet Gunthêre daz.

316

Urloup si alle nâmen, alsô si wolden dan.
Dô sach man die geste für Kriemhilde gân,
und ouch dâ vrouwe Uote, diu küneginne, saz.
Ez enwart nie degene noch mêre geurloubet baz.

317

Die herberge wurden lære, dô si von dannen riten.
Noch bestuont dâ heime mit hêrlîchen siten
der künec mit sînen mâgen, vil manec edel man.
Die sach man tegelîche zuo vrouwen Kriemhilde gân.

318

Urloup dô nemen wolde Sîvrit, der helt guot.
Er trûwete niht erwerben, des er dâ hete muot.
Der künec daz sagen hôrte, daz er wolde dan.
Gîselhêr der junge in von der reise gar gewan.

319

„War woldet ir nû rîten, vil edel Sîvrit?
Belîbet bî den recken (tuot, des ich iuch bit),
bî Gunthêre dem künege und ouch bî sînen man!
Hie ist vil schœner vrouwen, die sol man iuch gerne sehen lân.“

320

Dô sprach der starke Sîvrit: „Diu ross, diu lâzet stân!
Ich wolde hinne rîten, des wil ich ab gân.
Und traget ouch hin die schilde. Jâ wolde ich in mîn lant!
Des hât mich hêr Gîselhêr mit grôzen triuwen erwant.“

321

Sus beleip der küene durch vriunde liebe dâ.
Jâ wære er in den landen niender anderswâ
gewesen alsô sanfte. Dâ von daz geschach,
daz er nû tegelîche die schœnen Kriemhilden sach.

322

Durch ir unmâzen schœne der hêrre dâ beleip.
Mit maneger kurzewîle man nû die zît vertreip,
wan daz in twanc ir minne. Diu gap im dicke nôt.
Dar umbe sît der küene lac vil jæmerlîche tôt.

323

Iteniuwe mære sich huoben über Rîn.
Man sagte, daz dâ wære manec schœne magedîn.
Der gedâhte im eine erwerben Gunthêr, der künec guot.
Dâ von begunde dem recken vil sêre hôhen der muot.

wie Gunthêr gên Islande nâch Prünhilt vuor
{ 6 }
Wie Gunther nach Isenland fuhr, um Brunhild zu gewinnen.

324

Ez was ein küneginne gesezzen über sê,
ir gelîche enheine man wesse niender mê,
diu was unmâzen schœne. Vil michel was ir kraft.
Sie schôz mit snellen degenen umb minne den schaft.

325

Den stein, den warf si verre, dar nâch si wîten spranc.
swer ir minne gerte, der muose âne wanc
driu spil an gewinnen der vrouwen wol geborn.
Gebrast im an dem einem, er hete daz houbet sîn verlorn.

326

Des hete diu juncvrouwe unmâzen vil getân.
Daz gehôrte bî dem Rîne ein ritter wolgetân,
der wante sîne sinne an daz schœne wîp.
Dar umbe muosen helde sît verliesen den lîp

327

Dô sprach der vogt von Rîne: „Ich wil nider an den sê,
hin ze Prünhilde, swie ez mir ergê.
Ich wil durch ir minne wâgen mînen lîp.
Den wil ich verliesen, sine werde mîn wîp.“

328

„Daz wil ich widerrâten“, sprach dô Sîvrit.
„Jâ hât diu küneginne sô vreislîche sit,
swet umb ir minne wirbet, daz ez im hôhe stât.
Des muget ir der reise haben wærlîchen rât!“

329

„Sô wil ich iu daz râten“, sprach dô Hagene,
„ir bittet Sîvride mit iu ze tragene
die vil starken swære. Daz ist nû mîn rât,
sît im daz ist sô kündec, wie ez umbe Prünhilde stât.“

330

Er sprach: „Wil dû mir helfen, edel Sîvrit,
werben die minneclîchen? Tuostû, des ich dich bit,
Und wirt mir zeime trûte daz minneclîche wîp,
ich wil durch dînen willen wâgen êre und lîp!“

331

Des anwurte Sîvrit, der Sigemundes sun:
„Gîstû mir dîne swester, sô wil ich ez tuon,
die schœnen Kriemhilde, ein kûneginne hêr.
Sô ger ich deheines lônes nâch mînen arbeiten mêr.“

332

„Daz lob ich“, sprach dô Gunthêr, „Sîvrit, an dîne hant.
und kumt diu schœne Prünhilt her in ditze lant,
sô wil ich dir ze wîbe mîne swester geben.
Sô mahtû mit der schœnen immer vrœlîche leben.“

333

Des swuoren si dô eide, die recken vil hêr.
Des wart ir arbeiten verre deste mêr,
ê daz si die vrouwen brâhten an den Rîn.
Des muosen die vil küenen sît in grôzen sorgen sîn.

334

Sîvrit, der muose füeren die kappen mit im dan,
die der helt vil küene mit sorgen gewan
ab einem getwerge, daz hiez Albrîch.
Sich bereiten zuo der verte die recken küen und rîch.

335

Alsô der starke Sîvrit die tarnkappen truoc,
sô hete er dar inne krefte genuoc:
wol zwelf manne sterke zuo sîn selbes lîp.
Er warp mit grôzen listen daz vil hêrlîche wip.

336

Ouch was diu selbe tarnhût alsô getân,
daz dar inne worhte ein ieslîcher man,
swaz er selbe wolde, daz in doch niemen sach.
Sus gewan er Prünhilde. Dâ von im leide geschach.

337

„Nû sag mir, degen Sîvrit, ê daz mî vart ergê,
daz wir mit vollen êren komen an den sê,
sulen wir iht recken füeren in Prünhilde lant?
Drîzec tûsent degene, die werdent schiere besant.“

338

„Swie vil wir volkes füeren“, sprach aber Sîvrit,
„ez pfliget diu küneginne sô vreislîcher sit,
die müesen doch ersterben von ir übermuot.
Ich sol iuch baz bewîsen, degen küene und guot.

339

Wir suln in recken wîse ze tal varn den Rîn.
Die wil ich dir benennen, die daz sulen sîn:
selbe vierde degene varn wir an den sê.
Sô erwerben wir die vrouwen, swie ez uns dar nâch ergê.

340

Der gesellen bin ich einer, daz ander soltû wesen.
Der dritte, daz sî Hagene. Wir mugen wol genesen.
Der vierde, daz sî Dancwart, der vil küene man.
Uns endurfen ander tûsent mit strîte nimmêr bestân.“

341

„Diu mære wesse ich gerne“, sprach der künec dô,
„ê daz wir hinnen füeren, des wære ich harte vrô,
waz wir kleider solden vor Prünhilde tragen,
diu uns dâ wol gezæmen. Daz sult ihr Gunthêre sagen.“

342

„Wât die aller besten, die ieman bevant,
die treit man zallen zîten in Prünhilde lant.
Des sulen wir rîchiu kleider vor der vrouwen tragen,
daz wirs iht haben schande, sô man diu mære hœre sagen.“

343

Dô sprach der degen guoter: „Sô wil ich selbe gân
zuo mîner lieben muoter, ob ich erbitten kan,
daz uns ir schœnen meide helfen prüeven kleit,
diu wir tragen mit êren für die hêrlîchen meit.“

344

Dô sprach von Tronege Hagene mit hêrlîchen siten:
„Waz welt ir iuwer muoter sölcher dienste bitten?
Lât iuwer swester hœren, wes ir habet muot,
sô wirdet iu ir dienest zuo dirre hovereise guot.“

345

Dô enbôt er sîner swester, daz er si wolde sehen,
und ouch der degen Sîvrit. Ê daz was geschehen,
dô hete sich diu schœne ze wunsche wol gekleit.
Daz komen der vil küenen, daz was ir mæzlîche leit.

346

Nû was ouch ir gesinde gezieret, als im zam.
Die fürsten kômen beide. Dô si daz vernam,
dô stuont si von dem sedele. Mit zühten si dô gie,
dâ si den gast vil edele und ouch ir bruoder enpfie.

347

„Willekomen sî mîn bruoder und der geselle sîn!
Diu mære ich wiste gerne“, sô sprach daz magedîn,
„waz ir hêrren woldet, sît ir ze hove gât.
Daz lâzet ir mich hœren, wie ez iu edelen recken stât.“

348

Dô sprach der künec Gunthêr: „Vrouwe, ich wilz iu sagen:
wir müezen michel sorgen bî hôhem muote tragen.
Wir wellen höveschen rîten verre in vremdiu lant.
wir solden zuo der reise haben zierlîch gewant.“

349

„Nû sitzet, lieber bruoder“, sprach daz küneges kint,
„und lât mich rehte hœren, wer die vrouwen sint,
der ir dâ gert mit minnen in ander künege lant.“
Die ûz erwelten beide nam diu vrouwe bî der hant.

350

Dô gie si mit in beiden, dâ si ê dâ saz,
ûf matratze diu vil rîchen, ich wil wol wizzen daz,
geworht von guoten bilden, mit golde wol erhaben.
Si mohten bî den vrouwen guote kurzewîle haben.

351

Vriuntlîche blicke und güetlîchez sehen,
des mohte dâ in beiden harte vil geschehen.
Er truoc si ime herzen. Si was im sô der lîp.
Sît wart diu schœne Kriemhilt des starken Sîvrides wîp.

352

Dô sprach der künec rîche: „Vil liebiu swester mîn,
âne dîne helfe kunde ez niht gesîn,
wir wellen kurzewîlen in Prünhilde lant.
Dâ bedorften wir ze habene vor vrouwen hêrlîch gewant.“

353

Dô sprach diu juncvrouwe: „Vil lieber bruoder mîn,
swaz der mînen helfe dar an kan gesîn,
des bring ich iuch wol innen, daz ich iu bin bereit.
Versagte iu ander iemen, daz wære Kriemhilde leit.

354

Ir sult mich, ritter edele, niht sorgende bitten.
Ir sult mir gebieten mit hêrlîchen siten.
Swaz iu von mir gevalle, des bin ich iu bereit
und tuon ez willeclîche“, sprach diu wunneclîche meit.

355

„Wir wellen, liebiu swester, tragen guot gewant.
Daz sol helfen prüeven iuwer edeliu hant.
Des volziehen iuwer megede, daz ez uns rehte stât,
wand wir der verte hân deheiner slahte rât.“

356

Dô sprach diu juncvrouwe: „Nû merket, waz ich sage:
Ich hân selbe sîden. Nû schaffet, daz man trage
gesteine uns ûf den schilden, sô würken wir diu kleit.“
Des willen was dô Gunthêr und ouch Sîvrit bereit.

357

„Wer sint die gesellen, sprach diu künegîn,
die mit iu gekleidet ze hove sulen sîn?“
Er sprach: „Ich selbe vierde. Zwêne mîne man,
Dancwart und Hagene, suln ze hove mit mir gân.

358

Ir sult vil rehte merken, waz ich iu, vrouwe, sage:
daz ich selbe vierde ze vier tagen trage
ie drîer hande kleider und alsô guot gewant,
daz wir âne schande rûmen Prünhilde lant.“

359

Mit guotem urloube die hêrren schieden dan.
Dô hiez ir juncvrouwen drîzec meide gân
ûz ir kemenâten Kriemhilt diu künegîn,
die zuo sölchem werke heten grœzlîchen sin.

360

Die arâbischen sîden, wîz alsô der snê,
und von Zazamanc der guoten, grüen alsam der klê,
dar în si leiten steine. Des wurden guotiu kleit.
Selbe sneit si Kriemhilt, diu vil hêrlîche meit.

361

Von vremder vische hiuten bezoc, wol getân
ze sehene vremden liuten, swaz man der gewan,
die dacten si mit sîden, sô si si solden tragen.
Nû hœret michel wunder von der liehten wæte sagen:

362

Von Marroc ûz dem lande und ouch von Lybiân
die aller besten sîden, die ie mêr gewan
deheines küneges künne, der heten si genuoc.
Wol lie daz schînen Kriemhilt, daz si in holden willen truoc.

363

Sît si der hôhen verte heten nû gegert,
hermîne vedern, die dûhten si unwert.
Pfellel dar ob lâgen swarz alsam ein kol,
daz noch snellen helden stüende in hôchgezîten wol.

364

Ûz arâbischem golde vil gesteines schein.
Der vrouwen unmuoze, diu newas niht klein.
Inre siben wochen bereiten si diu kleit.
Dô was ouch ir gewæfen den guoten recken bereit.

365

Dô si bereitet wâren, dô was in ûf den Rîn
gemachet vlîzeclîchen ein starkez schiffelîn,
daz si tragen solde vol nider an den sê.
Den edelen juncvrouwen was von arbeiten wê.

366

Dô sagte man den recken, in wæren nû bereit,
diu si dâ füeren solden, ir zierlîchen kleit,
alsô si dâ gerten. Daz was nû getân.
Dône wolden si niht langer bî dem Rîne bestân.

367

Nâch den hergesellen wart ein bote gesant,
ob si wolden schouwen niuwez ir gewant,
ob ez den helden wære ze kurz und ouch ze lanc.
Ez was in rehter mâze. Des sagten si den vrouwen danc.

368

Für alle die si kômen, die muosen in des jehen,
daz si zer werlde heten bezzers niht gesehen.
Des mohten si si gerne dâ ze hove tragen.
Von bezzer recken wæte kunde niemen niht gesagen.

369

Vil grœzlîche danken wart dô niht verdeit.
Dô gerten urloubes die helde vil gemeit.
In ritterlîchen zühten die hêrren tâten daz.
Des wurden liehtiu ougen von weinen trüeb und naz.

370

Si sprach: „Vil lieber bruoder, ir möhtet noch bestân
und würbet ander vrouwen. Daz hieze ich wol getân,
dâ iu sô sêre enwâge stüende niht der lîp.
Ir muget hie nâher vinden ein alsô hôch geborn wîp.“

371

Ich wæn, in sagte ir herze, daz in dâ von geschach.
Si weinten all gelîche, swaz iemen gesprach.
Ir golt in vor den brüsten wart von trehen sal.
Die vielen in genôte von den ougen hin ze tal.

372

Si sprach: „Hêrre Sîvrit, lât iu bevolhen sîn
ûf triuwe und ûf genâde den lieben bruoder mîn,
daz im iht gewerre in Prünhilde lant!“
Daz lobte der vil küene in vroun Kriemhilde hant.

373

Dô sprach der degen rîche: „Ob mir mîn leben bestât,
sô sult ir aller sorgen, vrouwe, haben rât.
Ich bring in iu gesunden her wider an den Rîn.
Daz wizzet sicherlîchen.“ Im neic daz schœne magedîn.

374

Ir golt varwen schilde man truoc in ûf den sant
und brâhte in zuo zin allez ir gewant.
Ir ross hiez man in ziehen. Si wolden rîten dan.
Dâ wart von schœnen vrouwen vil michel weinen getân.

375

Dô stuonden in den venstern diu minneclîchen kint.
Ir schif mit dem segele, daz ruorte ein hôher wint.
Die stolzen hergesellen, die sâzen ûf den Rîn.
Dô sprach der künec Gunthêr: „Wer sol nû schiffmeister sîn?“

376

„Daz will ich“, sprach Sîvrit, „ich kan iuch ûf der vluot
hinnen wol gefüeren. Daz wizzet, helde guot.
Die rehten wazzerstrâzen, die sint mir wol bekant.“
Si schieden vrœlîchen ûz der Burgonden lant.

377

Sîvrit dô balde eine schalten gewan.
Von stade begunde schieben der kreftige man.
Gunthêr der küene ein ruoder selber nam.
Dô huoben sich von lande die snellen ritter lobesam.

378

Si fuorten rîche spîse, dar zuo vil guoten wîn,
den besten, den man kunde vinden umben Rîn.
Ir ross, diu stuonden schône, si heten guot gemach.
Ir schif, daz gie vil ebene. Vil lützel leides in geschach.

379

Ir vil starken segelseil, diu wurden in gestraht.
Si fuoren zweinzec mîle, ê daz ez wurde naht,
mit einem guotem winde nider gegen dem sê.
Ir starkez arbeiten tet sît den hôchgemuoten wê.

380

An dem zwelften morgen, sô wir hœren sagen,
heten si die winde verre dan getragen
gegen Îsensteine in Prünhilde lant.
Daz was ir deheinem niuwan Sîvride erkant.

381

Dô der künec Gunthêr sô vil der bürge sach,
und ouch die wîten marke, wie balde er dô sprach:
„Sagt mir, vriunt Sîvrit, ist iu daz bekant,
wes sint dise bürge und ouch daz hêrlîche lant?“

382

Des antwurte Sîvrit: „Ez is mir wol bekant.
Ez ist Prünhilde liute und lant,
und Îsenstein diu veste, als ir mich hôrtet jehen.
Dâ muget ir noch hiute vil schœner vrouwen gesehen.

383

Und wil iu helden râten, ir habt einen muot,
ir jeht gelîche, jâ dunket ez mich guot:
swenne wir noch hiute für Prünhilde gân,
sô müezen wir mit sorgen vor der künegînne stân.

384

Sô wir die minneclîchen bî ir gesinde sehen,
sô sult ir, helde mære, wan einer rede jehen:
Gunthêr sî mîn hêrre, und ich sî sîn man.
Des er dâ hât gedingen, daz wirt allez getân.“

385

Des wâren si bereite, swaz er si loben hiez.
Durch ir übermüete ir deheiner ez niht liez.
Si jâhen, swes er wolde. Dâ von in wol geschach,
dô der künec Gunthêr die schœnen Prünhilde sach.

386

„Jâne lobe ichz niht sô verre durch die liebe dîn,
sô durch dîne swester, daz schœne magedeîn!
Diu ist mir sam mîn sêle und sô mîn selbes lîp.
Ich wil daz gerne dienen, daz si werde mîn wîp.“

wie Gunthêr Prünhilde gewan
{ 7 }
Wie Gunther Brunhild gewann.

387

In der selben zîte dô was ir schif gegân
der bürge alsô nâhen. Dô sach der künec stân
oben in den venstern vil manege schœne meit.
Daz er ir niht erkande, daz was Gunthêre leit.

388

Er vragte Sîvride, den gesellen sîn:
„Ist iu daz iht künde umb disiu magedîn,
die dort her nider schouwent gein uns ûf die vluot,
swie ir hêrre heize? Si sint vil hôhe gemuot.“

389

Dô sprach der hêrre Sîvrit: „Nû sult ir tougen spehen
under den juncvrouwen und sult mir danne jehen,
welche ir nemen woldet, hetet irs gewalt.“
„Daz tuon ich“, so sprach Gunthêr, ein ritter küen und balt:

390

„Sô sihe ich ir eine in jenem venster stân
in snêwîzer wæte. Diu ist sô wolgetân,
die welent mîniu ougen durch ir schœnen lîp.
Ob ich gewalt des hete, si müese werden mîn wîp.“

391

„Dir hât erwelt vil rehte dîner ougen schîn.
Ez ist diu edel Prünhilt, daz schœne magedîn,
nâch der dîn herze ringet, der sin und ouch der muot.“
Elliu ir gebærde, diu dûhte Gunthêren guot.

392

Dô hiez diu küneginne ûz den venstern gân
ir hêrlîche megde. Sine solden dâ niht stân
den vremden an ze sehene. Des wâren si bereit.
Waz dô die vrouwen tâten, daz ist uns sider ouch geseit.

393

Gegen den unkunden strichen si ir lîp,
des ie site heten diu wætlîchen wîp.
An diu engen venster kômen si gegân,
dâ si die helde sâhen. Daz wart durch schouwen getân.

394

Ir wâren niuwan viere, die kômen in daz lant.
Sîvrit der küene ein ross zôch ûf den sant.
Dâ sâhen durch venster diu wætlîchen wîp.
Des dûhte sich getiuwert des künec Gunthêres lîp.

395

Er habte im dâ bî zoume daz zierlîche marc
guot und schœne, vil michel und vil starc,
unz der künec Gunthêr in den satel gesaz.
Alsô diente im Sîvrit, des er doch sît vil gar vergaz.

396

Dô zôch er ouch daz sîne von dem schiffe dan.
Er hete sölchen dienest vil selten ê getân,
daz er bî stegereife gestüende helde mêr.
Daz sâhen durch diu venster die vrouwen schœn und hêr.

397

Reht in einer mâze, den helden vil gemeit
von snê blanker varwe ir ross und ouch ir kleit
wâren vil gelîche. Ir schilde wol getân,
die lûhten von den handen den vil wætlîchen man.

398

Ir setel wol gesteinet, ir fürbüege smal,
si riten hêrlîche für Prünhilde sal.
Dar an hiengen schellen von liehtem golde rôt.
Si kômen zuo dem lande, als ez ir ellen gebôt,

399

mit spern niuwe sliffen, mit swerten wol getân,
diu ûf die sporn giengen den wætlîchen man.
Die fuorten die vil küenen, scharpf und breit.
Daz sach allez Prünhilt, diu vil hêrlîche meit.

400

Mit in kômen dô Dancwart und ouch Hagene.
Wir hœren sagen mære, wie die degene
von raben swarzer varwe truogen rîchiu kleit.
Ir schilde wâren schœne, michel guot und breit.

401

Von Indiâ dem lande man sach si steine tragen.
Die kôs man an ir wæte vil hêrlîche wagen.
Sie liezen âne huote ir schiffel bî der vluot.
Sus riten zuo der bürge die helde küene und guot.

402

Sehs und ahzec türne si sâhen drinne stân,
drî palas wîte, und einen sal wol getân
von edelem marmelsteine, grüene alsam ein gras.
Dar inne selbe Prünhilt mir ir ingesinde was.

403

Diu burc was entslozzen, vil wîte ûf getân.
Dô liefen in engegene die Prünhilde man
und enpfiengen dise geste in ir vrouwen lant.
Ir ross hiez man behalten, und ir schilde von der hant.

404

Dô sprach ein kamerære: „Ir sult uns geben diu swert
und ouch die liehten brünne!“ „Des sît ir ungewert“,
sprach von Tronege Hagene, „wir wellens selbe tragen.“
Dô begunde im Sîvrit dâ von diu rehten mære sagen:

405

„Man pfliget in dirre bürge, daz wil ich iu sagen,
daz neheine geste hie wâfen sulen tragen.
Nû lât si tragen hinnen, daz ist wol getân.“
Des volgete vil ungerne Hagene, Gunthêres man.

406

Man hiez den gesten schenken und schuof in gemach.
Vil manegen snellen recken man dâ ze hove sach
in fürstlîcher wæte allenthalben gân.
Dô wart vil michel schouwen an die küenen getân.

407

Dô wart vrouwen Prünhilde gesaget mit mæren,
daz unkunde recken dâ komen wæren
in hêrlîcher wæte gevlozzen ûf dem vluot.
Dâ von begunde vrâgen diu maget schœne und guot:

408

„Ir sult mich lâzen hœren“, sprach diu künegîn,
„wer die vil unkunden recken mugen sîn,
die in mîner bürge sô hêrlîche stân,
und durch welches liebe die helde her gevarn hân.“

409

Dô sprach ein ir gesinde: „Vrouwe, ich mac wol jehen,
daz ich ir deheinen nie mêr habe gesehen,
wand gelîche Sîvride einer dar under stât.
Den sult ir wol enpfâhen, daz ist mit triuwen mîn rât.

410

Der ander der gesellen, der ist sô lobelîch,
ob er gewalt des hete, wol wære er ein künec rîch
ob wîten fürsten landen, und möhte er diu gehân.
Man siht in bî den andern sô rehte hêrlîche stân.

411

Der dritte der gesellen, der ist sô griulîch,
und doch mit schœnem lîbe, küneginne rîch,
von swinden sînen blicken, der er sô vil getuot.
Er ist in sînen sinnen, ich wæne, grimme gemuot.

412

Der jungeste dar under, der ist sô lobelîch.
Magetlîcher zûhte sihe ich den degen rîch
mit guotem gelæze sô minneclîche stân.
Wir möhtenz alle fürhten, hete im hie iemen ihr getân.

413

Swie blîde er pflege der zühte, und swie schœne sî sîn lîp,
er möhte wol erweinen vil wætlîchiu wîp,
swenne er begunde zürnen. Sîn lîp ist sô gestalt,
er ist in allen tugenden ein degen küene und balt.“

414

Dô sprach diu küneginne: „Nû brinc mir gewant!
Und ist der starke Sîvrit komen in diz lant
durch willen mîner minne, ez gât im an den lîp.
Ich fürhte in niht sô sêre, daz ich werde sîn wîp.“

415

Prünhilt diu schœne wart schiere wol gekleit.
Dô gienc mit ir dannen vil manec schœniu meit,
wol hundert oder mêre. Gezieret was ir lîp.
Ez wolden sehen die geste diu vil wætlîchen wîp.

416

Dâ mit giengen degen dâ ûz Îslant,
die Prünhilde recken. Die truogen swert enhant,
fünf hundert oder mêre. Daz was den gesten leit.
Dô stuonden von dem sedele die helde küene und gemeit.

417

Dô diu küneginne Sivriden sach,
nû muget ir gerne hœren, wie diu maget sprach:
„Sît willekomen, Sîvrit, her in diz lant!
Waz meinet iuwer reise? Gerne hete ich daz bekant.“

418

„Vil michel iuwer genâde, mîn vrou Prünhilt,
daz ir mich geruochet grüezen, fürsten tohter milt,
vor disem edelen recken, der hie vor mir stât,
wand er ist mîn hêrre. Der êren hete ich gerne rât.

419

Er ist geborn von Rîne. Waz sol ich dir sagen mêr?
Durch die dîne liebe sîn wir gevarn her.
Der wil dich gerne minnen, swaz im dâ von geschiht.
Nû bedenk es dich bezîte, mîn hêrre erlâzet dich es niht.

420

Er ist geheizen Gunthêr und ist ein künec hêr.
Erwürbe er dîne minne, er engerte nihtes mêr.
Jâ gebôt mir her ze varne der recke wolgetân!
Möhte ich es im geweigert hân, ich hete ez gerne verlân.“

421

Si sprach: „Ist er dîn hêrre, und bistû sîn man,
diu spil, diu ich im teile, getar er diu bestân,
behabt er des meisterschaft, sô wirde ich sîn wîp.
Und ist daz ich gewinne, ez gât iu allen an den lîp.“

422

Dô sprach von Tronege Hagene: „Vrouwe, lât uns sehen
iuweriu spil diu starken. É daz iu müeste jehen
Gunthêr mîn hêrre, dâ müeste ez herte sîn.
Er trûwet wol erwerben ein alsô schœne magedîn.“

423

„Den stein sol er werfen und springen dar nâch,
den gêre mit mir schiezen. Lât iu sîn niht ze gâch!
Ir muget wol hie verliesen die êre und ouch den lîp.
Des bedenket iuch vil ebene.“ sprach daz minneclîche wîp.

424

Sîvrit der vil küene zuo dem künege trat.
Allen sînen willen er in reden bat
gegen der küneginne. Er solde ân angest sîn:
„Ich sol iuch wol behüeten vor ir mit den listen mîn.“

425

Dô sprach der künec Gunthêr: „Küneginne hêr,
nû teilet, swaz ir gebietet. Und wære es dannoch mêr,
daz bestüende ich allez durch iuwern schœnen lîp.
Mîn houbet wil ich verliesen, ir enwerdet mîn wîp.“

426

Dô diu küneginne sîne rede vernam,
des spils bat si gâhen, als ir dô gezam.
Si hiez ir gewinnen ze strîte guot gewant,
eine brünne rôtes goldes und einen guoten schildes rant.

427

Ein wâfenhemde sîden, daz leite an diu meit,
daz in deheinem strîte wâfen nie versneit,
von pfellel ûzer Lybiâ. Ez was vil wol getân.
Von porten lieht gewürhte sach man schînen dar an.

428

Die zît wart disen recken mit gelpfe vil gedröut.
Dancwart und Hagene, die wâren ungevröut.
Wie ez dem künege ergienge, des sorgete in der muot.
Si dâhten: „Unser reise, diu ist uns recken niht ze guot.“

429

Die wîle was ouch Sîvrit, der wætlîche man,
ê ez iemen erfünde, in daz schif gegân,
dâ er sîne tarnkappen verborgen ligen vant.
Dar in slouf er vil schiere. Dô was er niemen bekant.

430

Er îlte hin widere. Dô vant er recken vil,
dâ diu küneginne teilte ir hôhen spil.
Dar gie er tougenlîche. Von listen daz geschach,
alle die dâ wâren, daz in dâ niemen ensach.

431

Der rinc, der was bezeiget. Daz spil solde geschehen
vor manegem küenen recken, die daz solden sehen.
Mêr danne siben hundert, die sach man wâfen tragen,
swem an dem spil gelünge, daz ez die helde solden sagen.

432

Dô was komen Prünhilt. Gewâfent man die vant,
sam ob si solde strîten umb elliu küneges lant.
Jâ truoc si ob den sîden vil manegen goldes zein.
Ir minneclîche varwe dar under vil hêrlîche schein.

433

Dô kom ir gesinde. Die truogen dar zehant
von al rôtem golde einen schildes rant
mit stahele herte spangen, vil michel und breit,
dar under spilen wolde diu minneclîchiu meit.

434

Der vrouwen schiltvezzel ein edel porte was.
Dar ûfe lâgen steine grüene sam ein gras.
Der lûhte maneger hande mit schîne wider daz golt:
er müeste wesen vil küene, dem diu vrouwe würde holt.

435

Der schilt was under buckeln, als uns daz ist gesaget,
wol drîer spannen dicke. Den solde tragen die maget.
Von stahel und ouch von golde rîch er was genuoc,
den ir kamerære selbe vierde kûme truoc.

436

Alsô der starke Hagene den schilt dar tragen sach,
mit grimmigem muote der helt von Tronege sprach:
„Wâ nû, künec Gunthêr, wie verliese wir den lîp?
Der ir dâ gert ze minnen, diu ist des tiuvels wîp!“

437

Vernemt noch von ir wæte. Der hete si genuoc:
von Azagouc der sîden einen wâfenroc si truoc,
edel und rîche. Ab des varwe schein
von der küneginne vil manec hêrlîcher stein.

438

Dô truoc man der vrouwen, vil swære und grôz,
einen gêr vil scharpfen, den si alle zîte schôz,
starc und ungefüege, michel und breit,
der ze sînen ecken vil harte vreislîchen sneit.

439

Von des gêres swære hœret wunder sagen:
wol vierdehalbiu messe was dar zuo geslagen.
Den truogen kûme drîe Prünhilde man.
Gunthêr der edele vil harte sorgen began.

440

Er dâhte in sînem muote: „Waz sol diz wesen?
Der tiuvel ûz der helle, wie kunde er dâ vor genesen?
Wære ich ze Burgonden mit dem lebene mîn,
si müeste hie lange vrî vor mîner minne sîn.“

441

Dô sprach Hagenen bruoder, der küene Dancwart:
„Mich riuwet inneclîchen disiu hovevart.
Nû hiezen wir ie recken, wie verliese wir den lîp,
suln uns in disen landen nû überwinden diu wîp?

442

Mich müet daz harte sêre, daz ich kom in diz lant.
und hete mîn bruoder Hagene sîn wâfen an der hant,
und ouch ich daz mîne, sô möhten sanfte gân
mir ir übermüete alle Prünhilde man.

443

Daz wizzet sicherlîchen, si soldenz wol bewarn,
und hete ich tûsent eide ze einem vride geswarn,
ê daz ich sterben sæhe den lieben hêrren mîn,
jâ müese den lîp verliesen daz vil schœne magedîn!“

444

„Wir solden ungevangen wol rûmen diz lant“,
sprach dô sîn bruoder Hagene, „und heten wir daz gewant,
des wir ze der nôt bedurfen, und ouch diu swertr vil guot,
sô würde wol gesenftet der starken vrouwen übermuot.“

445

Wol hôrte diu maget edele, daz der degen sprach.
Mit smielendem munde si über ahsel sach:
„Nû er dunke sich sô küene, sô traget in ir gewant.
Ir vil scharpfen wâfen gebet den recken an die hant!“

446

Dô si diu swert gewunnen, alsô diu maget gebôt,
der vil küene Dancwart vor vröuden wart vil rôt.
„Nû spilen, swes si wellen!“ sprach der vil snelle man,
„Gunthêr ist unbetwungen, sît daz wir unsere wâfen hân.“

447

Diu Prünhilde sterke vil grœzlîche schein.
Man truoc ir zuo dem ringe einen swæren stein,
grôz und ungefüege, vil michel und wel.
In truogen kûme zwelve helde küene und snel.

448

Den warf si zallen zîten, dô si den gêr verschôz.
Der Burgondære sorge wurden harte grôz.
„Wâfen“, dô sprach Hagene, „was hât der künec ze trût?
Jâ sol si in der helle sîn des übelen tiuvels brût!“

449

An vil wîzen armen si die ermel want.
Si begunde vazzen den schilt an der hant.
Den gêr si hôch zucte. Dô gienc ez an den strît.
Gunthêr und Sîvrit, die vorhten Prünhilde nît.

450

Und wære im Sîvrit niht ze helfe komen,
sô hete si dem künege sînen lîp benomen.
Er gie dar tougenlîche und ruorte im sîne hant.
Gunthêr sîne liste vil sorclîchen ervant.

451

„Waz hât mich gerüeret?“ dahte der küene man.
Dô sach er allenthalben und vant dâ niemen stân.
Er sprach: „Ich binz, Sîvrit, der liebe vriunt dîn.
Vor der küneginne soltû gar ân angest sîn.

452

Den schilt gip mir von hende und lâze mich den tragen,
und merke rehte, waz dû mich hœres sagen.
Nû habe dû die gebære, diu werc wil ich begân.“
Dô er in rehte erkande, ez was im liebe getân.

453

„Nû hil dû mîne liste, diene soltû niemen sagen.
Sô mac diu küneginne vil lützel iht bejagen
an dir deheines ruomes, des si doch willen hât.
Nû sihtû, wie diu vrouwe vor dir unsorclîchen stât.“

454

Dô schôz vil krefteclîche diu hêrlîchiu meit
ûf einen schilt niuwen, michel und breit,
den truoc an sîner hende daz Sigelinde kint.
Daz fiuwer spranc von stahele, als ez wæte der wint.

455

Des starken gêres snîde al durch den schilt gebrach,
daz man diu fiuwer lougen ûz den ringen sach.
Des schuzzes beide strûchten, die kreftigen man.
Wan diu tarnkappe, si wæren tôte dâ bestân.

456

Sîvride dem vil küenen von munde brast daz bluot.
Vil balde spranc er widere. Dô nam der helt guot
den gêr, den si geschozzen hete dem helde durch den rant.
Den vrumte ir dô hin widere des starken Sîvrides hant.

457

Er dahte: „Ich wil niht schiezen daz schœne magedîn.“
Er kêrte des gêres snîde hinder den rucke sîn.
Mit der gêrstangen er schôz ûf ir gewant,
daz ez erklanc vil lûte von sîner ellenthaften hant.

458

Daz fiuwer stoup ûz ringen, alsam ez tribe der wint.
Den schuz, den schôz mit ellen daz Sigemundes kint.
Sine mohte mir ir kreften des schuzzes niht gestân.
Ez enhete der künec Gunthêr triuwen nimmêr getân.

459

Prünhilt diu schœne, vil balde si ûf gespranc:
„Gunthêr, ritter edele, des schuzzes habe danc!“
Si wânde, er hete ez mit sîner kraft getân.
Ir was dar nâch geslichen ein verre kreftiger man.

460

Dô gie si hin vil balde. Vil zornec was ir muot.
Den stein huop vil hôhe diu edel maget guot.
Si swanc in krefteclîche vil verre von der hant.
Dô spranc si nâch dem wurfe. Jâ erklanc ir allez ir gewant.

461

Der stein, der was gevallen wol zwelf klâfter dan.
Den wurf, den brach mit sprunge diu maget wolgetân.
Dar gie der hêrre Sîvrit, dâ der stein gelac.
Gunthêr in dô wegte, der helt in werfene pflac.

462

Sîvrit, der was küene, vil kreftec und vil lanc.
Den Stein, den warf er verrer, dar zuo er wîter spranc.
Von sînen schœnen listen er hete kreft genuoc,
daz er mit dem sprunge den künec Gunthêre doch truoc.

463

Der sprunc, der was ergangen, der stein der was gelegen.
Dô sach man ander niemen wan Gunthêr den degen.
Prünhilt die schœne, diu wart in zorne rôt.
Sîvrit hete geverret des künec Gunthêres tôt.

464

Zuo zir insgesinde ein teil si lûte sprach,
dô si Gunthêren zent des ringes wol gesunden sach:
„Vil balde kumt her nâher, ir mâge und mîne man.
Ir sult dem künege Gunthêr alle wesen undertân!“

465

Dô leiten die vil küenen diu wâfen von der hant.
Si buten sich ze füezen ûz Burgonden lant
Gunthêr dem rîchen, vil manec küene man.
Si wânden, daz er hete diu spil mit sîner kraft getân.

466

Er gruozte si minneclîche. Jâ was er tugende rîch.
Dô nam in bî der hende diu maget lobelîch.
Si erloubte im, daz er dâ solde haben gewalt.
Des vröute sich dô Hagene, der degen küene und balt.

467

Si bat den ritter edele mit ir dannen gân
in den palas wîten. Alsô daz wart getân,
dô erbôt man ez den recken mit dienste baz.
Dancwart und Hagene, die muosenz lâzen âne haz.

468

Sîvrit der snelle wîse was genuoc.
Sîne tarnkappe er abe behalten truoc.
Dô gie er hine wider, dâ manec vrouwe saz.
Er sprach zuo dem künege, und tet vil wîslîche daz:

469

„Wes beitet ir, mîn hêrre? Wan beginnet ir der spil,
der iu diu küneginne teilet alsô vil?
Und lât uns balde schouwen, wie diu sîn getân!“
Sam ers niht enwesse, gebârte der listege man.

470

Dô sprach diu küneginne: „Wie ist daz geschehen,
daz ir habt, hêr Sîvrit, der spil niht gesehen,
diu hie hât errungen diu Gunthêres hant?“
Des antwurte in Hagene ûzer Burgonden lant.

471

Er sprach: „Dâ het ir uns, vrouwe, betrüebet den muot.
Dô was bî dem schiffe Sîvrit, der helt guot,
dô der vogt von Rîne diu spil iu an gewan.
Des ist ez im unkunde“, sprach der Gunthêres man.

472

„So wol mich dirre mærre“, sprach Sîvrit der degen,
„daz iuwer hôchvart ist alsô hie gelegen,
daz iemen lebet, der iuwer meister müge sîn!
Nû sult ir, maget edele, uns hinnen volgen an den Rîn.“

473

Dô sprach diu wolgetâne: „Des enmac niht ergân.
Ez müezen ê bevinden mâge und mîne man.
Jâne mac ich alsô lîhte gerûmen mîniu lant,
die mîne besten vriunde werden ê besant!“

474

Dô hiez si boten rîten allenthalben dan.
Si besande ir vriunde, mâge und man.
Die bat si ze Îsensteine komen unerwant,
und hiez in allen geben rîch und hêrlîch gewant.

475

Si riten tegelîche spâte und vruo
der Prünhilde bürge scharhaft zuo.
„Jârâ jâ!“ spach Hagene, „Was haben wir getân?
Wir erbeiten hie vil übele der schœnen Prünhilde man,

476

sô si nû mit ir krefte koment in daz lant.
Der küneginne wille ist uns unbekant.
Waz, ob si alsô zürnet, daz wir sîn verlorn?
Sô ist uns diu maget edele ze grôzen sorgen geborn.“

477

Dô sprach der starke Sîvrit: „Daz sol ich understân.
Des ir dâ habt sorge, des lâz ich niht ergân.
Ich sol iu helfe bringen her in diz lant,
vil erwelten recken, die iu noch nie wurden bekant.

478

Ir sult nâch mir niht vrâgen. Ich wil hinnen varn.
Got müeze iuwer êre die zît wol bewarn.
Ich kum schiere wider und bringe tûsent man
der aller besten degene, der ich ie künde gewan.“

479

„Sône sît êt niht ze lange“, sprach der künec dô,
„wir sîn iuwerer helfe vil billîchen vrô.“
Er sprach: „Ich kum wider in vil kurzen tagen.
Daz ir mich habt gesendet, daz sult ir Prünhilde sagen.“

wie Sîvrit nâch den Nibelungen vuor
{ 8 }
Wie Siegfried zu den Nibelungen fuhr.

480

Dannen gie dô Sîvrit zer porten ûf den sant
in sîner tarnkappen, dâ er ein schiffel vant.
Dar an sô stuont vil tougen daz Sigemundes kint.
Er fuorte ez balde dannen, alsam ez wæte der wint.

481

Den schiffmeister sach niemen. Daz schiffel sêre vlôz
von Sîvrides kreften, die wâren alsô groz.
Si wânde, daz ez fuorte ein sunder starker wint.
Nein, ez fuorte Sîvrit, der schœnen Sigelinden kint.

482

Bî des tages zîten und in der einen naht
kom er ze einem lande mit grœzlîcher maht,
wol hundert langer raste und dannoch baz.
Die hiezen Nibelunge, dâ er den grôzen schatz besaz.

483

Der helt, der fuor aleine ûf einen wert vil breit.
Daz schif gebant vil balde der ritter vil gemeit.
Er gie zuo einem berge, dar ûf ein burc stuont,
und suochte herberge, sô die wegemüeden tuont.

484

Dô kom er für die porten. Verslozzen im diu stuont.
Jâ huoten si ir êren, sô noch die liute tuont.
Anz tor begunde bôzen der unkunde man.
Daz was wol behüetet. Dô vant er innerthalben stân

485

einen ungefüegen, der der bürge pflac,
bî dem zallen zîten sîn gewæfen lac.
Der sprach: „Wer ist, der bôzet sô vaste an daz tor?“
Dô wandelte sîne stimme der hêrre Sîvrit dâ vor.

486

Er sprach: „Ich bin ein recke, nû entsliuz ûf daz tor!
Ich erzürne ir etslîchen noch hiute dâ vor,
der gerne sanfte læge und hete sîn gemach.“
Daz müete den portenære, dô daz hêr Sîvrit gesprach.

487

Nû hete der rise küene sîn gewæfen an getân,
sînen helm ûf sîn houbet. Der vil starke man
den schilt vil balde zucte, daz tor er ûf dô swief.
Wie rehte grimmeclîchen er an Sîvriden lief!

488

Wie er getorste wecken sô manegen küenen man!
Dâ wurden slege swinde von sîner hant getân.
Dô begunde im schermen der hêrlîche gast.
Dô schuof der portenære, daz sîn gespenge zebrast

489

von deiner îsenstangen. Des gie dem helde nôt.
Ein teil begunde fürhten Sîvrit den tôt,
dô der portenære sô krefteclîche sluoc.
Dar umbe was im wæge sîn hêrre Sîfrit genuoc.

490

Si striten alsô sêre, daz al diu burc erschal.
Dô hôrte man daz diezen in Nibelunges sal.
Er twanc den portenære, daz er in sît gebant.
Diu mære wurden kunde in al Nibelunge lant.

491

Dô hôrte daz grimme strîten verre durch den berc
Albrîch der vil küene, ein wildez getwerc.
Er wâfende sich balde. Dô lief er, dâ er vant
disen gast vil edelen, dâ er den risen gebant.

492

Albrîch was vil grimme, starc was er genuoc.
Helm und ringe er an dem lîbe truoc,
und eine geisel swære von golde an sîner hant.
Dô lief er harte snelle, dâ er Sîvriden vant.

493

Siben knoufe swære, die hiengen vor dar an,
dâ mit er umb der hende den schilt dem küenen man
sluoc sô bitterlîchen, daz im des vil zerbrast.
Des lîbes kom in sorge dô der wætlîche gast.

494

Den scherm er von der hende gar zebrochen swanc.
Dô stiez er in die scheiden ein wâfen, daz was lanc.
Den sînen kamerære wolde er niht slahen tôt.
Er schônte sîner zühte, als im diu tugent daz gebôt.

495

Mit starken sînen handen lief er Albrîchen an.
Dô vienc er bî dem barte den altgrîsen man.
Er zogte in ungefuoge, daz er lûte schrê.
Zuht des jungen heldes, diu tet Albrîche wê.

496

Lûte rief der küene: „Lât mich genesen!
Und möhte ich iemens eigen ân einen recken wesen,
dem swüere ich des eide, ich wære im undertân,
ich diente iu ê ich stürbe“, sprach der listige man.

497

Er bant ouch Albrîchen alsam den risen ê.
Die Sîvrides krefte tâten im vil wê.
Daz getwerc begunde vrâgen: „Wie sît ir genant?“
Er sprach: „Ich heize Sîvrit. Ich wânde, ich wære iu wol bekant.“

498

„Sô wol mich dirre mære!“ sprach Albrîch daz getwerc,
„Nû hân ich wol erfunden diu degenlîchen werc,
daz ir von wâren schulden müget landes hêrre wesen.
Ich tuon swaz ir gebietet, daz ir mich lâzet genesen.“

499

Dô sprach der hêrre Sîvrit: „Ir sult balde gân,
und bringet mir der recken, der besten die wir hân,
tûsent Nibelunge, daz mich die hie gesehen.“
War umbe er dô des gerte, des hôrte in niemen verjehen.

500

Dem risen und Albrîche lôsete er diu bant.
Dô lief Albrîch balde, dâ er die recken vant.
Er wacte sorgende der Nibelunge man.
Er sprach: „Wol ûf, ir helde, ir sult ze Sîvride gân!“

501

Si sprungen von den betten und wâren vil bereit.
Tûsent ritter snelle wurden wol gekleit.
Si giengen, dâ si funden Sîvriden stân.
Dâ wart ein schône grüezen ein teil mit werken getân.

502

Vil kerzen was enzündet, man schancte im lûtertranc.
Daz si schiere kômen, er sagte es in allen danc.
Er sprach: „Ir sult von hinnen mit mir über vluot.“
Des vant er vil bereite die helde küen und guot.

503

Wol drîzec hundert recken, die wâren schiere komen.
Ûz den wurden der besten tûsent dô genomen.
Den brâhte man ir helme und ander ir gewant,
wand er si füeren wolde in daz Prünhilde lant.

504

Er sprach: „Ir guote ritter, daz wil ich iu sagen:
ir sult vil rîchiu kleider dâ ze hove tragen,
wand uns dâ sehen müezen vil minneclîchiu wîp.
Dar umbe sult ir zieren mit guoter wæte den lîp.“

505

An einem morgen vruo huoben si sich dan.
Waz sneller geverten Sîvrit dô gewan!
Si fuorten ross diu guoten und hêrlîch gewant.
Si kômen ritterlîche in daz Prünhilde lant.

506

Dô stuonden in den zinnen diu minneclîchen kint.
Dô sprach diu küneginne: „Weiz iemen, wer die sint,
die ich dort sihe vliezen sô verre ûf dem sê?
Si füerent segele rîche, die sint noch wîzer danne der snê.“

507

Dô sprach der künec von Rîne: „Ez sint mîne man.
Die hete ich an der verte hie nâhen bî verlân.
Die hân ich besendet. Die sint nû, vrouwe, komen.“
Der hêrlîchen geste wart vil grôze war genomen.

508

Dô sach man Sîvride vor in einem schiffe stân
in hêrlîcher wæte, unde ander manegen man.
Dô sprach diu küneginne: „Hêr künec, ir sult mir sagen:
sol ich die geste enpfâhen, oder sol ich grüezen si verdagen?“

509

Er sprach: „Ir sult engegen in für den palas gân,
ob wir si gerne sehen, daz si daz wol verstân.“
Dô tet die küneginne, als ir der künec geriet.
Sîvride mit dem gruoze si von den andern schiet.

510

Man schuof in herberge und behielt in ir gewant.
Dô was sô vil der geste komen in daz lant,
daz si sich allenthalben drungen in den scharn.
Dô wolden die vil küenen heim ze lande varn.

511

Dô sprach diu küneginne: „Ich wolde im wesen holt,
der geteilen kunde mîn silber und mîn golt
mîn und des küneges gesten, des ich sô vil hân.“
Des antwurte Dancwart, des künec Gîselhêres man:

512

„Vil edeliu küneginne, lât mich der slüzzel pflegen
ich trûwe ez sô geteilen“, sprach der küene dagen,
„swaz ich erwerbe schande, die lât mîn eines sîn!“
Daz er milte wære, daz tet der degen schîn.

513

Dô sich Hagenen bruoder der slüzzel underwant,
sô manege gâbe rîche gap des heldes hant:
swer einer marke gerte, dem wart sô vil gegeben,
daz die armen alle muosen vrœlîche leben.

514

Wol bî hundert pfunden gap er âne zal.
Genuoge in rîcher wæte giengen vor dem sal,
die nie dâ vor getruogen sô hêrlîchiu kleit.
daz gevriesch diu künegîn. Ez was ir wærlîche leit.

515

Dô sprach diu vrouwe hêre: „Hêr künec, ich hete es rât,
daz iuwer kamerære mir wil der mînen wât
lâzen niht belîben. Er swendet mir mîn golt.
Der ez noch understüende, dem wolde ich immer wesen holt.

516

Er gît sô rîche gâbe, jâ wænet des der degen,
ich habe gesant nâch tôde! Ich wils noch lenger pflegen.
Ouch trûwe ichz wol verswenden, daz mir mîn vater lie.
Sô milten kamerære gewan noch küneginne nie.“

517

Dô sprach von Tronege Hagene: „Vrouwe, iu sî geseit,
ez hât der künec von Rîne golt und kleit
alsô vil ze gebene, daz wir des haben rât,
daz wir von hinnen füeren iht der Prünhilde wât.“

518

„Nein, durch mîne liebe“, sprach diu künegîn,
„lâzet mich erfüllen zweinzec leitschrîn
von golde und von sîden, daz geben sol mîn hant,
sô wir kômen über in daz Gunthêres lant.“

519

Mit edelem gesteine ladete man diu schrîn.
Ir selber kamerære dâ mite muosen sîn.
Sine wolde es niht getrûwen dem Gunthêres man.
Gunthêr und Hagene dar umb lachen began.

520

Dô sprach diu küneginne: „Wem lâz ich mîniu lant?
Diu sol ê bestiften mîn und iuwer hant!“
Dô sprach der künec edele: „Nû heizet her gân
der iu dar zuo gevalle, den sul wir voget wesen lân.“

521

Ein ihr hôhesten mâc diu vrouwe bî ir sach.
Er was ir muoter bruoder. Zuo dem diu vrouwe sprach:
„Nû lât iu sî bevolhen mîne bürge und ouch diu lant.“
Si rihten sich zer verte. Man sach si rîten ûf den sant.

522

Si fuorte mit ir dannen sehs und ahzec wîp,
dar zuo wol hundert megde. Vil schœne was in der lîp.
Sine sûmte sich niht langer, si wolden gâhen dan.
Die si dâ heime liezen, hey, waz der weinen began!

523

In tugentlîchen zühten si rûmte ir eigen lant.
Si kuste ir vriunt die nâhen, die si bî ir vant.
Mit guotem urloube sie kômen ûf den sê.
Zuo ir vater lande kom diu vrouwe nimmêr mê.

524

Dô hôrte man ûf der verte maneger hande spil.
Aller kurzewîle heten si dô vil.
Dô kom in zuo ir reise ein rehter wazzerwint.
Si fuoren von dem lande mit vil grôzen vröuden sint.

525

Dône wolde si den hêrren niht minnen ûf der vart.
Ez wart ir kurzewîle unz in ir hûs gespart,
ze Wormez zuo der bürge, zeiner hôchgezît,
dâ si vil vröuden rîche kômen mit ir helden sît.

wie Sîvrit gesant wart
{ 9 }
Wie Siegfried nach Worms gesandt wurde.

526

Dô si gevarn wâren wol niuwen tage,
dô sprach von Tronege Hagene: „Nû hœrt, waz ich iu sage:
wir sûmen uns mit den mæren ze Wormez an den Rîn.
Iuwer boten solden nû ze Burgonden sîn.“

527

Dô sprach der künec Gunthêr: „Ir habet mir wâr geseit.
Uns wære ze der selben verte niemen sô bereit
als ir, mîn vriunt, hêr Hagene. Nû rîtet in mîn lant!
Die mîne hovereise tuot in niemen baz bekant.“

528

Des antwurte Hagene: „Ich bin niht bote guot.
Lât mich pflegen der kamere, belîben ûf der vluot.
Jâ wil ich bî den vrouwen behüeten ir gewant,
unz wir si bringen in der Burgonde lant.

529

Nû bittet Sîvride füeren die boteschaft!
Der kan si wol gewerben mit ellenhafter kraft.
Versage er iu die reise, ir sult mit guoten siten
durch iuwer swester willen der bete in vriuntlîchen bitten.“

530

Er sande nâch dem recken. Der kom, dô man in vant.
Er sprach: „Sît wir heim nâhen in mîniu lant,
sô solde ich boten senden der lieben swester mîn
und ouch mîner muoter, daz wir nâhen an den Rîn.

531

Des ger ich an iuch, Sîvrit. Nû leistet mînen muot,
daz ich ez immer diene“, sprach der degen guot.
Dô widerredete ez Sîvrit, der vil küene man,
unz daz in Gunthêr sêre vlêgen began.

532

Er sprach: „Ir sult rîten durch den willen mîn
und ouch durch Kriemhilde, daz schœne magedîn,
daz ez mit mir verdiene diu hêrlîche meit.“
Dô daz gehôrte Sîvrit, dô was der recke vil bereit.

533

„Nû enbietet, swaz ir wellet, des wirt niht verdaget.
Ich wil ez gerne werben durch die vil schœnen maget.
Zewiu solde ich verzîhen, die ich in herzen hân?
Swaz ir gebietet, daz ist allez getân.“

534

„Sô saget mîner muoter, Uoten der künegîn,
daz wir an dirre verte in hôhem muote sî.
Lât wizzen mîne bruoder, wie wir geworben hân!
Ir sult ouch unser vriunde disiu mære hœren lân.

535

Die mînen schœnen swester, die sult ir niht verdagen.
Den mîn und Prünhilde dienest, den sult ir der megde sagen,
und ouch dem gesinde und allen mînen man,
dar nâch ie ranc mîn herze, wie wol ich daz verendet hân.

536

Und sagt Ortwîne, dem liebem neven mîn,
daz er heize sidelen ze Wormez ad den Rîn,
und ander mîne mâge sol man wizzen lân:
ich wil mit Prünhilde grôze hôchzîte hân.

537

Und sage mîner swester, sô si daz habe vernomen,
daz ich mit mînen gesten sî ze lande komen,
daz si mit vlîze enpfâhe die lieben triutinne mîn.
Daz wil ich immer diende umb Kriemhilde sîn.“

538

Sîvrit der hêrre balde urloup genam
von vroun Prünhilde, als im wol gezam,
und zallem ir gesinde. Dô reit er an den Rîn.
Ez kunde in dirre werlde ein bote bezzer niht gesîn.

539

Mit vier und zweinzec recken ze Wormez er dô reit.
Des küneges kom er âne. Dô daz wart geseit,
allez daz gesinde müete jâmers nôt.
Si vorhten, daz ir hêrre dort belîben wære tôt.

540

Dô erbeizten si von rossen. Vil hôhe stuont ir muot.
Vil schiere kom in Gîselhêr, der junge künec guot,
unde Gêrnôt, sîn bruoder. Wie balde er dô sprach,
dô er den künec Gunthêr niht bî Sîvride sach:

541

„Sît willekomen, Sîvrit! Ir sult mich wizzen lân,
wâ ir mînen bruoder, den künec, habt verlân.
Diu Prünhilde sterke in wæn uns hât benomen,
sô wære ir hôhiu minne uns ze grôzem schaden komen.“

542

„Die angest lât belîben! Iu und den mâgen sîn,
iu enbiutet sînen dienest der liebe hergeselle mîn.
Den liez ich wol gesunden. Er hât mich iu gesant,
daz ich sîn bote wære mit mæren her in iuwer lant.

543

Ir sult daz ahten schiere, swie sô daz geschehe,
daz ich die küneginne und iuwer swester sehe.
Die sol ich lâzen hœren, waz in enboten hât
Gunthêr und Prünhilt. Ir dinc in hôhe stât.“

544

Dô sprach der junge Gîselhêr: „Dâ sult ir zuo zir gân.
Dâ habt ir mîner swester vil liebe an getân.
Si treit ouch michel sorge umb den bruoder mîn.
Diu maget siht iuch gerne, des wil ich iuwer bürge sîn.“

545

Dô sprach der hêrre Sîvrit: „Swaz ich ir dienen kan,
daz sol vil willeclîchen mit triuwen sîn getân.
Wer saget nû den vrouwen, daz ich dar wil gân?“
Des wart dô bote Gîselhêr, der vil wætlîche man.

546

Gîselhêr der snelle zuo sîner muoter sprach
und ouch ze sîner swester, dâ er si beide sach:
„Uns ist komen Sîvrit, der helt ûz Niderlant.
In hât mîn bruoder Gunthêr her ze Rîne gesant.

547

Er bringet uns diu mære, wie ez umb den künec stê.
Nû sult ir im erlouben, daz er ze hove gê.
Er sagt diu rehten mære her von Îslant.“
Noch was den edelen vrouwen michel sorge bekant.

548

Si sprungen nâch ir wæte. Dô leiten si sich an.
Si bâten Sîvride hin ze hove gân.
Daz tet er willeclîchen, wand er si gerne sach.
Kriemhilt diu edele zuo im güetlîchen sprach:

549

„Sît willekom, hêr Sîvrit, ritter lobelîch!
Wâ ist mîn bruoder Gunthêr, der edel künec rîch?
Von Prünhilde krefte, ich wæn, wir in hân verlorn.
Ouwê mich armer megde, daz ich ze der werlt ie wart geborn!“

550

Dô sprach der ritter küene: „Nû gebt mir botenbrôt!
Ir vil schœne vrouwen, ir weinet âne nôt.
Ich liez in wol gesunden, daz tuon ich iu bekant.
Si habent mich iu beide mit den mæren her gesant.

551

Iu enbiutet holden dienest er und diu wine sîn
mit vriuntlîcher liebe, vil edeliu künegîn.
Nû lâzet iuwer weinen. Si wellent schiere komen.“
Si hete in manegen zîten sô liebez mære niht vernomen.

552

Mit snê wîzen gêren ir ougen wolgetân
wischete si nâch trehen. Danken si began
dem boten dirre mære, diu ir wâren komen.
Dô was ir michel trûren und ir weinen benomen.

553

Si bat den boten sitzen. Des was er vil bereit.
Dô sprach diu minneclîche: „Mir wære niht ze leit,
ob ich dem boten miete solde geben mîn golt.
Dar zuo sît ir ze rîche: ich wil iu immer wesen holt.“

554

„Ob ich nû eine hete“, sprach er, „drîzec lant,
sô enpfienge ich doch gerne gâbe ûz iuwerer hant.“
Dô sprach diu tugentrîche: „Nû sol ez sîn getân!“
Si hiez den kamerære nâch der botenmiete gân.

555

Vier und zweinzec bouge mit gesteine guot,
die gap si im ze miete: sô stuont des heldes muot,
er wolde es niht behalten. Er gap ez sâ zehant
ir næhestem ingesinde, die er ze kemenâten vant.

556

Ir muoter bôt ir dienest in vil güetlîchen an.
„Ich sol iu sagen mære“, sprach der küene man,
„wes iuch bittet Gunthêr, sô er kumt an den Rîn.
Ob ir daz, vrouwe, leistet, er welle iu immer wæge sîn.

557

Die sînen rîchen geste, des hôrte ich in gern,
daz ir die wol enpfâhet, und sult in des gewern,
daz ir gegen im rîtet für Wormez an den sant.
Des sît ir von dem künege mit rehten triuwen gemant.“

558

Dô sprach diu minneclîche: „Des bin ich vil bereit.
Swaz ich im kan gedienen, daz ist im unverseit.
Mit vriuntlîchen triuwen, sô sol ez sî getân.“
Dô mêrte sich ir varwe, die si vor liebe gewan.

559

Ez enwart nie bote enpfangen deheines fürsten baz.
Getorste si in küssen, diu vrouwe tæte daz.
Wie rehte minneclîche er von den vrouwen schiet!
Dô tâten Burgonde, als in Sîvrit geriet.

560

Sindolt und Hûnolt und Rûmolt der degen,
vil grôzer unmuoze muosen si dô pflegen,
rihten daz gesidele vor Wormez ûf den sant.
Des küneges schaffære man mit arbeiten vant.

561

Ortwîn und Gêre, diene wolden daz niht lân,
si sanden nâch den vriunden allenthalben dan.
Si kundeten in die hôchzît, diu dâ solde sîn.
Dâ zierten sich engegene diu vil schœnen magedîn.

562

Der palas und die wende, daz was über al
gezieret gegen den gesten. Der Gunthêres sal,
der wart vil wol bezimbert durch manegen vremden man.
Disiu vil starke hôchzît, diu huop sich vil vrœlîchen an.

563

Dô riten allenthalben die wege durch daz lant
der drîer künege mâge. Die hete man besant,
daz si den solden warten, die in dâ wolden komen.
Dâ war ûzer valde vil rîcher wæte genomen.

564

Dô sagete man diu mære, daz man rîten sach
die Prünhilde vriunde. Dô huop sich ungemach
von des volkes krefte in Burgonden lant.
Hey, waz man küener degene dâ ze beiden sîten vant!

565

Dô sprach diu schœne Kriemhilt: „Ir miniu magedîn,
die an dem antpfange mit mir wellen sîn,
die suochen ûz den kisten diu aller besten kleit!
Sô wirt uns von den gesten lop und êre geseit.“

566

Dô kômen ouch die recken. Die hiezen tragen dar
die hêrlîchen setele von rôtem golde gar,
die vrouwen solden rîten ze Wormez an den Rîn.
Bezzer pfertgereite, diu kunden niender sîn.

567

Hey, waz dâ liehtes goldes von den mœren schein!
In lûhte von den zoumen vil manec edel stein.
Die guldînen schemel ob liehtem pfelle guot,
die brâhte man den vrouwen. Si wâren vrœlîch gemuot.

568

Ûfe dem hove wâren diu vrouwenpfert bereit
den edelen juncvrouwen als ich iu hân geseit.
Diu smalen fürbüege sach man die mœre tragen
von den besten sîden, dâ von iu iemen kunde gesagen.

569

Sehs und ahzec vrouwen sach man dâ für gân,
die gebende truogen. Zuo Kriemhilde dan
kômen die vil schône und truogen liehtiu kleit.
Dâ kom ouch gezieret manec wætlîchiu meit.

570

Fünfzec und viere von Burgonde lant.
Ez wâren ouch die hœhsten, die man dâ iender vant.
Die sach man dâ valvahse under liehten porten gân.
Des ê der künec gerte, daz wart mit vlîze getân.

571

Si truogen rîchen pfellel, die besten, die man vant,
vor den vremden recken, sô manec guot gewant,
daz ir genuoge schœne ze rehte wol geazm.
Er wære in swachem muote, der ir deheiner wære gram.

572

Von zobel und von harme vil man dâ kleider vant.
Dâ wart vil wol gezieret manec arm und hant
mit bougen ob den sîden, die si dâ solden tragen.
Iu enkunde daz vlîzen ze ende niemen gesagen.

573

Vil manegen gürtel spæhen, rîch und lanc,
über liehtiu kleider vil manec hant dô swanc
ûf edel rocke ferrans von pfelle ûz Arâbî.
Den edelen juncvrouwen was vil hôher vröuden bî.

574

Ez wart in fürgespenge manec schœniu meit
genæt vil minneclîche. Ez möhte ir wesen leit,
der ir vil liehtiu varwe niht lûhte gegen der wât.
Sô schœnes ingesindes nû niht küneges künne hât.

575

Dô die vil minneclîchen nû truogen ir gewant,
die si dâ füeren solden, die kômen dar zehant.
Der hôchmüeten recken was ein vil michel kraft.
Man truoc ouch dar mit schilden vil manec eschînen schaft.

wie Prünhilt ze Wormze enpfangen wart
{ 10 }
Wie Brunhild zu Worms empfangen wurde.

576

Anderthalb des Rînes sach man mit manegen scharn
den künec mit sînen gesten zuo dem stade varn.
Ouch sach man dâ bî zoume leiten manege meit.
Die si enpfâhen solden, die wâren alle bereit.

577

Dô die von Îslande zen schiffen kômen dan,
und ouch von Nibelungen die Sîvrides man,
sie gâheten zuo dem lande. Unmüezec wart ir hant,
dâ man des küneges vriunde des stades anderthalben vant.

578

Nû hœret ouch disiu mære von der künegîn,
Uoten der rîchen, wie si diu magedîn
vrumte von der bürge. Dar si dô selbe reit.
Dâ gewan ein ander kunde vil manec ritter und meit.

579

Der herzoge Gêre Kriemhilt zoumte dan,
niwâr für daz bürgetor. Sîvrit, der küene man,
der muoste ir fürbaz dienen. Si was ein schœne kint.
Des wart im wol gelônet von der juncvrouwen sint.

580

Ortwîn der küene bî vrou Uoten reit
vil geselleclîchen manec ritter und meit.
Ze sô grôzem antpfange, des wir wol mügen jehen,
wart nie sô vil der vrouwen bî ein ander gesehen.

581

Vil manec bûhurt rîcher wart dâ getriben
von helden lobelîchen, niht wol daz wære belîben,
vor Kriemhilt der vil schœnen zuo den schiffen dan.
Dô huop man von den mœren manege vrouwen wolgetân.

582

Der künec was komen über, und manec werder gast.
Hey, waz starker schefte vor den vrouwen brast!
Man hôrte dâ hurteclîchen von schilden manegen stôz.
Hey, waz rîcher buckelen vor gedrange lûte erdôz!

583

Die vil minneclîchen stuonden an der habe.
Gunthêr mit sînen gesten gie von den schiffen abe.
Er fuorte Prünhilden selbe an sîner hant.
Dâ lûhte wider ein ander vil lieht stein und gewant.

584

Mit vil grôzen zühten vrou Kriemhilt dô gie,
dô si vroun Prünhilden von ir gesinde enpfie.
Man sach dâ schapel rucken mit liehten henden dan,
dâ si sich kusten beide. Daz wart durch zuht getân.

585

Dô sprach gezogenlîche Kriemhilt daz magedîn:
„Ir sult zuo disen landen uns willekomen sîn,
mir und mîner muoter, und allen die wir hân
der getriuwen vriunde!“ Dô wart nîgen getân.

586

Die vrouwen sich beviengen mit armen dicke hie.
Sô minneclîch enpfâhen gehôrte man noch nie,
sô die vrouwen beide der briute tâten kunt.
Vrou Uote und ir tohter, die kusten dicke ir süezen munt.

587

Dô vrou Prünhilt vol kom ûf den sant,
dô wart vil minneclîchen genomen bî der hant
von wætlîchen recken manec wîp wolgetân.
Man sach die schœnen megede vor vroun Prünhilde stân.

588

Ê daz ir gruoz ergienge, daz was ein lange stunt.
Jâ wart dâ geküsset manec rôse varwer munt.
Noch stuonden bî ein ander die küneges töhter rîch.
Daz liebte an ze sehene vil manegem recken lobelîch.

589

Dô spehten mit den ougen, die ê hôrten jehen,
daz si alsô schœnes niht mêr heten gesehen
sô die vrouwen beide. Des jach man âne lüge.
Ouch kôs man an ir lîbe dâ deheiner slahte trüge.

590

Die vrouwen spehen kunden und minneclîchen lîp,
die lobten durch ir schœne daz Gunthêres wîp.
Dô sprâchen dâ die wîsen, die heten ez baz gesehen,
man möhte Kriemhilden vor vroun Prünhilden jehen.

591

Wider ein ander giengen maget und wîp
Man sach dâ wol gezieret vil manegen schœnen lîp.
Dâ stuonden sîden hütten und manec rîch gezelt.
Der was gar erfüllet vor Wormez daz velt.

592

Vor des küneges mâgen wart dringen dâ getân.
Dô hiez man Prünhilde und Kriemhilde gân.
und mit in alle die vrouwen, dâ man schate vant.
Dar brâhten si die degene ûzer Burgonden lant.

593

Nû wâren ouch die geste ze rosse alle komen.
Vil manec rîchiu tjost durch schilt wart genomen.
Daz velt begunde stiuben, sam ob al daz lant
mit louge wære erbrunnen. Dâ wurden helde wol bekant.

594

Des dâ die recken pflâgen, daz sach dâ manec meit.
Mich dunket, daz hêr Sîvrit mit sînen degen reit
vil manege widerkêre für die hütten dan.
Er fuorte der Nibelunge tûsent wætlîcher man.

595

Dô kom von Tronege Hagene, als im der wirt geriet.
Den bûhurt minneclîche dô der helt geschiet,
daz si ungestoubet liezen diu vil schœnen kint.
Des wart dô von den gesten gevolget güetlîche sint.

596

Dô sprach der hêrre Gêrnôt: „Diu ross lâzet stân,
unz ez beginne kuolen. Sô sul wir ane vân
dienen schœnen wîben für den palas wît:
sô der künec welle rîten, daz ir vil bereite sît!“

597

Dô der bûhurt was zergangen über al daz velt,
dô giengen kurzewîlen under manec gezelt
die ritter zuo den vrouwen ûf hôher vröuden wân.
Dâ vertriben si die stunde, unz si wolden rîten dan.

598

Vor âbendes nâhen, dô diu sunne nider gie
und ez begunde kuolen, niht langer man daz lie,
sich huop gegen der bürge manec man und wîp.
Mit ougen wart getriutet vil maneger schœnen vrouwen lîp.

599

Dâ wart von guoten helden vil kleider ab geriten
von den hôchgemuoten nâch des landes siten,
unze für den palas der künec nider stuont.
Dâ wart gedienet den vrouwen, sô helde hôchgemuote tuont.

600

Dô wurden ouch gescheiden die rîchen künegîn.
Vrou Uote und ir tohter, die giengen beide hin
mit ir ingesinde in ein vil wîtez gadem.
Dô hôrte man allenthalben ze vröuden grôzen kradem.

601

Gerihtet wart daz gesidele. Der künec wolde gân
ze tische mit den gesten. Dô sach man bî im stân
die schœnen Prünhilde. Krône si dô truoc
in des küneges lande. Jâ was si rîch genuoc.

602

Vil manec hergesidele mit guoten tavelen bereit
von spîse wart gesetzet, als uns ist geseit.
Des si dâ haben solden, wie wênec des gebrast!
Dô sach man bî dem künege vil manegen hêrlîchen gast.

603

Des wirtes kamerære in becken von golde rôt
daz wazzer für truogen. Des wære lützel nôt,
ob iu daz iemen sagte, daz man diente baz
ze fürsten hôchgezîte. Ich wolde niht gelouben daz.

604

Ê daz der vogt von Rîne wazzer dô genam,
dô tet der hêrre Sîvrit, als im dô gezam.
Er mante in sîner triuwe, wes er im verjach,
ê daz er Prünhilt dâ heime in Îslande sach.

605

Er sprach: „Ir sult gedenken, des mir swuor iuwer hant,
swenne vrou Prünhilt kœme in diz lant,
ir gæbet mir iuwer swester. Wâ sint die eide komen?
Ich hân an iuwer reise michel arbeit genomen!“

606

Dô sprach der künec zem gaste: „Ir haben mich rehte ermant.
Jâne sol niht meineide werden des mîn hant!
Ich wil ez iu füegen, sô ich aller beste kan.“
Dô hiez man Kriemhilde ze hove für den künec gân.

607

Mit ir vil schœnen megden si kômen für den sal.
Dô spranc von einer stiege Gîselhêr ze tal.
„Nû heizet wider wenden disiu magedîn!
Niuwan mîn swester eine sol bî dem künege sîn.“

608

Dô brâhte man Kriemhilde, dâ man den künec vant.
Dô stuonden ritter edele von maneges fürsten lant
in dem sal wîten. Man hiez si stille stân.
Dô was diu vrou Prünhilt wol hin unz an den tisch gegân.

609

Dô sprach der künec Gunthêr: „Swester vil gemeit,
durch dîne selbe tugende lœse mînen eit.
Ich swuor dir einen recken, und wirdet der dîn man,
sô hâstû mînen willen mit vil grôzen triuwen getân.“

610

Dô sprach diu maget vil edele: „Vil lieber bruoder mîn,
ir sult mich niht vlêgen. Jâ wil ich immer sîn
swie ir mir gebietet! Daz sol sîn getân.
Ich wil in loben gerne, den ir mir, hêrre, gebet ze man.“

611

Von lieber ougen blicke wart Sîvrit varwe rôt.
Ze dienste sich der recke vroun Kriemhilde bôt.
Man hiez si zuo ein ander an einen rinc dô gân.
Man vrâgte, ob si gerne næme den vil wætlîchen man.

612

In magetlîchen zühten schamte si sich ein teil.
Iedoch was gelücke und Sîvrit vil geil,
daz si in niht versprechen wolde al dâ zehant.
Ouch lobte si ze wîbe der edel künec von Niderlant.

613

Dô er si gelobte und ouch in diu meit,
güetlîch umbefâhen was dâ vil bereit
von Sîvrides armen daz minneclîche kint.
Von helden wart geküsset diu schœne Kriemhilt sint.

614

Sich teilte daz gesinde. Alsô daz geschach,
an daz gegensidele man Sîvride sach
mit Kriemhilde sitzen. Dar diente manec man.
Man sach die Nibelunge mit samt Sîvride gân.

615

Der künec was gesezzen und Prünhilt diu meit.
Dô sach si Kriemhilde, dône wart ir nie sô leit,
bî Sîvride sitzen. Weinen si began.
Ir vielen heize trehene über liehtiu wange dan.

616

Dô sprach der wirt des landes: „Vil liebiu vrouwe mîn,
war umbe lât ir trüeben vil liehter ougen schîn?
Ir muget iuch vröun balde. Iu ist undertân
Mîn lant und mîne bürge und manec wætlîcher man.“

617

„Ich mac wol balde weinen,“ sprach diu schœniu meit.
„Umb dîne swester ist mir von herzen leit.
Die sihe ich nâhen sitzen dem eigenholden dîn.
Daz muoz ich immer weinen, sol si alsô verderbet sîn.“

618

Dô sprach der künec Gunthêr: „Ir müget wol stille dagen.
Ich wil iu zandern zîten disiu mære sagen,
war umb ich mîne swester Sîvride hân gegeben.
Jâ mac si mit dem recken immer vrœlîchen leben!“

619

Si sprach: „Mich jâmert immer ir schœne und ouch ir zuht.
Wesse ich, war ich möhte, ich hete gerne vluht,
daz ich iu nimmêr wolde geligen nâhen bî,
ir ensaget mir wâ von Kriemhilt diu Sîvrides wine sî.“

620

Dô sprach der künec edele: „Ich tuon ez iu wol bekant.
Er hât als wol bürge als ich, und wîtiu lant.
Daz wizzet sicherlîche: er ist ein künec rîch.
Dar umb gan ich im ze minnen die schœnen maget lobelîch.“

621

Swaz ir der künec sagete, si hete trüeben muot.
Dô gâhte von den tischen vil manec ritter guot.
Ir bûhurt wart sô herte, daz al diu burc erdôz.
Den wirt bî sînen gesten vil harte sêre verdrôz.

622

Er dâhte, er læge sanfter der schœnen vrouwen bî.
Dô was er des gedingen niht gar in herzen vrî,
im müese von ir schulden liebes vil geschehen.
Er begunde vriuntlîchen an vroun Prünhilde sehen.

623

Ir ritterschaft die geste bat man abe lân.
Der künec mit sînem wîbe ze bette wolde gân.
Vor des sales stiegen gesamenten si sich sît,
Kriemhilt und Prünhilt. Noch was ez ân ir beider nît.

624

Dô kom ir ingesinde, diene sûmten sich des niht.
Ir rîchen kamerære brâhten in diu lieht.
Sich teilten dô die recken, der zweier künege man.
Dô sach man vil der degene danne mit Sîvirde gân.

625

Die hêrren kômen beide, dâ si solden ligen.
Dô gedâhte ietslîcher mit minnen an gesigen
den minneclîchen vrouwen. Daz senftete in den muot.
Sîvride kurzewîle, diu wart vil grœzlîche guot.

626

Dô der hêrre Sîvrit bî Kriemhilde lac,
und er sô minneclîche der juncvrouwen pflac
mit sînen edelen minnen, si wart im sô lîp.
Er næme für si eine niht tûsent anderiu wîp.

627

Ich sag iu niht mêre, wie er der vrouwen pflac.
Nû hœret disiu mære, wie Gunthêr gelac
bî vroun Prünhilde, der ziere degen.
Er hete dicke sanfter bî andern wîben gelegen.

628

Daz volc was im entwichen, vrouwen und man.
Dô wart diu kemenâte vil balde zuo getân.
Er wânde, er solde triuten ir vil minneclîchen lîp.
Jâ was ez noch unnâhen, ê si wurde sîn wîp.

629

In sabenwîzen hemede si an daz bette gie.
Dô dâhte der ritter edele: „Nû hân iz allez hie,
des ich ie dâ gerte in allen mînen tagen.“
Si muoste im von ir schœne von grôzen schulden wol behagen.

630

Diu lieht begunde bergen des edelen küneges hant.
Dô gie der degen küene, dâ er die vrouwen vant.
Er leite sich ir nâhen. Sîn vröude, diu was grôz.
Die vil minneclîchen der helt mit armen umbeslôz.

631

Minneclîch triuten, des kunde er vil begân,
ob in diu edele vrouwe hete lâzen daz getân.
Dô zurnde si sô sêre, daz in gemüete daz.
Er wânde vinden vriunde, dô vant er vîentlîcen haz.

632

Si sprach: „Ritter edele, ir sult ez lâzen stân,
des ir dâ haben gedingen. Jâne mac es niht ergân!
Ich wil noch maget belîben, ir sult wol merken daz,
unz ich diu mære ervinde.“ Dô wart ir Gunthêr gehaz.

633

Dô ranc er nâch ir minne und zerfuorte ir diu kleit.
Dô greif nâch einem gürtel diu hêrlîchiu meit.
Daz was ein starker porte, den si umb ir sîten truoc.
Dô tet si dem künege grôzer leide genuoc.

634

Die füeze und ouch die hende si im ze samne bant.
Si truoc in zeinem nagel und hienc in an die want.
Dô er si slâfes irrete, die minne si im verbôt.
Jâ hete er von ir krefte vil nâch gewunnen den tôt.

635

Dô begunde er vlêgen, der meister wânde sîn:
„Nû lœset mîn gebende, vil edeliu künegîn!
Ine trûwe iu doch, schœniu vrouwe, nimmêr an gesigen,
und sol ouch harte selten iu sô nâhe mêr geligen!“

636

Sine ruochte, wie im wære, wand si vil sanfte lac.
Dort muoste er allez hangen die naht unz an den tac,
unz der liehte morgen durch diu venster schein.
Ob er ie kraft gewunne, diu was an sînem lîbe klein.

637

„Nû sagt mir, hêr Gunthêr, ist iu daz iht leit,
ob iuch gebunden fünden,“ sprach diu schœne meit,
„die iuwern kamerære von einer vrouwen hant?“
Dô sprach der ritter edele: „Da würde iu übele bewant!

638

Ouch hete ich es wênec êre“, sprach der snelle man.
„Durch iuwer selber tugende nû lât mich zuo iu gân.
Sît daz iu mîne minne sint alsô starke leit,
ich sol mit mînen henden nimmêr rüeren iuwer kleit.“

639

Dô lôsete si in balde. Und dô so in ûf verlie,
wider daz bette er zuo der vrouwen gie.
Er leite sich sô verre, daz er ir schœne wât
dar nâch vil selten ruorte. Des wolde ouch si dô haben rât.

640

Dô kom ouch ir gesinde, die brâhten in niuwiu kleit.
Der was in an den morgen harte vil bereit.
Swie wol man dâ gebârte, trûrec was genuoc
der hêrre von dem lande, swie er des tages krône truoc.

641

Nâch siten, der si pflâgen, und man durch reht begie,
Gunthêr und Prünhilt niht langer daz enlie,
sie giengen zuo dem münster, dâ man die messe sanc.
Dar kom ouch hêr Sîvrit. Sich huop dâ grœzlîch gedranc.

642

Nâch küneclîchen êren was in dar bereit,
swaz si dâ haben solden, ir krône und ouch ir kleit.
Dô wurden si gewîhet. Dô daz was getân,
dô sach man si alle viere under krône vrœlîchen stân.

643

Vil junger degen swert dâ nâmen, sehs hundert oder baz,
den künegen al ze den êren. Ir sult wol wizzen daz.
Sich huop vil michel vröude in der Burgonde lant.
Man hôrte dâ schefte hellen an der swertdegene hant.

644

Dô sâzen in den venstern diu schœnen magedîn.
Si sâhen vor in liuhten vil maneges schildes schîn.
Dô hete sich gescheiden der künec von sînen man.
Swes iemen ander pflæge, man sach den künec trûrende gân.

645

Im und Sîvride ungelîch stuont der muot.
Wol wesse, waz im wære, der edel ritter guot.
Dô gienc er zuo dem künege. vrâgen er began:
„Wie ist iu hînt gelungen? Daz sult ir mich nû wizzen lân!“

646

Dô sprach der wirt ze dem gaste: „Ich hân laster und schaden,
wand ich hân den übelen tiuvel heim ze hûse geladen.
Dô ich si wânde minnen, vil sêre si mich bant.
Si truoc mich zeinem nagele und hie mich hôhe an die want.

647

Dâ hie ich angestlîche die naht unz an den tac,
ê daz si mich enbünde. Wie sanfte si dô lac!
Daz sol dir vriuntlîche ûf genâde sîn gekleit.“
Dô sprach der starke Sîvrit: „Ez ist mir wærlîche leit.

648

Des bringe ich dich wol innen. Und læzestû ez âne nît,
ich schaffe, daz si hîntz sô nâhe bî dir gelît,
daz si dich ir minne gesûmet nimmêr mêr.“
Der rede was dô Gunthêr nâch sînen arbeiten hêr.

649

Dô sprach der hêrre Sîvrit: „Dû maht wol genesen.
Ich wæne, uns ungelîche hînat sî gewesen.
Mir ist dîn swester Kriemhilt lieber danne der lîp.
Ez muoz diu vrouwe Prünhilt noch hînat werden dîn wîp.“

650

Er sprach: „Ich kum noch hînte ze der kemenâten dîn
alsô tougenlîchen in der tarnkappen mîn,
daz sich mîner liste mac niemen wol verstân.
Sô lâ die kamerære ûz zuo ir herberge gân.

651

Sô lesche ich den kinden diu lieht an der hant.
Daz ich sî dar inne, dâ bî sî dir bekant,
daz ich dir gerne diene. Sô twinge ich dir dîn wîp,
daz dû si hînte minnest, oder ich verliuse mînen lîp.“

652

„Âne daz dû iht triutest“, sprach der künec dô,
„die mîne lieben vrouwen, anders bin ich es vrô.
Sô tuo ir swaz dû wellest, und næmest ir den lîp.
Daz solde ich wol verkiesen. Si ist ein vreislîchez wîp!“

653

„Daz nim ich“, sô sprach Sîvrit, „ûf die triuwe mîn,
daz ich ir niht enminne. Die schœne swester dîn,
diu ist mir vor allen, die ich noch ie gesach.“
Vil wol geloubte der künec Gunthêr, daz Sîvrit gesprach.

654

Dâ was von kurzewîle vröude und nôt.
Bûhurt und schallen allez man verbôt,
dâ die vrouwen solden gegen dem sale gân.
Dô hiezen die kamerære die liute von dem wege stân.

655

Von rossen und von liuten gerûmet wart der hof.
Der vrouwen ietslîche, die fuorte ein bischof,
dô si vor den künegen ze tische solden gân.
In volgete an daz gesidele vil manec wætlîcher man.

656

Der künec in guotem wâne dô vrœlîchen saz.
Daz im gelobte Sîvrit, wol dâhte er ane daz.
Der eine tac in dûhte wol drîzec tage lanc:
an sîner vrouwen minne stuont aller sîn gedanc.

657

Er erbeite kûme, daz man von tische gie.
Die schœnen Prünhilde man dô komen lie,
und ouch vroun Kriemhilde, beide an ir gemach.
Hey, waz man sneller degene vor den künegen sach!

658

Sîvrit der hêrre vil minneclîchen saz
bî sînem wîbe mit vröuden âne haz.
Si trûte sîne hende mit ir vil wîzer hant,
unze er ir vor den ougen, sine wesse wenne, verswant.

659

Dô si mit im spilte und sis niht mêr ensach,
zuo sînem gesinde diu küneginne sprach:
„Mich hât des michel wunder, wâ der künec sî bekomen.
Wer hât im die sînen hende ûz den mînen genomen?“

660

Die rede si lie belîben. Dô was er hin gegân,
dâ er vil kamerære mit den liehten vant stân.
Diu begunde er leschen den kinden an der hant.
Daz er wære Sîvrit, daz was Gunthêr bekant.

661

Wol wesse er, waz er wolde. Dô hiez er dannen gân
megede und vrouwen. Dô daz was getân,
der rîche künec selbe dô beslôz die tür.
Vil starker rigel zwêne warf er snelle dar für.

662

Diu lieht verbarc er schiere under die bettewât.
Eines spils begunde, des was dô niht rât,
Sîvrit der vil starke und ouch diu vil schœniu meit,
daz was dem künege Gunthêr beidiu liep und leit.

663

Sîvrit, der leite sich nâhen der juncvrouwen bî.
Si sprach: „Nû lât ez, Gunthêr, als liep als ich iu sî,
daz ir iht arbeite lîdet alsam ê!“
Sît getet diu vrouwe dem küenen Sîvride wê.

664

Dô hal er sîne stimme, daz er niht ensprach.
Gunthêr wol hôrte, swie er sîn niht ensach,
daz heinlîcher dinge von in dâ niht geschach.
Si hete an dem bette vil harte kleinen gemach.

665

Er gebârte, sam ez wære Gunthêr, der künec rîch.
Er umbslôz mit armen die maget lôbelîch.
Si warf in ûz dem bette dâ bî ûf eine banc,
daz im sîn houbet lûte ûf einem schamel erklanc.

666

Wider ûf mit kreften spranc der küene man.
Er wolde ez baz versuochen. Dô er des began,
daz er si wolde twingen, dâr umbe wart im vil wê.
Sölch wer von deheiner vrouwen, diu wæne immer mêr ergê.

667

Dô er niht wolde erwinden, diu maget ûf dô spranc.
„Ir ensult mir niht zerfüeren mîn hemde sô blanc!
Ir sît vil ungefüege! Daz sol iu werden leit,
des bringe ich iuch wol innen!“ sprach diu wætlîchiu meit.

668

Si beslôz mit armen den tiuwerlîchen degen.
Dô wolde si in gebunden alsam den künec legen,
daz si an dem bette möhte haben gemach.
Daz er ir die wât zerfuorte, diu vrouwe ez grœzlîchen rach.

669

Waz half sîn grôziu sterke und ouch sîn grôziu kraft?
Si erzeigete dem degene ir lîbes meisterschaft.
Si truoc in mit gewalte, daz muose êt alsô sîn,
und dructe in gefuoge zwischen die want und ein schrîn.

670

„Ouwê“, dâhte der recke, „sol ich nû mînen lîp
von einer maget verliesen, sô mugen elliu wîp
her nâch immer mêre tragen gelpfen muot
gegen ir manne, diu ez sus nimmêr getuot!“

671

Der künec ez wol hôrte. Er angestete umb den man.
Sîvrit zurnte sêre. Schamen er sich began.
Mit ungefüeger krefte satzte er sich wider.
Er versuochtez angestlîche an vroun Prünhilde sider.

672

Den künec ez dûhte lange, ê er si betwanc.
Si dructe im sîne hende, daz ûz den nagelen spranc
daz bluot im von ir krefte. Daz was dem helde leit.
Sît brâhte er an ein lougen die vil hêrlîchen meit

673

ir ungefüeges willen, des si ê dâ jach.
Der künec ez allez hôrte, swie er niht ensprach.
Er dructe si an daz bette, daz si vil lûte schrê.
Ir tâten sîne krefte harte grœzlîchen wê.

674

Dô greif si hinz ir sîten, dâ si den porten vant,
und wolde in hân gebunden. Dô werte ez sô sîn hant,
daz ir diu lit erkrachten und ouch al der lîp.
Des wart der strît gescheiden. Dô war si Gunthêres wîp.

675

Si sprach: „Künec edele, dû solt mich leben lân.
Ez wirt vil wol versüenet, swaz ich dir hân getân.
Ich engewer mich nimmêr mêre der edelen minne dîn.
Ich hân daz wol erfunden, daz dû kanst vrouwen meister sîn.“

676

Sîvrit stuont dannen. Ligen lie er die meit,
sam er von im ziehen wolde vil gar sîniu kleit.
Er zôch ir ab ir hende ein guldîn vingerlîn,
daz si des nie wart innen, diu edele künegîn.

677

Dar zuo nam er ir gürtel, daz was ein porte guot.
Ine weiz, ob er daz tæte durch sînen hôhen muot.
Er gap ez sînem wîbe, daz wart im sider leit.
Dô lâgen bî ein ander Gunthêr und diu schœniu meit.

678

Er pflac ir minneclîchen, als im daz gezam.
Dô muoste si verkiesen ir zorn und ouch ir scham.
Von sîner heinlîche si wart ein lützel bleich.
Hey, waz ir von der minne ir grôzen krefte entweich!

679

Dône was ouch sie niht sterker dann ein ander wîp.
Er trûte minneclîche den ir vil schœnen lîp.
Ob siz versuochte mêre, waz kunde daz vervân?
Daz hete ir allez Gunthêr mit sînen minnen getân.

680

Wie rehte minneclîche si dô bî im lac
mit vriuntlîcher liebe unz an den liehten tac!
Nû was der hêrre Sîvrit wider ûz gegân,
dâ er wol wart enpfangen von einer vrouwen wolgetân.

681

Er understuont ir vrâge, der si hete gedâht.
Er hal si sît vil lange, daz er ir hete brâht,
unz daz si under krône in sînem lande gie.
Swaz er ir geben solde, wie lützel erz belîben lie!

682

Der wirt wart an dem morgen verrer baz gemuot,
danne er dâ vor wære. Des wart diu vröude guot
in allem sînem lande von manegem edelem man.
Die er ze hûse ladete, den wart vil dieneste getân.

683

Diu hôchzît dô werte unz an den vierzehenden tac,
daz in al der wîle nie der schal gelac
von aller hende vröuden, der iemen solde pflegen.
Dô wart des küneges koste vil harte hôhe gewegen.

684

Des edelen wirtes mâge, als ez der künec gebôt,
die gâben durch sîn êre kleider und golt vil rôt,
ross und dar zuo silber vil manegem vremdem man.
Die dâ gâbe gerten, die schieden vrœlîchen dan.

685

Sîvrit, der hêrre ûzer Niderlant
mit tûsent sînen mannen, allez ir gewant,
daz si ze Rîne brâhten, wart allez hin gegeben.
und ouch diu ross mit setelen. Si kunden hêrlîche leben.

686

Ê daz man die rîche gâbe alle dâ verswanc,
die wider ze lande wolden, die dûhte des ze lanc.
Ez enwart nie geste mêre baz gepflegen.
Sô endete sich diu hôchzît. Daz wolde Gunthêr der degen.

wie Sîvrit heim ze lande mit sînem wîbe kom
{ 11 }
Wie Siegfried mit seinem Weib heimkehrte.

687

Dô die geste wâren alle dan gevarn,
dô sprach ze sînem gesinde Sigemundes barn:
„Wir suln uns ouch bereiten heim in mîniu lant!“
Liep was ez sînem wîbe, dô ez diu vrouwe rehte ervant.

688

Si sprach zuo zir manne: „Wenne sul wir varn?
Daz ich sô harte gâhe, daz heiz ich wol bewarn.
Mir suln ê mîne bruoder teilen mit diu lant.“
Leit was ez Sîvride, dô erz an Kriemhilde ervant.

689

Die fürsten zuo zim giengen und sprâchen alle drî:
„Nû wizzet daz, hêr Sîvrit, daz iu immer sî
mit triuwen unser dienest bereit, rehte unz an den tôt.“
Dô neic er den degenen, dô man imz sô güetlîch erbôt.

690

„Wir suln ouch mit iu teilen,“ sprach Gîselhêr daz kint,
„lant und bürge, die unser eigen sint,
und swaz der wîten rîche, ist uns undertân.
Der sult ir teil vil guoten mit samt Kriemhilde hân.“

691

Sun der Sigemundes zuo den fürsten sprach,
dô er der hêrren willen gehôrte und sach:
„Got lâz iu iuwer erbe immer sælec sîn,
und ouch die liute dar inne! Jâ getuot diu liebe wine mîn

692

des teiles wol ze râte, den ir ir woldet geben!
Dâ si sol tragen krône, und sol ich daz geleben,
si muoz werden rîcher danne iemen lebendiger sî.
Swaz ir sus gebietet, des bin ich iu dienestlîchen bî.“

693

Dô sprach diu vrouwe Kriemhilt: „Habt ir der erbe rât,
umb Burgonde degene sô lîhte ez niht enstât.
Si müge ein künec gerne füeren in sîn lant.
Jâ sol si mit mir teilen mîner lieben bruoder hant!“

694

Dô sprach der hêrre Gêrnôt: „Nû nim dir, swen dû wil.
Die gerne mit dir rîtent, der vindestû hie vil.
Von drîzec hundert recken wir geben dir tûsent man.
Die sîn dîn heimgesinde.“ Kriemhilt dô senden began

695

nâch Hagenen von Tronege und ouch nâch Ortwîn,
ob die und ouch ir mâge Kriemhilde wolden sîn.
Dô gewan dar umbe Hagene ein zornlîchez leben.
Er sprach: „Jâne mac uns Gunthêr ze werlde niemen gegeben!

696

Ander iuwer gesinde die lât iu volgen mite,
wand ir doch wol bekennet der Tronegære site:
wir müezen bî den künegen hier enhove bestân.
Wir suln in langer dienen, den wir al her gevolget hân!“

697

Daz liezen si belîben. Dô bereiten si sich dan.
Ir edel ingesinde vrou Kriemhilt zuo zir gewan
zwô und drîzec meide und fünf hundert man.
Eckewart der grâve, der volgete Sîvride dan.

698

Urloup si alle nâmen, beidiu ritter und kneht,
megede und vrouwen. Daz was michel reht.
Gescheiden küssende wurden si zehant.
Si rûmten vrœlîchen des künec Gunthêres lant.

699

Dô beleiten si ir mâge vil verre ûf den wegen.
Man hiez in allenthalben ir nahtselde legen,
swâ si si gerne nâmen, al durch der künege lant.
Dô wurden boten balde Sigemunde dan gesant,

700

daz er daz wizzen solde und ouch Sigelint,
daz sîn sun komen wolde und ouch vroun Uoten kint,
Kriemhilt diu vil schœne, von Wormez über Rîn.
Dône kunden in diu mære nimmêr lieber gesîn.

701

„Sô wol mich“, sprach dô Sigemunt, „daz ich gelebet hân,
daz Kriemhilt diu vil schœne sol hie gekrônet gân!
Des müezen wol getiuwert sîn al diu erbe mîn.
Mîn sun, der edel Sîvrit, sol hie selbe künec sîn!“

702

Dô gap diu edele Sigelint vil manegen samît rôt.
Silber und golt vil swære, daz was ir botenbrôt.
Si vröute sich der mære, diu si dô vernam.
Sich kleidete ir ingesinde mit vlîze, als in dô wol gezam.

703

Man sagete, wer dâ kœme mit im in daz lant.
Dô hiezen si gesidele rihten sâ zehant,
dar zuo er gekrônet vor vriunden solde gân.
Dô riten im engegene des künec Sigemundes man.

704

Ist iemen baz enpfangen, daz ist mir unbekant,
danne die helde mære in Sigemundes lant.
Sigelint die schœne Kriemhilt engegene reit
mit maneger vrouwen schœnen, ir volgeten ritter gemeit,

705

in einer tageweide, dâ man die geste sach.
Die kunden und die vremden liten ungemach,
unz daz si kômen zeiner bürge wît,
diu was geheizen Santen, dâ si krône truogen sît.

706

Mit lachendem munde Sigelint und Sigemunt
kusten Kriemhilt durch liebe ze maneger stunt,
und ouch Sîvrit. In was ir leit benomen.
Allez ir gesinde was in grôze willekomen.

707

Man bat die geste bringen für Sigemundes sal.
Die schœnen juncvrouwen, die huop man dâ ze tal
nider von den mœren. Dâ was vil manec man,
dô man den schœnen vrouwen mit vlîze dienen began.

708

Swie grôz ir hôchzît bî dem Rîne was bekant,
noch gap man den helden hie vil bezzer gewant,
denne si ie getruogen noch bî allen ir tagen.
Man mohte michel wunder von ir rîchheite sagen.

709

Dô si in ir hôhen êren sâzen und heten genuoc,
waz golt varwer gêren ir ingesinde truoc!
Perlen und edel gesteine verwieret wol dar în:
sus pflac ir vlîzeclîchen Sigelint diu edel künegîn.

710

Dô sprach vor sînen vriunden der hêrre Sigemunt:
„Den Sîvrides mâgen tuon ich allen kunt,
er sol vor disen recken die mîne krône tragen!“
Diu mære hôrten gerne die von Niderlande sagen.

711

Er bevalch im sîn gerihte, krône und ouch daz lant.
Sît was er aller meister, die er ze rehte vant,
und dar er rihten solde. Daz wart also getân,
daz man sêre vorhte der schœnen Kriemhilden man.

712

In disen grôzen êren lebete er, daz ist wâr,
und rihte under krône unz an daz zehende jâr,
daz diu vil schœne vrouwe einen sun gewan.
Daz was des küneges mâgen nâch ir willen ergân.

713

Den îlte man dô toufen und gap im einen namen,
Gunthêr, nâch sînem œheim. Des endorfte er sich niht schamen.
Geriet er nâch den mâgen, daz wære im wol ergân.
Dô zôch man in mit vlîze. Daz was von schulden getân.

714

In den selben zîten starp vrou Sigelint.
Dô hete den gewalt mit alle der edelen Uoten kint,
der sô rîchen vrouwen ob landen wol gezam.
Daz klagten dô genuoge, dô si der tôt von in genam.

715

Nû hete ouch dort bî Rîne, sô wir hœren sagen,
bî Gunthêr dem rîchen einen sun getragen
Prünhilt diu schœne in Burgonden lant.
durch des heldes liebe wart er Sîvrit genant.

716

Wie rehte vlîzeclîchen sîn man hüeten hiez!
Gunthêr der edele im magezogen liez,
die ez wol kunden ziehen ze einem biderbem man.
Hey, waz im ungelücke sît der vriunde an gewan!

717

Mære zallen zîten der wart vil geseit,
wie rehte lobelîchen die recken vil gemeit
lebten zallen stunden in Sîgemundes lant.
alsam tet ouch Gunthêr mit sînen mâgen ûz erkant.

718

Daz lant zen Nibelungen Sîvride diente hie,
rîcher sîner mâge wart noch deheiner nie,
und ouch Nibelunges recken und ir beider guot.
Des truoc der vil küene deste hœhern muot.

719

Hort den aller meisten, den helt ie gewan,
âne die es ê pflâgen, hete nû der küene man,
den er vor einem berge mit sîner hende erstreit.
Dar umbe sluoc er ze tôde vil manegen ritter gemeit.

720

Er hete den wunsch der êren. Und wære des niht geschehen,
sô müese man von schulden dem edelen recken jehen,
daz er wære ein der beste, der ûf ors ie gesaz.
Man vorhte sîne sterke, und tet vil billîche daz.

wie Gunthêr Sîvriden zuo der hôhgezît bat
{ 12 }
Wie Gunther Siegfried zu einem Hofgelage einlud.

721

Nû gedâhte ouch alle zîte daz Gunthêres wîp:
„Wie treit êt alsô hôhe vrou Kriemhilt den lîp?
Nû ist doch unser eigen Sîvrit ir man.
Er hât uns nû vil lange lützel dienste getân.“

722

Diz truoc si in ir herzen, und wart ouch wol verdeit.
Daz si ir vremede wâren, daz was ir harte leit.
Daz man ir sô selten diente von Sîvrides lant,
wâ von daz wære, daz hete si gerne bekant.

723

Si versuochtez an dem künege, ob ez möhte geschehen,
daz si Kriemhilde solde noch gesehen.
Sie reitez heinlîche, des si dâ hete muot.
Dô dûhte den hêrren diu rede mæzlîchen guot.

724

„Wie möhte wir si bringen“, sprach der künec rîch,
„her zuo disem lande? Daz wære unmügelîch.
Si sitzent uns ze verre. Ine getar sis niht gebitten.“
Des antwurte im vrou Prünhilt in einen listigen siten:

725

„Swie hôhe rîche wære deheines küneges man,
swaz im gebüte sîn hêrre, daz solde er doch niht lân.“
Des ersmielte Gunthêr, dô si daz gesprach.
Er enjach es im niht ze dienste, swie dicke er Sîvride sach.

726

Si sprach: „Vil lieber hêrre, durch den willen mîn,
sô hilf mir, daz Sîvrit und ouch diu swester dîn
kumen zuo disem lande, daz wir si hie gesehen!
Sône kunde mir ze wâre nimmêr lieber geschehen.

727

Dîner swester zühte und ir wol gezogener muot,
swenne ich dar an gedenke, wie sanfte mir daz tuot,
wie wir ensamt sâzen, dô ich êrste wart dîn wîp!
Si mac mir êren minnen des küenen Sîvrides lîp.“

728

Si gerte es alsô lange, unz daz der künec sprach:
„Nû wizzet, daz ich geste sô gerne nie gesach.
Ir müget mich sanfte vlêgen. Ich wil die boten mîn
nâch in beiden senden, daz si uns komen an den Rîn.“

729

Dô sprach diu küneginne: „Sô sult ir mir sagen,
wenne ir si welt besenden, oder in welchen tagen
unser lieben vriunde suln komen in daz lant.
Die ir dar wellet senden, die lât mir werden bekant.“

730

„Daz tuon ich“, sprach der fürste. „drîzec mîner man
wil ich dar lâzen rîten.“ Die hiez er für sich gân.
Bî den enbôt er mære in daz Sîvrides lant.
Ze liebe gap in Prünhilt vil harte hêrlîch gewant.

731

Dô sprach der künec Gunthêr: „Ir recken sult von mir sagen,
al daz ich dar enbiete, sult ir niht verdagen,
dem starken Sîvride und ouch der swester mîn,
daz in endarf ze der werlde niemen holder gesîn.

732

Unde bittet, daz si beide zuo uns komen an den Rîn.
Daz welle ich und mîn vrouwe immer dienende sîn.
Vor disen sunewenden sol er und sîne man
sehen hie vil manegen, der im vil grôzer êren gan.

733

Dem künege Sigemunde saget den dienest mîn,
daz ich und die mîne im immer wæge sîn,
und saget ouch mîner swester, daz si niht lâze daz,
sine rîte zuo zir vriunden! Ir zam nie hôchgezîten baz.“

734

Prünhilt und Uote und swaz man dâ vrouwen vant,
die enbuten alle ir dienest in Sîvrides lant
den minneclîchen vrouwen und manegem küenem man.
Mit küneges vriunde râte die boten huoben sich dan.

735

Si fuoren reislîche. Ir pfert und ir gewant,
daz was in komen allen. Dô rûmten si daz lant.
In zogete wol ir verte, dar si dâ wolden varn.
Der künec hiez mit geleite die boten vlîzeclîche bewarn.

736

Si kômen in drîn wochen geriten in daz lant
ze Nibelunges bürge, dar wâren si gesant.
Ze Norwæge in der marke, dâ funden si den degen.
Diu ross den boten wâren vil müede von den langen wegen.

737

Sîvride und Kriemhilt wart beiden dô geseit,
daz ritter dar komen wæren, die truogen sölchiu kleit,
sam man zen Burgonden dô der site pflac.
Si spranc von einem bette, dar an si ruowende lac.

738

Dô bat si zeinem venster eine maget gân.
Diu sach den küenen Gêren an dem hove stân,
in und die gesellen, die wâren dar gesant.
Gegen ir herzeleide wie liebiu mære si bevant!

739

Si sprach zuo dem künege: „Nu seht ir, wâ si stânt,
die mit dem starken Gêren ûf dem hove gânt,
die uns mîn bruoder Gunthêr sendet nider den Rîn.“
Dô sprach der starke Sîvrit: „Die suln uns willekomen sîn!“

740

Allez daz gesinde lief, dâ man si sach.
Ir ietslîch besunder vil güetlîche sprach
daz beste daz si kunden ze den boten dô.
Sigemunt der hêrre, der was ir kunfte harte vrô.

741

Dô wart geherberget Gêre und sîne man.
Diu ross hiez man behalten. Die boten giengen dan,
dâ der hêrre Sîvrit bî Kriemhilde saz.
In was ze hove erloubet, dâ von sô tâten si daz.

742

Der wirt mit sînem wîbe stuont ûf sâ zehant.
Wol wart enpfangen Gêre von Burgonden lant
mit sînen hergesellen, die Gunthêres man.
Gêren den vil rîchen bat man an den sedel gân.

743

„Erloubet uns die botschaft, ê daz wir sitzen gân.
Uns wegemüede geste, lât uns die wîle stân!
Wir süln iu sagen mære, waz iu enboten hât
Gunthêr und Prünhilt, ir dinc vil hôhenlîche stât,

744

und ouch waz vrou Uote, iuwer muoter, her enbôt,
Gîselhêr der junge und ouch hêr Gêrnôt,
und iuwer besten mâge. Die habent uns her gesant.
Die enbietent iu ir dienest ûzer Gunthêres lant.“

745

„Nû lôn in got“, sprach Sîvrit, „ich getrûwe in harte wol
triuwen und guotes, alsô man vriunden sol.
Alsam tuot ouch ir swester. Ir sult uns mære sagen,
ob unser lieben vriunde dâ heime iht hôhes muotes tragen.

746

Sît daz wir von in schieden, hât in iemen iht getân,
den mînen konemâgen, daz sult ir mich wizzen lân.
Daz wil ich in immer mit triuwen helfen tragen,
unze daz ir vîande den mînen dienest müezen klagen.“

747

Dô sprach der marcgrâve Gêre, ein recke vil guot:
„Si sint in allen tugenden sô rehte hôch gemuot.
Si ladent iuch ze Rîne zeiner hôchgezît.
Si sæhen iuch vil gerne, daz ir des âne zwîvel sît.

748

Unde bittent mîne vrouwen, si sul mit iu dar komen.
Swenne daz der winter ein ende habe genomen,
vor disen sunewenden, sô wolden si iuch sehen.“
Dô sprach der starke Sîvrit: „Daz kunde müelîch geschehen.“

749

Dô sprach aber Gêre von Burgonden lant:
„Iuwer muoter Uote hât iuch gemant,
Gêrnôt und Gîselhêr, ir sult in niht versagen.
Daz ir in sît sô verre, daz hœre ich tegelîche klagen.

750

Prünhilt, mîn vrouwe, und alle ir magedîn,
die vröunt sich der mære. Und ob ez müge sîn,
daz si iuch noch gesæhen, daz gæbe in hôhen muot.“
Dô dûhten disiu mære die schœnen Kriemhilde guot.

751

Gêre was ir sippe. Der wirt in sitzen hiez.
Den gesten hiez er schenken, niht langer man daz liez.
Dô was ouch komen Sigemunt, dâ er die boten sach.
Der hêrre vriuntlîche zuo den Burgonden sprach:

752

„Sît willekomen, ir recken, ir Gunthêres man!
Sît daz Kriemhilt ze wîbe gewan
Sîvrit der mîn sun, man solde iuch dicker sehen
hie in disem lande, wolt ir uns vriuntschefte jehen.“

753

Si sprâchen, swenne er wolde, si solden gerne komen.
In wart ir michel müede mit vröuden vil benomen.
die boten bat man sitzen. Spîse man in truoc.
Dô hiez dô geben Sîvrit nâch sînen vriunden genuoc.

754

Si muosen dâ belîben bevollen niun tage.
Des heten endeclîchen die snellen ritter klage,
daz si niht wider solden rîten in ir lant.
Dô hete der künec Sîvrit nâch sînen vriunden gesant.

755

Er vrâgte, waz si rieten, ob si an den Rîn:
„Ez hât nâch mir gesendet Gunthêr, der vriunt mîn,
er und sîne mâge, durch eine hôchgezît.
Nû kœme ich im vil gerne, wand daz sîn lant ze verre lît.

756

Und bittent Kriemhilde, daz si mit mir var.
Nû râtet, liebe vriunde, wie sol ich komen dar?
Und solde ich herverten durch si in drîzec lant,
dâ müese in dienen gerne hin diu Sîvrides hant!“

757

Dô sprâchen sîne recken: „Habt ir der reise muot
hin zer hôchgezîte, wir râten, waz ir tuot:
ir sult mit tûsent recken rîten an den Rîn.
Sô müget ir wol mit êren dâ zen Burgonden sîn.“

758

Dô sprach von Niderlande der hêrre Sigemunt:
„Welt ir zer hôchgezîte, wan tuot ir mir daz kunt?
Ob ez iu niht versmâhet, sô rît ich mit iu dar.
Ich füere hundert degene. Dâ mite mêre ich iuwer schar.“

759

„Und welt ir mit uns rîten, vil lieber vater mîn“,
sprach der küene Sîvrit, „vil vrô sol ich des sîn.
Inner tagen zwelven sô rûm ich mîniu lant.“
Alle die es dô gerten, den gap man ross und ouch gewant.

760

Dô der künec edele der reise hete muot,
dô hiez man wider rîten die snellen boten guot.
Den sînen konemâgen enbôt er an den Rîn,
er wolde harte gerne dâ zir hôchgezîten sîn.

761

Sîvrit und Kriemhilt, alsô wir hœren sagen,
sô vil den boten gâben, daz ez niht mohten tragen
ir mœre heim ze lande. Er was ein rîcher man.
Ir starken soumære, die treip man vrœlîche dan.

762

Ir volc kleidete Sîvrit und ouch Sigemunt.
Eckewart der grâve, der hiez an der stunt
vrouwen kleider suochen, diu besten diu man vant
oder iender kunde erwerben über al Sîvrides lant.

763

Die setele zuo den schilden bereiten man began.
Rittern und vrouwen, die mit in solden dan,
den gap man swaz si wolden, daz in niht gebrast.
Dô brâhte er sînen vriunden vil manegen hêrlîchen gast.

764

Den boten zogete sêre ze lande ûf den wegen.
Dô kom zen Burgonden Gêre der degen.
Er wart vil wol enpfangen. Dô erbeizten si ze tal
von rossen und von mœren für den Gîselhêres sal.

765

Die tumben und die wîsen giengen, sô man tuot,
vrâgen umbe mære. Dô sprach der ritter guot:
„Swenne ich si sage dem künege, dâ hœret si zehant!“
Er gie mit den gesellen, dâ er Gunthêren vant.

766

Der künec von grôzer liebe von dem sedele spranc.
Daz si sô balde kômen, des sagte in dô danc
Prünhilt diu schœne. Gunthêr zem boten sprach:
„Wie gehabt sich Sîvrit von dem mir liebes vil geschach?“

767

Dô sprach der küene Gêre: „Dâ wart er vröuden rôt,
er und iuwer swester. Nie vriunde baz enbôt
sô getriuwiu mære deheiner slahte man,
als iu der hêrre Sîvrit und ouch sîn vater hât getân.“

768

Dô sprach ze dem marcgrâven des edelen küneges wîp:
„Nû sagt mir, kumet uns Kriemhilt? Hât noch ir schœner lîp
behalten iht der zühte, der si wol kunde pflegen?“
„Si kumt iu sicherlîchen,“ sô sprach dô Gêre der degen.

769

Uote bat dô drâte die boten für sich gân.
Dô mohte man an ir vrâge harte wol verstân,
daz si daz hôrte gerne, was Kriemhilt noch gesunt.
Er sagete, wie er si fünde, und daz si kœme in kurzer stunt.

770

Ouch wart von in diu gâbe ze hove niht verdeit,
die in gap hêr Sîvrit, golt und ouch diu kleit.
Daz brâhte man ze sehene der drîer künege man.
Der ir vil grôzen milte wart in danken getân.

771

„Er mac“, sprach dô Hagene, „von im sanfte geben.
Er enkunde ez niht verswenden, und solde er immer leben.
Hort der Nibelunge beslozzen hât sîn hant.
Hey, solde er kumen immer in der Burgonden lant!“

772

Allez daz gesinde vröute sich dar zuo,
daz si komen solden. Spâte und vruo
jâ wâren vil unmüezec der drîer künege man.
Vil manec hergesidele man dô rihten began.

773

Hûnolt der küene und Sindolt der degen,
die heten vil unmuoze, die zît si muosen pflegen
truhsæzen und schenken ze rihten manege banc.
Des half in ouch hêr Ortwîn. Des sagete in Gunthêr danc.

774

Rûmolt der kuchenmeister, wie wol er rihte sît
die sînen undertânen! Vil manegen kezzel wît,
heven und pfannen, hey, waz man der dâ vant!
Dô beriete man den spîse, die dâ kômen in daz lant.

wie si ze der hôhgezît vuoren
{ 13 }
Wie sie zum Hofgelage fuhren.

775

Alle ir unmuoze die lâze wir nû sîn,
unde sagen, wie vrouwe Kriemhilt und ouch ir magedîn
gegen Rîne fuoren von Nibelunge lant.
Nie getruogen mœre sô manec rîche gewant.

776

Vil der soumschrîne man schicte zuo den wegen.
Dô reit mit sînen vriunden Sîvrit der degen,
und ouch diu küneginne, dar si heten vröuden wân.
Sît wart ez in allen ze grôzem leide getân.

777

Dâ heime si dô liezen Sîvrides kindelîn
und sun Kriemhilde. Daz muose êt also sîn.
Von ir hovereise im erstuont michel sêr.
Sîn vater und sîn muoter gesach daz kindel nimmêr mêr.

778

Dô reit ouch mit in dannen der hêrre Sigemunt.
Solde er rehte wizzen, wie ez nâch der stunt
zer hôchgezîte ergienge, er hete ir niht gesehen.
Im kunde ze lieben vriunden nimmêr leider geschehen.

779

Die boten man für sande, die diu mære sageten dar.
Dô reit ouch in engegen mit wunneclîcher schar
vil der Uoten vriunde und der Gunthêres man.
Der wirt gegen sînen gesten vil sêre sich vlîzen began.

780

Er gie zuo Prünhilt, dâ er die sitzen vant.
„Wie enpfie êt iuch mîn swester, dô ir kômet in mîn lant?
Alsam sult ir enpfâhen daz Sîvrides wîp!“
„Daz tuon ich von schulden. Gerne holt ist ir mîn lîp.“

781

Dô sprach der künec rîche: „Si kument morgen vruo.
Welt ir si enpfâhen, dâ grîfet balde zuo,
daz wir ir in der bürge niht erbîten hie.
Mir kômen in allen wîlen sô rehte liebe geste nie.“

782

Ir megde und ir vrouwen hiez si dô sâ zehant
suochen guotiu kleidet, die besten die man vant,
die ir ingesinde vor gesten solden tragen.
Daz tâten si doch gerne. Daz mac man lîhte gesagen.

783

Ouch îlten in dô dienen die Gunthêres man.
Alle sîne recken der wirt zuo sich gewan.
Dô reit diu küneginne vil hêrlîche dan.
Dâ wart vil michel grüezen die liebe geste getân.

784

Mit wie getânen vröuden man die geste enpfie!
Si dûhte, daz vrou Kriemhilt vroun Prünhilde nie
sô rehte wol enpfienge in Burgonde lant.
Die si ê niht gesâhen, den wart vil hôher muot erkant.

785

Nû was ouch komen Sîvrit mit den sînen man.
Man sach die helde wenden wider unde dan
des veldes allenthalben mit ungefüegen scharn.
Dringen und stouben kunde dâ niemen bewarn.

786

Dô der wirt des landes Sîvride sach
und ouch Sigemunde, wie minneclîch er dô sprach:
„Nû sît mir grôze willekomen und al den vriunden mîn!
Der iuwer hovereise sul wir hôchgemuote sîn.“

787

„Nû lôn iu got“, sprach Sigemunt, der êre gernde man,
„sît daz iuch mîn sun Sîvrit ze vriunde gewan,
dô rieten mîne sinne, daz ich iuch solde sehen.“
Dô sprach der künec Gunthêr: „Mir ist liebe dar an geschehen.“

788

Sîvrit wart enpfangen, als im dâ wol gezam,
Mit vil grôzen êren, was im dâ niemen gram.
Des half mit grôzen zühten Gîselhêr und Gêrnôt.
Ich wæne, man ez gesten noch nie sô güetlîch erbôt.

789

Dô nâhten zuo ein ander der zweier künege wîp.
Dâ wart vil setel lære. Manec schœner vrouwen lîp
wart von helde handen erhaben ûf daz gras.
Die vrouwen gerne dienten, waz der unmüezegen was!

790

Dô giengen zuo ein ander diu minneclîchen wîp.
Des was in grôzen vröuden vil maneges ritters lîp,
daz ir beider grüezen sô schône wart getân.
Dô sach man vil der recken bî ir juncvrouwen stân.

791

Daz hêrlîche gesinde, daz vie sich bî der hant.
In zühte grôze nîgen, des man vil dâ vant,
und küssen minneclîchen von vrouwen wolgetân.
Daz was liep ze sehene Gunthêres und Sîvrides man.

792

Sine biten dâ niht langer. Si riten zuo der stat.
Der wirt daz sînen gesten wol erzeigen bat,
daz man si gerne sæhe in Burgonden lant.
Vil manegen puneiz rîchen man vor den juncvrouwen vant.

793

Ûzer Tronege Hagene und ouch Ortwîn,
daz si gewaldec wæren, daz tâten si wol schîn.
Swaz si gebieten wolden, daz torste man niht lân.
Von in wart michel dienest den lieben gesten getân.

794

Vil schilde hôrte man hellen dâ ze dem bürgetor
von stichen und von stœzen. Lange habte der vor
der wirt mit sînen gesten, ê si kômen drîn.
Jâ gienc in diu stunde mit grôzer kurzewîle hin.

795

Für den palas rîchen mit vröuden sie dô riten.
Manegen pfellel spæhen, guot und wol gesniten,
sach man über setel den vrouwen wolgetân
allenthalben hangen. Dô kômen Gunthêres man.

796

Die geste hiez man füeren balde an ir gemach.
Under wîlen blicken man Prünhilde sach
an vroun Kriemhilde, diu schœne was genuoc.
Ir varwe gegen dem golde den glanz vil hêrlîchen truoc.

797

Allenthalben schallen ze Wormez in der stat
hôrte manz gesinde. Gunthêr dô bat
Dancwarten, sînen marschalc, daz er ir solde pflegen.
Dô begunde er daz gesinde harte güetlîche legen.

798

Dar ûze und ouch dar inne spîsen man si lie.
Jâ wart vremder geste baz gepflegen nie.
Alles des si gerten, des was man in bereit.
Der künec der was sô rîche, daz dâ niemen niht wart verseit.

799

Man diente in vriuntlîche und ân allen haz.
Der wirt dô ze tische mit sînen gesten saz.
Man bat Sîvride sitzen, als er hete ê getân.
Dô gie mit im ze sedele vil manec wætlîcher man.

800

Wol zwelf hundert recken an dem ringe sîn
dâ ze tische sâzen. Prünhilt diu künegîn
gedâhte, daz eigenholde niht rîcher kunde wesen.
Si was im noch sô wæge, daz si in gerne lie genesen.

801

An einem âbende, dâ der künec saz,
vil der rîchen kleider wart von wîne naz,
dâ die schenken solden zuo den tischen gân.
Dâ wart vil voller dienest mit grôzem vlîze getân.

802

Sô man ze hôchzîten lange hât gepflegen,
vrouwen und megde, die hiez man schône legen.
Von swannen si dar kômen, der wirt in willen truoc.
Mit güetlîchen êren man gap in allen genuoc.

803

Dô diu naht hete ende und der tac erschein,
ûz den soumschrînen vil manec edel stein
erlûhte in guoter wæte, die ruorte vrouwen hant.
Dô wart dar für gesuochet vil manec hêrlîch gewant.

804

Ê daz vol ertagete, dô kômen für den sal
vil ritter unde knehte. Dô huop sich aber der schal
vor einer vrüemesse, die man dem künege sanc.
Dâ riten junge helde, dazs in der künec sagete danc.

805

Vil krefteclîche lûte manec pûsûn erdôz.
Von trumben und von floyten wart der schal sô grôz,
daz Wormez diu vil wîte dar nâch lûte erschal.
Die hôchgemuoten helde ze rossen kômen über al.

806

Dô huop sich in dem lande vil harte hôhe ein spil
von manegem guotem recken. Der sach man dâ vil,
den ir tumbiu herze gâben hôhen huot.
Dâ sach man under schilde vil manegen zieren ritter guot.

807

In diu venster sâzen diu hêrlîchiu wîp
und vil der schœnen megede. Gezieret was ir lîp.
Si sâhen kurzewîle von manegen küenem man.
Der wirt mit sînen vriunden selbe rîten began.

808

Sus vertriben si die wîle, diu dûhte niht lanc.
Man hôrte dâ zem tuome maneger glocken klanc.
Dô kômen in die mœre. Die vrouwen riten dan.
Den edelen küneginnen, den volgete manec küene man.

809

Si stuonden vor dem münster nider ûf daz gras.
Prünhilt ir gesten dannoch vil wæge was.
Sie giengen under krône in daz münster wît.
Diu liebe wart sît gescheiden. Daz vrumte grœzlîcher nît.

810

Dô si gehôrten messe, si fuoren wider dan
mit vil manegen êren. Man sach si sider gân
ze tische vrœlîche. Ir vröude nie gelac
dâ zer hôchgezîte, unz an den einleften tac.

wie die küneginne ein ander schulten
{ 14 }
Wie die Königinnen aneinander gerieten.

811

Vor einer vesperzîte huop sich grôz ungemach,
daz von manegem recken ûf dem hove geschach.
Si pflâgen ritterschefte durch kurzewîle wân.
Dô liefen dar durch schouwen vil manec wîp unde man.

812

Ze samene dô gesâzen die küneginne rîch.
Si gedâhten zweier recken, die wâren lobelîch.
Dô sprach diu schœne Kriemhilt: „Ich hân einen man,
daz elliu disiu rîche ze sînen handen solden stân!“

813

Dô sprach diu vrou Prünhilt: „Wie kunde daz gesîn?
Ob ander niemen lebte wan sîn unde dîn,
sô möhten im diu rîche wol wesen undertân.
Die wîle lebt Gunthêr, sô kunde ez nimmêr ergân!“

814

Dô sprach aber Kriemhilt: „Nû sihestû, wie er stât,
wie rehte hêrlîche er vor den recken gât,
alsam der liehte mâne vor den sternen tuot!
Des muoz ich von schulden tragen vrœlîchen muot.“

815

Dô sprach diu vrou Prünhilt: „Swie wætlîch sî dîn man,
swie edele und swie schœne, sô muost dû vor im lân
Gunthêr den recken, den edelen bruoder dîn.
Der muoz vor allen künegen, daz wizzest wærlîche, sîn.“

816

Dô sprach vrou Kriemhilt: „Sô tiuwer ist wol mîn man,
daz ich in âne schulde niht gelobet hân.
An vil manegen dingen sô ist sîn êre grôz.
Geloubestû des, Prünhilt, er ist wol Gunthêres genôz.“

817

„Jâne solt dû mir ez, Kriemhilt, ze arge niht verstân,
wand ich âne schulde die rede niht hân getân!
Ich hôrte si jehen beide, dô ich si aller êrste sach,
und dâ des küneges wille an mînem lîbe geschach,

818

und dâ er mîne minne sô ritterlîch gewan,
dâ jach des selbe Sîvrit, er wære sküneges man.
Des hân ich in für eigen, sît ich es in hôrte jehen.“
Dô sprach diu schœne Kriemhilt: „So wære mir übele geschehen.

819

Wie heten sô geworben die edelen bruoder mîn,
daz ich eigen mannes wine solde sîn?
Des wil ich dich, Prünhilt, vil vriuntlîche bitten,
daz dû die rede lâzest durch mich mit güetlîchen siten.“

820

„Jâne mac ir niht gelâzen!“ sprach des küneges wîp.
„Zwiu solde ich verkiesen sô maneges ritters lîp,
der uns mit dem degene dienestlîch ist undertân?“
Kriemhilt diu vil schœne vil sêre zürnen began.

821

„Dû muost in verkiesen, daz er dir immer bî
wone deheiner dienste. Er ist tiuwerer danne sî
Gunthêr, der mîn bruoder, der vil edel man.
Dû solt mich des erlâzen, daz ich von dir vernomen hân!

822

Unde nimet mich immer wunder, sît er dîn eigen ist,
und daz über uns beide sô gewaltec bist,
daz er dir sô lange den zins versezzen hât.
Der dîner übermüete solde ich von rehte haben rât!“

823

„Du ziuhest dich ze hôhe“, sprach des küneges wîp.
„Nû wil ich sehen gerne, ob man den dînen lîp
habe ze sölchen êren, sô man den mînen tuot!“
Die vrouwen wurden beide vil sêre zornec gemuot.

824

Dô sprach diu vrouwe Kriemhilt: „Daz muoz êt nû geschehen.
Sît dû mînes mannes für eigen hâst verjehen,
nû müezen hiute kiesen der beider künege man,
ob ich vor küneges wîbe zem münster türre gân.

825

Dû muost dâ hiute schouwen, daz ich bin edel vrî,
und daz mîn man ist tiuwerer danne der dîne sî.
Dâ mit wil ich selbe niht bescholten sîn.
Dû solt noch hînte kiesen, wie diu eigene diu dîn

826

ze hove gê vor recken in Burgonden lant.
Ich wil selbe tiuwerer wesen, danne iemen habe bekant
deheine küneginne, diu krône ie her getruoc!“
Dô huop sich under den vrouwen des grôzen nîdes genuoc.

827

Dô sprach aber Prünhilt: „Wiltû niht eigen sîn,
sô muostû dich scheiden mit den vrouwen dîn
von mînem ingesinde, dâ wir zem münster gân.“
Des antwurte Kriemhilt: „Entriuwen, daz sol sîn getân!“

828

„Nû kleidet iuch, mîne meide“, sprach Sîvrides wîp.
„Ez muoz âne schande belîben hie mîn lîp.
Ir sult wol lâzen schouwen, und habt ir rîche wât.
Si mac sîn gerne lougen, des Prünhilt verjehen hât.“

829

Man mohte in lîhte râten. Si suochten rîchiu kleit.
Dâ wart vil wold gezieret manec vrouwe unde meit.
Dô gie mit ir gesinde des edelen küneges wîp,
dô wart ouch wol gezieret der schœnen Kriemhilden lîp,

830

mit drîn und vierzec meiden, die brâhte si an den Rîn.
Die truogen liehte pfelle geworht in Arâbî,
sus kômen zuo dem münster die meide wolgetân.
Ir warten vor dem hûse alle Sîvrides man.

831

Die liute nam des wunder, wâ von daz geschach,
daz man die küneginne alsô gescheiden sach,
daz si bî ein ander niht giengen alsam ê.
Dâ von wart manegem degene sît vil sorclîchen wê.

832

Hie stuont vor dem münster daz Gunthêres wîp.
Dô hete kurzewîle vil maneges ritters lîp
mit den schœnen vrouwen, der si dâ nâmen war.
Dô kom diu vrou Kriemhilt mit maneger hêrlîchen schar.

833

Swaz kleider ie getruogen edeler ritter kint,
wider ir gesinde daz was gar ein wint.
Si was sô rîch des guotes, daz drîzec künege wîp
ez möhten niht erziugen, daz tæte Kriemhilde lîp.

834

Ob iemen wünschen solde, der kunde niht gesagen,
daz man sô rîchiu kleider gesæhe ie mêre tragen,
alsô dâ ze stunden truogen ir meide wolgetân.
Wan ze leide Prünhilde, ez hete Kriemhilt verlân.

835

Ze samne si dô kômen vor dem münster wît.
Ez tet diu hûsvrouwe durch einen grôzen nît,
si hiez vil übellîche Kriemhilde stille stân:
„Jâ sol vor küneges wîbe nimmêr eigen diu gegân!“

836

Dô sprach diu schœne Kriemhilt, zornec was ir muot:
„Kundestû noch geswîgen, daz wære dir guot.
Dû hâst geschendet selbe den dînen schœnen lîp.
Wie möhte mannes kebse werden immer küneges wîp?“

837

„Wen hâstû hie verkebset?“ sprach dô des küneges wîp.
„Daz tuon ich“, sprach Kriemhilt, „den dînen schœnen lîp.
Den minnete êrste Sîvrit, der mîn vil lieber man.
Jâne was ez niht mîn bruoder, der dir den magetuom an gewan!

838

War kômen dîne sinne? Ez was ein arger list.
Zwiu lieze dû in minnen, sît er dîn eigen ist?
Ich hœre dich“, sprach Kriemhilt, „ân alle schulde klagen.“
„Entriuwen“, sprach dô Prünhilt, „daz wil ich Gunthêre sagen!“

839

„Waz mac mir daz gewerren? Dîn übermuot dich hat betrogen.
Dû hâst mich ze dieneste mit rede dich an gezogen.
Daz wizze in rehten triuwen, ez ist mir immer leit.
Getriuwer heinlîche sol ich dir wesen unbereit!“

840

Prünhilt dô weinte. Kriemhilt niht langer lie,
vor des küneges wîbe inz münster si dô gie
mit ir ingesinde. Dâ huop sich grôzer haz.
Des wurden ir liehtiu ougen vil starke trüebe und naz.

841

Swie vil man gote gediente oder iemen dâ gesanc,
des dûhte Prünhilde diu wîle gar ze lanc,
wand ir was vil trüebe der lîp und ouch der muot.
Des muose sît engelten manec helt küen und guot.

842

Prünhilt gie mit ir vrouwen für daz münster stân.
Si gedâhte: „Mich muos Kriemhilt mêre hœren lân,
des mich so lûte zihet daz wortræze wîp.
Hât er sich es gerüemet, ez gât an Sîvrides lîp.“

843

Nû kom diu edele Kriemhilt mit manegem küenem man.
Dô sprach diu vrouwe Prünhilt: „Ir sult noch stille stân.
Ir jahet mîn ze kebesen. Daz sult ir mich lâzen sehen.
Mir ist von iuwern sprüchen, daz wizzet, leide geschehen.“

844

Dô sprach diu vrouwe Kriemhilt: „Ir möhtet mich lâzen gân.
Ich erziuge ez mit dem golde, daz ich an der hende hân.
Daz brâhte mir mîn vriedel, dô er êrste bî mir lac.“
Nie gelebte Prünhilt deheinen leidern tac.

845

Si sprach: „Diz golt vil edele, daz wart mir verstoln
und ist mich harte lange vil übele vor verholn.
Ich kum es an ein ende, wer mir ez hât genomen.“
Die vrouwen wâren beide in grôz ungemüete komen.

846

Dô sprach aber Kriemhilt: „Ine wils niht wesen diep.
Dû möhtes wol gedaget hân, und wære dir êre liep.
Ich erziuge ez mit dem gürtel, den ich hie umbe hân,
daz ich niht liuge. Jâ wart mîn Sîvrit dîn man!“

847

Von Ninnivê der sîden si den porten truoc
mit edelem gesteine. Jâ was er guot genuoc.
Dô den gesach vrou Prünhilt, weinen si began.
Daz muose vreischen Gunthêr und alle Burgonden man.

848

Dô sprach diu küneginne: „Heizet here gân
den fürsten vonme Rîne! Ich wil in hœren lân,
wie mich hât gehœnet sîner swester lîp.
Si sagt hie offenlîche, ich sî Sîvrides wîp!“

849

Der künec kom mit recken. Weinen er dô sach
die sîne triutinne. Wie güetlîch er sprach:
„Sagt mir, liebiu vrouwe, wer hât iu iht getân?“
Si sprach zuo dem künege: „Ich muoz unvrœlîche stân.

850

Von allen mînen êren mich diu swester dîn
gerne wolde scheiden. Dir sol geklaget sîn,
si giht, mich habe gekebset Sîvrit, ir man.“
Dô sprach der künec Gunthêr: „Sô hete si übele getân.“

851

„Si treit hie mînen gürtel, den ich hân verlorn,
und mîn golt, daz rôte. Daz ich ie wart geborn,
daz riuwet mich vil sêre, dûne beredest, künec, mich
der vil grôzen schande. Daz diene ich, künec, immer umbe dich.“

852

Dô sprach der künec Gunthêr: „Er sol her für gân.
Und hât er sichs gerüemet, daz sol er hœren lân,
oder sîn muoz lougen der helt von Niderlant.“
Den Kriemhilde vriedel, den hiez man bringen sâ zehant.

853

Dô der hêrre Sîvrit die ungemüeten sach,
er enwesse niht der mære. Wie balde er dô sprach:
„Waz weinent dise vrouwen? Daz hete ich gerne erkant,
oder von welchen schulden mich der künec habe besant.“

854

Dô sprach der künec Gunthêr: „Jâ ist mir harte leit!
Mir hât mîn vrouwe Prünhilt ein mære hie geseit,
dû habes dich des gerüemet, daz dû ir schœnen lîp
aller êrst habes geminnet. Daz sagt Kriemhilt, dîn wîp.“

855

Dô sprach der starke Sîvrit: „Und hât si daz geseit,
ê daz ich erwinde, ez sol ir werden leit.
Und wil dir daz enpfüeren vor allen dînen man
mit mînen hôhen eiden, daz ich es niht gesaget hân.“

856

Dô sprach der künec von Rîne: „daz soltû lâzen sehen!
Den eit, den dû dâ biutest, und mac der hie geschehen,
aller valschen dinge, der wil ich dich ledec lân.“
Dô hiez man zuo dem ringe die stolzen Burgonden stân.

857

Sîvrit der vil küene zem eide bôt die hant.
Dô sprach der künec rîche: „Mir ist sô wol bekant
iuwer grôz unschulde, ich wil iu ledec lân,
des iuch mîn swester zîhet, daz ir des niene habt getân!“

858

Dô sprach aber Sîvrit: „Geniuzet es mîn wîp,
daz si hât betrüebet den Prünhilde lîp,
daz ist mir sicherlîchen âne mâze leit!“
Dô sâhen zuo zein ander die guoten ritter gemeit.

859

„Man sol vrouwen ziehen“, sprach Sîvrit der degen,
„daz si üppeclîche sprüche lâzen under wegen.
Verbiut ez dînem wîbe, der mînen tuon ich sam.
Ir grôzen ungefuoge ich mich wærlîche scham.“

860

Mit rede was gescheiden manec schœne wîp.
Dô trûrete alsô sêre der Prünhilde lîp,
daz ez barmen muose den Gunthêres man.
Dô kom von Tronege Hagene zuo sîner vrouwen gegân.

861

Er vrâgete, waz ir wære. Weinende er si vant.
Dô sagte si im diu mære. Er lobte ir sâ zehant,
daz ez erarnen müese der Kriemhilde man,
oder er wolde nimmêr dar umbe vrœlîch gestân.

862

Zuo der rede kom dô Ortwîn und Gêrnôt,
dâ die helde rieten den Sîvrides tôt.
Dar zuo kom ouch Gîselhêr, der edelen Uoten kint.
Dô er ir rede gehôrte, er sprach getriuwelîche sint:

863

„Ir vil guoten recken, war umbe tuot ir daz?
Jâne gediente Sîvrit nie alsölchen haz,
daz er dar umbe solde verliesen sînen lîp!
Jâ ist es harte lîhte, dar umbe zürnent diu wîp!“

864

„Suln wir gouche ziehen?“ sprach aber Hagene.
„Des habent vil lützel êre sô guote degene,
daz er sich hât gerüemet der lieben vrouwen mîn.
Dar umbe wil ich sterben, ez engê im an das leben sîn.“

865

Dô sprach der künec selbe: „Er enhât uns niht getân
niuwan guot und êre. Man sol in leben lân.
Waz touc, ob ich dem recken nû wære gehaz?
Er was ie getriuwe, und tet vil willeclîche daz.“

866

Dô sprach von Metzen der degen Ortwîn:
„Jâne mac in niht gehelfen diu grôze sterke sîn!
Erloubet mir ez mîn hêrre, ich getuo im leit.“
Dô heten im die helde âne schulde widerseit.

867

Sîn gevolgete niemen, niuwan daz Hagene
geriet in allen zîten Gunthêr dem degene,
ob Sîvrit niht enlebte, sô würde im undertân
vil der künege lande. Der helt des trûren began.

868

Dô liezen siz belîben. Spiln man dô sach.
Hey, waz man starker schefte vor dem münster brach
vor Sîvrides wîbe al zuo dem sale dan!
Dô wâren in unmuote alle Gunthêres man.

869

Der künec sprach: „Lât belîben den mortlîchen zorn!
Er ist uns ze sælden und ze êren geborn.
Ouch ist sô grimme starc der wundern küene man,
ob er sîn inne werde, sô torste in niemen bestân.“

870

„Nein er“, sprach dô Hagene, „ir müget wol stille dagen.
Ich getrûwez heinlîche alsô wol an getragen.
Daz Prünhilde weinen sol im wesen leit.
Jâ sol im von Hagenen immer wesen widerseit!“

871

Dô sprach der künec Gunthêr: „Wie mac daz ergân?“
Des antwurte Hagene: „Ich wilz iuch hœren lân:
wir heizen boten zuo zuns in diz lant
widersagen offenlîche, die hie niemen sîn bekant.

872

Sô jeht ir vor den gesten, daz ir und iuwer man
wellet herverten. Alsô daz ist getân,
sô lobt er iu dar dienen. Des verliuset er den lîp.
Sô ervar ich uns diu mære ab des küenen recken wîp.“

873

Der künec gevolgete übele Hagenen, sînem man.
Die starken untriuwe begunden tragen an,
ê iemen daz erfünde, die ritter ûz erkorn.
Von zweier vrouwen bâgen wart vil manec helt verlorn.

wie Sîvrit verrâten wart
{ 15 }
Wie Siegfried verraten wurde.

874

An dem vierdem morgen zwên und drîzec man
sach man ze hove rîten. Daz wart dô kunt getân
Gunthêr dem vil rîchen, im wære widerseit.
Von lüge erwuohsen vroun Kriemhilde diu aller grœzesten leit.

875

Urloup si nâmen, daz si für solden gân,
und jâhen, daz siz wæren, Liudegêres man,
den ê hete betwungen diu Sîvrides hant
und in ze gîsel brâhte in daz Gunthêres lant.

876

Die boten er dô gruozte und hiez si sitzen gân.
Ir einer sprach dar under: „Hêrre, lât uns stân,
unze wir sagen mære, die iu enboten sint.
Jâ habt ir ze vîande, daz wizzet, maneger muoter kint!

877

Iu widersaget Liudegast und Liudegêr,
den ir dâ wîlen tâtet diu grœzlîchen sêr.
Die wellent zuo ziu rîten mit her in diz lant.“
Der künec begunde zürnen, dô er diu mære bevant.

878

Dô hiez man die meinræten zen herbergen varn.
Wie möhte sich hêr Sîvrit dô dâ vor bewarn,
er oder ander iemen? Daz si dâ truogen an,
daz wart sît in selben ze grôzem leide getân.

879

Der künec mit sînen vriunden rûnende gie.
Hagene von Tronege in nie geruowen lie.
Noch heten ez gescheiden genuoge sküneges man,
dône wolde êt Hagene nie des tages ab gegân.

880

Eines tages si Sîvrit rûnende vant.
Dô begunde vrâgen der helt von Niderlant:
„Wie gât sô trûreclîche der künec und sîne man?
Daz hilf ich im immer rechen, hât im iemen iht getân.“

881

Dô sprach der hêrre Gunthêr: „Mir ist von schulden leit.
Liudegast und Liudegêr, die habent mir widerseit.
Si wellent offenlîchen rîten in mîn lant!“
Dô sprach der degen küene: „Daz sol diu Sîvrides hant

882

nâch allen iuwern êren mit vlîze understân.
Ich getuon noch den degenen, als ich hân ê getân.
Ich gelege in wüeste ir bürge und ouch ir lant,
ê daz ich erwinde. Des sî mîn houbet iuwer pfant.

883

Ir und iuwer recken sult hie heime bestân,
und lât mich zuo zin rîten mit den, die ich hân.
Daz ich iu gerne diene, daz lâz ich iuch sehen.
Von mir sol iuweren vîanden, daz wizzet, leide geschehen!“

884

„Sô wol mich dirre mære!“ sprach der künec dô,
als ob er ernstlîche der helfe wære vrô.
Mit valsche neic im tiefe der ungetriuwe man.
Dô sprach der hêrre Sîvrit: „Ir sult vil kleine sorge hân.“

885

Dô schicten si die reise mit den knehten dan.
Sîvride und den sînen ze sehen was ez getân.
Dô hiez er sich bereiten die von Niderlant.
Die Sîvrides recken suochten strîteclîche gewant.

886

Dô sprach der starke Sîvrit: „Min vater Sigemunt,
ir sult hie belîben. Wir komen in kurzer stunt,
gît uns got gelücke, her wider an den Rîn.
Ir sult bî dem künege hie vil vrœlîche sîn.“

887

Diu zeichen si an bunden, alsô si wolden dan.
Dâ wâren genuoge die Gunthêres man,
diene wessen niht der mære, dâ von ez was geschehen.
Man mohte grôz gesinde dô bî Sîvride sehen.

888

Ir helme und ouch ir brünne si bunden ûf diu marc.
Sich bereite vome lande vil manec ritter starc.
Dô gie von Tronege Hagene, dâ er Kriemhilde vant,
und bat im geben urloup. Si wolden rûmen daz lant.

889

„Nû wol mich“, sprach dô Kriemhilt, „daz ich ie gewan den man,
der mînen lieben vriunden wol tar vor gestân,
alsô mîn hêrre Sîvrit tuot den vriunden mîn!
Des wil ich hôhes muotes“, sprach diu küneginne, „sîn.

890

Vil lieber vriunt Hagene, gedenket ane daz,
daz ich iu gerne diene und noch nie wart gehaz.
Des lâzet mich geniezen an mînen liebem man!
Er ensol des niht engelten, habe ich Prünhilde iht getân.

891

Daz hât mich sît gerouwen“, sprach daz edel wîp,
„ouch hât er dar umbe zerblouwen mînen lîp,
daz ich ez ie geredete, daz beswæret ir den muot.
Daz hât vil wol errochen der helt küene und guot.“

892

Er sprach: „Ir werdet versüenet noch wol nâch disen tagen,
Kriemhilt, mîn liebiu vrouwe. Jâ sult ir mir sagen,
wie ich iu müge gedienen an Sîvride, iuwerm man!
Daz tuon ich gerne, vrouwe, wand ich es niemen baz engan.“

893

„Ich wære ân alle sorge“, sprach daz edel wîp,
„daz im iemen næme in sturme sînen lîp.
Ob er niht wolde volgen sîner übermuot,
sô wære immer sicher der degen küene und guot.“

894

„Vrouwe“, sprach dô Hagene, „und habt ir des wân,
daz man in müge versnîden, ir sult mich wizzen lân,
mit wie getânen listen ich daz sol understân.
Ich wil im ze huote immer rîten und gân.“

895

Si sprach: „Dû bist mîn mâc und ich bin der dîn.
Ich bevilhe dir mit triuwen den lieben wine mîn,
daz dû mir wol behüetest den mîn holden man.“
Si sagte im kundiu mære, diu bezzer wæren verlân.

896

Si sprach: „Mîn man ist küene und dar zuo starc genuoc.
Dô er den linttrachen an dem berge sluoc,
jâ badete sich in dem bluote der recke vil gemeit.
Dâ von in sît in stürmen nie dehein wâfen versneit.

897

Iedoch bin ich in sorgen, swenne er in strîte stât,
und vil der gêrschüzze von helden hande gât,
daz ich dâ verliese den mînen lieben man.
Hey, waz ich grôzer sorge dicke umbe Sîvriden hân!

898

Ich melde ez ûf genâde, vil lieber vriunt, dir,
daz dû dîne triuwe behaltest ane mir.
Dâ man dâ mac verhouwen den mînen lieben man,
daz lâz ich dich hœren. Deist ûf genâde getân.

899

Dô von des trachen wunden vlôz daz heize bluot,
und sich dar inne badete der küene ritter guot,
dô viel im zwischen die herte ein linden blat vil breit.
Dâ mac man in versnîden. Des ist mir sorgen vil bereit.“

900

Dô sprach von Tronege Hagene: „Ûf daz sîn gewant
næt ir im ein kleinez zeichen. Dâ ist mir bî bekant,
wâ ich in müge behüeten, sô wir in sturme stân.“
Si wânden helt dô vristen: ez was ûf sînen tôt getân.

901

Si sprach: „Mit kleinen sîden næ ich ûf sîn gewant
ein tougenlîchez kriuze. Dâ sol, helt, dîn hant
den mînen man behüeten, sô ez an die herte gât.
swenne er in den stürmen vor sînen vîanden stât.“

902

„Daz tuon ich“, sprach dô Hagene, „vil liebiu vrouwe mîn.“
Dô wânde ouch des diu vrouwe, ez solde im vrume sîn.
Dô was dâ mit verrâten der Kriemhilde man.
Urloup nam dô Hagene. Dô gie er vrœlîche dan.

903

Des küneges insgesinde was allez samt gemuot.
Ich wæne, immer recke mêr deheiner tuot
sô grôzer meinræte, sô dâ von im ergie,
dô sich an sîne triuwe Kriemhilt, diu küneginne, lie.

904

Des andern morgens mit tûsent sîner man
reit der hêrre Sîvrit vil vrœlîchen dan.
Er wânde, er solde rechen der sîner vriunde leit.
Hagene im reit sô nahen, daz er geschouwete diu kleit.

905

Als er gesach daz bilde, dô schicte er tougen dan,
die sageten ander mære, zwêne sîner man,
mit vride solde belîben daz Gunthêres lant,
und si hete Liudegêr zuo dem künege gesant.

906

Wie ungerne Sîvrit dô hin wider reit,
er enhete etewaz errochen sîner vriunde leit,
wand in vil kûme erwanten die Gunthêres man.
Dô reit er zuo dem künege. Der wirt im danken began:

907

„Nû lôn iu got des willen, vriunt Sîvrit,
daz ir sô willeclîche tuot, des ich iuch bit!
Daz sol ich immer dienen, als ich von rehte sol.
Vor allen mînen vriunden sô getrûwe ich iu wol.

908

Nû wir der herverte ledec worden sîn,
sô wil ich jagen rîten bern und swîn
hin zem Waskenwalde, als ich vil dicke hân getân.“
Daz hete gerâten Hagene, der vil ungetriuwe man.

909

„Allen mînen gesten sol man daz sagen,
daz wir vil vruo rîten, die wellen mir mir jagen,
daz si sich bereiten. Die aber hie bestân
höveschen mit den vrouwen, daz sî mir liebe getân.“

910

Dô sprach der hêrre Sîvrit mit hêrlîchem site:
„Swenne ir jagen rîtet, dâ wil ich gerne mite.
Sô sult ir mir lîhen einen suocheman
und etelîchen bracken. Sô wil ich rîten in den tan.“

911

„Welt ir niht nemen einen?“ sprach der künec zehant,
„Ich lîh iu, welt ir, viere, den vil wol ist bekant
der walt unde ouch die stîge, dâ diu tier hine gânt,
die iuch niht fürwîse zen herbergen rîten lânt.“

912

Dô reit zuo sînem wîbe der recke vil gemeit.
Schiere hete Hagene dem künege geseit,
wie er gewinnen wolde den tiuwerlîchen degen.
sus getâner untriuwe solde nimmêr man gepflegen.

wie Sîvrit erslagen wart
{ 16 }
Wie Siegfried erschlagen wurde.

913

Gunthêr und Hagene, die recken vil balt,
lobten mit untriuwen ein pirsen in den walt.
Mit ir scharpfen gêren si wolden jagen swîn,
bern und wisende. Waz möhte küeners gesîn?

914

Dâ mit reit ouch Sîvrit in hêrlîchen site.
Maneger hande spîse fuorte man in mite.
Zeinem kalten brunnen verlôs er sît den lîp,
daz hete gerâten Prünhilt, des künec Gunthêres wîp.

915

Dô gie der degen küene, dâ er Kriemhilde vant.
Dô was nû ûfgesoumet sîn edel pirsgewant,
sîn und sîner gesellen. Si wolden über Rîn.
Dône dorfte Kriemhilde nimmêr leider gesîn.

916

Die sîne triutinne kuste er an den munt:
„Got lâze mich dich, vrouwe, gesehen noch gesunt,
und mich diu dînen ougen! Mit holden mâgen dîn
soltû kurzewîlen. Ine mac hie heime niht gesîn.“

917

Dô gedâhte si an diu mære, sine torste ir niht gesagen,
diu si dâ Hagenen sagete. Dô begunde klagen
diu edel küneginne, daz si ie gewan den lîp.
Dô weinete âne mâze des hêrren Sîvrides wîp.

918

Si sprach zuo dem recken: „Lât iuwer jagen sîn!
Mir troumte hînat, wie zwei wildiu swîn
jageten über heide, dâ wurden bluomen rôt.
Daz ich sô sêre weine, des gât mir wærlîche nôt.

919

Ich fürhte harte sêre etelîchen rât,
ob man der deheinem missedienet hât,
die uns gefüegen künnen vîentlîchen haz.
Belîbet, lieber hêrre! Mit rehten triuwen rât ich daz.“

920

Er sprach: „Min triutinne, ich kum in kurzen tagen.
Ine weiz hie niht der liute, die mir iht hazzes tragen.
Alle dîne mâge sint mir gemeine holt.
Ouch hân ich an den degenen hie niht anders versolt.“

921

„Neinâ, hêrre Sîvrit! Jâ fürht ich dînen val!
Mir troumte hînte leide, wie ob dir ze tal
vielen zwêne berge. Ine gesach dich nimmêr mê.
Wil dû von mir scheiden, daz tuot mir an dem herzen wê.“

922

We umbvie mit handen daz tugentrîche wîp.
Mit minneclîchen küssen trûte er ir schœnen lîp.
Mit urloube er dannen schiet in kurzer stunt.
Sine gesach in leider dar nâch nimmêr mêr gesunt.

923

Dô riten si von dannen in einen tiefen walt
durch kurzewîle willen. Vil manec ritter balt
volgeten Gunthêre und sînen man.
Gêrnôt und Gîselhêr, die wâren dâ heime bestân.

924

Geladen vil der rosse kom vor in über den Rîn,
die den jagetgesellen truogen brôt und wîn,
daz vleisch mit den vischen und manegen andern rât,
den ein künec sô rîche vil harte billîchen hât.

925

Sie hiezen herbergen für den grüenen walt
gegen des wildes abloufe, die stolzen jeger balt,
dâ si dâ jagen solden, ûf einen wert vil breit.
Dâ was ouch komen Sîvrit. Daz wart dem künege geseit.

926

Von den jagetgesellen wurden dô gar bestân
die warte in allen enden. Dô sprach der küene man,
Sîvrit der vil starke: „Wer sol uns in den walt
wîsen nâch dem wilde, ir helde küene und balt?“

927

„Welle wir uns scheiden“, sprach dô Hagene,
„ê daz wir beginnen hie ze jagene?
Dâ bî wir mügen bekennen, ich und die hêrren mîn,
wer die besten jegere an dirre waltreise sîn.

928

Liute und gehünde suln wir teilen gar.
Sô kêr ietslîcher, swar er gerne var.
Swer danne jage daz beste, des sol er haben danc.“
Dô wart der jeger bîten bî ein ander niht ze lanc.

929

Dô sprach der hêrre Sîvrit: „Ich hân der hunde rât,
niuwan einen bracken, der sô genozzen hât,
daz er die verte erkenne der tiere durch den tan.
Wir komen wol ze jegede“, sprach der Kriemhilde man.

930

Dô nam ein alter jegere einen guoten spürhunt.
Er brâhte den hêrren in einer kurzer stunt,
dâ si vil tiere funden. Swaz der von legere stuont,
die erjagten die gesellen, also noch guote jeger tuont.

931

Swaz ir der bracke ersprancte, die sluoc mit sîner hant
Sîvrit der vil küene, der helt von Niderlant.
Sîn ross lief sô sêre, daz ir im niht entran.
Den lop vor in allen er an dem jegde gewan.

932

Er was in allen dingen biderbe genuoc.
Tier was daz êrste, daz er ze tôde sluoc,
ein vil starkez halp[swuol], mit der sînen hant.
Dar nâch er vil schiere einen ungefüegen lewen vant.

933

Dô den der bracke ersprancte, den schôz der mit dem bogen.
Eine starke strâle hete er dar în gezogen
Der lew lief nâch dem schuzze wan drîer sprünge lanc.
Die sînen jagetgesellen, die sagten Sîvride danc,

934

Dar nâch sluoc er schiere einen wisent und einen elch,
starker uower viere und einen grimmen schelch.
Sîn ross in truoc sô balde, daz ir im niht entran.
Hirze oder hinden kunde im wênec engân.

935

Einen eber grôzen, den vant der spürhunt.
Als er begunde vliehen, dô kom an der stunt
des selben gejeides meister. Er bestuont in ûf der slâ.
Daz swîn vil zorneclîchen lief an den helt sâ.

936

Dô sluoc in mit dem swerte der Kriemhilde man.
Ez enhete ein ander jeger sô sanfte niht getân.
Dô er in hete ervellet, man vie den spürhunt.
Dô wart jaget daz rîche wol den Burgonden kunt.

937

Dô sprâchen sîne jegere: „Mügez mit fuoge wesen,
sô lât uns, hêr Sîvrit, der tiere ein teil genesen.
Ir tuot uns hiute lære den berc und ouch den walt!“
Des begunde smielen der degen küene unde balt.

938

Dô hôrtens allenthalben ludem und dôz.
Von liute und ouch von hunden was der schal sô grôz,
daz in dâ von antwurte der berc und ouch der tan.
Vier und zweinzec ruore die jeger heten verlân.

939

Dô muosen vil der tiere verliesen dâ daz leben.
Dô wânden si daz füegen, daz man in solde geben
den prîs von dem gejeide. Des kunde niht geschehen,
dô der starke Sîvrit wart zer fiuwerstat gesehen.

940

Daz jaget was ergangen, und ouch niht gar.
Die zer fiuwerstete wolden, die brâhten mit in dar
vil maneger tiere hiute und wildes genuoc.
Hey, waz man des zer kuchen des küneges ingesinde truoc!

941

Dô hiez der künec künden den jegern ûz erkorn,
daz er wolde enbîzen. Dô wart vil lûte ein horn
zeiner stunt geblâsen, dâ mit in wart erkant,
daz man den fürsten edele dâ zen herbergen vant.

942

Dô sprach ein Sîvrides jegere: „Hêrre, ich hân vernomen
von eines hornes duzze, daz wir nû suln komen
zuo den herbergen. Antwurten ich des wil.“
Dô wart nâch den gesellen gevrâget blâsende vil.

943

Dô sprach der hêrre Sîvrit: „Nû rûme ouch wir den tan!“
Sîn ross truoc in ebene. Si îlten mit im dan.
Si ersprancten mit ir schalle ein tier vil griuwelîch.
Daz was ein ber wilde. Dô sprach der degen hinder sich:

944

„Ich wil uns hergesellen guoter kurzewîle wern.
Ir sult den bracken lâzen, jâ sich ich einen bern!
Der sol mit uns hinnen zen herbergen varn.
Er envliehe danne vil sêre, er enkan sich es nimmêr bewarn.“

945

Der bracke wart verlâzen, der bere sprancte von dan.
Dô wolde in errîten der Kriemhilde man.
Er kom in ein gewelle, dône kunde es niwet wesen.
Daz starke tier dô wânde vor dem jegere genesen.

946

Dô spranc von sînem rosse der stolze ritter guot.
Er begunde nâch loufen. Daz tier was unbehuot.
Ez enkunde im niht entrinnen, dô vienc er ez zehant.
Ân aller slahte wunden der helt ez schiere gebant.

947

Kratzen und bîzen kunde ez niht den man.
Er bant ez zuome satele. Ûf saz der snelle sân.
Er brâhte ez an die fiuwerstat durch sînen hôhen muot
zeiner kurzewîle, der recke küene und guot.

948

Wie rehte hêrlîche er zen herbergen reit!
Sîn gêr was vil michel, starc unde breit.
Im hienc ein zier wâfen hin nider an den sporn.
Von vil rôtem golde fuorte der hêrre ein schœne horn.

949

Von bezzerm pirsgewæte gehôrte ich nie gesagen.
Einen roc von swarzem pfellel, den sach man in tragen,
und eine hût von zobele, diu rîche was genuoc.
Hey, waz er rîcher porten an sînem kochære truoc!

950

Von einem pantel was dar über gezogen
eine hût, durch die süeze. Ouch fuorte er einen bogen,
den man mit antwerke muose ziehen dan,
der in spannen solde, er enhete ez selbe getân.

951

Von einer ludemes hûte was allez sîn gewant.
Von houbet unz an daz ende geströut man dar ûfe vant.
Ûz der liehten riuhe vil manec goldes zein
ze beiden sînen sîten dem küenem jegermeister schein.

952

Dô fuorte er Balmungen, ein ziere wâfen breit.
Daz was alsô scherpfe, daz ez nie vermeit,
swâ man ez sluoc ûf helme. Sîn ecke wâren guot.
Der hêrlîche jeger was hôhe gemuot.

953

Sît daz ich diu mære gar bescheiden sol:
im was sîn edel kocher vil guoter strâle vol
von guldînen tüllen, diu sahs wol hende breit.
Ez muose vil balde sterben, swaz er dâ mit versneit.

954

Dô reit der ritter edele vil weidenlîche dan.
In sâhen dort komen her die Gunthêres man.
Si liefen im engegen und enpfiengen im daz marc.
Dô fuorte er bî dem satel einen bern grôz und starc.

955

Als er gestuont von rosse, do lôste er im diu bant
von fuoze und ouch von munde. Dô erlûte dâ zehant
vil grôze daz gehünde, swaz des den bern sach.
Daz tier ze walde wolde. Die liute heten ungemach.

956

Der ber von dem schalle durch die kuchen geriet.
Hey, waz er kuchenknehte von dem fiuwer schiet!
Vil kezzel wart gerüeret, zefüeret manec brant.
Hey, waz man guoter spîse in der aschen ligen vant!

957

Dô sprungen von dem sedele die hêrren und ir man.
Der ber begunde zürnen. Der künec, der hiez dô lân
allez daz gehünde, daz an den seilen lac.
Und wære ez wol verendet, si heten vrœlîchen tac.

958

Mit bogen und mit spiezen niht langer man daz lie,
dô liefen dar die snellen, dâ der ber gie.
Dâ was sô vil der hunde, daz dâ niemen schôz.
Von des liutes schalle daz gebirge allez erdôz.

959

Der ber begunde vliehen von den hunden dan.
Im kunde niht gevolgen wan Kriemhilde man.
Der erlief in mit dem swerte. Ze tôde er in dô sluoc.
Hin wider zuo dem fiuwere den bern man dô sider truoc.

960

Dô sprâchen, die daz sâhen, er wære ein kreftec man.
Die stolzen jagetgesellen hiez man zen tischen gân.
Ûf einem schœnem anger saz ir dâ genuoc.
Hey, waz man rîcher spîse den edelen jegeren dô truoc!

961

Die schenken kômen seine, die tragen solden wîn.
Ez enkunde baz gedienet den helden nimmêr sîn:
heten si dar under niht sô valschen muot,
sô wæren wol die recken vor allen schanden behuot.

962

Dô sprach der hêrre Sîvrit: „Wunder mich des hât,
sît man uns von den kuchen gît sô manegen rât,
war umb uns die schenken bringen niht den wîn.
Man enpflæge baz der jegere, ich enwil niht jagetgeselle sîn.

963

Ich hete wol gedienet, daz man mîn baz næme war!“
Der künec von sînem tische sprach in valsche dar:
„Man sol iu gerne büezen, swes wir gebresten hân.
Daz ist von Hagenen schulden. Er wil uns gerne erdürsten lân.“

964

Dô sprach von Tronege Hagene: „Vil lieber hêrre mîn,
ich wânde, daz daz pirsen hiute solde sîn
dâ zem Spehtsharte. Den wîn, den sande ich dar.
Sîn wir hiute ungetrunken, wie wol ich mêre daz bewar.“

965

Dô sprach der hêrre Sîvrit: „Ir lîp, der habe undanc!
Man solde mir siben soume met und lûtertranc
haben her gefüeret. Dô des niht mohte sîn,
dô solde man uns gesidelt haben nâher an den Rîn!“

966

Dô sprach von Tronege Hagene: „Ir edel ritter balt,
ich weiz hie bî nâhen einen brunnen kalt.
Daz ir niht enzürnet, dâ suln wir hine gân.“
Der rât wart manegem degene ze grôzen sorgen getân.

967

Sîvrit den recken twanc des durstes nôt.
Den tisch er deste zîter rucken dan gebôt.
Er wolde für die berge zuo dem brunnen gân.
Dô was der rât mit meine von den recken getân.

968

Diu tier hiez man ûf wegen füeren in daz lant,
diu dâ hete verhouwen diu Sîvrides hant.
Man jac im grôzer êren, swer ez ie gesach.
Hagene sîne triuwe vil sêre an Sîvriden brach.

969

Dô si wolden dannen zuo den linden breit,
dô sprach von Tronege Hagene: „Mir ist des vil geseit,
daz niht gevolgen künne der Kriemhilde man,
swenne er wolde gâhen. Hey, wolde er uns daz sehen lân!“

970

Dô sprach von Niderlande der küene Sîvrit:
„Daz muget ir wol versuochen. Welt ir mir loufen mit
ze wette zuo dem brunnen? Sô daz ist getân,
dem sol man jehen dannen, den man sihet gewunnen hân.“

971

„Nû welle ouch wirz versuochen“, sprach Hagene der degen.
Dô sprach der snelle Sîvrit: „Sô wil ich mich legen
für die iuwern füeze nider an daz gras.“
Dô er daz gehôrte, wie liep ez Gunthêre was!

972

Dô sprach der degen küene: „Noch wil ich iu mêre sagen:
allez mîn gewæte wil ich mit mir tragen,
den gêr zuo dem schilde und al mîn pirsgewant.“
Den kocher zuo dem swerte vil schiere er umb gebant.

973

Dô zugen si diu kleider von dem lîbe dan.
In zwein wîzen hemden sach man si beide stân.
Sam zwei wildiu pantel si liefen durch den klê.
Dô sach man bî dem brunnen den küenen Sîvriden ê.

974

Den prîs an allen dingen truoc er vor manegem man.
Daz swert, daz lôste er schiere, den kocher leite er dan,
den starken gêr er leinte an der linden ast.
Bî des brunnen vluzze stuont der hêrlîche gast.

975

Die Sîvrides tugende wâren harte grôz.
Den schilt er leite nider, al dâ der brunne vlôz.
Swie harte in dô durste, der helt niene tranc,
ê daz der künec getrunke. Des sagte der im bœsen danc.

976

Der brunne, der was küele, lûter und guot.
Gunthêr sich dô neigete nider zuo dem vluot.
Als er hete getrunken, dô rihte er sich von dan.
Alsam hete ouch gerne der küene Sîvrit getân.

977

Dô engalt er sîner zühte. Den bogen und daz swert,
daz truoc allez Hagene von im dannenwert.
Dô spranc er hin wider, dâ er den gêr dâ vant.
Er sach nâch einem bilde an des küenen gewant.

978

Dâ der hêrre Sîvrit ob dem brunnen tranc,
er schôz in durch daz kriuze, daz von der wunden spranc
daz bluot im von dem herzen vaste an Hagenen wât,
Sô grôze missewende ein helt nimmêr mêr begât.

979

Den gêr im gein dem herzen er dô stecken lie.
Alsô grimmeclîchen ze vlühten Hagene nie
gelief noch in der werlde vor deheinen man.
Dô sich der hêrre Sîvrit der grôzen wunden versan,

980

der hêrre tobelîchen von dem brunnen spranc.
Im ragete von dem herzen ein gêrstange lanc.
Der fürste wânde vinden bogen oder swert,
sô müese wesen Hagene nâch sînem dienste gewert.

981

Dô der sêre wunde des swertes niht envant,
dône hete êt er niht mêre wand des schildes rant.
Er zucte in von dem brunnen, dô lief er Hagenen an.
Dône kunde im niht entrinnen des künec Gunthêres man.

982

Swie wunt er was zem tôde, sô krefteclîch er sluoc,
daz ûz dem schilde dræte genuoc
des edelen gesteines. Der schilt vil gar zerbrast.
Sich hete gerne errochen der vil hêrlîche gast.

983

Dô was gestrûchet Hagene vor sîner hant ze tal.
Von des slages krefte der wert vil lûte erhal.
Hete er daz swert enhande, sô wærez Hagenen tôt,
sô sêre zurnte der wunde. Des gie im wærlîcen nôt.

984

Erblichen was sîn varwe, er enkunde niht gestân.
Sînes lîbes sterke muose gar zergân.
wand er des tôdes zeichen in liehter varwe truoc.
Sît wart er beweinet von schœnen vrouwen genuoc.

985

Dô viel in die bluomen der Kriemhilde man.
Daz bluot von sîner wunden sach man vil vaste gân.
Dô begund er schelten, des gie im grôziu nôt,
die ûf in gerâten heten den ungetriuwen tôt.

986

Dô sprach der verchwunde: „Jâ, ir vil bœsen zagen!
Waz helfent mîniu dienest, daz ir mich habt erslagen?
Ich was ie getriuwe. Des ich engolten hân.
Ir habt an iuwern mâgen leider übele getân.

987

Die sint dâ von bescholten, swaz ir wirt geborn
her nâch disen zîten. Ir habet iuweren zorn
gerochen alsô sêre an dem lîbe mîn,
mit laster ir gescheiden sult von guoten recken sîn!“

988

Die ritter alle liefen, dâ er erslagen lac.
Ez was ir genuogen ein vröudelôser tac.
Die iht triuwe heten, von den wart der gekleit.
Daz hete wol verdienet der ritter küen und gemeit.

989

Der künec von Burgonden klagte sînen tôt.
Dô sprach der verchwunde: „Ez ist âne nôt,
daz der nâch schaden weinet, der in hât getân.
Der dienet michel schelten. Ez wære bezzer verlân.“

990

Dô sprach der grimme Hagene: „Jâne weiz ich, waz er kleit.
Allez hât nû ende, unser sorge und unser leit.
Wir vinden ir vil wênec, die getürren uns bestân.
Wol mich, deich sîner hêrschaft ze râte hân getân!“

991

„Ir müget iuch lîhte rüemen“, sprach dô Sîvrit,
„hete ich an iu erkennet den mortlîchen sit,
ich hete wol behalten vor iu mînen lîp.
Mich riuwet niht sô sêre sô vrou Kriemhilt, mîn wîp.

992

Nû müeze got erbarmen, deich ie gewan den sun,
dem man daz itewîzen sol nâch den zîten tuon,
daz sîne mâge iemen mortlîche hân erslagen.
Möhte ich“, sô sprach Sîvrit, „daz solde ich billîche klagen.“

993

Dô sprach jæmerlîche der verchwunde man:
„Welt ir, künec edele, triuwen iht begân
in der werlt iemen, lât iu bevolhen sîn
ûf iuwer genâde die holden triutinne mîn,

994

und lât si des geniezen, daz si iuwer swester sî.
Durch aller fürsten tugende, wont ir mir triuwen bî!
Mir müezen warten lange mîn vater und mîne man.
Ez enwart nie vrouwen leider an liebem manne getân.“

995

Die bluomen allenthalben von bluote wurden naz.
Dô ranc er mit dem tôde. Unlange tet er daz,
wand des tôdes wâfen ie ze sêre sneit.
Dône mohte niht reden mêre der recke küen und gemeit.

996

Dô die hêrren sâhen, daz der helt was tôt,
si leiten in ûf einen schilt, der was von golde rôt,
und wurden des ze râte, wie daz solde ergân,
daz man ez verhæle, daz ez hete Hagene getân.

997

Dô sprâchen genuoge: „Uns ist übel geschehen.
Ir sult ez heln alle und sult gelîche jehen,
dâ er rite eine jagen, der Kriemhilde man,
in slüegen schâchære, dâ er füere durch den tan.“

998

Dô sprach von Tronege Hagene: „Ich bringe in in daz lant.
Mir ist vil unmære, und wirt ez ir bekant,
diu sô hât betrüebet den Prünhilde muot.
Ez ahtet mich vil ringe, swaz si weinens getuot.“

wie Sîvrit beklaget und begraben wart
{ 17 }
Wie Siegfried beklagt und begraben wurde.

999

Dô erbiten si der nahte und fuoren über Rîn.
Von helden kunde nimmêr wirs gejaget sîn.
Ein tier, daz si sluogen, daz weinten edeliu kint.
Jâ muosen sîn engelten vil guote wîgande sint.

1000

Von grôzer übermüete müget ir hœren sagen
und von eislîcher râche. Dô hiez Hagene tragen
Sîvrit alsô tôten von Nibelunge lant
Für eine kemenâten, dâ man Kriemhilde vant.

1001

Er hiez in tougenlîchen legen an die tür,
daz si in dâ solde vinden, sô si gienge dâ für
zer mettîne, ê daz ez würde tac.
Der diu vrouwe Kriemhilt vil selten deheine verlac.

1002

Man lûte dâ zem münster nâch gewoneheit.
Vrou Kriemhilt diu schœne wacte manege meit.
Ein lieht bat si ir bringen und ouch ir gewant.
Dô kom ein kamerære, dâ er Sîvriden vant.

1003

Er sach in bluotes rôten. Sîn wât was elliu naz.
Daz ez sîn hêrre wære, niene wesse er daz.
Hin zer kemenâten daz lieht truoc er an der hant.
Von dem vil leidem mære die vrou Kriemhilt ervant.

1004

Dô si mit ir vrouwen zem münster wolde gân,
dô sprach der kamerære: „Ir sult stille stân!
Ez lît vor disem gademe ein ritter tôt erslagen.“
Dô begunde Kriemhilt vil harte unmæzlîche klagen.

1005

Ê daz si rehte erfünde, daz ez wære ir man,
an die Hagenen vrâge denken si began,
wie er in solde vristen. Dô wart ir êrste leit.
Von ir was allen vröuden von sînem tôde widerseit.

1006

Dô seic si zuo der erden, daz si niht ensprach.
Die schœnen vröudelôsen ligen man dô sach.
Kriemhilde jâmer wart unmâzen grôz.
Dô erschrê si nâch unkrefte, daz al diu kemenâte erdôz.

1007

Dô sprach daz gesinde: „Waz, ob ez ist ein gast?“
Daz bluot ir ûz dem munde von herzen jâmer brast.
Dô sprach si: „Ez ist Sîvrit, der mîn vil lieber man.
Ez hât gerâten Prünhilt, daz ez hât Hagene getân.“

1008

Diu vrouwe hiez sich wîsen, dâ si den helt vant.
Si huop sîn houbet schœne mit ir vil wîzen hant.
Swie rôt ez wære von bluote, si hete in schiere erkant.
Dô lac vil jæmerlîche der helt von Nibelunge lant.

1009

Dô rief vil trûreclîche diu vrouwe milt:
„Ouwê mich mînes leides! Nû ist dir dîn schilt
mit swerten niht verhouwen. Dû lîst ermorderôt.
Wesse ich, wer ez hete getân, ich riete im immer sînen tôt.“

1010

Allez ir gesinde klagete und schrê
mit ir lieben vrouwen, wande in was harte wê,
umb ir vil edelen hêrren, den si dâ heten verlorn.
Dâ hete gerochen Hagene harte Prünhilde zorn.

1011

Dô sprach diu jâmerhafte: „Ir kamerære, ir sult hin gân,
und wecket harte balde die Sîvrides man.
Ir sult ouch Sigemunde mînen jâmer sagen,
ob er mir helfen welle den küenen Sîvride klagen.“

1012

Dô lief ein bote balde, dâ er si ligen vant,
die Sîvrides helde von Nibelunge lant.
Mit den vil leiden mæren ir vröude er in benam.
Sine woldens niht gelouben, unz man daz weinen vernam.

1013

Der bote kom ouch schiere, dâ der künec lac,
Sigemunt, der hêrre, der slâfes niht enpflac.
Ich wæne, sîn herze im sagte, daz im was geschehen.
Er enmohte sînen lieben sun nimmêr lebendec gesehen.

1014

„Wachet, hêrre Sigemunt! Mich bat nâch iu gân
Kriemhilt, mîn vrouwe. Der ist ein leit getân,
daz ir vor allen leiden an ir herze gât.
Daz sult ir klagen helfen, wand ez iuch sêre bestât.“

1015

Ûf rihte sich dô Sigemunt: Er sprach: „Waz sint diu leit
der schœnen Kriemhilde, diu dû mir hâst geseit?“
Der bote sprach mit weinen: „Ine kan iu niht verdagen.
Jâ ist von Niderlande der küene Sîvrit erslagen!“

1016

Dô sprach der hêrre Sigemunt: „Lât iuwer schimpfen sîn
und alsô bœsiu mære durch willen mîn,
daz ir ez saget iemen, daz er sî erslagen,
wand ine kunde in nimmêr vor mînem tôde verklagen.“

1017

„Welt ir mir niht gelouben, daz ir mich hœret sagen,
sô muget ir selbe hœren Kriemhilde klagen
und allez ir gesinde den Sîvrides tôt.“
Vil sêre schracte dô Sigemunt. Des gie im wærlîche nôt.

1018

Mit hundert sînen mannen er von dem bette spranc.
Si zucten zuo den henden diu scharpfen wâfen lanc.
Si liefen zuo dem wuofe vil jæmerlîche dan.
Dô kômen tûsent recken, des küenen Sîvrides man.

1019

Dô si sô jæmerlîche die vrouwen hôrten klagen,
dô wânden sümelîche, si solden kleider tragen.
Jâne mohten si der sinne vor leide niht gehaben.
In wart vil michel swære in ir herzen begraben.

1020

Dô kom der küene Sigemunt, dâ er Kriemhilde vant.
Er sprach: „Ouwê der reise her in ditze lant!
Wer hât mich mînes kindes und iuch des iuweren man
bî alsô guoten vriunden sus mortlîche âne getân?

1021

„Hey, solde ich den bekennen!“ sprach daz vil edel wîp,
„holt würde im nimmêr mîn herze und ouch mîn lîp.
Ich geriete im alsô leide, daz die vriunde sîn
von den mînen schulden müesen weinende sîn.“

1022

Sigemunt, der hêrre, den fürsten umbeslôz.
Dô wart von sînen vriunden der jâmer alsô grôz,
daz von dem starkem wuofe palas unde sal
und ouch diu stat ze Wormze von ir weinen erschal.

1023

Dône kunde niemen getrœsten daz Sîvrides wîp.
man zôch ûz den kleidern den sînen lîp.
Man wuosch im sîne wunden und leite in ûf den rê.
Dô was den sînen liuten von grôzem jâmer starke wê.

1024

Dô sprâchen sîne recken von Nibelunge lant:
„In sol immer rechen mit willen unser hant.
Er ist in dirre bürge, der ez hât getân!“
Dô îlten nâch den wâfen alle Sîvrides man.

1025

Die ûz erwelten degene mit schilden kômen dar,
einlef hundert recken, die hete an sîner schar
Sigemunt der hêrre. Sînes sunes tôt,
den wolde er gerne rechen. Des gie im wærlîchen nôt.

1026

Sine wessen, wen si solden mit strîte dô bestân,
sine tæten ez danne Gunthêr und sîne man,
mit den der hêrre Sîvrit an daz gejeide reit.
Kriemhilt sach si gewâfent. Daz was ir grœzlîche leit.

1027

Swie michel wære ir jâmer und swie starc ir nôt,
dô vorhte si harte der Nibelunge tôt
von ir bruoder mannen, daz si ez understuont.
Si warnte si als güetlîche, sô vriunde liebe vriunde tuont.

1028

Dô sprach diu jâmers rîche: „Mîn hêrre Sigemunt,
wes welt ir beginnen? Iu ist niht rehte kunt:
jâ hât der künec Gunthêr sô manegen küenen man!
Ir welt iuch alle verliesen, sult ir die recken bestân.“

1029

Mit ûf erbunden schilden in was ze strîte nôt.
Diu edel küneginne bat und gebôt,
daz siz mîden solden, die recken vil gemeit.
Dô siz niht lâzen wolden, es was ir wærlîchen leit.

1030

Si sprach: „Hêrre Sigemunt, ir sult ez lâzen understân,
unz ez sich baz gefüege. Sô wil ich mînen man
immer mit iu rechen. Der mir in hât benomen,
wirde ich des bewîset, ich sol im schedelîche komen.

1031

Ez ist der übermüeten hie bî Rîne vil,
dâ von ich iu des strîtes râten niht enwil.
Si habent wider einen ie wol drîzec man.
Nû lâz in got gelingen, als umb uns gedienet hân!

1032

Ir sult hie belîben, und dolt mit mir mîniu leit.
Als ez tagen beginne, ir helde vil gemeit,
sô helfet mir besarken den mînen lieben man!“
Dô sprâchen die degene: „Daz sol werden getân.“

1033

Iu enkunde niemen daz wunder vol sagen
von rittern und von vrouwen, wie man die hôrte klagen,
sô daz man des wuofes wart in der stat gewar.
Die edelen burgære, die kômen gâhende dar.

1034

Si klageten mit den gesten, wand in was harte leit,
daz Sîvrides schulde in niemen hete geseit,
durch waz der edel recke verlür den sînen lîp.
Dô weinten mit den vrouwen der guoten burgære wîp.

1035

Smide hiez man gâhen würken einen sarc
von silber und von golde, vil michel und vil starc.
Man hiez in vaste spengen mit stahel, daz was guot.
Dô was allen liuten harte trûrec der muot.

1036

Diu naht was zergangen. Man sagte, ez wolde tagen.
Dô hiez diu edel vrouwe zuo dem münster tragen
Sîvriden, den hêrren, den vil lieben man.
Swaz er dâ vriunde hete, die sach man weinende gân.

1037

Dô si in zem münster brâhten, vil der glocken klanc.
Dô hôrte man allenthalben vil manetes pfaffen sanc.
Dô kom der künec Gunthêr mit den sînen man
und ouch der grimme Hagene zuo dem wuofe gegân.

1038

Er sprach: „Vil liebiu swester, ouwê der leide dîn,
daz wir niht âne des grôzen schaden sîn!
Wir müezen klagen immer den Sîvrides lîp.“
„Daz tuot ir âne schulde“, sprach daz jâmerhafte wîp.

1039

Wære iu dar umbe leide, sône wære es niht geschehen.
Ir hetet mîn vergezzen, des mac ich nû wol jehen,
dâ ich dâ wart gescheiden und mîn lieber man.
Daz wolde got“, sprach Kriemhilt, „und wære ez mir selber getân.“

1040

Si buten vaste ir lougen. Kriemhilt begunde jehen:
„Swelcher sich unschuldige, der lâze daz gesehen!
Der sol zuo der bâre vor den liuten gân.
Dâ bî mac man die wârheit harte schiere verstân.“

1041

Daz ist ein michel wunder, vil dicke ez noch geschiht:
swâ man den mortmeilen bî dem tôten siht,
sô bluotent im die wunden. Als ouch dâ geschach.
Dâ von man die schulde dâ ze Hagene gesach.

1042

Die wunden vluzzen sêre, alsam si tâten ê.
Die ê dâ sêre klageten, des wart nû michel mê.
Dô sprach der künec Gunthêr: „Ich wilz iuch wizzen lân:
in sluogen schâchære. Hagene hât es niht getân.“

1043

„Mir sint die schâchære“, sprach si, „vil wol bekant.
Nû lâze ez got errechen noch sîner vriunde hant.
Gunthêr und Hagene, jâ habt ir ez getân!“
Die Sîvrides degene heten gegen strîte wân.

1044

Dô sprach aber Kriemhilt: „Habt mit mir die nôt!“
Dô kômen dise beide, dâ si in funden tôt,
Gêrnôt, ir bruoder, und Gîselhêr daz kint.
In triuwen si in klageten mit den anderen sint.

1045

Si weinten inneclîchen den Kriemhilde man.
Man solde messe singen. Zuo dem münster dan
giengen allenthalben wîp, man und kint.
Die sîn doch lîhte enbâren, die weinten Sîvriden sint.

1046

Gêrnôt und Gîselhêr, die sprachen: „Swester mîn,
nû trœste dich nâch tôde, als ez doch muoz sîn.
Wir wellen dichs ergetzen, die wîle wir geleben!“
Dône kunde ir trôst deheinen zer werlde niemen gegeben.

1047

Sîn sarc, der was bereitet wol umbe einen mitten tac.
Man huop in von der bâre, dâ er ûfe lac.
In enwolde noch diu vrouwe lâzen niht begraben.
Des muosen al die liute michel arbeite haben.

1048

In einen rîchen pfellel man den tôten want.
Ich wæne, man dâ iemen âne wienen vant.
Dô klagete herzenlîche Uote, ein edel wîp,
und allez ir gesinde den sînen wætlîchen lîp.

1049

Dô man daz gehôrte, daz man zem münster sanc,
und man in gesarket hete, dô huop sich grôz gedranc.
Durch willen sîner sêle waz opfers man dô truoc!
Er hete bî den vîanden doch guoter vriunde genuoc.

1050

Kriemhilt diu arme zen kameræren sprach:
„Si suln durch mîne liebe lîden ungemach,
die im iht guotes günnen und mir wesen holt.
Durch Sîvrides sêle sol man teilen sîn golt.“

1051

Dehein kint was dâ sô kleine, daz iht witze mohte haben,
daz muose gân zem opfer, ê er würde begraben.
Baz danne hundert messe man dâ des tages sanc.
Von Sîvrides vriunden war dâ grôzer gedranc.

1052

Dô man dâ hete gesungen, daz volc huop sich von dan.
Dô sprach diu vrouwe Kriemhilt: „Ir ensult eine lân
hînte mich bewachen den ûz erwelten degen.
Ez ist an sînem lîbe al mîn vröude gelegen.

1053

Drî tage und drî nahte wil ich in lâzen stân,
unz ich mich geniete mînes vil lieben man.
Waz, ob daz got gebiutet, daz mich nimt ouch der tôt?
Sô wære wol verendet mîn armer Kriemhilde nôt.“

1054

Zen herbergen giengen die liute von der stat.
Pfaffen und münche si belîben bat
und allez sîn gesinde, daz ez des heldes pflac.
Si heten naht vil arge und vil müelîchen tac.

1055

Âne ezzen und âne trinken beleip dâ manec man.
Die ez dâ nemen wolden, den wart daz kunt getân,
daz mans in den vollen gæbe. Daz schuof hêr Sigemunt.
Dô was den Nibelungen vil arbeite kunt.

1056

Die drîe tagezîte, sô wir hœren sagen,
die dâ kunden singen, daz si muosen tragen
vil der arbeite. Waz man in opfers truoc!
Die vil arme wâren, die wurden rîche genuoc.

1057

Swaz man vant der armen, die es niht mohten hân,
die hiez man zem opfer mit dem golde gân
ûz sîn selbes kamern. Dô er niht solde leben,
umb sîne sêle wart manec tusent marc gegeben.

1058

Urbor ûf der erden teilten si in diu lant,
swâ sô man diu klôster und guote liute vant.
Silbers und wæte gap man den armen genuoc.
Si tet dem wol gelîche, daz si im holden willen truoc.

1059

An dem drittem morgen, ze der rehten messezît,
sô was bî dem münster der kirchhof alsô wît
von den lantliuten weinens alsô vol.
Si dienten im nâch tôde, alsô man lieben vriunden sol.

1060

In den tagen vieren, man hât gesaget daz,
ze drîzec tûsent marken oder dannoch baz
wart durch sîne sêle den armen dâ gegeben.
Dô was gelegen ringe sîn grôziu schœne und ouch sîn leben.

1061

Dô got dâ wart gedienet, daz man vol sanc,
mit ungefüegem leide vil des volkes ranc.
Man hiez in ûz dem münster zuo dem grabe tragen.
Die sîn ungerne enbâren, die sach man weinen und klagen.

1062

Vil lûte schrîende daz liut gie mit im dan.
Vrô enwas dâ niemen, weder wîp noch man.
Ê daz man in begrüebe, man sanc und las.
Hey, waz guoter pfaffen ze sîner bivilde was!

1063

Ê daz zem grabe kœme daz Sîvrides wîp,
dô ranc sô mit jâmer ir getriuwer lîp,
daz man si mit dem brunnen vil dicke dâ vergôz.
Ez was ir ungemüete vil harte unmæzlîchen grôz.

1064

Ez was ein michel wunder, daz si ie genas.
Mit klage ir helfende manec vrouwe was.
Dô sprach diu küneginne: „Ir Sîvrides man,
ir sult durch iuwer triuwe an mir genâde begân.

1065

Lât mir nâch mînem leide daz kleine liep geschehen,
daz ich sîn schœne houbet noch eines müeze sehen!“
Dô bat sis alsô lange mit jâmers sinnen starc,
daz man zebrechen muose dô den hêrlîchen sarc.

1066

Dô brâhte man die vrouwen, dâ si in ligen vant.
Si huop sîn schœne houbet mit ir vil wîzen hant.
Dô kuste si alsô tôten den edel ritter guot.
Diu ir vil liehten ougen vor leide weinte bluot.

1067

Ein jâmergez scheiden wart dô dâ getân.
Dô truoc man si von dannen. Sine kunde niht gegân.
Dô vant man sinnelôse daz hêrlîche wîp.
Vor leide möhe ersterben der ir vil wunneclîcher lîp.

1068

Dô man den edelen hêrren hete nû begraben,
leit âne mâze sach man die alle haben,
die mit im komen wâren von Nibelunge lant.
Vil selten vrœlîchen man dô Sigemunden vant.

1069

Dâ was der etelîcher, der drîer tage lanc
vor dem grôzen leide niht az noch entranc.
Dô mohten si dem lîbe sô gar geswîchen niht.
Si nerten sich nâch sorgen, sô noch genuogen geschiht.

wie Sigemunt wider ze lande vuor
{ 18 }
Wie Siegmund wieder heimkehrte.

1070

Der sweher Kriemhilde gie, dâ er si vant.
Er sprach zer küneginne: „Wir suln in unser lant.
Wir wæn unmære geste bî dem Rîne sîn.
Kriemhilt, vil liebiu vrouwe, nû vart ir zuo den landen mîn!

1071

Sît daz uns untriuwe âne hât getân
hie in disen landen des iuwern edelen man,
des sult ir niht engelten. Ich wil iu wæge sîn
durch mînes suns liebe. Des sult ir âne zwîvel sîn.

1072

Ir sult haben, vrouwe, allen den gewalt,
den iu ê tæte kunde Sîvrit, der degen balt.
Daz lant und ouch diu krône, daz sî iu undertân.
iu suln gerne dienen alle Sîvrides man.“

1073

Dô sagete man den knehten, si solden rîten dan.
Dô wart ein michel gâhen nâch rossen getân.
Bî ir starken vîanden was in ze wesen leit.
Den vrouwen und den megden hiez man suochen diu kleit.

1074

Dô der künec Sigemunt wolde sîn geriten,
dô begunden Kriemhilt die ir mâge bitten,
daz si bî ir muoter solde dâ bestân.
Dô sprach diu vrouwe hêre: „Daz kunde nimmêr ergân.

1075

Wie möhte ich den immer mit ougen an gesehen,
von dem mir armem wîbe sô leide ist geschehen?“
Dô sprach der junge Gîselhêr: „Vil liebiu swester mîn,
dû solt durch dîne triuwe hie bî dîner muoter sîn.

1076

Die dich dâ haben beswæret unde betrüebet den muot,
der bedraftû niht ze dienste. Nû zer mîn eines guot!“
Si sprach zuo dem recken: „Jâne mac es niht geschehen.
Vor leide muoz ich sterben, swenne ich Hagenen müese sehen.“

1077

„Des tuon ich dir ze râte, vil liebiu swester mîn.
Dû solt bî dînem bruoder Gîselhêre sîn.
Jâ wil ich dich ergetzen dînes mannes tôt!“
Dô sprach diu gotes arme: „Des wære Kriemhilde nôt!“

1078

Dô ez ir der junge Gîselhêr sô güetlîch erbôt,
dô begunde vlêgen Uote und Gêrnôt
und ir getriuwe mâge. Si bâten si dâ bestân.
si hete lützel künnes under Sîvrides man.

1079

„Si sint iu alle vremde“, sô sprach Gêrnôt.
„Ez enlebet sô starker niemen, er nemüeze ligen tôt.
Daz bedenket, liebiu swester, und trœstet iuwern muot.
Belîbet bî den vriunden! Daz wirt iu wærlîchen guot.“

1080

Si lobte Gîselhêren, si wolde dâ bestân.
Diu ross gezogen wâren den Sigemundes man,
als si wolden rîten zer Nibelunge lant.
Dô was ouch ûf gesoumet al der recken gewant.

1081

Dô gie der hêrre Sigemunt zuo Kriemhilde stân.
Er sprach zuo der vrouwen: „Die Sîvrides man
nû warten bî den rossen. Nû sul wir rîten hin,
wand ich vil ungerne bî den Burgonden bin.“

1082

Dô sprach diu vrouwe Kriemhilt: „Mir râten die vriunde mîn,
swaz ich hân getriuwen, ich sul hie bî in sîn.
Ich habe niemen mâge in Nibelunge lant.“
Vil leit was ez Sigemunde, dô erz an Kriemhilde ervant.

1083

Dô sprach der künec Sigemunt: „Lât iuz niemen sagen!
Vor allen mînen mâgen sult ir die krône tragen
alsô gewalteclîche, als ir ê habt getân.
Ir ensult des niht engelten, daz wir den helt verloren hân.

1084

Und vart ouch mit uns wider durch iuwer kindelîn,
daz ensult ir niht, vrouwe, weize lâzen sîn.
Swenn iuwer sun gewahset, der trœstet iu den muot.
Die wîle sol iu dienen manec helt küene und guot!“

1085

Si sprach: „Hêrre Sigemunt, jâne mac ich rîten niht.
Ich muoz hie belîben, swaz halt mir geschiht,
bî den mînen mâgen, die mir helfen klagen.“
Dô begunden disiu mære den guoten recken missehagen.

1086

Si sprâchen al gelîche: „Sô möhte wir wol jehen,
daz uns aller êrste wære leit geschehen,
woldet ir belîben bî unsern vîanden hie.
Sô geriten hovereise noch helde sorclîcher nie.“

1087

„Ir sult âne sorge got bevolhen varn.
Man gît iu guot geleite, ich heiz iuch wol bewarn,
zuo Sigemundes lande. Mîn liebez kindelîn,
daz sol ûf genâde iu recken wol bevolhen sîn!“

1088

Dô si wol vernâmen, daz si niht wolde dan,
dô weinten al gelîche die Sigemundes man.
Wie rehte jæmerlîchen schiet dô Sigemunt
von vroun Kriemhilde! Dô was im ungmüete kunt.

1089

„Sô wê der hôchgezîte!“ sprach dô der künec hêr.
„Ez geschiht von kurzewîle hinfür nimmêr mêr
künege noch sînen mâgen, daz uns ist geschehen.
Man sol uns nimmêr mêre hie zen Burgonden sehen!“

1090

Dô sprâchen offenlîche die Sigemundes man:
„Ez möhte noch diu reise in diz lant ergân,
sô wir den rehte ervinden, der uns den hêrren sluoc.
Si habent von sînen mâgen starker vîande genuoc!“

1091

Er kuste Kriemhilden. Wie jæmerlîchen er sprach,
dô si belîben wolde, und er daz rehte ersach:
„Nû rîten vröuden âne heim in unser lant.
Alle mîne sorge sint mir êrste nû bekant.“

1092

Si riten ân geleite von Wormez niden Rîn.
Si mohten wol des muotes vil sicherlîchen sîn,
ob si in vîentschefte würden an gerant,
daz sich weren wolde der küenen Nibelunge hant.

1093

Sine gerten urloubes dâ ze keinem man.
Dô sach man Gêrnôt und Gîselhêren gân
zuo zim minneclîchen. Im was sîn schade leit.
des brâhten in wol inne die helde küene und gemeit.

1094

Dô sprach gezogenlîchen der fürste Gêrnôt:
„Got weiz daz wol von himele, an Sîvrides tôt
gewan ich nie die schulde, daz ich daz hôrte sagen,
wer im hie vîent wære! Ich sol in billîche klagen.“

1095

Dô gap in guot geleite Gîselhêr daz kint.
Er brâhte sorgende ûz dem lande sint
den künec mit sînen recken heim ze Niderlant.
Wie lützel man der mâge dar inne vrœlîchen vant!

1096

Wie si nû gefüeren, des kan ich niht gesagen.
Man hôrte hie zallen zîten Kriemhilde klagen,
daz ir niemen trôste daz herze und ouch den muot,
ez entæte Gîselhêr. Der was getriuwe unde guot.

1097

Prünhilt diu schœne mit übermüete saz.
Swaz geweinte Kriemhilt, unmære was ir daz.
Sine wart ir guoter triuwe nimmêr mêr bereit.
Sît getet ir ouch vrou Kriemhilt diu vil herzenlîchen leit.

wie der Nibelunge hort ze Wormez kom
{ 19 }
Wie der Nibelungenschatz nach Worms kam.

1098

Dô diu edel Kriemhilt alsô verwitwet wart,
bî ir ime lande der grâve Eckewart
beleip mit sînen mannen. Der dienete ir zallen tagen.
Der half ouch sîner vrouwen sînen hêrren dicke klagen.

1099

Ze Wormez bî dem münster ein gezimber man ir slôz,
wît und vil michel, rîch und grôz,
dâ si mit ir gesinde sît âne vröude saz.
Si was zer kirchen gerne, und tet vil güetlîchen daz.

1100

Dâ man begruop ir vriedel, wie selten si daz lie,
mit trûregem muote si alle zît dar gie!
Si bat got den guoten sîner sêle pflegen.
Vil dicke wart beweinet mit grôzen triuwen der degen.

1101

Uote und ir gesinde trôsten si zaller stunt.
Dô was ir daz herze sô grœzlîche wunt,
ez kunde niht vervâhen, swaz man ir trôstes bôt.
Si hete nâch liebem vriunde die aller grœsten nôt,

1102

die nâch liebem manne ie mêr wîp gewan.
Man mohte ir michel tugende kiesen wol dar an,
si klagete unz an ir ende, die wîle werte si der lîp.
Sît rach sich wol mit ellen des küenen Sîvrides wîp.

1103

Sus saz si nâch ir leide, daz ist alle wâr,
nâch ir mannes tôde wol vierdehalbez jâr,
daz si ze Gunthêr nie dehein wort gesprach
und ouch ir vîant Hagenen in der zîte nie gesach.

1104

Dô sprach der helt von Tronege: „Möht ir daz tragen an,
daz ir iuwer swester ze vriunde möhtet hân,
sô kœme ze disen landen daz Nibelunges golt.
Des möhte ir vil gewinnen, würde uns diu küneginne holt.“

1105

Er sprach: „Wir suln ez versuochen. Mîne bruoder sint ir bî.
Die sul wirz bitten werben, daz si unser vriunt sî,
ob wir in ir an gewinnen, daz si daz gerne sehe.“
„Ine trûwe es niht“, sprach Hagene, „daz daz immer geschehe.“

1106

Dô hiez er Ortwînen hin ze hove gân
und den marcgrâven Gêren. Dô daz was getân,
man brâhte ouch Gêrnôten und Gîselhêr daz kint.
Si versuochtenz vriuntlîche an vroun Kriemhilde sint.

1107

Dô sprach von Burgonden der küene Gêrnôt:
„Vrouwe, ir klaget ze lange den Sîvrides tôt.
Iu wil der künec rihten, daz er sîn niht hât erslagen.
Man hœret iuch zallen zîten sô rehte grœzlîchen klagen!“

1108

Si sprach: „Des zîhet in niemen. In sluoc diu Hagenen hant.
Wâ man in verhouwen solde, dô er daz an mir ervant,
wie möhte ich des getrûwen, daz er im wære gehaz?
Ich hete wol behuotet“, sprach diu küneginne, „daz,

1109

daz ich niht vermeldet hete sînen lîp.
Sô lieze ich nû mîn weinen, ich vil armez wîp.
Holt wirde ich in nimmêr, die ez dâ hânt getân.“
Dô begunde vlêhen Gîselhêr, der vil wætlîche man.

1110

„Ich wil den künec grüezen!“ Dô si im des verjach,
mit sînen besten vriunden man in vor ir sach.
Dône torste Hagene für si niht gegân.
Wol wesse er sîne schulde. Er hete ir leide getân.

1111

Dô si verkiesen wolde ûf Gunthêren den haz,
ob er si küssen solde, ez zæme im deste baz,
wære ir von sînem râte leide niht getân.
Sô möhte er unzwîfellîchen zuo Kriemhilde gân.

1112

Ez enwart nie suone mit sô vil trehen mê
gefüeget under vriunden. Ir tet ir schade wê.
Si verkôs ûf alle, wan ûf den einen man.
In hete erslagen niemen, ez hete Hagene getân.

1113

Dar nâch vil unlange truogen si daz an,
daz diu vrouwe Kriemhilt den grôzen hort gewan
von Nibelungen lande und fuorte in an den Rîn.
Er was ir morgengâbe. Er solde ir billîche sîn.

1114

Dar nâch fuor Gîselhêr und Gêrnôt.
Ir ahzec hundert mannen Kriemhilt dô gebôt,
daz si in holen solden, dâ er verborgen lac,
dâ sîn der degen Albrîch mit sînen besten vriunde pflac.

1115

Dô man die von dem Rîne nâch dem schatze komen sach,
Albrîch der vil küene zuo sînen vriunden sprach:
„Wir engetürren ir des hordes vor gehaben niht,
sît sîn ze morgengâbe diu edel küneginne giht.

1116

Doch würdez nimmêr“, sprach Albrîch, „getân,
niuwan daz wir übele dâ verlorn hân
mit samt Sîvrit die guoten tarnhût,
wand die truoc alle zîte der schœnen Kriemhild trût.

1117

Nû ist es Sîvride leider übel komen,
daz uns die tarnkappen hât der helt benomen,
und daz im muose dienen allez ditze lant.“
Dô gie der kamerære, dâ er die slüzzel vant.

1118

Ez stuonden vor dem berge die Kriemhilde man
und ouch ein teil ir mâge. Den schatz, den hiez man dan
tragen zuo dem schiffe an diu schiffelîn.
Den fuorte man ûf den ünden unz ze Berge an den Rîn.

1119

Nû müget ir von dem horde wunder hœren sagen:
swaz zwelf kanzwegene meiste mohten tragen
in vier tagen und nahten von dem berge dan,
ouch muose ir ietzlîcher des tages drî stunt gân.

1120

Ez enwas niht anders wan steine und golt.
Und ob man al die werlde hete dâ von versolt,
sîn newære niht minner einer marke wert.
Jâne hete es âne schulde niht gar Hagene gegert.

1121

Der wunsch, der lac dar under: von golde ein rüetelîn.
Der daz hete erkunnet, der möhte meister sîn
wol in aller werlde über einen ietslîchen man.
Der Albrîches mâge kom vil mit Gêrnôte dan.

1122

Dô si den hort behielten in Gunthêres lant,
und sich es diu küneginne aller êrst underwant,
in kamer und in türnen sîn wart vil getragen.
Man gehôrte nie daz wunder von guote mêre gesagen.

1123

Und wære sî tûsent stunde noch alse vil gewesen,
und solde der hêrre Sîvrit gesunder sîn gewesen,
bî im wære Kriemhilt hende blôz bestân.
getriuwer wîbes künne ein helt nie mêr gewan.

1124

Dô si den hort nû hete, dô brâhte si in daz lant
vil unkunder recken. Jâ gap der vrouwen hant,
daz man sô grôzer milte mêre nie gesach.
Si pflac vil guoter tugende, des man der küneginne jach.

1125

Den armen und den rîchen begunde si nû geben,
daz dâ reite Hagene, ob si solde leben
noch deheine wîle, daz si sô manegen man
in ir dienst gewünne, daz ez in leide müese ergân.

1126

Dô sprach der künec Gunthêr: „Ir ist lîp und guot.
Zwiu sol ich daz wenden, swaz si dâ mit getuot?
Jâ derwarp ich daz vil kûme, daz si mir wart sô holt!
Nû enruochen, war si teile ir silber und ir golt.“

1127

Hagene sprach ze dem künege: „Ez solde ein vrumer man
deheinem einem wîbe niht des hordes lân.
Si bringet ez mit gâbe noch ûf den tac,
dâz vil wol geriuwen die küenen Burgonden mac.“

1128

Dô sprach der künec Gunthêr: „Ich swuor ir einen eit,
daz ich ir getæte nimmêr mêre leit,
und wil es fürbaz hüeten. Si ist diu swester mîn.“
Dô sprach aber Hagene: „Lât mich den schuldigen sîn!“

1129

Ir sümelîche eide wâren unbehuot.
Dô nâmen si der witwen daz kreftige guot.
Hagene sich der slüzzel aller underwant.
Daz zurnde ir bruoder Gêrnôt, dô er daz rehte bevant.

1130

Dô sprach der hêrre Gîselhêr: „Hagene hât getân
vil leides mîner swester. Ich solde ez understân.
Wære er niht mîn mac, ez gienge im an den lîp!“
Iteniuwez weinen tet dô Sîvrides wîp.

1131

Dô sprach der hêrre Gêrnôt: „Ê daz wir immer sîn
gemüejet mit dem golde, wir soldenz in den Rîn
allez heizen senken. Daz wære wol getân.“
Si gie vil klegelîche für ir bruoder Gunthêre stân.

1132

Si sprach: „Vil lieber bruoder, dû solt gedenken mîn.
Beidiu lîbes und guotes soltû mîn voget sîn!“
Dô sprach er zuo der vrouwen: „Daz sol sîn getân,
als wir nû komen widere. Wir haben rîtens wân.“

1133

Der künec und sîne mâge rûmten dô daz lant,
die aller besten dar under, die man iender vant,
niuwan Hagene aleine. Der beleip dâ durch haz,
den er truoc Kriemhilde, und tet vlîzeclîche daz.

1134

Ê daz der künec rîche wære wider komen,
die wîle hete Hagene den schatz vil genomen.
Er schutte in dâ ze Lôche allen in den Rîn.
Er wânde, er solde in niezen. Des enkunde niht gesîn.

1135

Die fürsten kômen widere, mit in vil manec man.
Kriemhilt ir schaden grôzen klagen began
mit meiden und mit vrouwen. In was harte leit.
Gerne wære ir Gîselhêr aller triuwen bereit.

1136

Dô sprâchen si gemeine: „Er hât übele getân!“
Er entweich der fürsten zorne alsô lange dan,
unz er gewan ir hulde. Si liezen in genesen.
Dône kunde im Kriemhilt nimmêr vîender sîn gewesen.

1137

Ê daz von Tronege Hagene den schatz alsô verbarc,
dô heten siz gevestent mit eiden alsô starc,
daz er verholn wære, unz ir einer möhte leben.
Sine kunden ins selben noch niemen ander gegeben.

1138

Mit iteniuwen leiden beswæret was ir muot,
umb ir mannes ende, und dô si ir daz guot
alsô gar genâmen. Dône gestuont ir klage
des lîbes nimmêr mêre unz an ir jungesten tage.

1139

Nâch Sîvrides tôde, daz ist al wâr,
si wonte in manegem sêre driuzehen jâr,
daz si des recken tôdes vergezzen kunde niht.
Si was im getriuwe, des ir diu meiste menige giht.

BUOCH II

wie künec Ezel ze Burgonden nâch Kriemhilde sande
{ 20 }
Wie König Etzel bei den Burgundern um Griemhild anhielt.

1140

Daz was in einen zîten, dô vrou Helche erstarp,
und daz der künec Etzel umb ein ander vrouwen warp.
Dô rieten sîne vriunde in der Burgonden lant
zeiner stolzen witewen, diu was vrou Kriemhilt genant.

1141

Sît daz erstorben wære der schœnen Helchen lîp,
si sprâchen: „Welt ir immer gewinnen edel wîp,
die hôhesten und die besten, die künec ie gewan,
sô nemt die selben vrouwen. Der starke Sîvrit was ir man.“

1142

Dô sprach der künec rîche: „Wie möhte daz ergân,
sît ich bin ein heiden und der toufe niene hân?
Sô ist diu vrouwe kristen. Dâ von sô lobt sis niht.
Ez müese sîn ein wunder, ob ez immer geschiht.“

1143

Dô sprâchen aber die snellen: „Waz, ob siz lîhte tuot
durch iuwern namen den hôhen und iuwer michel guot?
Sô sol man daz versuochen an daz edel wîp.
Ir müget vil gerne minnen den ir vil wætlîchen lîp!“

1144

Dô sprach der künec edele: „Wem ist nû bekant
under iu bî Rîne die liute und ouch daz lant?“
Dô sprach von Bechlâren der guote Rüedeger:
„Ich hân erkant von kinde die edelen künege hêr,

1145

Gunthêr und Gêrnôt, die edelen ritter guot.
Der dritte heizet Gîselhêr. Ir ietslîcher tuot,
swaz er der besten êren und tugende mac begân.
Ouch hânt ir alten mâge noch her daz selbe getân.“

1146

Dô sprach aber Etzel: „Vriunt, dû solt mir sagen,
ob si in mînem lande krône solde tragen.
und ist ir lîp sô schœne, als mir ist geseit,
den mînen besten vriunden solde ez nimmêr werden leit.“

1147

„Si gelîchen sich wol mit schœne der lieben vrouwen mîn,
Helchen der vil rîchen. Jâne kunde niht gesîn
in dirre werlde schœner deheines küneges wîp.
Den si lobt ze vriunde, der mac wol trœsten sînen lîp.“

1148

Er sprach: „Sô wirbez, Rüedegêr, als liep als ich dir sî.
Und sol ich Kriemhilde immer geligen bî,
Des wil ich dir lônen, sô ich aller beste kan.
Sô hâstû mînen willen sô rehte verre getân.

1149

Ûzer mîner kameren sô heiz ich dir geben,
daz dû und dîne gesellen müge vrœlîche leben,
von rossen und von kleidern allez, daz dû wil.
Des heiz ich iu bereiten zuo der boteschefte vil.“

1150

Des antwurte Rüedegêr, der marcgrâve rîch:
„Gerte ich dînes guotes, daz wære unlobelîch.
Ich wil dîn bote gerne wesen an den Rîn
mit mîn selbes guote, daz ich hân von der hende dîn.“

1151

Dô sprach der künec rîche: „Nû, wenne welt ir varn
nâch der minneclîchen? Got sol iuch bewarn
der reise an allen êren, und ouch die vrouwen mîn.
Des helfe mir gelücke, daz si uns genædec müeze sîn!“

1152

Dô sprach aber Rüedegêr: „Ê wir rûmen daz lant,
wie müezen ê bereiten wâfen und gewant,
alsô daz wirs êre vor fürsten mugen hân.
Ich wil ze Rîne füeren fünf hunderrt wætlîcher man.

1153

Swâ man zen Burgonden mich und die mîne sehe,
daz ir ietslîcher danne dir des jehe,
daz nie künec deheiner alsô manegen man
sô verre baz gesande, danne dû ze Rîne hâst getân.

1154

Und ob dûz, künec rîche, niht wil dar umb lân,
si was in edelen minnen Sîvride undertân,
dem Sigemundes kinde. Den hastû hie gesehen.
Man mohte im rehter êren mit maneger wârheit jehen.“

1155

Dô sprach der künec edele: „Was si des recken wîp,
sô was wol alsô tiure des edelen fürsten lîp,
daz ich niht versmâhen die küneginne sol.
Durch ir grôzen schœne sô gevallet si mir wol.“

1156

Dô sprach der marcgrâve: „Sô wil iu daz sagen,
daz wir uns heben hinnen in vier und zweinzec tagen.
Ich enbiute ez Gotelinde, der lieben vrouwen mîn,
daz ich nâch Kriemhilde selbe bote welle sîn.“

1157

Hin ze Bechlâren sande Rüedegêr.
Dô wart diu marcgrâvinne trûrec und hêr.
Er enbot ir, daz er solde dem künege werben wîp.
Si gedâhte minneclîche an der schœnen Helchen lîp.

1158

Dô diu marcgrâvinne die boteschaft vernam,
ein teil was ir leide. Weinens si gezam,
ob si gewinnen solde vrouwen alsam ê.
Sô si gedâhte an Helchen, daz tet ir inneclîche wê.

1159

Rüedegêr von Ungern in siben tagen reit.
Des was der künec Etzel vrô und gemeit.
Dâ zer stat ze Wiene bereite man im wât.
Dône mohte er sîner reise dô niht langer haben rât.

1160

Dâ ze Bechlâren im warte Gotelint.
Diu junge marcgrâvinne, daz Rüedegêres kint,
sach ir vater gerne und die sîne man.
Dâ wart ein liebez bîten von schœnen kinden getân.

1161

Ê daz der edel Rüedegêr ze Bechelâren reit
ûz der stat ze Wiene, dô wâren in ir kleit
rehte volleclîchen ûf den soumen komen.
Die fuoren in der mâze, daz in wart wênec iht genomen.

1162

Dô si ze Bechelâren kômen in die stat,
die sînen reisgesellen herbergen dô bat
der wirt vil minneclîche und schuof in guot gemach.
Gotelint diu rîche den wirt vil gerne komen sach.

1163

Alsam tet sîn liebiu tohter, diu junge marcgrâvîn.
Der nekunde nimmêr sîn komen lieber sîn.
Die helde ûz Hiunen landen, wie gerne si si sach!
Mit lachendem muote diu edele juncvrouwe sprach:

1164

„Nû sî uns grôze willekommen mîn vater und sîne man!“
Dô wart ein schœne danken mit vlîze dâ getân
der jungen marcgrâvinne von manegem ritter guot.
Vil wol wesse Gotelint des hêrren Rüedegêres muot.

1165

Dô si des nahtes nâhen bî Rüedegêren lac,
wie güetlîche vrâgen diu marcgrâvinne pflac,
war in gesendet hete der künec von Hiunen lant!
Er sprach: „Min vrouwe Gotelint, ich tuon dir ez gerne bekant.

1166

Dâ sol ich mînem hêrren werben ein ander wîp,
sît daz ist verdorben der schœnen Helchen lîp.
Ich wil nâch Kriemhilde rîten an den Rîn.
Diu sol hie zen Hiunen gewaltec sîn.“

1167

„Daz wolde got“, sprach Gotelint, „und möhte daz geschehen,
sît daz wir ir hœren sô maneger êren jehen,
si ergatzte uns mîner vrouwen lîhte in alten tagen.
Ouch möhten wir si gerne zen Hiunen krône lâzen tragen.“

1168

Dô sprach der marcgrâve: „Triutinne mîn,
die mit mir sulen rîten hinnen an den Rîn,
den sult ir minneclîche bieten iuwer guot.
Sô helde varent rîche, sô sint si hôhe gemuot.“

1169

Si sprach: „Ez ist deheiner, der ez gerne von mir nimt,
ine gebe ir ietslîchem, swaz im wol gezimt,
ê daz ir hinnen scheidet und ouch iuwer man.“
Dô sprach der marcgrâve: „Daz ist mir liebe getân.“

1170

Hey, waz man rîcher pfellel von ir kamer truoc!
Der wart den edelen recken ze teile dô genuoc,
erfüllet vlîzeclîchen von hals uns ûf den sporn.
Die im dar zuo gevielen, die hete im Rüedegêr ûz erkorn.

1171

An dem sibendem morgen von Bechelâren reit
der wirt min sînen recken. Wâfen und kleit
fuorten si den vollen durch der Beyer lant.
Si wurden ûf der strâzen durch rouben selten an gerant.

1172

Inner tagen zwelven si kômen an den Rîn.
Dône kunden disiu mære niht verholn sîn.
Man sagete ez dem künege und ouch sînen man,
ez kœmen vremde geste. Der wirt dô vrâgen began,

1173

ob iemen si bekande, man solde ez im sagen.
Man sach ir soumære sô rehte swære trâgen.
Daz si vil rîche wâren, daz wart dâ bekant.
Man schuof in herberge. In der wîten stat zehant.

1174

Dô die vil unkunden wâren în bekomen,
dô wart der selben hêrren vaste war genomen.
Si wunderte, wannen füeren die recken an den Rîn.
der wirte nâch Hagenen sande, ob si im kündec möhten sîn.

1175

Dô sprach der helt von Tronege: „Ine hân ir niht gesehen.
Als wir si nû geschouwen, ich kan iu wol verjehen,
von swannen si riten her in ditze lant.
Si sulen sîn vil vremde, ine habe si schiere bekant.“

1176

Den gesten herberge wâren nû genomen.
In vil rîchiu kleider was der bote komen
und sîne hergesellen. Ze hove si dô riten.
Si fuorten guotiu kleider vil harte spæhe gesniten.

1177

Dô sprach der snelle Hagene: „Als ich mich kan verstân,
wande ich den hêrren lange niht gesehen hân,
si varent wol dem gelîche, sam ez sî Rüedegêr,
von hiunischen landen der recke küene und hêr.“

1178

„Wie sol ich daz gelouben“, sprach der künec zehant,
„daz der von Bechelâren sî komen in diz lant?“
Als der künec Gunthêr die rede vol gesprach,
Hagene der küene den guoten Rüedegêren sach.

1179

Er und sîne vriunde liefen alle dan.
Dô sach man von den rossen fünf hundert ritter stân.
Dô wurden wol enpfangen die von Hiunen lant.
Boten nie getruogen alsô hêrlîch gewant.

1180

Dô sprach harte lûte von Tronege Hagene:
„Nû sîn gote willekomen dise degene,
der voget von Bechelâren und alle sîne man!“
Der antpfanc wart wol mit êren den snellen Hiunen getân.

1181

Des küneges næhsten mâge, die giengen, dâ man si sach.
Ortwîn von Metze ze Rüedegêren sprach:
„Wir haben in aller wîle mêre nie gesehen
geste hie sô gerne. Des wil ich wærlîche jehen.“

1182

Des gruozes si dô dankten den recken über al.
Mit den hergesinden si giengen in den sal,
dâ si den künec funden bî manegem hêrlîchem man.
Der hêrre stuont von sedele. Daz was durch grôze zuht getân.

1183

Wie rehte zühteclîchen er zuo den boten gie!
Gunthêr und Gêrnôt vil vlîzeclîch enpfie
den gast mit sînen mannen, als im wol gezam.
Den guoten Rüedegêren er bî der hende genam.

1184

Er brâhte in zuo dem sedele, dâ er selbe saz.
Den gesten hiez man schenken, vil gerne tet man daz,
met den vil guoten und den besten wîn,
den man kunde vinden in dem lande al umb den Rîn.

1185

Gîselhêr und Gêre, die wâren beide komen.
Dancwart und Volkêr, die heten ouch vernomen
umb dise geste. Si wâren vrô gemuot.
Si enpfiengen vor dem künege die ritter edel und guot.

1186

Dô sprach ze sînem hêrren von Tronege Hagene:
„Ez solden immer dienen dise degene,
daz uns der marcgrâve ze liebe hât getân.
Des solde lôn enpfâhen der schœnen Gotelinde man.“

1187

Dô sprach der künec Gunthêr: „Ine kan daz niht verdagen,
wie sich gehaben beide, daz sult ir mir sagen,
Etzel und Helche ûzer Hiunen lant.“
Dô sprach der marcgrâve: „Ich tuon ez iu gerne bekant.“

1188

Dô stuont er von dem sedele mit allen sînen man.
Er sprach zuo dem künege: „Und mac daz sîn getân,
daz ir mir, fürste, erloubet, sône wil ich niht verdagen.
Diu mære, diu ich bringe, sol ich iu vrœlîche sagen.“

1189

Er sprach: „Swaz man uns mære bî iu enboten hât,
die erloube ich iu ze sagene âne vriunde rât.
Ir sult si lâzen hœren mich und mîne man,
wand ich iu aller êren hie ze werbene gân.“

1190

Dô sprach der bote biderbe: „Iu enbiutet an den Rîn
getriuwelîchen dienest der grôze voget mîn,
dar zuo al den vriunden, die ir müget hân.
Ouch ist disiu boteschaft mit grôzen triuwen getân.

1191

Iu bat der künec edele klagen sîne nôt:
sîn volc ist âne vröude. Mîn vrouwe, diu ist tôt,
Helche die vil rîche, mînes hêrren wîp.
An der nû ist verweiset vil maneger juncvrouwen lîp,

1192

Kint der edelen fürsten, diu si gezogen hât.
Dâ von ez ime lande vil jæmerlîche stât.
Diu enhânt nû leider niemen, der ir mit triuwen pflege.
Des wæn ouch sich vil seine des küneges sorge gelege.“

1193

„Nû lôn im got“, sprach Gunthêr, „daz er den dienest sîn
sô willeclîch enbiutet mir und den vriunden mîn!
Den sînen gruoz ich gerne hie vernomen hân.
Daz sulen gerne dienen beide mâge und mîne man.“

1194

Dô sprach von Burgonden der recke Gêrnôt:
„Die werlt mac immer riuwen der schœnen Helchen tôt
durch ir vil manege tugende, der si kunde pflegen.“
Der rede gestuont im Hagene, dar zuo vil manec ander degen.

1195

Dô sprach aber Rüedegêr, der edel bote hêr:
„Sît ir mir, künec, erloubet, ich sol iu sagen mêr,
waz iu mîn lieber hêrre her enboten hât,
sît im sîn dinc nâch Helchen sô rehte kumberlîchen stât:

1196

Man sagte mînem hêrren, Kriemhilt sî âne man,
hêr Sîvrit sî erstorben. Und ist daz sô getân,
welt ir ir des günnen, sô sol si krône tragen
vor Etzelen recken. Daz hiez ir mîn hêrre sagen.“

1197

Dô sprach der künec rîche, wol gezogen was sîn muot:
„Si hœret mînen willen, ob siz gerne tuot.
Den wil ich iu künden in disen drîen tagen.
Ê ich ez an ir erfünde, zwiu solde ich Etzelen versagen?“

1198

Die wîle man den gesten hiez schaffen guot gemach.
In wart dâ sô gedienet, daz Rüedeger des jach,
daz er dâ vriunde hete under Gunthêres man.
Hagene im diente gerne. Er hete im ê alsam getân.

1199

Alsus beleip dô Rüedegêr unz an den dritten tac.
Der künec nâch râte sande, vil wîslîch er pflac,
ob ez sîne mâge dûhte guot getân,
daz Kriemhilt nemen solde den künec Etzelen ze man.

1200

Si rieten al gemeine, niuwan Hagene.
Der sprach ze Gunthêr dem degene:
„Habt ir rehte sinne, sô wirt ez wol behuot,
ob sis volgen wolde, daz ir ez nimmêr getuot.“

1201

„War umbe“, sprach dô Gunthêr, „solde ichs volgen niht?
Swaz der küneginne liebes geschiht,
des sol ich ir wol günnen. Si ist diu swester mîn.
Wir soldenz selbe werben, ob ez ir êre möhte sîn.“

1202

Dô sprach aber Hagene: „Lât die rede stân!
Het ir Etzelen künde, als ich sîn künde hân,
sol si in danne minnen, als ich iuch hœre jehen,
sô ist iu aller êrste von schulden sorgen geschehen.“

1203

„War umb?“ sprach dô Gunthêr, „Ich behuote vil wol daz,
daz ich im kome sô nâhen, daz ich deheinen haz
von im dulden müese, und wære si sî wîp.“
Dô sprach aber Hagene: „Ez gerætet nimmêr mîn lîp.“

1204

Man hiez nâch Gêrnôten und nâch Gîselhêren gân,
ob die hêrren beide dûhte guot getân,
daz Kriemhilt solde minnen den rîchen künec hêr.
Noch widerreite ez Hagene und nieman mêr.

1205

Dô sprach von Burgonden Gîselhêr der degen:
„Nû müget ir, vriunt Hagene, noch der triuwen pflegen.
Ergetzet si der leide, und ir ir habt getân!
An swiu ir wol gelünge, daz soldet ir ungevêhet lân.

1206

Jâ habt ir mîner swester getân sô manegiu leit“,
sô sprach aber Gîselhêr, der recke vil gemeit,
„daz si des hete schulde, ob si iu wære gram.
Nie man deheiner vrouwen noch mêre vröuden benam.“

1207

„Daz ich daz wol bekenne, daz tuon ich iu kunt.
Sol si nemen Etzel, gelebt si an die stunt,
si getuot uns noch vil leide, swie siz getraget an.
Jâ wirt ir dienende vil manec wætlîcher man!“

1208

Des antwurte Hagenen der küene Gêrnôt:
„Ez mac alsô belîben unz an ir beider tôt,
daz wir gerîten nimmêr in Etzelen lant.
Wir suln ir sîn getriuwe. Daz ist ze den êren uns gewant.“

1209

Dô sprach aber Hagene: „Mir mac niemen widersagen.
Und sol diu edele Kriemhilt Helchen krône tragen,
si getuot uns noch vil leide, swie si gefüege daz.
Ir sult ez lân belîben. Daz zimt iu recken michel baz.“

1210

Mit zorn sprach dô Gîselhêr, der schœnen Uoten sun:
„Wir suln doch niht alle meinlîchen tuon.
Swaz êren ir geschehe, vrô solden wir des sîn.
Swaz ir geredet, Hagene, ich diene ir durch die triuwe mîn!“

1211

Dô daz gehôrte Hagene, dô wart er ungemuot.
Gêrnôt und Gîselhêr, die stolzen ritter guot,
und Gunthêr der rîche ze jungest reiten daz,
ob ez lobte Kriemhilt, si woldenz lâzen âne haz.

1212

Dô sprach der fürste Gêre: „Ich wilz der vrouwen sagen,
daz si ir den künec Etzel lâze wol behagen.
Dem ist sô manec recke mit grôzen vorhten undertân.
Er mac si wol ergetzen, swaz ir leides ist getân.“

1213

Dô gie der snelle recke, dâ er Kriemhilde sach.
Si enpfie in güetlîche. Wie balde er dô sprach:
„Ir müget mich gerne grüezen und geben botenbrôt.
Iuch wil gelücke scheiden vil schiere ûz aller iuwer nôt.

1214

Ez hât durch iuwer minne, vrouwe, her gesant
ein der aller beste, der ie küneges lant
gewan mit vollen êren oder krône solde tragen.
Ez werbent ritter edele. Daz hiez iu iuwer bruoder sagen.“

1215

Dô sprach diu jâmers rîche: „Iu sol verbieten got
und allen mînen vriunden, daz si deheinen spot
an mir armer üeben. Waz solde ich einem man,
der ie herzeliebe von guotem wîbe gewan?

1216

Si widerreite ez sêre. Dô kom aber sint
Gêrnôt, ir bruoder, und Gîselhêr daz kint
dâ bâten minneclîche trœsten si ir muot:
ob si den künec genæme, ez wære ir wærlîchen guot.

1217

Überwinden kunde niemen dô daz wîp,
daz si minnen wolde deheines mannes lîp.
Dô bâten si die degene: „Nû lâzet doch geschehen,
ob ir anders niht getuot, daz ir den boten ruochet sehen!.“

1218

„Daz eine wil ich niht versprechen“, sprach daz vil edel wîp,
„Ich ensæhe gerne den Rüedegêres lîp
durch sîne manege tugende. Wære er her niht gesant,
swerz ander boten wære, dem wære ich immer unbekant.“

1219

Si sprach: „Ir sult in morgen heizen her gân
zuo mîner kemenâte. Ich wil in hœren lân
vil gar den mînen willen sol ich im selbe sagen.“
Ir wart eriteniuwet daz ir vil grœzlîchez klagen.

1220

Dô gerte ouch niht anders der edel Rüedegêr,
wan daz er gesæhe die küneginne hêr.
Er weste sich sô wîsen, ob ez immer solde ergân,
daz si sich den recken überreden müese lân.

1221

Des andern morgens vruo, dô man die messe sanc,
die edelen boten kômen, dô wart dâ grôz gedranc,
die mite Rüdegêre ze hove wolden gân.
Der sach man dâ gekleidet vil manegen hêrlîchen man.

1222

Kriemhilt diu hêre und vil trûrec gemuot,
sie warte Rüedegêr, dem edelen boten guot.
Der vant si in der wæte, die si alle tage truoc.
Dâ bî truoc ir gesinde rîcher kleider genuoc.

1223

Si gienc im engegene zuo der tür dan
und enpfie vil güetlîche den edelen man.
Niuwan selbe zwelfter er dar zuo ir gie.
Man bôt im grôzen dienest. Ir enkômen hôher boten nie.

1224

Man hiez den hêrren sitzen und sîne man.
Die zwêne marcgrâven, die sach man vor ir stân,
Eckewart und Gêre, die edelen recken guot.
Durch die hûsvrouwen si sâhen niemen wol gemuot.

1225

Si sâhen vor ir sitzen vil manec schœne wîp.
Dô pflac niuwan jâmers der Kriemhilde lîp.
Ir wât was vor den brüsten von heizen trehen naz.
Der edel marcgrâve sach wol an Kriemhilde daz.

1226

Dô sprach der bote hêre: „Vil edeles küneges kint,
mir und mînen gesellen, die mit mir komen sint,
sult ir daz erlouben, daz wir vor iu stân
und iu sagen mære, war nâch wir her geriten hân.“

1227

„Nû sî iu erloubet“, sprach diu künegîn.
„Swaz ir reden wellet. Also stât mîn sin,
daz ich ez gerne hœre. Ir sît ein bote guot.“
Die andern dô wol hôrten ir unwilligen muot.

1228

Dô sprach von Bechelâren der fürste Rüedegêr.
„Mit triuwen grôze liebe Etzel, ein künec hêr,
hât iu enboten, vrouwe, her in ditze lant.
Er hât nâch iuwer minne vil guote recken her gesant.

1229

Er enbiutet iu inneclîchen minne âne leit.
Stæter vriuntschefte, der sî er iu bereit,
als er ê tet vroun Helchen, diu im ze herzen lac.
Jâ hât er nâch ir tugenden vil dicke unvrœlîchen tac!“

1230

Dô sprach diu küneginne: „Marcgrâve Rüedegêr,
wære iemen, der bekande mîniu starken sêr,
der bæte mich niht triuten noch deheinen man.
Jâ verlôs ich ein den besten, den ie vrouwe gewan!“

1231

„Waz mac ergetzen leides“, sprach der vil küene man,
„Wan vriuntlîche liebe? Swer die kan begân,
und der dan einen kiuset, der im ze rehte kumt,
vor herzelîcher leide niht sô grœzlîche vrumt.

1232

Und geruochet ir ze minnen den edelen hêrren mîn,
zwelf vil rîcher krône sult ir gewaltec sîn.
Dar zuo gît iu mîn hêrre wol drîzec fürsten lant,
diu elliu hât betwungen sîn vil ellenhaftiu hant.

1233

Ir sult ouch werden vrouwe über manegen werden man,
die mîner vrouwen Helchen wâren undertân,
und über manege vrouwen, der si hete gewalt,
von hôher fürsten künne“, sprach der küene degen balt.

1234

„Dar zuo gît iu mîn hêrre, heizet er iu sagen,
ob ir geruochet krône bî dem künege tragen,
gewalt den aller hœhesten, den Helche ie gewan.
Den sult ir gewalteclîche haben vor Etzelen man.“

1235

Dô sprach diu küneginne: „Wie möhte mînen lîp
immer des gelusten, deich würde heldes wîp?
Mir hât der tôt an einem sô rehte leit getân,
des ich unz an mîn ende muoz unvrœlîche stân.“

1236

Dô sprâchen aber die Hiunen: „Küneginne rîch,
iuwer leben wirt bî Etzel sô rehte lobelîch,
daz iuch immer wunnet, ist daz ez ergât,
wand der künec rîche vil manegen zieren degen hât.

1237

Helchen juncvrouwen und iuwer magedîn,
solden die bî ein ander ein gesinde sîn,
dâ bî möhten recken werden wol gemuot.
Lât ez iu, vrouwe, râten: ez wirt iu wærlîchen guot!“

1238

Si sprach in ir zühten: „Nû lât die rede stân
unze morgen vruo! Sô sult ir her gân.
Ich wil iu antwurten, des ir dâ habt muot.“
Des muosen dô gevolgen die recken küen und guot.

1239

Dô si zen herbergen alle kômen dan,
dô hiez diu edel vrouwe nâch Gîselhêren gân
und ouch nâch ir muoter. Den beiden sagte si daz,
daz si gezæme weinen und niht anderes baz.

1240

Dô sprach ir bruoder Gîselhêr: „Swester, mir ist geseit,
und wilz ouch wol gelouben, daz elliu dîniu leit
der künec Etzel swende, und nimestûn zeinem man.
Swaz iemen ander râte, sô dunkt ez mich wol getân.

1241

Er mac dich wol ergetzen“, sprach aber Gîselhêr,
„vome Rotten zuo dem Rîne, von der Elbe unz an daz mer
sô ist künec deheiner sô gewaltec niht.
Dû maht dich vröuwen balde, sô er dî ze konen giht.“

1242

Si sprach: „Mîn vil lieber bruoder, zwie rætestû mir daz?
Klagen und weinen mir immer zæme baz.
Wie solde ich vor recken dâ ze hove gân?
Wart mîn lîp ie schône, des bin ich âne getân.“

1243

Dô sprach diu vrouwe Uote ir lieben tohter zuo:
„Swaz dîne bruoder râten, liebez kint, daz tuo!
Volge dînen vriunden, sô mac dir wol geschehen.
Ich hân dich doch sô lange mit grôzem jâmer gesehen.“

1244

Dô bat si got vil dicke füegen ir den rât,
daz si ze gebene hete golt, silber und wât
sam ê bî ir manne, dô er noch was gesunt.
Si gelebte doch nimmêr mêre sît sô vrœlîche stunt.

1245

Si gedâhte in ir sinnen: „Und sol ich mînen lîp
geben einem heiden? Ich bin ein kristen wîp.
Des muoz ich zer werlde immer schaden hân.
Gæbe er mir elliu rîche, ez ist von mir vil ungetân.“

1246

Dâ mit siz lie belîben. Die naht unz an den tac
diu vrouwe an ir bette mit vil gedanken lac.
Diu ir vil liehtiu ougen getruckenten nie,
unz daz si aber den morgen hin ze mettîne gie.

1247

Ze rehter messezîte die künege wâren komen.
Si heten aber ir swester under hende genomen.
Jâ rieten si ir ze minnen den künec von Hiunen lant.
Die vrouwen ir deheiner lützel vrœlîche vant.

1248

Dô hiez man dar gewinnen die Etzelen man,
die nû mit urloube wæren gerne dan,
geworben oder gescheiden, swie ez dô möhte sîn.
Ze hove kom dô Rüedegêr. Die helde reiten under in,

1249

daz man rehte erfüere des edelen fürsten muot,
und tæten daz bezîte. Daz dûhte si alle guot:
ir wege wæren verre wider in ir lant.
Man brâhte Rüedegêren, dâ er Kriemhilde vant.

1250

Vil minneclîche bitten der recke dô began
die edelen küneginne, si solde in hœren lân,
waz si enbieten wolde in Etzelen lant.
Er wæn an ir niht anders niuwan lougenen vant,

1251

daz si nimmêr minnen wolde mêr deheinen man.
Dô sprach der marcgrâve: „Daz wære missetân.
Zwiu woldet ir verderben einen als schœnen lîp?
Ir müget noch mit êren werden guotes mannes wîp!“

1252

Niht half, daz si gebâten, unz Rüedegêr
si gesprach in heinlîche, die küneginne hêr,
er wolde si ergetzen, swaz ir ie geschach.
Ein teil begunde ir senften dô ir grôzer ungemach.

1253

Er sprach zer küneginne: „Lât iuwer weinen sîn!
Ob ir ze Hiunen hetet niemen danne mîn,
getriuwer mîner mâge und ouch der mîner man,
er müese es sêre engelten, und hete iu iemen iht getân.“

1254

Dâ von wart wol geringet dô der vrouwen muot.
Si sprach: „Sô swert mir eide, swaz mir iemen getuot,
daz ir sît der næhste, der büeze mîniu leit!“
Dô sprach der marcgrâve: „Vrouwe, des bin ich bereit.“

1255

Mit allen sînen mannen swuor ir dô Rüedegêr
mit triuwen immer dienen, und daz die recken hêr
ir immêr niht versageten ûz Etzelen lant.
Des si êre haben solde, des sichert ir Rüedegêres hant.

1256

Dô gedâhte diu getriuwe: „Sît ich vriunde hân
alsô vil gewunnen, sô sol ich reden lân
diu liute swaz si wellen, ich jâmerhaftez wîp.
Waz, ob noch wirt errochen des mînen lieben mannes lîp?“

1257

Si gedâhte: „Sît daz Etzel der recken hât sô vil,
sol ich den gebieten, sô tuon ich swaz ich wil.
Er ist ouch wol sô rîche, daz ich ze geben hân.
Mich hât der leidege Hagene mînes guotes âne getân.“

1258

Si sprach ze Rüedegêre: „Hete ich daz vernomen,
daz er niht wære ein heiden, sô wolde ich gerne komen,
swar er hete willen, und næme in zeinem man.“
Dô sprach der marcgrâve: „Die rede sult ir, vrouwe, lân.

1259

Er hât so vil der recken in kristenlîcher ê,
daz iu bî dem künege nimmêr wirdet wê.
Waz, ob ir daz verdienet, daz er toufet sînen lîp?
Des müget ir gerne werden des künec Etzelen wîp.“

1260

Dô sprach aber ir bruoder: „Nû lob ez, swester mîn.
Iuwer ungemüete, daz sult ir lâzen sîn!“
Si bâtens alsô lange, unz doch ir trûrec lîp
lobte vor den helden, si würde Etzelen wîp.

1261

Si sprach: „Ich wil iu volgen, ich armiu künegîn,
daz ich var zuo den Hiunen, sô daz nû mac gesîn,
swenne ich hân die vriunde, die mich füeren in sîn lant.“
Des bôt dô vor den helden diu schœne Kriemhilt ir hant.

1262

Dô sprach der marcgrâve: „Habt ir zwêne man,
dar zuo hân ich ir mêre. Ez wirdet wol getân,
daz wir iuch wol nâch êren bringen über Rîn.
Ir sult niht, vrouwe, langer hie zen Burgonden sîn.

1263

Ich hân fünf hundert manne und ouch der mâge mîn,
die suln iu hie dienen und dâ heime sîn,
vrouwe, swie ir gebietet. Ich tuon iu selbe alsam,
swenne ir mich mant der mære, daz ich mich es nimmêr gescham.

1264

Nû heizet iu bereiten iuwer pfertkleit.
Die Rüedegêres ræte iu nimmêr werden leit.
Und saget ez iuwern magedîn, die ir dâ füeren welt.
Jâ kumt uns ûf der strâze vil manec ûz erwelter helt!“

1265

Si heten noch gesmîde, daz man dâ vor reit
bî Sîvrides zîten, daz si vil manege meit
mit êren möhte füeren, swenne si wolde dan.
Hey, waz man guoter setele den schœnen vrouwen gewan!

1266

Ob si ê ie getruogen deheiniu rîchen kleit,
der wart zuo zir verte vil manegez nû bereit,
wand in von dem künege sô vil gesaget wart.
Si sluzzen ûf die kisten, die ê stuonden wol bespart.

1267

Si wâren vil unmüezec wol fünftehalben tac.
Si suochten ûz der valden, des vil dar inne lac.
Kriemhilt dô ir kamer al entsliezen began:
si wolde machen rîche all Rüedegêres man.

1268

Si hete noch des goldes von Nibelunge lant,
si wânde, ez zen Hiunen teilen solde ir hant,
daz ez wol hundert mœre niender kunden tragen.
Diu mære hôrte Hagene dô von Kriemhilde sagen.

1269

Er sprach: „Sît mir vrou Kriemhilt nimmêr wirdet holt,
sô muoz ouch hie belîben daz Sîvrides golt.
Zwiu solde ich mînen vîanden lân sô michel guot?
Ich weiz wol, waz Kriemhilt mit disem schatze getuot.

1270

Ob si in bræhte hinnen, ich wil gelouben daz,
er würde doch zerteilet ûf den mînen haz.
Sine habent ouch niht der rosse, diu in solden tragen.
In wil behalten Hagene. Daz sol man Kriemhilde sagen!“

1271

Dô si gehôrte diu mære, dô was ir grimme leit.
Ez wart ouch den künegen allen drîn geseit.
Si woldenz gerne wenden. Dô des niht geschach,
Rüedegêr der edele harte vrœlîche sprach:

1272

„Rîchiu küneginne: „Zwiu klaget ir daz golt?
Iu ist der künec Etzel sô grœzlîchen holt.
Gesehent iuch sîniu ougen, er gît iu alsô vil,
daz ir ez verswendet nimmêr. Des ich iu, vrouwe, sweren wil.“

1273

Dô sprach diu küneginne: „Vil edel Rüedegêr,
ez gewan küneges tohter nie rîchheite mêr,
danne der mich Hagene âne hât getân.“
Dô kom ir bruoder Gêrnôt hin zir kemenâten gegân.

1274

Mit gewalt des küneges den slüzzel stiez er an die tür.
Golt daz Kriemhilde reichte man dar für
ze drîzec tûsent marken oder dannoch baz.
Er hiez ez nemen die geste. Liep was Gunthêre daz.

1275

Dô sprach von Bechelâren der Gotelinde man:
„Ob ez mîn vrouwe Kriemhilt allez möhte hân,
swaz sî ie wart gefüeret von Nibelunge lant,
sîn solde lützel rüeren mîn oder der küneginne hant.

1276

Nû heizet ez behalten, wand ich es niene wil.
Jâ fuorte ich von lande. Des mînen alsô vil,
daz wirs ûf der strâze haben guoten rât,
und unser koste hinnen harte hêrlîchen stât!“

1277

Dâ vor in aller wîle gefüllet zwelf schrîn
des aller besten goldes, daz iender möhte sîn,
heten die ir megde. Daz fuorte man von dan,
und gezierde vil der vrouwen, das si zir verte solde hân.

1278

Gewalt des grimmen Hagenen dûhte si ze starc.
Si hete ir opfergoldes noch wol tûsent marc.
Si teilte ez sîner sêle, ir vil liebem man.
Daz dûhte Rüedegêren mit grôzen triuwen getân.

1279

Dô sprach diu klagende vrouwe: „Wâ sint die vriunde mîn,
die durch mîne liebe wellent ellende sîn?
Die suln mit mir rîten in der Hiunen lant.
Die nemen schatz den mînen, und koufen ross und ouch gewant!“

1280

Dô sprach zer küneginne der marcgrâve Eckewart:
„Sît daz ich alêrste iuwer gesinde wart,
sô hân ich iu mit triuwen gedienet“, sprach der degen,
„und wil unz an mîn ende des selben immer bî iu pflegen.

1281

Ich wil ouch mit mir füeren fünf hundert mîner man,
der ich iu ze dienste mit rehten triuwen gan.
Wir sîn vil ungescheiden, ez entuo dann der tôt.“
Der rede neic im Kriemhilt. Des gie ir wærlîche nôt.

1282

Dô zôch man dan die mœre. Si wolden varn dan.
Dâ wart vil michel weinen von vriunden getân.
Uote diu vil rîche und manec schœne meit,
die zeigeten, daz in wære nâch vroun Kriemhilde leit.

1283

Hundert rîcher megede fuorte si mit ir dan.
Die wurden sô gekleidet, als in wol gezam.
Dô vielen in die trehene von liehten ougen nider.
Si gelebte vil der vröuden ouch bî Etzelen sider.

1284

Dô kom der hêrre Gîselhêr und ouch Gêrnôt
mit ir gesinde, als in ir zuht gebôt.
Dô wolden si beleiten ir liebe swester dan.
Dô fuorten si ir recken wol tûsent wætlîcher man.

1285

Dô kom der snelle Gêre und ouch Ortwîn.
Rûmolt der kuchenmeister dâ mite muose sîn.
Si schuofen die nahtselde unz an Tuonouwe stat.
Dô reit niht fürbaz Gunthêr, wan ein lützel für die stat.

1286

Ê si von Rîne füeren, si heten für gesant
ir boten harte snelle in der Hiunen lant,
die dem künege sageten, daz im Rüedegêr
ze wîbe hete erworben die edelen küneginne hêr.

wie Kriemhilt gên den Hiunen vuor
{ 21 }
Wie Griemhild zu den Hunnen reiste.

1287

Die boten lâzen rîten! Wir suln iu tuon bekant,
wie diu küneginne füere durch diu lant,
oder wâ von ir schieden Gîselhêr und Gêrnôt.
Si heten ir gedienent, als in ir triuwe daz gebôt.

1288

Unz an die Tuonouwe ze Vergen si dô riten.
Si begunden urloubes die küneginne bitten,
wan si wider wolden rîten an den Rîn.
Dône mohte ez âne weinen von guoten vriunden niht gesîn.

1289

Gîselhêr der snelle sprach zer swester sîn:
„Swenne daz dû, vrouwe, bedurfen wellest mîn,
ob dir iht gewerre, daz tuo dû mir bekant!
Sô rît ich dir ze dieneste in daz Etzelen lant.“

1290

Die ir mâge wâren, kuste si an den munt.
Vil minneclîche scheiden sach man an der stunt
von Rüedegêres, des marcgrâven, man.
Dô fuorte diu küneginne vil manege meit wolgetân,

1291

hundert und viere, die truogen rîchiu kleit
von gemâlet rîchen pfellel. Vil der schilde breit
fuorte man bî den vrouwen nâhen ûf den wegen.
Dô kêrte von ir dannen vil manec hêrlîcher degen.

1292

Si zogeten dannen balde nider durch Beyerlant.
Dô sagte man diu mære, dâ wæren für gerant
vil unkunder geste, dâ noch ein klôster stât,
und dâ daz In mit vluzze in die Tuonouwe gât.

1293

In der stat ze Pazzouwe saz ein bischof.
Die herberge wurden lære, und ouch des fürsten hof.
Si îlten gegen den gesten ûf in Beyerlant,
dâ der bischof Pilgrîn die schœnen Kriemhilden vant.

1294

Den recken von dem lande was dô niht ze leit,
dô si ir volgen sâhen sô manege schœne meit.
Dâ trûte man mit ougen der edelen ritter kint.
Guote herberge gap man den gesten sint.

1295

Der bischof mit sîner nifteln ze Pazzouwe reit.
Dô daz den burgæren von der stat wart geseit,
daz dar kœme Kriemhilt, des fürsten swester kint,
diu wart wol enpfangen von den koufliuten sint.

1296

Daz si belîben solden, der bischof hete es wân.
Dô sprach der hêrre Eckewart: „Ez ist ungetân.
Wir müezen varn nider in Rüedegêres lant.
Uns wartet vil der degene, wan ez ist in allen wol bekant.“

1297

Diu mære nû wol wesse diu schœne Gotelint.
Si bereite sich mit vlîze unde ir vil edel kint.
Ir hete enboten Rüedegêr, daz in daz dûhte guot,
daz si der küneginne dâ mite trôste den muot,

1298

daz si ir rite engegene mit den sînen man
ûf zuo der Ense. Dô daz wart getân,
dô sach man allenthalben die wege unmüezec stân.
Si begunden gegen den gesten beidiu rîten und gân.

1299

Nû was diu küneginne ze Everdingen komen.
Genuoge ûz Beyerlande, solden si hân genomen
den roub ûf der strazen nâch ir gewonheit,
sô heten si den gesten dâ getân vil lîhte leit.

1300

Daz was wol understanden von dem marcgrâven hêr.
Er fuorte tûsent ritter und dannoch mêr.
Dô was ouch komen Gotelint, Rüedegêres wîp.
Mit ir kom hêrlîche vil maneges edelen recken lîp.

1301

Dô si über die Trouwen kômen bî Ense ûf das velt,
dô sach man ûf gespannen hütte und gezelt,
dâ die geste solden die nahtselde hân.
Diu koste was den gesten dâ von Rüedegêr getân.

1302

Gotelint diu schœne die herberge lie
hinder ir belîben. Ûf den wegen gie
mit klingenden zoumen manec pfert wolgetân.
Der antpfanc wart vil schône. Liep was ez Rüedegêr getân.

1303

Die in ze beiden sîten kômen ûf den wegen,
die riten lobelîche. Der was vil manec degen.
Si pflâgen ritterschefte. Daz sach vil manec meit.
Ouch was der ritter dienest niht der küneginne leit.

1304

Dô zuo den gesten kômen die Rüedegêres man,
vil der trunzûne sach man ze berge gân
von der recken hende mit ritterlîchen siten.
Dâ wart wol ze prîse vor den vrouwen dô geriten.

1305

Daz liezen si belîben. Dô gruozte manec man
vil güetlîche ein ander. Dô fuorten si von dan
die schœnen Gotelinden, dâ si Kriemhilde sach.
Die vrouwen dienen kunden, die heten kleinen gemach.

1306

Der voget von Bechelâren ze sînem wîbe reit.
Der edelen marcgrâvinne was daz niht ze leit,
daz er sô wol gesunder was von Rîne komen.
ir was ein teil ir swære mit grôzen vröuden benomen.

1307

Dô si in hete enpfangen, er hiez si ûf daz gras
erbeizen mit den vrouwen, swaz ir dâ mit ir was.
Dâ wart vil unmüezec manec edel man.
Dâ wart vrouwen dienest mit grôzem vlîze getân.

1308

Dô sach diu vrouwe Kriemhilt die marcgrâvinne stân
mit ir gesinde. Sine lie niht nâher gân.
Daz pfert mit dem zoume zucken si began
und bat sich snelleclîchen heben von dem satel dan.

1309

Den bischof sach man wîsen sîner swester kint,
in und Eckewarten, zuo Gotelinde sint.
Dâ wart vil michel wîchen an der selben stunt.
Dô kuste diu ellende an Gotelinden munt.

1310

Dô sprach vil minneclîchen daz Rüedegêres wîp:
„Nû wol mich, liebiu vrouwe, daz ich iuweren schœnen lîp
hân in disen landen mit mînen ougen gesehen!
Mir enkunde an disen zîten nimmêr lieber geschehen.“

1311

„Nû lôn iu got“, sprach Kriemhilt, „vil edeliu Gotelint!
Sol ich gesunt belîben und Botelunges kint,
ez mac iu komen ze liebe, daz ir mich habt gesehen.“
In beiden was unkunde, daz sider muose geschehen.

1312

Mit zühten zuo zein ander gie vil manec meit.
Dô wâren in die recken mit dieneste vil bereit.
Si sâzen nâch dem gruoze nider ûf den klê.
Si gewunnen maneger künde, die in vil vremede wâren ê.

1313

Man hiez den vrouwen schenken. Ez was wol mitter tac.
Daz edel ingesinde dâ niht lenger lac.
Si riten, dâ si funden manege hütten breit.
Dâ was den edelen gesten vil michel dienest bereit.

1314

Die naht si heten ruowe unz an den morgen vruo.
Die von Bechelâren bereiten sich dar zuo,
wie si behalten solden vil manegen vremden gast.
Wol hete gehandelt Rüedegêr, daz in dâ wênec iht gebrast.

1315

Diu venster an den mûren sach man offen stân.
Diu burc ze Bechelâren, diu was ûf getân.
Dô riten dar în die geste, die man vil gerne sach.
Den hiez der wirt vil edele schaffen guoten gemach.

1316

Diu Rüedegêres tohter mit ir gesinde gie,
dâ si die küneginne vil minneclîch enpfie.
Dâ was ouch ir muoter, des marcgrâven wîp.
Mit liebe wart gegrüezet vil maneger juncvrouwen lîp.

1317

Si viengen sich behanden und giengen dan
in einen palas wîten, der was vil wol getân,
dâ diu Tuonouwe under hin vlôz.
Si sâzen gegen dem lufte unde heten kurzewîle grôz.

1318

Wes si dâ mêre pflâgen, des enkan ich niht gesagen.
Daz in sô übele zogete, daz hôrte man dô klagen
die Kriemhilde recken, wan ez was in leit.
Hey, waz dô guoter degene mit ir von Bechelâren reit!

1319

Vil minneclîchen dienest Rüedegêr in bôt.
Dô gap diu küneginne zwelf armbouge rôt
der Gotelinde tohter, und alsô guot gewant,
daz si niht bezzers brâhte in diz lant.

1320

Swie ir genomen wære der Nibelunge golt,
alle die si gesâhen, die machete si ir holt
noch mit dem kleinem guote, daz si dâ mohte hân.
Des wirtes ingesinde, dem wart grôziu gâbe getân.

1321

Dâ widerbôt dô êre diu vrouwe Gotelint
den gesten von dem Rîne sô güetlîche sint,
daz man der vremden harte wênec vant,
si trüegen ir gesteine oder ir vil hêrlîch gewant.

1322

Dô si enbizzen wâren, und daz si solden dan,
von der hûsvrouwen wart geboten an
getriuwelîcher dienest daz Etzelen wîp.
Dâ wart vil getriutet der juncvrouwen lîp.

1323

Si sprach zer küneginne: „Swenne iuch nû dunket guot,
ich weiz wol, daz ez gerne mîn lieber vater tuot,
daz er mich zuo ziu sendet in der Hiunen lant.“
Daz si ir getriuwe wære, vil wol daz Kriemhilt ervant.

1324

Diu ross bereitet wâren und für Bechelâren komen.
Dô hete diu edel küneginne urloup nû genomen
von Rüedergêres wîbe und der tohter sîn.
Dô schiet ouch sich mit gruoze vil manec schœnez magedîn.

1325

Ein ander si vil selten gesâhen nâch den tagen.
Ûzer Medelicke ûf handen wart getragen
vil manec goltvaz rîche. Dar inne brâhte man wîn
den gesten zuo der strâze. Si muosen willekomen sîn.

1326

Ein wirt was dâ gesezzen, Astolt was der genant.
Der wîste si die strâze in daz Ôsterlant,
gegen Mûtâren die Tuonouwe nider.
Dâ wart vil wol gedienet der küneginne sider.

1327

Der bischof minneclîche von sîner nifteln schiet.
Daz si sich wol gehabte, wie vaste er ir daz riet,
und daz si ir êre koufte, als Helche hete getân.
Hey, waz si grôzer êren sît dâ zen Hiunen gewan!

1328

Zuo der Treisem brâhte man die geste dan.
Ir pflâgen vlîzeclîche die Rüedegêres man,
unze daz Hiunen riten über lant.
Dô wart der küneginne vil michel êre bekant.

1329

Bî der Treisem hete der künec von Hiunen lant
eine burc vil rîche, diu was vil wol bekant,
geheizen Zeizenmûre. Vrou Helche saz dâ ê
und pflac sô grôzer tugende, daz wærlîch nimmêr mêr ergê,

1330

Ez entæte danne Kriemhilt, diu alsô kunde geben.
Si mohte nâch ir leide daz liep vil wol geleben,
daz ir ouch jâhen êre die Etzelen man,
der si sît grôzen vollen bî den helden gewan.

1331

Diu Etzelen hêrschaft was sô wît erkant,
daz man zallen zîten in sînem hove vant
die küenesten recken, von den ie wart vernomen
under kristen und under heiden. Die wâren mit im alle komen.

1332

Bî im was zallen zîten, daz wætlîch mêr ergê,
kristenlîcher orden und ouch der heiden ê.
In swie getânem leben sich ietslîcher truoc,
daz schuof des küneges milte, daz man in allen gap genuoc.

wie si zen Hiunen wart enphangen
{ 22 }
Wie Griemhild bei den Hunnen empfangen wurde.

1333

Si was ze Zeizenmûre unz an den vierden tac.
Diu molte ûf der strâze die wîle nie gelac,
sine stübe alsam ez brünne allenthalben dan.
Dâ riten durch Ôsterrîche des künec Etzelen man.

1334

Dô was ouch dem künege vil rehte nû geseit,
des im von den gedanken swunden sîniu leit,
wie hêrlîchen Kriemhilt dâ kœme durch diu lant.
Der künec begunde gâhen, dâ er die wolgetânen vant.

1335

Von vil maneger sprâche sach man ûfe den wegen
vor Etzelen rîten manegen küenen degen,
von kristen und von heiden vil manege wîte schar,
dâ si die vrouwen funden. Si kômen hêrlîche dar.

1336

Von Riuzen und von Kriechen reit dâ vil manec man.
Den Pœlân und den Walâchen sach man swinde gân
ir ross diu vil guoten, dâ si mit krefte riten.
Swaz si site heten, der wart vil wênec vermiten.

1337

Von dem lande ze Kiewen reit dâ vil manec degen,
und die wilden Petschenære. Dâ wart vil gepflegen
mit dem bogen schiezen zen vogelen, die dâ vlugen.
Die pfîle si vil sêre zuo den wenden vaste zugen.

1338

Ein stat bî Tuonouwe lît in Ôsterlant,
diu ist geheizen Tulne. Dâ wart ir bekant
vil manec site vremede, den si ê nie gesach.
Si enpfiengen dâ genuoge, den sît leit von ir geschach.

1339

Vor Etzelen, dem künege, ein ingesinde reit,
vrô und vil rîche, hövesch und gemeit:
wol vier und zweinzec fürste, tiuwer und hêr.
Daz si ir vrouwen sæhen, dâ von engerten si niht mêr.

1340

Der herzoge Râmunc ûzer Walâchen lant,
mit siben hundert mannen kom er für si gerant.
Sam vliegende vogele sach man si varn.
Dô kom der fürste Gibeche mit vil hêrlîchen scharn.

1341

Hornboge der snelle wol mit tûsent man
kêrte von dem künege gegen sîner vrouwen dan.
vil lûte wart geschallet nâch des landes siten.
Von der Hiunen mâgen wart ouch dâ sêre geriten.

1342

Dô kom von Tenemarken der küene Hâwart
und Îrinc der vil snelle, vor valsche wol bewart,
und Irnvrit von Düringen, ein wætlîcher man.
Si enpfiengen Kriemhilde, daz sis êre muosen hân,

1343

mit zwelf hundert mannen, die fuortens in ir schar.
Dô kom der hêrre Blœdelîn mit drîn tûsent dar,
der Etzelen bruoder ûzer Hiunen lant.
Der kom vil hêrlîche, dâ er die küneginne vant.

1344

Dô kom der künec Etzel und ouch hêr Dieterîch
mit allen sînen gesellen. Dâ was vil lobelîch
manec ritter edele, biderbe und guot.
Des wart dô vroun Kriemhilde vil wol gehœhet der muot.

1345

Dô sprach zer küneginne der hêrre Rüedegêr:
„Vrouwe, ich wil enpfâhen hie den künec hêr.
Swen ich iuch heize küssen, daz sol sîn getân.
Jâne muget ir niht gelîche grüezen alle Etzelen man!“

1346

Dô huop man von dem mœre die küneginne hêr
Etzel der vil rîche enbeite dô niht mêr,
er stuont von sînem rosse mit manegem küenem man.
Man sach in vrœlîche gegen Kriemhilde gân.

1347

Zwêne fürsten rîche, als uns daz ist geseit,
bî der vrouwen gânde, truogen ir diu kleit,
dâ ir der künec Etzel hin engegen gie,
dâ si den fürsten edele mit kusse güetlîch enpfie.

1348

Ûf ructe si ir gebende. Ir varwe wolgetân,
diu lûhte ir ûz dem golde. Dâ was vil manec man,
die jâhen, daz vrou Helche niht schœner kunde sîn.
Dâ bî sô stuont vil nâhen des küneges bruoder Blœdelîn.

1349

Den hiez si küssen Rüedegêr, der marcgrâve rîch,
und den künec Gibechen. Dâ stuont ouch Dieterîch.
Der recken kuste zwelve daz Etzelen wîp.
Dô enpfie si sus mit gruoze vil maneges ritters lîp.

1350

Al die wîle und Etzel bî Kriemhilde stuont,
dô tâten dô die tumben, als noch die liute tuont.
Vil manegen puneiz rîchen sach man dâ geriten.
Daz tâten kristen helde und ouch die heiden nâch ir siten.

1351

Wie rehte ritterlîche die Dieterîches man
die schefte liezen vliegen mit trunzûnen dan,
hôhe über die schilde guoter ritter hant!
Von den tiuschen gesten wart dürkel manec schildes rant.

1352

Dâ wart von schefte brechen vil michel dôz vernomen.
Dô wâren von dem lande die recken alle komen
und ouch des küneges geste, vil manec edel man.
Dô gie der künec rîche mit vroun Kriemhilde dan.

1353

Si sâhen bî in stênde ein vil hêrlîch gezelt.
Von hütten was erfüllet alumbe daz velt,
dâ si solden ruowen nâch ir arbeit.
Von helden wart gewîset dar under manec schœniu meit.

1354

Mit der küneginne, dâ si sît gesaz
ûf rîch stuolgewæte. Der marcgrâve daz
hete wol geschaffen, daz man ez vant vil guot,
daz gesidele Kriemhilde. Des vröute sich Etzelen muot.

1355

Waz dô redete Etzel, daz ist mir unbekant.
In der sînen zeswen lac ir wîziu hant.
Si gesâzen minneclîche, dâ Rüedegêr der degen
den künec niht wolde lâzen Kriemhilde heinlîche pflegen.

1356

Dô hiez man lân belîben den bûhurt über al.
Mit êren wart verendet dâ der grôze schal.
Dô giengen zuo den hütten die Etzelen man.
Man gap in herberge vil wîte allenthalben dan.

1357

Der tac der hete nû ende. Si schuofen ir gemach,
unz man den liehten morgen aber schînen sach.
Dô was zuo den rossen komen manec man.
Hey, waz man kurzewîle dem künege ze êren began!

1358

Der künec ez nâch den êren die Hiunen schaffen bat.
Dô riten si von Tulne ze Wiene zuo der stat.
Dâ funden si gezieret vil maneger vrouwen lîp.
Si enpfiengen wol mit êren des künec Etzelen wîp.

1359

Mit harte grôzem vollen sô was in bereit,
swaz si haben solden. Vil manec helt gemeit
sich vröute gegen dem schalle. Herbergen man began.
Des küneges hôchgezîte, diu huop sich vrœlîchen an.

1360

Sine mohten niht geherbergen alle in der stat.
Die niht geste wâren, Rüedegêr die bat,
daz si herberge næmen in daz lant.
Ich wæne, man alle zîte bî Kriemhilde vant

1361

den hêrren Dieterîchen und andern manegen degen.
Si heten sich der ruowe mit arbeit bewegen,
durch daz si den gesten trôsten wol den muot.
Hêr Rüedegêr und sîne vriunde heten kurzewîle guot.

1362

Diu hôchzît was gevallen an einen pfinxtac,
dâ der künec Etzel bî Kriemhilde lac
in der stat ze Wiene. Si wæn sô manegen man
bî ir êrsten manne nie ze dienste gewan.

1363

Si kunte sich mit gâbe dem, der si nie gesach.
Vil maneger dar under zuo den gesten sprach:
„Wir wânden, daz vrou Kriemhilt guotes niht möhte hân.
Nû ist hie mit ir gâbe vil manec wunder getân!“

1364

Diu hôchzît, diu werte sibenzehen tage.
Ich wæne, man von deheinem künege mêre sage,
des hôchzît grôzer wære. Daz ist uns gar verdeit.
Alle die dâ wâren, die truogen iteniuwe kleit.

1365

Sie wæn in Niderlande dâ vor niene gesaz
mit sô manegem recken. Dâ bî sô geloube ich daz,
was Sîvrit rîch des guotes, daz er nie gewan
sô manegen recken edele, sô si sach vor Etzelen stân.

1366

Ouch gap nie deheiner zuo sî selbes hôchgezît
sô manegen rîchen mantel tief und wît
noch sô guoter kleider, der si mohten vil hân,
sô si durch Kriemhilde heten alle getân.

1367

Ir vriunde und ouch die geste, die heten einen muot,
daz si dâ niht ensparten deheiner slahte guot.
Swes iemen an si gerte, daz gâben si bereit.
Des gestuont dâ vil der degene von milte blôz âne kleit.

1368

Wie si ze Rîne sæze, si gedâhte ane daz,
bî ir edelen manne, ir ougen wurden naz.
Si hete es vaste hæle, deiz iemen kunde sehen.
Ir was nâch manegem leide sô vil der êren geschehen.

1369

Swaz iemen tet mit milte, daz was gar ein wint,
unz an Dieterîchen. Swaz Botelunges kint
im gegeben hete, daz was nû gar verswant.
Ouch begie dâ michel wunder des milten Rüedegêres hant.

1370

Ûzer Ungerlande der fürste Blœdelîn,
der hiez dâ lære machen vil manec leitschrîn
von silber und von golde, daz wart dâ hin gegeben.
Man gesach des küneges helde sô rehte vrœlîche leben.

1371

Werbel und Swemmelîn, des küneges spilman,
ich wæne, ir ieslîcher zer hôchgezît gewan
wol ze tûsent marken oder dannoch baz,
dâ diu schœne Kriemhilt bî Etzel under krône saz.

1372

An dem ahzentem morgen von Wiene si dô riten.
Dâ wart in ritterschefte schilde vil versniten
von spern, die dâ fuorten die recken an der hant.
Sus kom der künec Etzel unz in daz hiunische lant.

1373

Ze Heimburc der alten si wâren über naht.
Dône kunde niemen wizzen sol des volkes aht,
mit wie getâner krefte si riten über lant.
Hey, waz man schœner vrouwen in sîner heinmüete vant!

1374

Ze Mîsenburc der rîchen, dâ schiffen si sich an.
Daz wazzer wart verdecket von ross und ouch von man,
alsam ez erde wære, swaz man sîn vliezen sach.
Die wegemüeden vrousen, die heten senfte und ouch gemach.

1375

Ze samene was geslozzen manec schif vil guot,
daz im niht enschadete die ünde noch diu vluot.
Dar über was gespannen manec guot gezelt,
sam ob si noch heten beidiu lant und velt.

1376

Dô kômen disiu mære ze Etzelnburc von dan.
Dô vröuten sich dar inne wîp unde man.
Daz Etzelen ingesinde, des ê diu vrouwe pflac,
gelebten sît bî Kriemhilde vil manegen vrœlîchen tac.

1377

Dô stuonden dâ wartende vil manec edel meit,
die von Helchen tôde hete manegiu leit.
Siben künege töhter, Kriemhilt noch dâ vant,
von den was gezieret wol allez Etzelen lant.

1378

Diu juncvrouwe Herrât noch des gesindes pflac,
diu Helchen swester tohter, an der vil tugende lac,
diu gemahele Dieterîches, eins edelen küneges kint,
diu tohter Nentwînes. Diu hete vil der êren sint.

1379

Gegen der geste künfte vröute sich ir muot.
Ouch was dar zuo bereitet vil krefigez guot.
Wer kunde iu daz bescheiden, wie sît der künec saz?
Si gelebten dâ zen Hiunen nie mit der küneginne baz.

1380

Dô der künec mit sînem wîbe von dem stade reit,
wer ieslîchiu wære, daz wart dô wol geseit.
Die edelen Kriemhilde, si gruoztens deste baz.
Hey, wie gewalteclîche si sît an Helchen stat gesaz!

1381

Getriuwelîcher dienste wart ir vil bekant.
Dô teilte diu küneginne golt und gewant,
silber und gesteine. Swaz die des über Rîn
mit ir zen Hiunen brâhte, daz muose gar zergeben sîn.

1382

Ouch wurden ir mit dieneste sider undertân
alle des küneges mâge und alle sîne man,
daz diu vrouwe Helche sô gewalteclîch gebôt,
sô si nû muosen dienen unz an den Kriemhilde tôt.

1383

Dô stuont mit sölchen êren der hof und ouch daz lant,
daz man dâ zallen zîten die kurzewîle vant,
swar nâch ieslîchem daz herze truoc den muot,
durch des küneges liebe und die küneginne guot.

wie Kriemhilt ir leit gedâht ze rechen
{ 23 }
Wie Griemhild sich vornam, ihr Leid zu rächen.

1384

Mit vil grôzen êren, daz ist al war,
wonten si mit ein ander unz an daz sibende jâr.
die zît diu küneginne eines suns was genesen.
Des kunde der künec Etzel nimmêr vrœlîcher wesen.

1385

Sine wolde niht erwinden, sine würbe sint,
daz getoufet würde daz Etzelen kint
nâch kristenlîchem rehte. Ez wart Ortliep genant.
Des wart vil michel vröude über elliu Etzelen lant.

1386

Swaz ie guoter tugende an vroun Helchen lac,
der vleiz sich nû vrou Kriemhilt dar nâch vil manegen tac.
Die site si lêrte Herrât, diu ellende meit.
Diu hete tougenlîche nâch Helchen grôziu leit.

1387

Den vremden und den kunden was si vil wol bekant.
Die jâhen, daz nie vrouwe besæze ein küneges lant
bezzer unde milter. Daz heten si für wâr.
Daz lop si truoc zen Hiunen unz an daz drîzehende jâr.

1388

Nû hete si wol erkunnen, daz ir niemen widerstuont,
alsô noch fürsten wîbe küneges recken tuont,
und daz si alle zîte zwelf künege vor ir sach.
Si gedâhte ouch maneger leide, der ir dâ heime geschach.

1389

Si gedâhte ouch maneger êren von Nibelunge lant,
der si dâ was gewaltec, und die ir Hagenen hant
mit Sîvrides tôde hete gar benomen,
ob im daz noch immer von ir ze leide möhte komen:

1390

„Daz geschæhe, ob ich in möhte bringen in daz lant!“
Ir troumte, daz ir gienge vil dicke an der hant
Gîselhêr, ir bruoder. Si kuste in zaller stunt
vil ofte in senftem slâfe. Sît wart in arbeiten kunt.

1391

Ich wæne, der übel valant Kriemhilde daz geriet,
daz si sich mit vriuntschefte von Gîselhêre schiet,
den si durch suone kuste in Burgonden lant.
Dô begunde ir aber salwen von heizen trehen ir gewant.

1388

Ez lac ir an dem herzen spâte und vruo,
wie man si âne schulde bræhte dar zuo,
daz si müese minnen einen heidnischen man.
Die nôt, die hete ir Hagene und Gunthêr getân.

1393

Des willen in ir herzen kom si vil selten abe.
Si gedâhte: „Ich bin sô rîche und hân sô grôze habe,
daz ich mînen vîanden gefüege noch ein leit.
Des wære êt ich von Tronege Hagenen gerne bereit.

1394

Nâch den getriuwen jâmert dicke daz herze mîn.
Die mir dâ leide tâten, möhte ich bî den sîn,
sô würde wol errochen mînes vriundes lîp,
des ich kûme erbeite“, sprach daz Etzelen wîp.

1395

Ze liebe si dô heten alle sküneges man,
die Kriemhilde recken. Daz was vil wol getân.
Der kamern, der pflac Eckewart. Dâ von er vriunt gewan.
Den Kriemhilde willen kunde niemen understân.

1396

Sie dâhte zallen zîten: „Ich wil den künec bitten“,
daz er ir des gunde mit güetlîchen siten,
daz man ir vriunde bræhte in der Hiunen lant.
Den argen willen niemen an der küneginne ervant.

1397

Dô si eines nahtes bî dem künege lac,
mit armen umbvangen hete er si, als er pflac
die edelen vrouwen triuten, si was im alsô sîn lîp,
dô gedâhte ir vîande daz vil hêrlîche wîp.

1398

Si sprach zuo dem künege: „Vil lieber hêrre mîn,
ich wolde iuch bitten gerne, möhte ez mit hulden sîn,
daz ir mich liezet sehen, ob ich daz hete versolt,
ob ir den mînen vriunden wæret inneclîchen holt.“

1399

Dô sprach der künec rîche, getriuwe was sîn muot:
„Ich bringe iuch des wol innen, swâ liep und guot
den recken widerfüere, des müese ich vröude hân,
wande ich von wîbes minne nie bezzer vriunde gewan.“

1400

Dô sprach diu küneginne: „Iu ist daz wol geseit,
ich hân vil hôher mâge. Dar umbe ist mir sô leit,
daz mich die sô selten ruochent hie gesehen.
Ich hœre mîn die liute niuwan für ellende jehen.“

1401

Dô sprach der künec Etzel: „Vil liebiu vrouwe mîn,
dûhte ez si niht ze verre, sô lüede ich über Rîn,
swelche ir dâ gerne sæhet, her in mîniu lant.“
Des vröute sich diu vrouwe, dô si den willen sîn ervant.

1402

Si sprach: „Welt ir mir triuwe leisten, hêrre mîn,
sô sult ir boten senden ze Wormez über Rîn.
Sô enbiut ich mînen vriunden, des ich dâ habe muot.
Sô kumt uns her ze lande vil manec edel ritter guot.“

1403

Er sprach: „Swenne ir gebietet, sô lâzet ez geschehen!
Iren kundet iuwer vriunde sô gerne niht gesehen,
als ich si gesæhe, der edelen Uoten kint.
Mich müet daz harte sêre, daz si uns sô lange vremde sint.

1404

Ob ez dir wol gevalle, vil liebiu vrouwe mîn,
sô wolde ich gerne senden nâch den vriunden dîn
die mînen videlære in Burgonden lant.“
Die guoten videlære hiez er bringen sâ zehant.

1405

Si îlten harte balde, dâ der künec saz
bî der küneginne. Er sagete in beiden daz,
si solden boten werden in Burgonden lant.
Dô hiez er in bereiten harte hêrlîch gewant.

1406

Vier und zweinzec recken bereite man diu kleit.
Ouch wart in von dem künege diu boteschaft geseit,
wie si dar laden solden Gunthêr und sîne man.
Kriemhilt diu vrouwe si sunder sprechen began.

1407

Dô sprach der künec riche: „Ich sage iu, wie ir tuot:
Ich enbiute mînen vriunden liep unde allez guot,
daz si geruochen rîten her in mîniu lant.
Ich hân sô lieber geste harte wênec noch bekant.

1408

Unde ob si mînes willen wellen iht begân,
die Kriemhilde mâge, daz si des niht enlân,
sine kœmen an disem sumere zuo mîner hôchgezît,
wand vil der mînen wunne an mînen konemâgen lît.“

1409

Dô sprach der videlære, der stolze Swemmelîn:
„Wenne sol iuwer hôchzît in disen landen sîn,
daz wir daz iuren vriunden kunnen dort gesagen?“
Dô sprach der künec Etzel: „Ze næhesten sunewenden tagen!“

1410

„Wir tuon, swaz ir gebietet“, sprach dô Werbelîn.
In ir kemenâten bat si diu künegîn
bringen tougenlîche, dâ si die boten sprach.
Dâ von vil manegem degene sît wênec liebes geschach.

1411

Si sprach zen boten beiden: „Nû dienet michel guot,
daz ir mînen willen vil güetlîchen tuot,
und saget, swa ich enbiete, heim in unser lant!
Ich mache iuch guotes rîche und gip iu hêrlîch gewant.

1412

Unde swaz ir mîner vriunde immer müget gesehen
ze Wormez bî dem Rîne, den sult ir niht verjehen,
daz ir noch nie gesæhet betrüebet mînen muot,
und saget mînen dienest den helden küene unde guot.

1413

Bittet, daz si leisten, daz in Rüedegêr enbôt,
und mich dâ mite scheiden von aller mîner nôt!
Die Hiunen wellent wænen, deich âne vriunde sî.
Ob ich ein ritter wære, ich kœme in etwenne bî.

1414

Unde sagt ouch Gêrnôt, dem edelen bruoder mîn,
daz im zer werlde holder niemen müge sîn.
Bittet, daz er mir bringe in diz lant
unser besten vriunde, deiz uns zen êren sî gewant.

1415

Sô sagt ouch Gîselhêr, daz er wol gedenke dar an,
daz ich von sînen schulden nie leides niht gewan.
Des sæhen in vil gerne hie diu ougen mîn.
Ich hete in hie vil gerne durch die grôzen triuwe sîn.

1416

Saget ouch mîner muoter die êre, die ich hân,
und ob von Tronege Hagene welle dort bestân,
wer si danne solde wîsen durch diu lant?
Dem sint die wege von kinde her zen Hiunen wol bekant.“

1417

Die boten niene westen, wâ von das was getân,
da si von Tronege Hagenen niht solden lân
belîben bî dem Rîne. Ez wart in sider leit.
Mit im was manegem degene ze grimmem tôde widerseit.

1418

Brieve unde botschaft was in nû gegeben.
Si fuoren guotes rîche und mohten schône leben.
Urloup gap in Etzel und ouch sîn schœne wîp.
In was von guoter wæte wol gezieret der lîp.

wie Werbel und Swemmel die botschaft wurben
{ 24 }
Wie Werbel und Schwemmel die Botschaft überbrachten.

1419

Dô Etzel zuo dem Rîne sîne boten sande,
dô vlugen disiu mære von lande ze lande.
Mit boten harte snellen er bat und ouch gebôt
zuo sîner hôchgezîte. Des holte maneger dâ den tôt.

1420

Die boten dannen fuoren ûzer Hiunen lant
zuo den Burgonden. Dar wâren si gesant
nâch drîn edelen künegen und ouch nâch ir man,
si solden komen Etzele. Des man dô gâhen began.

1421

Hin ze Bechelâren kômen si geriten.
Dâ diente man in gerne. Daz enwart dâ niht vermiten.
Rüedegêr sînen dienest enbôt und Gotelint
bî in hin ze Rîne, und ouch ir beider liebez kint.

1422

Sine liezens âne gâbe von in niht scheiden dan,
daz deste baz gefüeren die Etzelen man.
Uoten und ir kinden enbôt dô Rüedegêr,
sine heten in sô wæge deheinen marcgrâven mêr.

1423

Si enbuten ouch Prünhilde dienest und guot,
stæteclîche triuwe und willigen muot.
Dô si die rede vernâmen, die boten wolden varn.
Si bat diu marcgrâvinne got von himele bewarn.

1424

Ê daz die boten kômen wol durch Beyerlant,
Werbel der vil snelle den guoten bischof vant.
Waz der dô sînen vriunden hin ze Rîne enbôt,
daz ist mir niht gewizzen, niuwan sîn golt alsô rôt

1425

gap er den boten ze minne. Rîten er si lie.
Dô sprach der bischof Pilgrîn: „Unde solde ich si sehen hie,
mir wære wol ze muote, die swester süne mîn,
wand ich mac vil selten zuo zin komen an den Rîn.“

1426

Welche wege si füeren ze Rîne durch diu lant,
des kan ich niht bescheiden. Ir silber und gewant,
daz nam in niemen: man vorhte ir hêrren zorn.
Jâ was gewaltec der edele künec wol geborn.

1427

Inner tagen zwelven kômens an den Rîn,
ze Wormez zuo dem lande, Werbel und Swemmelîn.
Dô sagte man diu mære den künegen und ir man,
dâ kômen boten vremde. Gunthêr dô vrâgen began.

1428

Dô sprach der vogt von Rîne: „Wer tuot uns daz bekant,
von wannen dise vremden, riten in daz lant?“
Daz enwesse niemen, unze daz si sach
Hagene von Tronege dô ze Gunthêren sprach:

1429

„Uns koment niuwiu mære, des wil ich iu verjehen.
Die Etzelen videlære, die hân ich hie gesehen.
Si hât iuwer swester gesenden an den Rîn.
Si süln uns durch ir hêrren grôze willekomen sîn!“

1430

Si riten al bereite für den palas dan.
Ez gefuoren nie hêrlîcher fürsten spileman.
Des küneges ingesinde enpfienc si sâ zehant.
Man gap in schœn herberge, und hiez behalten ir gewant.

1431

Ir reisekleider wâren rîch und sô wol getân,
jâ mohten si mit êren für den künec gân.
Der enwolden si niht mêre dâ ze hove tragen.
Ob ir iemen ruochte, die boten hiezen ez dâ sagen.

1432

In der selben mâze man ouch liute vant,
die ez vil gerne nâmen. Den wart ez gesant.
Dô leiten an die geste verre bezzer wât,
als ez boten küneges ze tragen hêrlîche stât.

1433

Dô gie mit urloube dâ der künec saz
daz Etzelen gesinde. Gerne sach man daz.
Hagene zühteclîche gegen den boten spranc
und enpfie si minneclîche. Des sageten im die knappen danc.

1434

Durch diu kunden mære vrâgen er began,
wie sich Etzel gehabte und sîne man.
Dô sprach der videlære: „Daz lant gestuont nie baz,
noch sô vrô die liute. Nû wizzet endeclîche daz.“

1435

Si giengen zuo dem wirte. Der palas, der was vol.
Dô enpfie man die geste, sô man von rehte sol
güetlîchen grüezen in ander künege lant.
Werbel vil der recken dâ bî Gunthêren vant.

1436

Der künec gezogenlîche grüezen si began:
„Sît willekomen ir beide, ir Hiunen spilman,
und iuwer hergesellen! Hât iuch her gesant
Etzel der vil rîche zuo der Burgonden lant?“

1437

Si nigen dem künege. Dô sprach Werbelîn:
„Dir enbiutet holden dienest der liebe hêrre mîn
und Kriemhilt, dîn swester, her in ditze lant.
Si habent uns iu recken ûf guote triuwe gesant.“

1438

Dô sprach der künec rîche: „Der mære bin ich vrô.
Wie gehabt sich Etzel“, sô vrâgte der degen dô,
„und Kriemhilt, mîn swester, ûzer Hiunen lant?“
Dô sprach der videlære: „Diu mære tuon ich iu bekant,

1439

daz sich noch nie gehabten deheine liute baz,
danne si sich gehabent beide, wizzet daz,
und allez ir gedigene, die mâge und ouch ir man.
Si vröuten sich der verte, dô wir schieden von dan.“

1440

„Genâde sîner dieneste, die er mir enboten hât,
und mîner swester, sît ez alsô stât,
daz si lebent mit vröuden, der künec und sîne man,
wand ich doch der mære gevrâget sorgende hân!“

1441

Die zwêne junge künege, die wâren ouch nû komen.
Si heten disiu mære alrêrst dô vernomen.
Durch sîner swester liebe die boten gerne sach
Gîselhêr der junge zuo zin minneclîchen sprach:

1442

„Ir boten soldet uns grôze willekome sîn!
Ob ir dicker woldet her rîten an den Rîn,
ir fündet hie die vriunde, die ir gerne möhtet sehen.
Iu solde hie ze lande vil wênec leides geschehen.“

1443

„Wir trûwen iu aller êren“, sprach dô Swemmelîn,
„ine kunde iu niht bediuten mit den sinnen mîn,
wie rehte minneclîchen iu Etzel enboten hât
und iuwer edel swester, der dinc in hôhen êren stât.

1444

Genâde und triuwe mant iuch des küneges wîp,
und daz ir ie was wæge iuwer herze und iuwer lîp,
und ze vorderste dem künege sîn wir her gesant,
daz ir geruochet rîten in daz Etzelen lant.

1445

Daz wir iuch des bæten, vil vaste uns daz gebôt
Etzel der rîche iu allen daz enbôt:
ob ir iuch iuwer swester niht sehen woldet lân,
sô wolde er doch gerne wizzen, waz er iu hete getân,

1446

daz ir in alsô vremdet und ouch sîniu lant.
Ob iu diu küneginne wære nie bekant,
sô möhte er doch verdienen, daz ir in ruochet sehen!
Swenne daz ergienge, sô wære im liebe geschehen.“

1447

Dô sprach der künec Gunthêr: „Über dise siben naht,
sô künd ich diu mære, wes ich mich hân bedâht
mir den mînen vriunden. Die wîle sult ir gân
in iuwer herberge und sult vil guote ruowe hân.“

1448

Dô sprach aber Werbelîn: „Und möhte daz geschehen,
daz wir mîne vrouwen kunden ê gesehen,
Uoten die vil rîchen, ê wir schüefen uns gemach?“
Gîselhêr der edele dô vil zühteclîchen sprach:

1449

„Daz sol iu niemen wenden, welt ir für si gân.
Ir habt mîner muoter willen gar getân,
wand si sihet iuch gerne durch die swester mîn,
vroun Kriemhilden. Ir sult ir willekomen sîn!“

1450

Gîselhêr si brâhte, dâ er die vrouwen vant.
Die boten sach si gerne von der Hiunen lant.
Si gruozte si minneclîche durch ir tugende muot.
Dô sagten ir diu mære die boten hövesch unde guot.

1451

„Jâ enbiutet iu mîn vrouwe“, sô sprach Swemmelîn,
„dienest unde triuwe! Möhte daz gesîn,
daz si iuch dicke sæhe, ir sult gelouben daz,
sô wære ir in der werlde mit deheinen vröuden baz.“

1452

Dô sprach diu küneginne: „Des enmac niht gesîn.
Swie gerne ich dicke sæhe die lieben tohter mîn,
sô ist mir leider ze verre des edelen küneges wîp.
Nû sî immer sælec ir und Etzelen lîp!

1453

Ir sult mich lâzen wizzen, ê ir ez gerûmet hie,
wenne ir wider wellet. Ine gesach sô gerne nie
boten in langen zîten, denne ich iuch hân gesehen.“
Die knappen ir dô lobten, daz si daz liezen geschehen.

1454

Zen herbergen fuoren die von Hiunen lant.
Dô hete der künec rîche nâch vriunden sîn gesant.
Gunthêr der edele vrâgte sîne man,
wie in diu rede geviele. Vil maneger dô sprechen began.

1455

Daz er wol möhte rîten in Etzelen lant,
daz rieten im die besten, die er dâ under vant,
âne Hagenen eine. Dem was ez grimme leit.
Er sprach zem künege tougen: „Ir habt iu selben widerseit.

1456

Nû ist iu doch gewizzen, waz wir haben getân!
Wir mügen immer sorge zuo Kriemhilde hân,
wand ich sluoc ze tôde ir man mit mîner hant.
Wie getorste wir rîten in daz Etzelen lant?“

1457

Dô sprach der künec rîche: „Mîn swester lie den zorn
mit kusse minneclîche. Si hât ûf uns verkorn,
daz wir ir ie getâten, ê si von hinnen reit,
ez ensî êt Hagene, danne iu einem widerseit.“

1458

„Nû lât iuch niht betriegen“, sprach Hagene, „swes si jehen,
die boten von den Hiunen. Welt ir Kriemhilde sehen,
Ir müget dâ verliesen die êre und ouch den lîp.
Jâ ist vil lancræche des künec Etzelen wîp!“

1459

Dô sprach zuo dem râte der fürste Gêrnôt:
„Sît ir von schulden fürhtet dâ den tôt
in hiunischen rîchen, solde wirz dar umbe lân,
Wir ensæhen unser swester, daz wære vil übele getân.“

1460

Dô sprach der fürste Gîselhêr zuo dem degene:
„Sît ir iuch schuldec wizzet, vriunt Hagene,
sô sult ir hie belîben und iuch wol bewarn,
und lâzet, die getürren, zuo mîner swester mit uns varn.“

1461

Dô begunde zürnen von Tronege der degen:
„Ine wil, daz ir iemen füeret ûf den wegen,
der getürre rîten mit iu ze hove baz.
Sît ir niht welt erwinden, ich sol iu wol erzeigen daz.“

1462

Dô sprach der kuchenmeister, Rûmolt der degen:
„Der vremden und der kunden möhtet ir wol heizen pflegen
nâch iuwer selbes willen, wand ir habet vollen rât.
Ich wæne niht, daz Hagene iuch noch vergîselt hât.

1463

Welt ir niht volgen Hagene, iu rætet Rûmolt,
wand ich iu bin mit triuwen vil dienestlîchen holt,
daz ir sult hie belîben durch den willen mîn,
unde lât den künec Etzel dort bî Kriemhilde sîn.

1464

Wie kunde iu in der werlde immer sanfter wesen?
Ir müget vor iuwern vîanden harte wol genesen.
Ir sult mit guoten kleidern zieren wol den lîp.
Trinket wîn den besten und minnet wætlîchiu wîp!

1465

Dar zuo gît man iu spîse, die besten, die ê gewan
in der werlt künec deheiner. Ob des niht möhte ergân,
ir soldet noch belîben durch iuwer schœne wîp,
ê ir sô kintlîche soldet wâgen den lîp.

1466

Des rât ich belîben. Rîch sint iuwer lant.
Man mac iu baz erlœsen hie heime diu pfant
danne dâ zen Hiunen. Wer weiz, wie ez dâ gestât?
Ir sult belîben, hêrren! Daz ist der Rûmoldes rât.“

1467

„Wir wellen niht belîben“, sprach dô Gêrnôt,
„Sît daz uns mîn swester sô minneclîch enbôt
und Etzel der rîche. Zwiu solde wir daz lân?
Der dar niht gerne welle, der mac hie heime bestân.“

1468

Des antwurte Hagene: „Lât iuch unbilden niht
mîne rede dar umbe. Swie halt iu geschiht,
ich rât iu an den triuwen: welt ir iuch bewarn,
sô sult ir zuo den Hiunen vil gewerlîche varn.

1469

Sît ir niht welt erwinden, sô besendet iuwer man,
die besten, die ir vindet oder iender müget hân.
Sô wel ich ûz in allen tûsent ritter guot.
Sône mac iu niht gewerren der argen Kriemhilde muot.“

1470

„Des wil ich gerne volgen“, sprach der künec zehant.
Dô hiez er boten rîten wîten in sîniu lant.
Dô brâhte man der helde driu tûsent oder mêr.
Sine wânden niht ze erwerben alsô grœzlîchiu sêr.

1471

Si riten vrœlîche in Gunthêres lant.
Man hiez in allen geben ross und ouch gewant,
die dâ varn solden von Burgonden dan.
Der künec mit guotem willen der vil manegen gewan.

1472

Dô hiez von Tronege Hagene Dancwart, den bruoder sîn,
ir beider recken ahzec füeren an den Rîn.
Die kômen ritterlîche. Harnasch und gewant
fuorten die vil snellen in daz Gunthêres lant.

1473

Dô kom der küene Volkêr, ein edel spilman,
zuo der hovereise mit drîzec sîner man.
Die heten sölch gewæte, ez möhte ein künec tragen.
Daz er zen Hiunen wolde, daz hiez er Gunthêre sagen.

1474

Wer der Volkêr wære, daz wil ich iuch wizzen lân:
er was ein edel hêrre. Im was ouch undertân
vil der guoten recken in Burgonden lant.
Durch daz er videlen kunde, dô was er der spilman genant.

1475

Hagene welte tûsent. Die hete er wol bekant,
und swaz in starken strîten gevrümt hete ir hant,
oder swaz si ie begiengen, des hete er vil gesehen.
Den kunde ander niemen niuwan vrümekeite jehen.

1476

Die boten Kriemhilde vil sêre dâ verdrôz,
wande ir vorhte zir hêrren, diu was harte grôz.
Si gerten tegelîche urloubes von dan.
Des enkunde in niht Hagene. Daz was durch liste getân.

1477

Er sprach zuo sînem hêrren: „Wir süln daz bewarn,
daz wir si lâzen rîten, ê daz wir selbe varn
dar nâch in siben tagen in Etzelen lant.
Treit uns iemen argen willen, deist uns deste baz bekant.

1478

Sône mac ouch sich vrou Kriemhilt bereiten niht dar zuo,
daz uns durch ir râte iemen schaden tuo.
Hât aber si den willen, ez mac ir leide ergân.
Wir füeren mit uns hinnen sô manegen ûz erwelten man.“

1479

Schilde und setele und allez ir gewant,
daz si füeren wolden in Etzelen lant,
daz was bereitet nû gar vil manegem küenem man.
Die boten Kriemhilde hiez man für Gunthêren gân.

1480

Dô die boten kômen, dô sprach Gêrnôt:
„Der künec wil gevolgen, des uns Etzel her enbôt.
Wir wellen komen gerne ze sîner hôchgezît
und sehen unser swester, daz ir des âne zwîvel sît.

1481

Dô sprach der künec Gunthêr: „Künnet ir uns gesagen,
wenne sî diu hôchzît, oder in welchen tagen
wir dar komen solden?“ Dô sprach Swemmelîn:
„Zen næhsten sunewenden sol si wærlîche sîn.“

1482

Der künec in erloubte, des was noch niht geschehen,
ob si wolden gerne vroun Prünhilde sehen,
daz si für si solden mit sînem willen gân.
Daz understuont dô Volkêr. Das was ir liebe getân.

1483

„Jâne ist mîn vrouwe Prünhilt nû niht sô wol gemuot,
daz ir si müget schouwen!“ sprach der ritter guot.
„Bîtet unz morgen, sô lât mans iuch sehen.“
Dô si si wânden schouwen, dône kunde es niht geschehen.

1484

Dô hiez der fürste rîche, er was den boten holt,
durch sîne selbes tugende tragen dar sîn golt
ûfe den breiten schilden, der mohte er vile hân.
Ouch wart in rîchiu gâbe von sînen vriunden getân.

1485

Gîselhêr und Gêrnôt, Gêre und Ortwîn,
daz si ouch milte wâren, daz tâten si wol schîn.
Alsô rîche gâbe buten si die boten an,
daz si si vor ir hêrren niht getorsten enpfân.

1486

Dô sprach zuo dem künege der bote Werbelîn:
„Hêr künec, lât iuwer gâbe hie ze lande sîn!
Wir mügen ir doch niht füeren. Mîn hêrre ez uns verbôt,
daz wir iht gâbe næmen. Ouch ist es harte lützel nôt.“

1487

Dô wart der vogt von Rîne dâ von vil ungemuot,
daz si versprechen wolden sô rîches küneges guot.
Doch muosen si enpfâhen sîn golt und sîn gewant,
daz si mit in fuorten sît in Etzelen lant.

1488

Si wolden sehen Uoten, ê si schieden dan.
Gîselhêr der snelle, der brâhte die spileman
für sîne muoter Uoten. Diu vrouwe enbôt von dan,
swaz si êren hete, daz wære ir liebe getân.

1489

Dô hiez diu küneginne ir porten und ir golt
geben durch Kriemhilde, wand der was si holt,
und durch den künec Etzel, den selben spileman.
Si mohtenz gerne enpfâhen: ez was mit triuwen getân.

1490

Urloup genomen heten die boten nû von dan
von wîben und von mannen. Vrœlîch si dô dan
fuoren în ze Swâben. Dar hiez si Gêrnôt
sîne helde leiten, daz ez in niemen missebôt.

1491

Dô sich die von in schieden, die ir solden pflegen,
hêrschaft diu Etzelen vridete ûf allen wegen.
Des ennam in niemen ross noch ir gewant.
Si îlten harte balde in daz Etzelen lant.

1492

Swâ si der vriunde iht wessen, daz tâten si den kunt,
daz die Burgonden in vil kurzer stunt
kœmen her von Rîne in der Hiunen lant.
Dem bischofe Pilgrîne wart ouch daz mære bekant.

1493

Dâ si für Bechelâren die strâze nider riten,
man sagete ez Rüedeger, daz enwart niht vermiten,
und Gotelinde, des marcgrâven wîp.
Daz si si sehen solde, des wart vil vrœlîch ir lîp.

1494

Gâhen mit den mæren sach man die spilman.
Etzelen si funden in der stat ze Gran.
Dienest über dienest, der man im vil enbôt,
sageten si dem künege. Vor liebe wart er vröuden rôt.

1495

Dô diu küneginne diu mære rehte ervant,
daz ir bruoder solden komen in daz lant,
dô was ir wol ze muote. Si lônte den spileman
mit vil grôzer gâbe. Daz was ir êre getân.

1496

Si sprach: „Nû sagt beide, Werbel und Swemmelîn,
welche mîne mâge zer hôchzît wellen sîn,
der besten, die wir ladeten her in ditze lant.
Nû sagt, waz redete Hagene, dô er diu mære bevant?“

1497

Er sprach: „Der kom zer sprâche an einem morgen vruo.
Lützel guoter sprüche redete er dar zuo,
dô si die reise lobten her in Hiunen lant.
Daz was dem grimmem Hagenen gar zem tôde genant.

1498

Ez kument iuwer bruoder, die künege alle drî,
in hêrlîchem muote. Swer mêr dâ mite sî,
der mære ich endeclîchen wizzen niene kan.
Ez lobte mit in rîten Volkêr, der küene spileman.“

1499

„Des enbære ich harte lîhte“, sprach des küneges wîp,
„deich immer sæhe den Volkêres lîp.
Hagenen bin ich wæge. Der ist ein helt vil guot.
Daz wir in sehen müezen, des stât mir hôhe der muot.“

1500

Dô gie diu küneginne, dâ si den künec sach.
Wie rehte minneclîche Kriemhilt dô sprach:
„Wie gevallent iu diu mære, lieber hêrre mîn?
Des ie mîn wille gerte, daz sol nû verendet sîn.“

1501

„Dîn wille, deist mîn vröude“, sprach der künec dô.
„Ine wart mîn selbes mâge nie sô rehte vrô,
ob si immer komen solden her in mîniu lant.
Durch liebe dîner vriunde sô ist mîn sorge verswant.“

1502

Des küneges ambetliute, die hiezen über al
mit gesidele rihten palas und sal
gegen den lieben geste, die in dâ solden komen.
Sît wart von in dem künege vil michel wunne benomen.

wie die künege zuo den Hiunen vuoren
{ 25 }
Wie die Könige zu den Hunnen fuhren.

1503

Nû lâze wir belîben, wie sie gefuoren hie.
Hôchgemuote recken, die gefuoren nie
sô rehte hêrlîche in deheines küneges lant.
Si hete swaz si wolden, beidiu wâfen und gewant.

1504

Der vogt von dem Rîne kleidete sîne man,
sehzec und tûsent, als ich vernomen hân,
und niuwen tûsent knehte gegen der hôchgezît.
Die si dâ heime liezen, die beweinetenz sît.

1505

Dô truoc man diu gereite ze Wormez über den hof.
Dô sprach dâ von Spîre ein alter bischof
zuo der schœnen Uoten: „Unser vriunde wellent varn
gegen der hôchgezîte. Got müeze ir êre dâ bewarn!“

1506

Dô sprach zuo zir kinden diu edel Uote:
„Ir soldet hie belîben, helde guote!
Mir ist getroumet hînte von angestlîcher nôt,
wie allez diz gefügele in disem lande wære tôt.“

1507

„Swer sich an troume wendet“, sprach dô Hagene,
„der enweiz der rehten mære niht ze sagene,
wenn ez im ze êren volleclîchen stê.
Ich wil, daz mîn hêrre ze hove nâch urloube gê.

1508

Wir suln gerne rîten in Etzelen lant.
Dâ mac wol dienen küenen künegen guoter helde hant,
dâ wir dâ schouwen müezen Kriemhilde hôchgezît.“
Hagene riet die reise, iedoch gerou ez in sît.

1509

Er hete ez widerrâten, wand daz Gêrnôt
mit ungefüegen worten im alsô missebôt:
er man in Sîvrides, vroun Kriemhilden man.
Er sprach: „Dâ von wil Hagene die grôzen hovereise lân.“

1510

Dô sprach von Tronege Hagene: „Durch vorhte ich niene tuo.
Swenne ir gebietet, helde, sô sult ir grîfen zuo.
Jâ rît mit iu gerne in Etzelen lant!“
Sît wart von im verhouwen vil manec helm unde rant.

1511

Diu schif bereitet wâren. Dâ was vil manec man.
Swaz si kleider heten, diu truoc man dar an.
Si wâren unmüezec. Vor âbendes zît
si huoben sich von hûse vil harte vrœlîche sît.

1512

Gezelt und hütten spien man an daz gras
anderthalp des Rînes. Dô daz geschehen was,
der künec bat noch belîben daz sîn vil schœne wîp.
Si trûte noch des nahtes den sînen wætlîchen lîp.

1513

Pusûnen, floytiern, huop sich des morgens vruo,
dar si varn solden. Dâ bereiten si sich zuo.
Swer liep hete in arme, der trûte vriundes lîp.
Des schiet sît vil mit leide des künec Etzelen wîp.

1514

Diu kint der schœnen Uoten, die heten einen man,
küene und getriuwe. Dô si wolden dan,
dô sagte er dem künege tougen sînen muot.
Er sprach: „Des muoz ich trûren, daz ir die hovereise tuot.“

1515

Er was geheizen Rûmolt und was ein helt zer hant.
Er sprach: „Wem welt ir lâzen liute und ouch diu lant?
Daz niemen kan erwenden iu recken iuwern muot!
Diu Kriemhilden mære nie gedûhten mich guot.“

1516

„Daz lant sî dir bevolhen und mîn kindelîn,
und diene wol den vrouwen! Daz ist der wille mîn.
Swen dû sehest weinen, dem trœste sînen lîp.
Jâne getuot uns nimmêr leide des künec Etzelen wîp!“

1517

Diu ross bereitet wâren den künegen und ir man.
Mit minneclîchem küssen schiet vil maneger dan,
dem in hôhem muote lebte dâ der lîp.
Daz muose sît beweinen vil manec wætlîchez wîp.

1518

Dô man die snellen recken zen rossen sach gân,
dô kôs man vil der vrouwen trûreclîchen stân.
Daz ir vil langez scheiden sagte in vil wol ir muot:
ûf grôzen schaden ze komene daz herze niemen sanfte tuot.

1519

Die snellen Burgonden sich ûz huoben.
Dô wart in dem lande ein michel uoben.
beidenthalp der berge weinte wîp und man.
Swie dort ir volc getæte, si fuoren vrœlîche dan.

1520

Die Nibelunges helde kômen mit in dan
in tûsent halspergen. Ze hûs si heten lân
vil manege schœne vrouwen. Die gesâhen si nimmêr mê.
Die Sîvrides wunden tâten Kriemhilde wê.

1521

Dô schicketen si ir reise gegen dem Möune dan,
ûf durch Ôstervranken, die Gunthêres man.
Dar leite si dô Hagene, dem was ez wol bekant.
Ir marschalc was Dancwart, der helt von Burgonden lant.

1522

Dô si von Ôstervranken gegen Salvelde riten,
dô mohte man si kiesen an hêrlîchen siten,
die fürsten und ir mâge, die helde lobesam.
An dem zwelften morgen der künec an die Tuonouwe kam.

1523

Dô reit von Tronege Hagene zaller vorderôst.
Er was den Nibelungen ein helflîcher trôst.
Dô erbeizte der degen küene nider ûf den sant.
Sîn ross er harte balde zuo zeinem boume gebant.

1524

Daz wazzer was engozzen, diu schif verborgen.
Ez ergie den Nibelungen ze grôzen sorgen,
wie si kœmen übere: der wâc was in ze breit.
Dô erbeizte zuo der erden vil manec ritter gemeit.

1525

„Leide“, sprach dô Hagene, „Mac dir wol hie geschehen,
voget von dem Rîne. Nû maht dû selbe sehen,
das wazzer ist engozzen. Vil starc ist im sîn vluot.
Jâ wæne wir verliesen noch hiute hie manegen helt guot!“

1526

„Waz wîzet ir mir, Hagene?“ sprach der künec hêr.
„Durch iuwer selbes tugende, untrœstet uns niht mêr.
Den furt sult ir uns suochen hin über an daz lant,
daz wir von hinnen bringen beidiu ross und ouch gewant.“

1527

„Jâne ist mir“, sprach Hagene, „mîn leben niht sô leit,
daz ich mich welle ertrenken in disen ünde breit!
Ê sol von mînen handen ersterben manec man
in Etzelen landen, des ich vil guoten willen hân.

1528

Belîbet bî dem wazzer, ir stolzen ritter guot!
Ich wil die vergen suochen selbe bî der vluot,
die uns bringen übere in Gelpfrâtes lant.“
Dô nam der starke Hagene sînen guoten schildes rant.

1529

Er was vil wol gewâfent. Den schilt er dannen truoc,
sînen helm ûf gebunden, lieht was er genuoc.
Dô truoc er ob der brünne ein wâfen alsô breit,
daz ze beiden ecken harte vreislîchen sneit.

1530

Dô suochte er nâch den vergen wider und dan.
Er hôrte wazzer giezen, losen er began,
in einem schœnem brunnen. Daz tâten wîsiu wîp.
Die wolden sich dâ küelen und badeten ir lîp.

1531

Hagene wart innen. Er sleich in tougen nâch.
Dô si daz versunnen, dô wart in dannen gâch.
Daz si im entrunnen, des wâren si vil hêr.
Er nam in ir gewæte, der helt enschadete in niht mêr.

1532

Dô sprach daz eine merewîp, Hadeburc was si genant:
„Edel ritter Hagene, wir tuon iu hie bekant,
swenne ir uns, degen küene, gebet wider unser wât,
wie iu ze den Hiunen disiu hovereise ergât.“

1533

Si swebten sam die vogele vor im ûf der vluot.
Des dûhten in ir sinne starc und guot.
swaz si im sagen wolden, er geloubtez deste baz.
Des er dô hinz in gerte, vil wol bescheideten si im daz.

1534

Si sprach: „Ir müget wol rîten in Etzelen lant.
Des setze ich iu ze bürgen mîne triuwe hie ze hant,
daz helde nie gefuoren in deheiniu rîche baz
nâch alsô grôzen êren. Nû geloubet wærlîche daz!“

1535

Der rede was dô Hagene in sînem herzen hêr.
Dô gap er in ir kleider und sûmte sich niht mêr.
Dô si dô an geleiten ir wunderlîch gewant,
dô sagten si im rehte die reise in Etzelen lant.

1536

Dô sprach daz ander merewîp, diu hiez Sigelint:
„Ich wil dich warnen, Hagene, daz Aldrîânes kint:
durch der wæte liebe hât mîn muome dir gelogen.
Kümestû hin zen Hiunen, sô bistû sêre betrogen.

1537

Jâ soltû kêren widere! Daz ist dir an der zît,
wand ir helde küene alsô geladet sît,
daz ir sterben müezet in Etzelen lant.
Swelche dar gerîtent, die habent den tôt an der hant.“

1538

Dô sprach aber Hagene: „Ir trieget âne nôt.
Wie möhtez sich gefüegen, daz wir alle tôt
solden dâ belîben durch iemens haz?“
Si begunden im diu mære sagen küntlîcher baz.

1539

Dô sprach aber diu eine: „Ez muoz alsô wesen,
daz iuwer deheiner kan dâ niht genesen,
niuwan des küneges kappelân. Daz ist uns wol bekant.
Der kümet gesunt widere in daz Gunthêres lant.“

1540

Dô sprach in grimmem muote der küene Hagene:
„Daz wære mînen hêrren müelîch ze sagene,
daz wir alle zen Hiunen solden verliesen den lîp.
Noch zeige uns überz wazzer, daz aller wîseste wîp!“

1541

Si sprach: „Sît dû der verte niht welles haben rât:
swâ obene bî dem wazzer ein herberge stât,
dâ inne ist ein verge, und niender anderswâ.“
Der mære der er vrâgte, der geloubete er sich dâ.

1542

Dem ungemuotem recken sprach diu eine nâch:
„Nû bîtet noch, hêr Hagene, jâ ist iu gar ze gâch!
Vernemet noch diu mære, wie ir kumet über sant:
dirre marke hêrre, der ist Else genant.

1543

Sîn bruoder ist geheizen der degen Gelpfrât,
ein hêrre in Beyerlande. Wie müelîch ez iu stât,
welt ir durch sîne marke! Ir sult iuch wol bewarn
und sult ouch mit dem vergen vil bescheidenlîche varn.

1544

Der ist sô grimmes muotes, er lât iuch niht genesen,
ir enwelt bî dem helde mit guoten sinnen wesen.
Welt ir, daz er iuch füere, sô gebet im den solt.
Er hüetet dises landes und ist Gelpfrâte holt.

1545

Unde kom er niht bezîte, sô ruofet über vluot,
und jeht, ir heizet Amelrîch. Der was ein helt guot,
der durch vîentschefte rûmte ditze lant.
Sô kumt iu der verge, swenne im der nam wirt genant.“

1546

Der übermüete Hagene der vrouwen dô neic.
Er enredete niht mêre, wan daz er vaste sweic.
Dô gie er bî dem wazzer für sich an den sant.
Dâ er anderthalben ein herberge vant.

1547

Er begunde vaste ruofen hin über den vluot:
„Nû hol mich hie, verge“, sprach der degen guot,
„sô gip ich dir ze miete einen bouc von golde rôt.
Jâ ist mir dirre verte, daz wizzest, wærlîche nôt!“

1548

Der verge was sô rîche, daz im niht dienen zam.
Dâ von er lôn vil selten von iemen dâ genam.
Ouch wâren sîne knehte vil harte hôchgemuot.
Noch stuont allez Hagene eine disehalp der vluot.

1549

Dô ruofte er mit der krefte, daz al der wâc erdôz,
wan des heldes sterke was michel und grôz:
„Nû hol mich, Amelrîchen! Ich bin der Elsen man,
der durch starke vîentschaft von disem lande entran.“

1550

Vil hôhe an dem swerte einen bouc er im bôt,
lieht und schœne was er, von golde rôt,
daz man in über fuorte in Gelpfrâtes lant.
Der übermüete verge nam selbe daz ruoder an die hant.

1551

Ouch was der selbe verge müelîch gesît.
Diu guof nâch grôzem guote vil bœse ende gît.
Dô wolde er verdienen daz Hagenen golt sô rôt.
Des leit er von dem degene den swertgrimmigen tôt.

1552

Der verge îlte genôte hin über an den sant.
Den er dâ nennen hôrte, dô er des niht envant,
dô zurnde er ernslîchen, als er Hagenen sach.
Vil harte grimmeclîche er zuo dem degen sprach:

1553

„Ir müget wol sîn geheizen benamen Amelrîch.
Des ich mich hie verwæne, dem sît ir ungelîch.
Von vater und von muoter was er der bruoder mîn.
Nû ir mich betrogen habt, ir müezet disehalp sîn.“

1554

„Nein, durch got den rîchen!“ sprach dô Hagene,
„Ich bin ein recke vremde und sorge ûf degene.
Nû nemet hin vriuntlîche hiute mînen solt,
daz ir mich über füeret. Ich bin iu wærlîchen holt.“

1555

Dô sprach aber der verge: „Des mac niht gesîn.
Ez habent vîande die lieben hêrren mîn.
Dar umbe ich niemen vremden füere in diz lant.
Sô liebe dir sî ze lebene, sô trit vil balde ûz an den sant!“

1556

„Nûne tuot es niht!“ sprach Hagene, „wan trûrec ist mîn muot.
Nemet von mir ze minne diz golt vil guot,
und füeret uns über: tûsent ross und alsô manegen man.“
Dô sprach der grimme verge: „Ez wirdet nimmêr getân.“

1557

Er huop ein starkez ruoder, michel und breit.
Er sluoc ûf Hagenen, des wart er ungemeit,
daz er in dem schiffe strûchte an sîniu knie.
Sô rehte grimmer verge, der kom dem Tronegære nie.

1558

Dô wolde er baz erzürnen den übermüeten gast.
Er sluoc im eine schalten, daz diu gar zerbrast,
Hagenen über daz houbet. Er was ein starker man.
Dâ von der Elsen verge grôzen schaden dâ gewan.

1559

Mit grimmegem muote greif Hagene zehant
vil balde ze sîner scheiden, dâ er ein wâfen vant.
Er sluoc im ab daz houbet und warf ez an den grunt.
Diu mære wurden schiere den stolzen Burgonden kunt.

1560

In den selben stunden, dô er den schiffman sluoc,
daz schif, daz vlôz enouwe. Daz was im leit genuoc.
Ê erz gerihte widere, müeden er began.
Dô zôch vil krefteclîche des künec Gunthêres man.

1561

Mit zügen harte swinden kêrte ez der gast,
unz im daz starke ruoder in der hende brast.
Er wolde zuo den recken ûz an einen sant,
dâ was deheinez mêre. Hey, wie schiere erz dâ gebant

1562

mit einem schiltvezzel! Daz was ein porte smal.
Gegen einem walde kêrte er hin ze tal.
Dô vant er sînen hêrren an dem stade stân.
Dô gie im hin engegen vil manec wætlîcher man.

1563

Mit gruoze in wol enpfiengen die snellen ritter guot.
Dô sâhens in dem schiffe riechen daz bluot
von einer starken wunden, die er dem vergen sluoc.
Dô wart von den degenen gevrâget Hagene genuoc.

1564

Dô der künec Gunthêr daz heize bluot ersach
sweben in dem schiffe, wie balde er dô sprach:
„Wan sagt ir mir, Hagene, war ist der verge komen?
Iuwer starkez ellen, ich wæn, im daz leben hât benomen.“

1565

Dô sprach er lougenlîche: „Dâ ich daz schif dâ vant
bî den wilden wîden, dâ lôste ez mîn hant.
Ich hân deheinen vergen hiute hie gesehen.
Ez ist ouch niemen leide von mînen schulden hie geschehen.“

1566

Dô sprach von Burgonden der hêrre Gêrnôt:
„Hiute muoz ich sorgen ûf lieber vriunde tôt.
Sît wir der schiffliute bereite niene hân,
wie wir kumen über, des muoz ich trûrende stân.“

1567

Vil lûte rief dô Hagene: „Leit nider ûf das gras,
ir knehte, diu gereite! Ich gedenke, daz ich was
der aller beste verge, den man bî dem Rîne vant.
Jâ getrûwe ich iuch wol bringen hin über in Gelpfrâtes lant!“

1568

Daz si dester balder kœmen über vluot,
diu ross si an sluogen. Daz swimmen, daz wart guot,
wand in diu starc ünde deheines dâ benam.
Etelîchez ouwete verre, als es müeden began.

1569

Dô truogen si zem schiffe ir golt und ouch ir wât,
sît daz si der verte niht mohten haben rât.
Hagene was dâ meister. Des fuorte er ûf den sant
vil manegen rîchen recken in daz unkunde lant.

1570

Zem êrsten brâhte er über wol tûsent ritter hêr,
dar nâch sîne recken. Dannoch was ir mêr.
Niun tûsent knehte fuorte er an daz lant.
Des tages was unmüezec des Tronegæres hant.

1571

Dô er si wol gesunde brâhte über den vluot,
dô gedâhte vremder mære der snelle degen guot,
diu im ê dâ sageten diu wilden merewîp.
Des hete des küneges kappelân nâch verlorn sînen lîp.

1572

Bî dem kappelsoume er den pfaffen vant:
ob dem heilectuome er leinte an sîner hant.
Des mohte er niht geniezen, dô in Hagene sach.
Der gotes arme priester muose lîden ungemach.

1573

Er swanc in ûz dem schiffe. Dar zuo wart im gâch.
Dô riefen ir genuoge: „Nû vâhâ, hêrre, vâch!“
Gîselhêr der junge, zürnen erz began.
Er enwolde ez doch niht lâzen ir deheinen understân.

1574

Dô sprach von Burgonden der hêrre Gêrnôt:
„Waz hilfet iuch nû, Hagene, des kappelânes tôt?
Tæte ez ander iemen, daz solde iu wesen leit.
Umbe welche schulde habt ir dem priester widerseit?“

1575

Der pfaffe swam genôte. Er wolde sîn genesen,
ob im iemen hülfe. Des mohte dâ niht wesen,
wan der starke Hagene vil zornec was gemuot.
Er stiez in zuo dem grunde. Daz dûhte niemene guot.

1576

Dô der arme pfaffe der helfe niene sach,
dô kêrte er wider übere. Des leit er ungemach.
Swie er niht swimmen kunde, im half diu gotes hant,
daz er wol kom gesunder him wider ûz an daz lant.

1577

Dô stuont der arme priester unde schutte sîne wât.
Dâ bî sach wol Hagene, daz sîn niht wære rât,
daz im für wâr sageten diu wilden merewîp.
Er dâhte: „Dise degene müezen verliezen den lîp.“

1578

Dô si daz schif entluoden und gar getruogen dan,
swaz dar ûf heten der drîer künege man,
Hagene sluoc ez ze stücken und warf ez an den vluot.
Des hete michel wunder die recken küene unde guot.

1579

„Zwiu tuot ir daz, bruoder?“ Sô sprach Dancwart,
„Wie sul wir über, sô wir die widervart
rîten von den Hiunen ze lande an den Rîn?“
Sît dô sagete in Hagene, daz des kunde niht gesîn.

1580

Dô sprach der helt von Tronege: „Ich tuon ez ûf den wân,
ob wir an dirre reise deheinen zagen hân,
der uns entrinnen welle durch zagelîche nôt,
der muoz an disem wâge doch lîden schamelîche tôt.“

1581

Si fuorten mit in einen ûz Burgonden lant,
einen helt ze sînen handen, der was Volkêr genant.
Der redete spæhelîche allen sînen muot.
Swaz ie begie hêr Hagene, daz dûhte den videlære guot.

1582

Ir ross bereitet wâren, die soumære wol geladen.
Si heten an der verte noch deheinen schaden
genomen, der si müete, wan des küneges kappelân:
der muose ûfe sînen füezen hin wider zuo dem Rîne gân.

wie Gelfrât erslagen wart von Dankwarte
{ 26 }
Wie Dankwart Gelfrat erschlug.

1583

Dô si nû wâren komen alle ûfe den sant,
der künec begunde vrâgen: „Wer sol uns durch daz lant
die rehten wege wîsen, daz wir niht irre varn?“
Dô sprach der starke Volkêr: „Daz sol ich eine bewarn.“

1584

„Nû enthaltet iuch“, sprach Hagene, „ritter unde kneht.
Man sol vriunden volgen, jâ dunket ez mich reht!
Vil ungefüegiu mære, diu tuon ich iu bekant:
wir enkumen nimmêr wider in Burgonden lant.

1585

Daz sageten mir zwei merewîp hiute morgen vruo,
daz wir niht komen widere. Nû rât ich, waz man tuo:
daz ir iuch wâfent, helde. Ir sult iuch wol bewarn,
wir hân hie starke vîande, daz wir gewerlîche varn.

1586

Ich wânde an lügen vinden diu wilden merewîp.
Si jâhen, daz gesunder unser deheines lîp
wider ze lande kœme, niuwan der kappelân.
Dar umb ich in wolde sô gerne hiute ertrenket hân.“

1587

Dô vlugen disiu mære von schare ze schar.
Des wurden snelle helde vor leide missevar,
dô si begunden sorgen ûf den herten tôt
an dirre hovereise. Des gie in wærlîche nôt.

1588

Dâ ze Mœringen si wâren über komen,
dâ dem Elsen vergen der lîp was benomen.
Dô sprach aber Hagene: „Sît daz ich vîande hân
verdienet ûf der strâze, wir werden sicherlîch bestân.

1589

Ich sluoc den selben vergen hiute morgen vruo.
Si wizzen wol diu mære. Nû grîfet, helde, zuo,
ob Gelpfrât und Else hiute hie bestê
unser ingesinde, daz ez in schedelîch ergê.

1590

Ich erkenne si sô küene, ez wirdet niht verlân.
Diu ross, diu sult ir lâzen deste sanfter gân,
daz des iemen wæne, wir vliehen ûf den wegen.“
„Des râtes wil ich volgen“, sô sprach Gîselhêr der degen.

1591

„Wer sol daz ingesinde wîsen über lant?“
Si sprâchen: „Daz tuo Volkêr, dem ist ez hie wol bekant,
stîge und strâze, der küene spileman.“
Ê daz mans vollen gerte, man sach gewâfent stân

1592

den snellen videlære. Den helm er ûfgebant.
In hêrlîcher varwe was sîn wîcgewant.
Er bant ouch ze sînem schafte ein zeichen, daz was rôt.
Sît kom er mit den künegen in eine grœzlîche nôt.

1593

Dô was tôt des vergen Gelpfrâte komen
mit gewissem mære. Dô hete ez ouch vernomen
Else der vil starke. Ez was in beiden leit.
Si sanden nâch ir helden. Die wâren schiere bereit.

1594

In vil kurzen zîten, ich wilz iuch hœren lân,
sach man zuo in rîten, die schaden heten getân
in starken urliugen, vil ungefüegiu her.
Der kômen Gelpfrâte wol siben hundert oder mêr.

1595

Dô si ir grimmen vîanden begunden rîten nâch,
jâ beiten si ir hêrren. Den was ein teil ze gâch
nâch den küenen gesten: si wolden anden ir zorn.
Des wart der hêrren vriunde sider mêr verlorn.

1596

Dô hete von Tronege Hagene wol gefüeget daz,
wie möhte sîner mâge ein helt gehüeten baz,
er pflac der nâchhuote mit den sînen man
und Dancwart, sîn bruoder. Daz was vil wîslîch getân.

1597

In was des tages zerunnen, des enheten si niht mêr.
Er vorhte an sînen vriunden leit unde sêr.
Si riten under schilden durch der Beyer lant.
Dâ nâch in kurzer wîle die helde wurden an gerant.

1598

Beidenthalp der strâze und hinden vaste nâch
si hôrten hüeve klaffen. Dem liute was ze gâch.
Dô sprach der küene Dancwart: „Man wil uns hie bestân.
Nû bindet ûf die helme! Daz dunket mich rætlîch getân.“

1599

Si hielten ab ir verte, als ez muoste sîn.
Si sâhen in der vinster der liehten schilde schîn.
Dône wolde Hagene niht langer si verdagen:
„Wer jaget uns ûf der strâze?“ Daz muose im Gelpfrât dô sagen.

1600

Dô sprach der marcgrâve ûz Beyerlant:
„Wir suochen unser vîande, unde haben her nâch gerant.
Ine weiz niht, wer mir hiute mînen vergen sluoc.
Der was ein helt zen handen. Des ist mir leide genuoc.“

1601

Dô sprach von Tronege Hagene: „Was der verge dîn?
Der wolde uns niht füeren. Des ist diu schulde mîn.
Dô sluoc ich den recken. Deiswâr, des gie mir nôt.
Ich hete von sînen handen vil nâch gewunnen den tôt.

1602

Ich bôt im ze miete golt und gewant,
daz er uns über fuorte, helt, in dîn lant.
Dô zurnde er sô sêre, daz er mich dô sluoc
mit einer starken schalten. Des was ich grimme genuoc.

1603

Dô kom ich zem swerte und werte im sînen zorn
mit einer starken wunden. Des wart der helt verlorn.
Daz bringe ich iu ze suone, swie iuch dunket guot.“
Dô gie ez an ein strîten. Si wâren herte gemuot.

1604

„Ich wesse wol“, sprach Gelpfrât, „dô hie für gereit
Gunthêr und sîn gesinde, daz uns tæte leit
Hagene von Tronege. Nû sol er niht genesen.
Für des vergen ende der helt muoz hie bürge wesen.“

1605

Si neigeten über schilde ze stichen nû diu sper,
Gelpfrât und Hagene. In was zein ander ger.
Else und Dancwart vil hêrlîche riten.
Si versuochten, wer si wâren. Dâ wart vil grimme gestriten.

1606

Wie möhten sich versuochen immer helde baz?
Von eine starken tjoste hinder daz ross gesaz
Hagene der küene von Gelpfrâtes hant.
Im brast daz fürbüege. Dô wart im strîten bekant.

1607

Von ir ingesinde der krach der schefte schal.
Dô erholte ouch sich dô Hagene, der ê was ze tal
komen von dem stiche nider an daz gras.
Er wæne unsanftes muotes wider Gelpfrâte was.

1608

Wer in diu ross behielte, daz ist mir unbekant.
Si wâren zuo der erden komen ûf den sant.
Hagene und Gelpfrât ein ander liefen an.
Des hulfen ir gesellen, daz in wart strîten kunt getân.

1609

Swie bitterlîche Hagene ze Gelpfrâte spranc,
der edel marcgrâve des schildes hin im swanc
ein michel stücke, deiz fiuwer dræte dan.
Des was vil nâch erstorben der küene Gunthêres man.

1610

Dô begunde er rüefen Dancwarten an:
„Hilf mir, lieber bruoder! Jâ hât mich bestân
ein helt zen sînen handen, der enlât mich niht genesen!“
Dô sprach der küene Dancwart: „Des sol ich scheidære wesen.“

1611

Der helt dô spranc dar nâher und sluoc im einen slac
mit einem scharpfen wâfen, dâ von er tôt gelac.
Else wolde gerne rechen dô den man.
Er und sîn gesinde schieden schedelîche dan:

1612

Im was erslagen der bruoder, selbe wart er wunt.
Wol ahzec sîner degene belîben dâ ze stunt
mit dem grimmen tôde. Der hêrre muose dan
vlühteclîchen von den Gunthêres man.

1613

Dô die von Beyerlande wichen ûz dem wege,
dô hôrte man nâch hellen die vreislîchen slege.
Dô jageten die von Tronege ir vîanden nâch.
Die sîn niht engelten wânden, den was allen ze gâch.

1614

Dô sprach an der vlühte Dancwart der degen:
„Wir suln wider wenden balde ûf disen wegen,
und lâze wir si rîten. Si sint von bluote naz.
Gâhe wir zen vriunden! Ich râte wærlîchen daz.“

1615

Dô si hin wider kômen, dâ der schade was geschehen,
dô sprach von Tronege Hagene: „Helde, ir sult besehen,
wes uns hie gebreste, oder wen wir hân verlorn
hie in disem strîte durch den Gelpfrâtes zorn.“

1616

Si heten verlorn viere. Die muosen si verklagen.
Die wâren wol vergolten: dâ wider was erslagen
der von Beyerlande hundert oder baz.
Des wâren den von Tronege ir schilde trüebe und bluotes naz.

1617

Ein teil schein ûz den wolken des liehten mânen brehen.
Dô sprach aber Hagene: „Niemen sol verjehen
den mînen lieben hêrren, waz wir hie hân getân.
Lât si unze morgen âne sorge bestân.“

1618

Dô si nû nâch in kômen, die dort striten ê,
dô tet dem ingesinde diu müede harte wê.
„Wie lange sul wir rîten?“ sprach manec man.
Dô sprach der küene Dancwart: „Wir mugen niht herberge hân.

1619

Ir müezet alle rîten, unz ez werde tac.“
Volkêr der snelle, der des gesindes pflac,
bat den marschalc vrâgen: „Wâ sul wir hînte sîn,
dâ gerasten unser mœre und ouch die lieben hêrren mîn?“

1620

Dô sprach der küene Dancwart: „Ine kans iu niht gesagen.
Wir enmugen niht geruowen, ê ez beginne tagen.
Swâ wirz danne vinden, dâ legen uns an ein gras!“
Dô si diu mære hôrten, wie leit in sûmelîchen was!

1621

Si belîben unvermeldet des heizen bluotes rôt.
unz daz diu sunne ir liehtez schînen bôt
dem morgen über berge, daz ez der künec sach,
daz si gestriten heten. Der helt vil zorneclîchen sprach:

1622

„Wie nû, vriunt Hagene, iu wæn versmâhet daz,
daz ich bî iu wære, dâ iu die ringe naz
sus wurden von dem bluote! Wer hât daz getân?“
Er sprach: „Daz tet Else. Der hete uns nehten bestân.

1623

Durch den sînen vergen wir wurden an gerant.
Dâ sluoc Gelpfrâten mînes bruoder Dancwarten hant.
Sît entran uns Else. Des twanc in michel nôt.
In hundert und uns viere belîben in dem strîte tôt.“

1624

Wir kunnen niht bescheiden, wâ si sich leiten nider.
Alle die lantliute, die gevrieschen sider,
daz ze hove fuoren der edelen Uoten kint.
Si wurden wol enpfangen dâ ze Pazzouwe sint.

1625

Der edelen künege œheim, der bischof Pilgrîn
dem wart vil wol ze muote, dô die neven sîn
mit alsô vil recken kômen zuo zim in daz lant.
Daz er in willec wære, daz wart in schiere bekant.

1626

Si wurden wol enpfangen von vriunden ûf den wegen.
Dâ ze Pazzouwe man kunde ir niht gepflegen,
si muosen überz wazzer, dâ si funden velt.
Dâ wurden ûf gespannen hütten unde gezelt.

1627

Si muosen dâ belîben allen einen tac
und ouch die naht. Mit vollen wie schône man ir pflac!
Dar nâch si muosen rîten in Rüedegêres lant.
Dem wurden ouch diu mære dar nâch vil schiere bekant.

1628

Dô die wegemüeden ruowe genâmen,
unde si dem lande nâher kâmen,
dô fundens ûf der marke slâfende einen man,
dem von Tronege Hagene ein starkez wâfen an gewan.

1629

Jâ was geheizen Eckewart der starke ritter guot.
Er gewan der umb einen trûrigen muot,
dâ er verlôs daz wâfen von der helde vart.
Die marke Rüedegêres, die fundens übele bewart.

1630

„Ouwê mir dirre schande!“ sprach dô Eckewart,
„Jâ riuwet mich vil sêre der Burgonden vart!
Sît ich Sîvride verlôs, sît was mîn vröude vergân.
Ouwê, hêrre Rüedegêr, wie hân ich wider dich getân!“

1631

Dô hôrte vil wol Hagene des edelen recken nôt.
Et gap im wider sîn wâfen und sehs bouge rôt,
„Die habe dir, helt, ze minnen, daz dû mîn vriunt sîst.
Dû bist ein degen küene, swie eine dû ûfe der marke list.“

1632

„Got lôn iu iuwerer bouge!“ sprach dô Eckewart,
„Doch riuwet mich vil sêre zen Hiunen iuwer vart.
Ir sluoget Sîvriden. Man ist iu hie gehaz.
Daz ir iuch wol behüetet, an triuwen rât iu daz.“

1633

„Nû müeze uns got behüeten“, sprach dô Hagene.
„Jâne hânt niht mêre sorge dise degene
wan umb die herberge, die künege und ouch ir man,
wâ wir in disem lande noch hînte nahtselde hân.

1634

Diu ross sint uns verdorben ûf den herten wegen,
und der spîse zerunnen“, sprach Hagene der degen.
„Wir vinden ez niender veile. Uns wære wirtes nôt,
der uns noch hînte gæbe durch sîne tugende sîn brôt.“

1635

Dô sprach aber Eckewart: „Ich zeig iu einen wirt,
daz ir ze hûse selten sô wol bekomen birt
in deheinem lande, als iu hie mac geschehen,
ob ir vil snelle degene wellet Rüedegêren sehen.

1636

Der sitzet ûf der strâze und ist der beste wirt,
der ie kom ze hûse. Sîn herze tugende birt,
alsô der süeze meie daz gras mit bluomen tuot.
Swenne er sol helden dienen, sô ist er vrœlîch genuot.“

1637

Dô sprach der künec Gunthêr: „Welt ir mîn bote sîn,
ob uns welle enthalten durch den willen mîn
mîn lieber vriunt Rüedegêr, mîne mâge und unser man?
daz wil ich immer dienen, sô ich aller beste kan.“

1638

„Der bote bin ich gerne“, sprach dô Eckewart.
Mit vil guotem willen huop er sich an die vart
und sagete dô Rüedegêre, als er hete vernomen.
Im was in manegen zîten niht sô lieber mære komen.

1639

Man sach ze Bechelâren îlen einen degen.
Selbe erkande in Rüedegêr. Er sprach: „Ûf disen wegen
dort her gâhet Eckewart, ein Kriemhilde man.“
Er wânde, daz die vîande im hete leide getân.

1640

Dô gie er für die porten, dâ er den boten vant.
Daz swert er ab gurte und leitez von der hant.
Diu mære, diu er brâhte, wurden niht verdaget
den wirt und sîne vriunde. Ez wart in schiere gesaget.

1641

Er sprach zem marcgrâven: „Mich hât zuo ziu gesant
Gunthêr, der hêrre von Burgonden lant,
und Gîselhêr, sîn bruoder, und ouch Gêrnôt.
Der recken ieslîcher iu sînen dienest her enbôt.

1642

Daz selbe hât ouch Hagene und Volkêr
mit triuwen vlîzeclîche. Noch sage ich iu mêr,
daz iu des küneges marschalc bî mir daz enbôt,
daz den guoten knehten wære iuwer herberge nôt.“

1643

Mit lachendem munde antwurte Rüedegêr:
„Nû wol mich dirre mære, daz die künege hêr,
daz si geruochent mîner dieneste! Der wirt in niht verseit.
Koment si mir ze hûse, des bin ich vrô und gemeit.“

1644

„Dancwart, der marschalc, der hiez iuch wizzen lân,
wen ir ze hûse mit in soldet hân:
sehzec sneller recken, und tûsent ritter guot,
und niun tûsent knehte.“ Dô wart er vrœlîch gemuot.

1645

„Nû wol mich dirre geste!“ sprach dô Rüedegêr,
„daz mir koment ze hûse dise recken hêr,
den ich noch vil selten iht gedienet hân.
Nû rîtet in engegene, beide mâge und man!“

1646

Dô îlten zuo den rossen ritter und kneht.
Swaz in gebôt ir hêrre, daz dûhte si alle reht.
Dô liezen si in der dienste zogen deste baz.
Noch enweste es niht vrou Gotelint, diu in ir kemenâten saz.

wie si ze Bechelâren kômen
{ 27 }
Wie der Markgraf die Könige empfing.

1647

Dô gie der marcgrâve, dâ der die vrouwen vant,
sîn wîp mit sîner tohter, und sagete in zehant
diu vil lieben mære, diu er hete vernomen,
daz in ir vrouwen bruoder dar ze hûse solden komen.

1648

„Vil liebiu triutinne“, sprach dô Rüedegêr,
„Ir sult vil wol enpfâhen die edelen künege hêr,
sô si mit ir gesinde her ze hove gân.
Ir sult ouch schône grüezen Hagenen, Gunthêres man.

1649

Mit in kumt ouch einer, der heizet Dancwart,
der ander heizet Volkêr, an zühten wol bewart.
Die sehse sult ir küssen und diu tohter mîn,
unde sult ouch bî den recken in zühten güetlîche sîn.“

1650

Daz lobten dô die vrouwen und wâren sîn bereit.
Si suochten ûz den kisten diu hêrlîchen kleit,
dar inne si engegene den recken wolden gân.
Dâ wart vil michel vlîzen von schœnen wîben getân.

1651

Gevelschet vrouwen varwe vil lützel man dâ vant.
Si truogen ûf ir houbete von golde liehtiu bant,
daz wâren schapel rîche, daz in ir schœne hâr
zefuorten niht die winde. Daz ist an den triuwen wâr.

1652

In sölchen unmuozen sul wir die vrouwen lân.
Hie wart vil michel gâhen über velt getân
von Rüedegêres vriunden, dâ man die fürste vant.
Si wurden wol enpfangen in des marcgrâven lant.

1653

Dô si der marcgrâve zuo zim komen sach,
Rüedegêr der snelle vil vrœlîche sprach:
„Sît willekomen, ir hêrren und ouch iuwer man,
hie in mînem lande! Vil gerne ich iuch gesehen hân!“

1654

Dô nigen im die recken mit triuwen âne haz.
Daz er in willec wære, vil wol erzeigete er daz.
Besunder gruozte er Hagenen, den hete er ê bekant,
alsam tet er Volkêrn ûzer Burgonden lant.

1655

Er enpfie ouch Dancwarten. Dô sprach der küene degen:
„Sît ir uns welt beruochen, nû wer sol danne pflegen
des unsern ingesindes, daz wir haben brâht?“
Dô sprach der marcgrâve: „Ir sult haben guote naht

1656

und allez iuwer gesinde. Swaz ir in daz lant
habt mit iu gefüeret, ross und ouch gewant,
dem schaffe ich sölche huote, daz sîn niht wirt verlorn,
daz iu ze schaden bringe gegen einigem sporn.

1657

Spannet ûf, ir knehte, die hütten an daz velt!
Swaz ir hie verlieset, des wil ich wesen gelt.
Ziehet ab die zoume, diu ross lâzet gân!“
Daz hete in wirt deheiner dâ vor vil selten getân.

1658

Des vröuten sich die geste. Dô daz geschaffen was,
die hêrren riten dannen. Sich leiten an da gras
über al die knehte. Sie heten guot gemach.
Ich wæne, in an dirre verte nie sô sanfte geschach.

1659

Diu edele marcgrâvinne was für die burc gegân
mit ir vil schœnen tohter. Dô sach man bî ir stân
die minneclîchen vrouwen und manege schœne meit.
Die truogen vil der bouge und ouch hêrlîchiu kleit.

1660

Daz edel gesteine lûhte verre dan
ûz ir vil rîchen wæte. Si wâren wolgetân.
Dô kômen ouch die geste und erbeizten sâ zehant.
Hey, waz man grôzer zühte an den Burgonden vant!

1661

Sehs und drîzec megde und manec ander wîp,
den was wol ze wunsche geschaffen gar der lîp,
die giengen in engegene mit manegem küenem man.
Dâ wart ein schœne grüezen von edelen vrouwen getân.

1662

Diu edele marcgrâvinne kuste die künege alle drî.
Alsam tet ir muoter. Dâ stuont ouch Hagene bî.
Ir vater hiez in küssen. Dô blicte si in an.
Er dûhte si sô vorhtlîch, daz siz vil gerne hete lân.

1663

Dô muoste si daz leisten, daz ir der wirt gebôt.
Gemischet wart ir varwe, bleich unde rôt.
Si kuste ouch Dancwarten, dar nâch den spileman.
Durch sînes lîbes ellen wart im daz grüezen getân.

1664

Diu junge marcgrâvinne, diu nam bî der hant
Gîselhêr, den recken von Burgonden lant.
alsam tet ouch ir muoter Gunthêr den küenen man.
Si giengen mit den helden vil harte vrœlîche dan.

1665

Der wirt gie bî Gêrnôte in einen wîten sal.
Ritter und vrouwen gesâzen dâ ze tal.
Dô hiez man balde schenken den gesten guoten wîn.
Jâne dorften nimmêr helde baz gehandelet sîn.

1666

Mit lieben ougen blicken wart gesehen an
diu Rüedegêres tohter. Diu was sô wolgetân,
jâ trûte si in den sinnen vil manec ritter guot.
Daz kunde ouch si verdienen. Si was hôhe gemuot.

1667

Si dâhten, swes si wolden, des enmohte aber niht geschehen.
Hin und her wider wart dâ vil gesehen
an megede und an vrouwen, der saz dâ genuoc.
Der edel videlære dem wirte holden willen truoc.

1668

Nâch gewonheite sô schieden si sich dâ.
Ritter und vrouwen, die giengen anderswâ.
Dô rihte man die tische in dem sale wît.
Den unkunden gesten diente man hêrlîche sît.

1669

Durch der geste liebe hin ze tische gie
diu edele marcgrâvinne. Ir tohter si dô lie
belîben bî den kinden, dâ si von rehte saz.
Die geste ir niht ensâhen. Si müete wærlîche daz.

1670

Dô si getrunken heten und gezzen über al,
dô wîste man die schœnen wider in den sal.
Gemelîcher sprüche wart dâ niht verdeit.
Der redete vil dô Volkêr, ein degen küen und gemeit.

1671

Dô sprach offenlîchen der edel spilman:
„Rîcher marcgrâve, got hât an iu getân
vil genædeclîchen, wand er iu hât gegeben
ein wîp sô rehte schœne, dar zuo ein wunneclîchez leben.

1672

Ob ich ein fürste wære“, sprach der spilman,
“und solde ich tragen krône, ze wîbe wolde ich hân
die iuwern schœnen tohter. Des wünschet mir der muot.
Diu ist minneclîch ze sehen, dar zuo edel und guot.“

1673

Dô sprach der marcgrâve: „Wie möhte daz gesîn,
daz immer künec gerte der lieben tohter mîn?
Wir sîn hie ellende, beide ich und mîn wîp.
Waz hilfet grôziu schœne an der juncvrouwen lîp?“

1674

Des antwurte Gêrnôt, der wolgezogen man:
„Und solde ich triutinne nâch mînem willen hân,
sô wolde ich sölches wîbes immer wesen vrô.“
Des antwurte Hagene vil harte güetlîchen dô:

1675

„Nû sol mî hêrre Gîselhêr doch nemen ein wîp!
Ez ist sô hôher mâge der marcgrâvinne lîp,
daz wir gerne dienten, ich unde sîne man,
und solde si under krône dâ zen Burgonden gân.“

1676

Diu rede Rüedegêren dûhte harte guot,
und ouch Gotelinde. Jâ vröute sich in der muot.
Dô truogen an die helde, daz si ze wîbe nam
Gîselhêr der edele, als ez wol künege gezam.

1677

Swaz sich sol gefüegen, wer möhte daz understân?
Man bat die juncvrouwen hin ze hove gân.
Dô swuor man im ze gebene daz wunneclîche wîp.
Dô lobte ouch er ze minnen den ir vil minneclîchen lîp.

1678

Man beschiet der juncvrouwen bürge unde lant.
Des sicherte dâ mit eiden des edelen küneges hant
und ouch der hêrre Gêrnôt, daz würde daz getân.
Dô sprach der marcgrâve: „Sît ich der bürge niene hân,

1679

sô sol ich iu mit triuwen immer wesen holt.
Ich gibe ze mîner tohter silber unde golt,
sô hundert soumære meiste mügen tragen,
daz ich des heldes mâgen nâch êren müge wol behagen.“

1680

Dô hiez man si beide stân an einen rinc
nâch gewonheite. Vil manec jungelinc
in vrœlîchem muote in zegegen stuont.
Si gedâhten in ir sinnen, sô noch die tumben gerne tuont.

1681

Dô man begunde vrâgen die minneclîchen meit,
ob si den recken wolde, ein teil was ez ir leit,
und dâhte doch ze nemene den wætlîchen man.
Si schamte sich der vrâge, sô manec maget hât getân.

1682

Ir riet ir vater Rüedegêr, daz si spreche „Jâ!“
und daz si in gerne næme. Vil schiere dô was dâ
mit sînen wîzen handen, der si umbeslôz,
Gîselhêr der edele. Swie lützel si sîn doch genôz!

1683

Dô sprach der marcgrâve: „Ir edele künege rîch,
als ir nû wider rîtet, daz ist gewonlîch,
heim hin zen Burgonden, sô gip ich iu mîn kint,
daz ir si mit iu füeret.“ Daz gelobten si sint.

1684

Swaz man dô schalles hôrte, den muosen si dô lân.
Man hiez die juncvrouwen zer kemenâten gân,
und ouch die geste slâfen und ruowen an den tac.
Dô bereite man die spîse. Der wirt ir güetlîche pflac.

1685

Dô si enbizzen wâren, si wolden dannen varn
gegen der Hiunen landen. „Daz heiz ich wol bewarn“,
sprach der wirt vil edele, „Ir sult ouch hie bestân,
wand ich sô lieber geste selten hie iht gewunnen hân.“

1686

Des antwurte Dancwart: „Jâne mac es niht gesîn!
wâ nemt ir die spîse, daz brôt und ouch den wîn,
daz ir sô manegen recken noch hînte müeset hân?“
Dô daz der wirt gehôrte, er sprach: „Ir sult die rede lân.

1687

Mîne vil lieben hêrren, ir sult mir niht versagen.
Jâ gebe ich iu die spîse ze vierzehen tagen,
mit allem iuwerem gesinde, daz mit iu her ist komen!
Mir hât der künec Etzel noch vil wênec iht genomen.“

1688

Swie sêre si sich werten, si muosen dâ bestân
unz an den vierden morgen. Dô wart dâ getân
von des wirtes milte, daz verre wart geseit.
Er gap den sînen gesten beidiu ross und kleit.

1689

Ez enkunde niht wern langer, si muosen dannen varn.
Rüedegêr der küene vil wênec iht gesparn
kunde vor sîner milte. Swes iemen gerte nemen,
daz versagete er niemen. Ez muose in allen gezemen.

1690

Ir edel ingesinde brâhte für daz tor
gesatelt vil der mœre. Dô kom zuo zin dâ vor
vil der vremden recken. Si truogen schilde enhant,
wande si wolden rîten in daz Etzelen lant.

1691

Der wirt dô sîne gâbe bôt über al,
ê daz die edelen geste kœmen für den sal.
Er kunde milteclîche mit grôzen êren leben.
Die sîne tohter schœne, die hete er Gîselhêr gegeben.

1692

Dô gap er Gunthêre, dem helde lobelîch,
daz wol truoc mit êren der edel fürste rîch,
swie selten er gâbe enpfienge, ein wâfenlîch gewant.
Dar nâch neic dô Gunthêr des edelen Rüedegêres hant.

1693

Dô gap er Gêrnôte ein wâfen guot genuoc,
daz er sît in sturme vil hêrlîchen truoc.
Der gâbe im vil wol gunde des marcgrâfen wîp.
Dâ von der guote Rüedegêr sît muose verliesen den lîp.

1694

Gotelint bôt Hagenen, als ir vil wol gezam,
ir minneclîchen gâbe, sît si der künec nam,
daz er ouch ân ir stiure zuo der hôchgezît
von ir varn niht solde, doch widerredete er ez sît.

1695

„Alles, des ich ie gesach“, sprach dô Hagene,
„sône gerte ich niht mêre hinnen ze tragene
niuwan jenes schildes dort an jener want.
Den wolde ich gerne füeren in daz Etzelen lant.“

1696

Dô diu marcgrâvinne Hagenen rede vernam,
ez mante si ir leides. Weinen si gezam.
Dô gedâhte si vil tiure an Nuodunges tôt.
Den hete erslagen Witege. Dâ von sô hete si jâmers nôt.

1697

Si sprach zuo dem degene: „Den schilt wil ich iu geben.
Daz wolde got von himele, daz er noch solde leben,
der in dâ truoc enhende! Der lac in sturme tôt.
Den muoz ich immer weinen. Des gât mir armem wîbe nôt.“

1698

Diu edele marcgrâvinne von dem sedele gie.
Mit ir vil wîzen handen si den schilt gevie.
Diu vrouwe truoc in Hagenen. Er nam in an die hant.
Diu gâbe was mit êren an den recken gewant.

1699

Ein hulft von liehtem pfelle ob sîner varwe lac,
bezzern schilt deheinen belûhte nie der tac,
von edelem gesteine. Swer sîn hete gegert
ze koufen, an der koste was er wol tûsent marke wert.

1700

Den schilt hiez dô Hagene tragen vor im dan.
Dô begunde Dancwart hin ze hove gân.
Dem gap vil rîchiu kleider des marcgrâven kint.
Diu truoc er zen Hiunen vil harte hêrlîche sint.

1701

Allez, daz der gâbe von in wart genomen,
in ir deheines hende wære ir niht bekomen,
wan durch des wirtes liebe, der ez in sô schône bôt.
Sît wurdens im sô vîent, daz si in muosen slahen tôt.

1702

Volkêr der snelle mit sîner videlen dan
gie gezogenlîche für Gotelinde stân.
Er videlte süeze dœne und sanc ir sîniu liet.
Dâ mit nam er urloup, dô er von Bechelâren schiet.

1703

Ir hiez diu marcgrâvinne eine lade tragen.
Von vriuntlîcher gâbe müget ir hœren sagen:
dar ûz nam si zwelf bouge unde spiens im an die hant:
„Die sult ir hinnen füeren in daz Etzelen lant

1704

unde sult durch mînen willen si ze hove tragen,
swenne ir wider wendet, daz man mir müge sagen,
wie ir mir habt gedienet dâ zer hôchgezît!“
Des diu vrouwe gerte, vil wol leiste er daz sît.

1705

Dô sprach der wirt zen gesten: „Ir sult deste sanfter varn.
Ich wil iuch selbe leiten und heizen wol bewarn,
daz iu ûf der strâze niemen müge geschaden.“
Dô wurden sîne soume harte schiere geladen.

1706

Der wirt wart wol bereitet, mit fünf hundert man
mit rossen und mit kleidern. Die fuorte er mit im dan
vil harte hêrlîchen zuo der hôchgezît.
Der einer mit dem lebene kom nie ze Bechelâren sît.

1707

Mit kusse minneclîche der wirt dô dannen schiet.
Alsô tet ouch Gîselhêr, als im sîn tugent riet.
Mit umbeslozzen armen si trûten schœniu wîp.
Daz muose sît beweinen vil maneger juncvrouwen lîp.

1708

Dô wurden allenthalben diu venster ûf getân.
Der wirt mit sînen mannen zen rossen wolde gân.
Ich wæn, ir herze in sagete diu krefteclîchen leit.
Dâ weinte manec vrouwe und manec wætlîchiu meit.

1709

Nâch ir lieben vriunden genuoge heten sêr,
die si ze Bechelâren gesâhen nimmer mêr.
Doch riten si mit vröuden nider über sant,
ze tal bî Tuonouwe, ûz in daz hiunische lant.

1710

Dô sprach zen Burgonden der ritter vil gemeit,
Rüedegêr der edele: „Jâne suln niht verdeit
wesen unser mære, daz wir zen Hiunen komen!
Im hât der künec Etzel nie sô liebes niht vernomen.“

1711

Ze tal durch Ôsterrîche der bote balde reit.
Den liuten allenthalben wart daz wol geseit,
daz die helde kômen von Wormez über Rîn.
Des küneges ingesinde kunde ez niht lieber gesîn.

1712

Die boten für strichen mit den mæren,
daz die Nibelunge zen Hiunen wæren:
„Dû solt si wol enpfâhen, Kriemhilt, vrouwe mîn.
Dir koment nâch vil grôzen êren die vil lieben bruoder dîn.“

1713

Kriemhilt, diu vrouwe, in ein venster stuont.
Si warte nâch den mâgen, sô noch vriunde nâch vriunden tuont.
Von ir vater lande sach si manegen man.
Der künec vriesch ouch diu mære. Vor liebe er lachen began.

1714

„Nû wol mich mîner vröuden!“ sprach dô Kriemhilt,
„Hie bringent mîne mâge vil manegen niuwen schilt
und halsperge wîz. Swer nemen welle golt,
der gedenke mîner leide, und wil im immer wesen holt.“

wie Kriemhilt Hagenen enphie
{ 28 }
Wie Kriemhild Hagen empfing.

1715

Dô die Burgonden kômen in Etzelen lant,
dô gevriesch ez von Berne der alte Hildebrant.
Er sagte ez sînem hêrren. Ez was im harte leit.
Er bat in wol enpfâhen die riter küene und gemeit.

1716

Wolfhart der snelle hiez bringen diu marc.
Dô reit mit Dieterîche vil manec degen starc,
dâ er si grüezen wolde, zuo zin an daz velt.
Dâ hetens ûf gebunden vil manec hêrlîch gezelt.

1717

Dô si von Tronege Hagene verrest rîten sach,
zuo den sînen hêrren gezogenlîch er sprach:
„Nû sult ir snelle recken von den sedeln stân,
und gât in hin engegene, die iuch dâ wellent enpfân!

1718

Dort kumt her ein gesinde, daz ist mir wol bekant.
Ez sint vil snelle degene von Amelunge lant,
die füert der von Berne. Die sint vil hôchgemuot.
Ir sult ez niht versmâhen, swaz man iu dieneste getuot.“

1719

Dô stuonden von den rossen, daz was michel reht,
neben Dieterîche manec ritter und kneht.
Si giengen zuo den gesten, dâ man die helde vant.
Si gruozten minneclîchen die von Burgonden lant,

1720

dô si der hêrre Dieterîch gegen im komen sach.
Hie müget ir gerne hœren, waz dô der degen sprach
zuo den Uoten kinden: ir reise was im leit.
Er wânde, ez wiste Rüedegêr, daz erz in hete geseit.

1721

„Sît willekomen, ir hêrren, Gunthêr und Gîselhêr,
Gêrnôt und Hagene! Sam sî hêr Volkêr
und Dancwart der vil snelle! Ist iu daz niht bekant,
Kriemhilt noch sêre weinet den helt von Nibelunge lant!“

1722

„Si mac wol lange weinen“, sprach dô Hagene,
„Er lît vor manegem jâre gar ze tôde erslagene.
Den künec von den Hiunen, den sol si holden haben.
Sîvrit kumt niht widere. Er ist vor maneger zît begraben.“

1723

„Die Sîvrides wunden lâzen wir nû stân!
sol leben diu vrouwe Kriemhilt, noch mac schade ergân.“
Sô redete von Berne der hêrre Dieterîch:
„Trôst der Nibelunge, dâ vor behüete dû dich!“

1724

„Wie sol ich mich behüeten?“ sprach der künec hêr,
„Etzel uns boten sande, wes sol ich vrâgen mêr,
daz wir zuo zim solden rîten her in daz lant.
Ouch hât uns manegiu mære mîn swester Kriemhilt gesant.“

1725

„Ich kan iu wol gerâten“, sprach aber Hagene,
„nû bittet iu diu mære baz ze sagene
den hêrren Dieterîchen und sîne helde guot,
daz si iuch lâzen wizzen der vroun Kriemhilde muot.“

1726

Dô giengen sundersprâchen die drîe künege rîch,
Gunthêr und Gêrnôt, und ouch hêr Dieterîch:
„Nû sage uns, von Berne vil edel ritter guot,
wie dir sî gewizzen umb der küneginne muot!“

1727

Dô sprach der voget von Berne: „Waz sol ich mêre sagen?
Ich hœre alle morgen weinen und klagen
mit jæmerlîchen siten daz Etzelen wîp
dem rîchen got von himele des starken Sîvrides lîp.“

1728

„Ez ist êt unerwendet“, sprach der küene man,
Volkêr der videlære, „daz wir vernomen hân.
Wir suln ze hove rîten, und suln lâzen sehen,
waz uns vil snellen degenen dâ zen Hiunen müge geschehen.“

1729

Die küenen Burgonden hin ze hove riten.
Si kômen hêrlîche nâch des landes siten.
Dô wunderte dâ zen Hiunen vil manegen küenen man
umb Hagenen von Tronege, wie der wære getân,

1730

durch daz man sagete mære, des was im genuoc,
daz er von Niderlande Sîvriden sluoc,
sterkest aller recken, den Kriemhilde man.
Des wart michel vrâge ze hove nâch Hagenen getân.

1731

Der helt was wol gewahsen, daz ist al wâr.
Grôz was er zen brüsten, gemischet was sîn hâr
mit einer grîsen varwe. Diu bein wâren im lanc
und eislîch sîn gesihene. Er hete hêrlîchen ganc.

1732

Dô hiez man herbergen die Burgonden man.
Gunthêres ingesinde, daz wart gesundert dan.
Daz riet diu küneginne, diu im vil hazzes truoc.
Dâ von man sît die knehte in der herberge sluoc.

1733

Dancwart, Hagenen bruoder, der was marschalc.
Der künec im sîn gesinde vlîzeclîch bevalch,
daz er ir vil wol pflæge, und in gæbe genuoc.
Der helt von Burgonden in allen guoten willen truoc.

1734

Kriemhilt diu schœne mit ir gesinde gie,
dâ si die Nibelunge mit valschem muot enpfie.
Si kuste Gîselhêren und nam in bî der hant.
Daz sach von Tronege Hagene. Den helm er vaste gebant.

1735

„Nâch sus getânem gruoze“, sprach dô Hagene,
„mügen sich verdenken snelle degene.
Man gruozet sunderlingen die künege und ir man.
Wir haben niht guoter reise zuo dirre hôchgezît getân.“

1736

Si sprach: „Sît willekomen, swer iuch gerne siht!
Durch iuwer selbes vriuntschaft sô grüeze ich iuwer niht.
Saget, waz ir mir bringet von Wormez über Rîn,
dar umb ir mir sô grôze soldet willekomen sîn.“

1737

„Hete ich gewest diu mære“, sprach dô Hagene,
„daz iu gâbe solden bringen degene,
ich wære sol sô rîche, hete ich mich baz verdâht,
daz ich iu mîne gâbe her ze lande hete brâht.“

1738

„Nû sult ir mich der mære mêre wizzen lân:
hort der Nibelunge, war habt ir den getân?
Der was doch mîn eigen. Daz ist wol bekant.
Den soldet ir mir füeren in daz Etzelen lant.“

1739

„Entriuwen, mîn vrou Kriemhilt, des ist vil manec tac,
daz ich hort der Nibelunge niene gepflac.
Den hiezen mîne hêrren senken in den Rîn.
Dâ muoz er wærlîche unz an daz jungeste sîn!“

1740

Dô sprach diu küneginne: „Ich hâns ouch gedâht.
Ir habt mirs noch vil wênec her ze lande brâht,
swie er mîn eigen wære unde ich sîn wîlen pflac.
Des hân ich alle zîte vil manegen trûrigen tac.“

1741

„Jâ bringe ich iu den tiuvel!“ sprach aber Hagene.
„Ich hân an mînem schilde sô vil ze tragene
und an der mînen brünne. Mîn helm, der ist sô lieht.
Daz swert an mîner hende, des enbringe ich iu nieht!“

1742

Dô sprach diu küneginne zen recken über al:
„Man sol deheiniu wâfen tragen in den sal.
Ir helde, ir sult mirs ûf geben. Ich wil si behalten lân.“
„Entriuwen“, sprach dô Hagene, „ez wirdet nimmêr getân.

1743

Jâne ger ich niht der êren, fürsten wine milt,
daz ir zen herbergen trüeget mînen schilt
unde ander mîn gewæfen! Ir sît ein künegîn.
Daz enlêrte mich niht mîn vater. Ich wil selbe kamerære sîn.“

1744

„Ouwê mîner leide!“ sprach dô vrou Kriemhilt.
„War umbe wil mîn bruoder und Hagene sînen schilt
niht lâzen behalten? Si sint gewarnôt.
Und wesse ich, wer daz tæte, der müese kiesen den tôt.“

1745

Des antwurte ir mit zorne der fürste Dieterîch:
„Ich bin ez, der hât gewarnet die edelen künege rîch
und Hagenen den küenen, den Burgonden man.
Nû zuo, vâlandinne, dûne solt michs niht geniezen lân!“

1746

Desw schamte sich vil sêre daz Etzelen wîp.
Si vorhte bitterlîchen den Dieterîches lîp.
Dô gie si von im balde, daz si niene sprach,
wan daz si swinde blicke an ir vîande sach.

1747

Behenden sich dô viengen zwêne degene.
Daz eine was hêr Dieterîch, daz ander Hagene.
Dô sprach gezogenlîche der recke vil gemeit:
„Daz iuwer komen zen Hiunen, daz ist mir wærlîche leit,

1748

durch daz diu küneginne daz gesprochen hât.“
Dô sprach von Tronege Hagene: „Es wirt wol alles rât.“
Sus redeten mit ein ander die zwêne küene man,
daz der künec Etzel dar umbe vrâgen began:

1749

„Diu mære weste ich gerne“, sprach der künec rîch,
„wer der recke wære, den hort hêr Dieterîch
sô vriuntlîch enpfâhet. Er treit vil hôhen muot.
Swere sîn vater wære, er mac wol sîn ein helt guot.“

1750

Des antwurte dem künege ein Kriemhilde man:
„Er ist geborn von Tronege. Sîn vater hiez Aldrîân.
Swie blîde er hie gebâre, er ist ein grimmer man.
Ich lâze iuch daz wol schouwen, daz ich gelogen niene hân.“

1751

„Wie sol ich daz erkennen, daz er sô grimmec ist?“
Dannoch er niene wesse vil manegen argen list,
den sît diu küneginne an ir mâgen begie,
daz si mit dem lebene deheinen von den Hiunen lie.

1752

„Wol erkande ich Aldrîânen, der was mîn man.
Lop unde michel êre er hie bî mir gewan.
Ich machete in ze ritter und gap im mîn golt.
Helche diu getriuwe was im inneclîchen holt.

1753

Dâ von ich wol erkenne allez Hagenen sint.
Ez wurden mîne gîsel zwei wætlîchiu kint,
er unde von Spânje Walthêr, die wuohsen hie ze man.
Hagenen sande ich wider heim, Walthêr mit Hildegunt entran.“

1754

Er gedâhte langer mære, diu wâren ê geschehen.
Sînen vriunt von Tronege, den hete er rehte ersehen,
der im in sîner jugende vil starkiu dienes bôt.
Sît vrumte er im in alter vil manegen lieben vriunt tôt.

Wie Kriemhilt Hagenen verweiz und wie er niht gên ir ûf stuont
{ 29 }
Wie Kriemhild Hagen einen Verweis erteilte und
wie er sich nicht vor ihr erhob.

1755

Dô schieden sich die zwêne recken lobelîch,
Hagene von Tronege und ouch hêr Dieterîch.
Dô blicte über ahsel der Gunthêres man
nâch einem hergesellen, den er vil schiere gewan.

1756

Dô sach er Volkêr bî Gîselhêre stân.
Den spæhen videlære bat er mit im gân,
wand er vil wol erkande sînen grimmen muot.
Er was an allen dingen ein ritter küene und guot.

1757

Noch liezen si die hêrren ûf dem hove stân.
Niuwan si zwêne aleine sach man dannen gân
über den hof vil verre für einen palas wît.
Die ûz erwelten degene vorhten niemens nît.

1758

Si gesâzen vor dem hûse gegen einem sal,
der was Kriemhilde, ûf eine banc ze tal.
Dô lûhte in von ir lîbe ir hêrlîch gewant.
Genuoge, die si sâhen, si heten gerne bekant.

1759

Alsam tier diu wilden wurden gekapfet an
die übermüeten helde von den Hiunen man.
Si ersach ouch durch ein venster daz Etzelen wîp.
Des wart aber betrüebet der schœnen Kriemhilden lîp.

1760

Ez mante si ir leide. Weinen si began.
Des hete michel wunder die Etzelen man,
waz ir sô schiere betrüebet hete den muot.
Si sprach: „Daz hât Hagene, ir helde küene unde guot.“

1761

Si sprâchen zuo der vrouwen: „Wie ist daz geschehen?
Wand wir iuch niulîche haben vrô gesehen.
Nie niemen wart sô küene, der ez iu hât getân,
heizet ir ez uns rechen, ez sol im an sîn leben gân!“

1762

„Daz wolde ich immer dienen, swer ræche mîniu leit.
Alles des er gerte, des wære ich im bereit.
Ich biute mich iu ze füezen“, sprach des küneges wîp,
„rechet mich an Hagene, daz er verliese den lîp!“

1763

Dô garten sich vil balde sehzec küener man
durch Kriemhilde willen. Si wolden hine gân
und wolden slahen Hagenen, den vil küenen man,
und ouch den videlære. Daz wart mit râte getân.

1764

Dô diu küneginne ir schar sô kleine sach,
in einem grimmem muote si zuo den helden sprach:
„Des ir dâ habt gedingen, des sult ir abe gân.
Jâne durfet ir sô ringe nimmêr Hagenen bestân!

1765

Swie starc und swie küene von Tronege Hagene sî,
noch ist er verre sterker, der im dâ sitzet bî,
Volkêr der videlære. Der ist ein übel man.
Jâne sult ir die helde niht sô lîhte bestân!“

1766

Dô si daz gehôrten, dô garte sich ir mêr.
vier hundert sneller recken. Diu küneginne hêr
was des genœte, daz si in tæte leit.
Dâ von wart sît degenen vil michel sorge bereit.

1767

Dô si vil wol gewâfent daz ir gesinde sach,
zuo den snellen recken diu küneginne sprach:
„Nû bîtet eine wîle. Jâ sult ir stille stân!
Ich wil under krône zuo mînen vîanden gân.

1768

Unde hœret itewîze, daz mir hât getân
Hagene von Tronege, der Gunthêres man.
Ich weiz in sô übermüeten, daz er mir lougent niht.
Sô ist ouch mir unmære, swaz im dar umbe geschiht.“

1769

Dô sach der videlære, ein küene spilman,
die edelen küneginne ab einer stiege gân,
nider von einem hûse. Als er daz gesach,
Volkêr der vil küene zuo sînem hergesellen sprach:

1770

„Nû schouwet, vriunt Hagene, wâ si dort her gât.
diu uns âne triuwe inz lant geladet hât!
Ine gesach mit küneges wîbe nie sô manegen man,
die swert enhende trüegen und alsô strîteclîchen gân.

1771

Wizzet ir, vriunt Hagene, ob si iu sîn gehaz?
Sô wil ich iu râten, ir hüetet deste baz
des lîbes und der êren. Jâ dunket ez mich guot!
Als ich mich versinne, si sint zornec gemuot.

1772

Und sint ouch sûmelîche zen brüsten alsô wît,
swer sîn selbes hüete, der tuo daz enzît.
Ich wæn, si die liehten brünne nû dar under tragen.
Wen si dâ mit meinen, daz enkan ich niemen gesagen.“

1773

Dô sprach in zornes muote Hagene, der küene man:
„Ich weiz wol, daz ez allez ist ûf mich getân,
daz si diu liehten wâfen tragent an der hant.
Vor den möhte ich noch gerîten in der Burgonde lant.

1774

Nû sagt mir, vriunt Volkêr, ob ir mir welt gestân,
ob wellent mit mir strîten die Kriemhilde man.
Daz lâzet ir mich hœren, als liep als ich iu sî.
Ich won iu immer mêre mit triuwen dienstlîchen bî.“

1775

„Ich hilf iu sicherlîchen“, sprach der spilman,
„ob ich uns engegene sæhe den künec selbe gân
mit allen sînen recken. Die wîle ich leben muoz,
sô entwiche ich iu durch vorhte nimmêr einen fuoz.

1776

„Nû lôn iu got von himele, vil edel Volkêr!
Ob si mit mir strîten, wes bedarf ich danne mêr?
Sît ir mir helfen wellet, als ich hân vernomen,
sô suln dise recken vil gewerlîchen komen.“

1777

„Nû stê wir von dem sedele“, sprach der spilman.
„Si ist ein küneginne, und lât si für gân.
Bietet ir die êre. Si ist ein edel wîp.
Dâ mit ist ouch getiuret unser ieweders lîp.“

1778

„Nein, durch mîne liebe!“ sprach aber Hagene,
„Sô wolden sich versinnen dise degene,
daz ichz durch vorhte tæte, und solde ich hin gân.
Ich enwil durch ir deheinen nimmêr von dem sedele stân.

1779

Jâ zimet ez uns beiden ze wâre lâzen daz.
Zwiu solde ich den êren, der mir ist gehaz?
Daz engetuon ich nimmêr, die wîle ich hân den lîp.
Ouch enruoche ich, waz mich genîdet des künec Etzelen wîp.“

1780

Der übermüete Hagene leite über sîniu bein
ein vil liehtez wâfen, ûz des knopfe schein
ein vil liehter jaspes, grüener danne ein gras.
Wol erkande ez Kriemhilt, daz ez Sîvrides was.

1781

Dô si daz swert erkande, dô gie ir trûrens nôt.
Sîn gehilze, daz was guldîn, diu scheide ein porte rôt.
Ez mante si ir leide. Weinen si began.
Ich wæne, ez hete dar umbe der küene Hagene getân.

1782

Volkêr der snelle zôch nâher ûf der banc
einen videlbogen starken, vil michel und lanc,
gelîch einem swerte, vil scharpf unde breit.
Dô sâzen unervorhte die zwêne degene gemeit.

1783

Nû dûhten sich sô hêre die zwêne küene man,
daz si niht wolden von dem sedel stân
durch niemens vorhte. Des gie in an den fuoz
diu edele küneginne und bôt in vîentlîchen gruoz.

1784

Si sprach: „Hêr Hagene, wer hât nâch iu gesant,
daz ir getorstet rîten her in diz lant,
unde ir daz wol erkandet, waz ir mir habet getân?
Hetet ir guote sinne, ir soldet ez billîche lân.“

1785

„Nâch mir sande niemen“, sprach dô Hagene,
„man ladete her ze lande drîe degene,
die heizent mîne hêrren, und bin ich ir man.
In deheiner hovereise bin ich selten hinder in bestân.“

1786

Si sprach: „Nû sagt mir mêre, zwiu tâtet ir daz,
daz ir daz habt verdienet, daz ich iu bin gehaz?
Ir sluoget Sîvriden, den mînen lieben man.
Des ich unz an mîn ende immer genuoc ze weinen hân.“

1787

Er sprach: „Waz sol des mêre? Der rede ist nû genuoc.
Ich binz aber, Hagene, der Sîvriden sluoc,
den helt ze sînen handen. Wie sêre er des engalt,
daz diu schœne Kriemhilt die vroun Prünhilden schalt!

1788

Ez ist êt âne lougen, küneginne rîch,
ich hân es alles schulde, des schaden schedelîch.
Nû reche ez, swer der welle, ez sî wîp oder man!
Ich enwolde danne liegen, ich hân iu leides vil getân.“

1789

Si sprach: „Nû hœrt, ir recken, wâ er mir lougent niht
aller mîner leide! Swaz im dâ von geschiht,
daz ist mir vil unmære, ir Etzelen man.“
Die übermüeten degene, ein ander sâhen si an.

1790

Swer den strît dâ hüebe, sô wære daz geschehen.
daz man den zwein gesellen der êren müese jehen,
wan siz in stürmen heten vil dicke wol getân.
Des sich jene vermâzen, durch vorhte muosen si daz lân.

1791

Dô sprach ein der recken: „Wes seht ir mich an?
Daz ich ê dâ lobte, des wil abe gân,
daz ich durch niemens gâbe verliesen wil den lîp.
Jâ wil uns verleiten des künec Etzelen wîp!“

1792

Dô sprach dâ bî ein ander: „Des selben hân ich muot.
Der mir gæbe türne von rôtem golde guot,
disen videlære wolde ich niht bestân,
durch sîne swinden blicke, die ich an im gesehen hân.

1793

Ouch erkenne ich Hagenen von sînen jungen tagen.
Des mac man von dem recken lîhte mir gesagen:
in zwein und zweinzec stürmen hân ich in gesehen,
dâ vil maneger vrouwen ist herzeleit geschehen.

1794

Er und der von Spânje tâten manegen stich,
dô si hie bî Etzelen vâhten manec wîc
ze êren dem künege. Des ist vil geschehen.
Dar umb muoz man Hagenen der êren billîche jehen.

1795

Dannoch was der recke sîner jâr ein kint.
Daz dô die tumben wâren, wie grîse die nû sint!
Nû ist er komen ze witzen und ist ein grimmec man.
Ouch treit er Balmungen, daz er vil übele gewan.“

1796

Dâ mit was gescheiden, daz niemen dâne streit.
Dô wart der küneginne herzenlîchen leit.
Die helde kêrten dannen. Jâ vorhten si den tôt
von dem videlære. Des gie in sicherlîchen nôt.

1797

Dô sprach der videlære: „Wir haben daz wol ersehen,
daz wir hie vîande vinden, als wir ê hôrten jehen.
Wir suln zuo den künegen hin ze hove gân,
sône tar unser hêrren mit strîte niemen bestân.

1798

Wie dicke ein man durch vorhte manegiu dinc verlât,
swâ sô vriunt bî vriunde vriuntlîchen stât!
Und hât er guote sinne, daz ers niene tuot,
schade vil maneges wirt von sinnen wol behuot.“

1799

„Nû wil ich iu volgen“, sprach dô Hagene.
Si giengen, dâ si funden die zieren degene
in grôzem antpfange an dem hove stân.
Volkêr der vil küene vil lûte sprechen began

1800

zuo den sînen hêrren: „Wie lange welt ir stân,
daz ir iuch lâzet dringen? Ir sult ze hove gân,
und hœret an dem künege, wie er sî gemuot!“
Dô sach man sich gesellen die helden küene und guot.

1801

Der fürste von Berne nam an die hant
Gunthêren den vil rîchen von Burgonden lant.
Irnvrit, der nam Gêrnôten, den vil küenen man.
Dô sach man Rüedegêren ze hove mit Gîselhêren gân.

1802

Swie iemen sich gesellete und ouch ze hove gie,
Volkêr und Hagene, die geschieden sich nie,
niuwan in einem sturme an ir endes zît.
Daz muosen edel vrouwen beweinen grœzlîchen sît.

1803

Dô sach man mit den künegen hin ze hove gân
ir edelen ingesindes tûsent küener man,
dar über sehzec recken, die wâren mit in komen.
Die hete in sînem lande der küene Hagene genomen.

1804

Hâwart und ouch Îrinc, die zwêne ûz erwelten man,
die sach man gesellîchen bî den künegen gân.
Dancwart und Wolfhart, ein tiuwerlîcher degen,
die sach man wol ir tugende vor den anderen pflegen.

1805

Dô der vogt von Rîne in den palas gie,
Etzel der vil rîche daz langer niht enlie,
er spranc von sînem sedele, als er in komen sach.
Der gruoz sô rehte schône von den künegen im geschach.

1806

„Sît willekomen, hêr Gunthêr, und ouch hêr Gêrnôt
und iuwer bruoder Gîselhêr! Mîn dienest ich iu enbôt
mit triuwen vlîzeclîchen ze Wormez über Rîn,
und allez daz gesinde sol mir willekomen sîn.

1807

Nû sît uns grôze willekomen, ir zwêne degene,
Volkêr der vil küene und ouch Hagene,
mir und mîner vrouwen, her in ditze lant!
Si hât iu boten manege hin ze Rîne gesant.“

1808

Dô sprach von Tronege Hagene: „Des hân ich vil vernomen.
Wære ich durch mîne hêrren zen Hiunen her niht komen,
sô wære ich iu zen êren geriten in daz lant.“
Dô nam der wirt vil edele die lieben geste bî der hant.

1809

Er brâhte si zem sedele, dâ er selbe saz.
Dô schancte man den gesten, mit vlîze tet man daz,
in wîten goldes schâlen met, môraz unde wîn,
unde bat die ellenden grôze willekomen sîn.

1810

Dô sprach der künec Etzel: „Des wil ich iu verjehen:
mir enkunde in dirre werlde lieber niht geschehen
denne ouch an iu, helden, daz ir mir sît bekomen.
Des ist der küneginne vil michel trûren benomen.

1811

Mich nimt des michel wunder, waz ich iu habe getân,
sô manegen gast vil edel, den ich gewunnen hân,
daz ir nie geruochtet komen in mîniu lant.
Daz ich iuch nû gesehen hân, daz ist zen vröuden mir gewant.“

1812

Des antwurte Rüedegêr, ein ritter hôchgemuot:
„Ir muget si sehen gerne. Ir triuwe, diu ist guot,
Der mîner vrouwen mâge sô schône kunnen pflegen.
Si bringent iu ze hûse vil manegen wætlîchen degen.“

1813

An sunewenden âbent die hêrren wâren komen
in Etzelen hof des rîchen. Vil selten ist vernomen
von alsô hôhem gruoze, als er die helde enpfie.
Nû was ouch ezzens zît, der Rüedegêr mit in ze tische gie.

1814

Ein wirt bî sînen gesten schôner nie gesaz.
Man gap in volleclîchen trinken unde maz.
Alles, des si gerten, des was man in bereit.
Man hete von den helden vil michel wunder geseit.

wie si der schiltwaht phlâgen
{ 30 }
Wie Volker und Hagen Schildwacht standen.

1815

Der tac, der hete nû ende, und nâhete in diu naht.
Die wegemüeden recken, ir sorge si an vaht,
wanne si solden ruowen und an ir bette gân.
Daz beredete Hagene. Ez wart in schiere kunt getân.

1816

Gunthêr sprach ze dem wirte: „Got lâz iuch wol geleben!
Wir wellen varn slâfen. Ir sult uns urloup geben.
Swenne ir daz gebietet, sô kom wir morgen vruo.“
Er schiet von sînen gesten vil harte vrœlîchen dô.

1817

Dringen allenthalben die geste man dô sach.
Volkêr der küene zuo den Hiunen sprach:
„Wie getürret ir den recken für die füeze gân?
Unde welt irs iuch niht mîden, sô wirt iu leide getân.

1818

Sô slahe ich etelîchem sô swæren gîgen slac,
hât er getriuwer iemen, der ez beweinen mac.
Wan wîchet ir uns recken? Jâ dunket ez mich guot!
Ez heizent allez degene unde sint gelîche niht gemuot.“

1819

Dô der videlære sô zorneclîchen sprach,
Hagene der küene hinder sich dô sach.
Er sprach: „Iu râtet rehte der küene spilman,
ir Kriemhilde helde, ir sult zen herbergen gân.

1820

Des ir dâ habt willen, ich wæn, ez iemen tuo.
Welt ir ihtes beginnen, sô kumet uns morgen vruo
unde lât uns ellende hînt haben gemach.
Jâ wæne ez von helden mit sölchem willen ie geschach!“

1821

Dô brâhte man die geste in einen wîten sal.
Den funden si berihtet den recken über al
mit vil rîchen betten, lanc und breit.
In riet diu vrouwe Kriemhilt diu aller grœzesten leit.

1822

Vil manegen kulter spæhe von Arraz man dâ sach
der vil liehten pfellel, und manec bettedach
von arâbischen sîden, die besten mohten sîn.
Dar ûfe lâgen lîsten, die gâben hêrlîchen schîn.

1823

Diu decklachen hermîn vil manegiu man dâ sach,
und von swarzem zoble, dar under si ir gemach
des nahtes schaffen solden unz an den liehten tac.
Ein künec mit sînem gesinde nie sô hêrlîch gelac.

1824

„Ouwê der nahtselde!“ sprach Gîselhêr daz kint,
„und ouwê mîner vriunde, die mit uns komen sint!
swie êt ez uns mîn swester sô güetlîche erbôt,
ich fürhte, daz wir müezen von ir schulden ligen tôt.“

1825

„Nû lâzet iuwer sorgen!“ sprach Hagene der degen,
„Ich wil noch hînte selbe der schiltwahte pflegen.
Ich trûwe uns wol behüeten, unz komet der tac.
Des sît gar ân angest. Sô genese, swer der mac.“

1826

Dô nigen si im alle unde sagten im des danc.
Sie giengen zuo den betten. Diu wîle was niht lanc,
daz sich geleget heten die wætlîchen man.
Hagene, der küene helt, sich wâfen began.

1827

Dô sprach der videlære, Volkêr der degen:
„Versmâhet ez iu niht, Hagene, sô wolde ich mit iu pflegen
der schiltwahte hînte unz morgen vruo.“
Der helt vil minneclîche dankete Volkêre dô.

1828

„Nû lôn iu got von himele, vil lieber Volkêr!
Zallen mînen sorgen sône gerte ich niemens mêr
niuwan iuch aleine, swâ ich hete nôt.
Ich sol ez wol verdienen, mich enwende es der tôt.“

1829

Dô garten si sich beide in liehtez ir gewant.
Dô nam ir ietwedere den schilt an sîne hant,
und giengen ûz dem hûse für die tür stân.
Dô pflâgen si der geste. Daz was mit triuwen getân.

1830

Volkêr der snelle, zuo des sales want
sînen schilt den guoten leite er von der hant.
Dô gie er hin widere. Die videl er genam.
Dô diente er sînen vriunden, als ez dem helde gezam.

1831

Under die tür des hûses saz er für den stein.
Küener videlære, der wart nie dehein.
Dô im der seiten dœnen sô süezeclîch erklanc,
die stolzen ellenden sagtens Volkêren danc.

1832

Dô klungen sîne seiten, daz allez daz hûs erdôz.
Sîn ellen zuo der fuoge, diu beidiu wâren grôz.
Ie süezer und süezer er videlen began.
Dô entswebte er an den betten vil manegen sorgenden man.

1833

Dô si entslafen wâren, und er daz ervant,
dô nam der degen widere den schilt an die hant
und gie zuo dem gademe für den türn stân,
und huote der ellenden vor den Kriemhilde man.

1834

Des nahtes wol enmitten, ine weiz ez ê geschach,
daz Volkêr der küene einen helm schînen sach
verre ûz einer vinster. Die Kriemhilde man,
die wolden an den gesten gerne schaden hân getân.

1835

Dô sprach der videlære: „Vriunt Hagene,
uns zimt disiu sorge ensamt ze tragene.
Ich sihe gewâfente liute bî dem hûse stân.
Als ich mich versinne, ich wæne, si wellent uns bestân.“

1836

„Sô swîget!“ sprach dô Hagene, „Lât si uns her nâher baz,
ê si unser werden innen. Sô wirt hie helmvaz
verrucket mit den swerten von unser zweier hant.
Si werdent Kriemhilde hin wider übele gesant.“

1837

Ein der Hiunen recken vil schiere daz gesach,
daz diu tür was behüetet. Wie balde er dô sprach:
„Des wir dâ heten willen, jâne mac es niht ergân!
Ich sihe den videlære an der schiltwahte stân.

1838

Der treit ûf sînem houbete einen helm glanz,
lûter und herte, starc unde ganz.
Ouch lohent im die ringe, sam daz fiuwer tuot.
Bî im stât ouch Hagene. Des sint die geste wol behuot.“

1839

Zehant si kêrten widere. Dô Volkêr daz ersach,
wider sînen gesellen er zorneclîchen sprach:
„Nû lât mich zuo den recken vor dem hûse gân!
Ich wil vrâgen mære der vroun Kriemhilde man.“

1840

„Nein, durch mîne liebe!“ sprach dô Hagene.
„Kumt ir von dem hûse, die snellen degene
bringent iuch mit swerten vil lîhte in sölche nôt,
daz ich iu müese helfen, und wære ez aller mîner mâge tôt.

1841

Sô wir danne beide kœmen in den strît,
ir zwêne oder viere in einer kurzen zît
sprüngen zuo dem hûse unde tæten uns diu leit
an den slâfenden recken, diu nimmêr würden verkleit.“

1842

Dô sprach aber Volkêr: „Sô lât daz geschehen,
daz wir si bringen innen, daz ich si habe gesehen,
daz des iht haben lougen die Kriemhilde man,
daz si ungetriuwelîche vil gerne heten getân!“

1843

Zehant dô rief in Volkêr hin engegene:
„Wie gât ir sus gewâfent, ir snellen degene?
Welt ir schâchen rîten, ir Kriemhilde man,
dar sult ir mich ze helfe unde mîne hergesellen hân.“

1844

Des antwurte im niemen. Zornec was sîn muot.
„Pfî, ir zagen bœse!“ sprach der helt guot,
„Wolt ir slâfende uns ermordet hân?
Daz ist sô guoten helden noch vil selten her getân.“

1845

Dô wart der küneginne vil rehte geseit,
daz ir boten niht erwurben. Von schulden was ir leit.
Dô fuogete si ez anders. Vil grimmec was ir muot.
Des muosen sît verderben die helde küene unde guot.

wie die hêrren ze kirchen giengen
{ 31 }
Wie die Herren zur Kirche gingen.

1846

„Mir kuolent sô die ringe“, sô sprach Volkêr,
„Jâ wæne diu naht uns welle nû niht wern mêr!
Ich kius ez von dem lufte, ez ist schiere tac.“
Dô wacten si dô manegen, der noch slâfende lac.

1847

Dô erschein der liehte morgen den gesten in den sal.
Hagene begunde wecken die ritter über all,
ob si zuo dem münster zer messe wolden gân.
Nâch siten kristenlîche man vil liuten began.

1848

Si sungen ungelîche, daz dâ vil wol schein,
kristen unde heide, die wâren niht enein.
Dô wolden zuo der kirchen die Gunthêres man.
Si wâren von den betten al gelîche gestân.

1849

Dô næten sich die recken in alsô guot gewant,
daz nie helde mære in deheines küneges lant
ie bezzer kleider brâhten. Daz was Hagenen leit.
Er sprach: „Jâ sult ir helde hie tragen anderiu kleit!

1850

Jâ sint iu doch genuogen diu mære wol bekant!
Nû traget für die rôsen diu wafen an der hant,
für schapel wol gesteinet die liehten helme guot,
sît daz wir wol erkennen der argen Kriemhilden muot.

1851

Wir müezen hiute strîten, daz wil ich iu sagen.
Ir sult für sîden hemde die halsperge tragen
und für die rîchen mentel die guoten schilde wît.
ob iemen mit iu zürne, daz ir vil werlîche sît.

1852

Mîne vil lieben hêrren, dar zuo mâge und man,
ir sult vil willeclîchen zuo der kirchen gân.
unde klaget got dem rîchen iuwer sorge und iuwer nôt,
und wizzet sicherlîchen, daz uns nâhet der tôt.

1853

Ir ensult ouch niht vergezzen, swaz ir habet getân,
unde sult vil vlîzeclîche dâ gein gote stân.
Des wil ich iuch warnen, recken vil hêr,
ez enwelle got von himele, ir vernemet messe nimmêr mêr.“

1854

Sus giengen zuo dem münster die fürsten und ir man.
Ûf dem vrônen vrîthove, dâ hiez si stille stân
Hagene der küene, daz si sich schieden niht.
Er sprach: „Jâ weiz ez noch niemen, waz von den Hiunen uns geschiht!

1855

Leget, mîne vriunde, die schilde für den fuoz,
unde geltet, ob iu iemen welle bieten swachen gruoz,
mit tiefen verschwunden! Daz ist Hagenen rât,
daz ir sô werdet funden, daz ez iu lobelîchen stât,“

1856

Volkêr und Hagene, die zwêne giengen dan
für daz wîte münster. Daz wart durch daz getân,
daz si daz wolden wîzen, daz des küneges wîp
müese mit in dringen. Jâ was vil grimmec ir lîp.

1857

Dô kom der wirt des landes und ouch sîn schœne wîp.
Mit rîchem gewande gezieret was ir lîp,
und ouch vil sneller recken, die man sach mit ir varn.
Dô kôs man hôhe stouben von der Kriemhilde scharn.

1858

Dô der künec rîche sus gewâfent sach
die künege und ir gesinde, wie balde er dô sprach:
„Wie sihe ich vriunde mîne under helme gân?
Mir ist leit, ûf mîne triuwe, und hât in iemen iht getân,

1859

ich solz in büezen gerne, swie si dunket guot.
Hât iemen in beswæret daz herze und ouch den muot,
des bringe ich si wol innen, daz ez mir ist vil leit.
Swaz si mir gebietent, des bin ich in alles bereit.“

1860

Des antwurte Hagene: „Uns hât niemen niht getân.
Ez ist site mîner hêrren, daz si gewâfent gân
zallen hôchgezîten ze vollen drîen tagen.
Swaz man uns hie getæte, wir soldenz Etzelen sagen.“

1861

Vil wol hôrte Kriemhilt, waz dô Hagene sprach.
Wie rehte vîentlîche si im under sach!
Sine wolde doch niht melden den site von ir lant,
swie lange si den hete dâ zen Burgonden bekant.

1862

Swie grimme und swie starc si in vîent wære,
hete im iemen gesaget diu rehten mære,
er hete wol understanden, daz doch sît dâ geschach.
Durch ir vil starke übermuot ir deheiner im es verjach.

1863

Dô gie vil grôziu menege mit der küneginne dan.
Dône wolden dise zwêne doch niht hôher stân
zweier hande breite. Daz was den Hiunen leit.
Jâ muosen si sich dringen mit den helden gemeit.

1864

Etzelen kamerære, diene dûhte daz niht guot.
Jâ heten si den recken erzürnet dô den muot,
wan daz sine torsten vor dem künege hêr.
Dâ was vil michel dringen und doch niht anders mêr.

1865

Dô man dâ gote gediente, und daz si wolden dan,
vil balde kom zen rossen vil manec Hiunen man.
Dô was bî Kriemhilde manec schœniu meit.
Wol siben tûsent degene bî der küneginne reit.

1866

Kriemhilt mit ir vrouwen in diu venster gesaz
zuo Etzel dem rîchen. Vil liep was im daz.
Si wolden schouwen rîten die helde vil gemeit.
Hey, waz vremder recken vor in ûf dem hove reit!

1867

Dô was ouch der marschalc mit den knehten komen,
Dancwart der vil küene. Der hete zuo zim genomen
sînes hêrren ingesinde von Burgonden lant.
Diu ross man wol gesatelt den küenen Nibelungen vant.

1868

Dô si zen rossen kômen, die künege unde ouch ir man,
Volkêr der starke râten daz began,
si solden bûhurdieren nâch ir landes siten.
Des wart von den helden sît vil hêrlîch geriten.

1869

Der helt hete in gerâten, des si doch niht verdrôz.
Der bûhurt und daz schallen, diu wurden beide grôz.
Ûfe den hof vil wîten kom vil manec man.
Etzel unde Kriemhilt daz selbe schouwen began.

1870

Ûf den bûhurt kômen sehs hundert degene
der Dieterîches recken den gesten zegegene.
Si wolden kurzewîle mit den Burgonden hân.
Hete ers in gegunnen, si hetenz gerne getân.

1871

Hey, waz guoter recken in dâ nâch reit!
Dem hêrren Dieterîche, dem wart daz geseit.
Mit Gunthêres mannen daz spil er in verbôt.
Er vorhte sîner manne. Des gie im sicherlîchen nôt.

1872

Dô dise von Berne gescheiden wâren dan,
dô kômen von Bechelâren die Rüedegêres man,
fünf hundert under schilde, für den sal geriten.
Liep wære dem marcgrâven, daz siz heten vermiten.

1873

Dô reit er wîslîchen zuo zin durch die schar
unde sagete sînen degenen, si wæren des gewar,
daz in unmuote wæren die Gunthêres man.
Ob si den bûhurt liezen, ez wære im liebe getân.

1874

Dô si von in geschieden die helde vil gemeit,
dâ kômen die von Düringen, als uns daz ist geseit,
und der von Tenemarken wol tûsent küener man.
Von stichen sach man vliegen vil der trunzûne dan.

1875

Irnvrit unde Hâwart in den bûhurt riten.
Ir heten die von Rîne vil stolzlîch erbiten.
Si buten manege tjoste den von Düringen lant.
Des wart von stichen dürkel vil manec hêrlîcher rant.

1876

Dô kom der hêrre Blœdelîn mit drîn tûsent dar.
Etzel und Kriemhilt nâmen sîn vil wol war,
wande vor in beiden diu ritterschaft geschach.
Diu küneginne ez gerne durch leit der Burgonden sach.

1877

Schrûtân unde Gibeche ûf den bûhurt riten,
Râmunc und Hornboge, nâch hiunischen siten.
Si hielten gegen den helden von Burgonden lant.
Die schefte dræten hôhe über des küneges sales want.

1878

Swes iemen dâ pflæge, sô was ez niuwan schal.
Man hôrte von schilde stœzen palas unde sal
harte lûte erdiezen von Gunthêres man.
Den lop daz sîn gesinde mit grôzen êren gewan.

1879

Dô was ir kurzewîle sô michel und grôz,
daz durch die kovertiure der blanke sweiz dô vlôz
von den guoten rossen, diu die helde riten.
Si versuochtenz an die Hiunen mit vil hôchvertegen siten.

1880

Dô sprach der küene recke, Volkêr der spilman:
„Ich wæn, uns dise recken türren niht bestân.
Ich hôrte ie sagen mære, si wæren uns gehaz.
Nûne kundez sich gefüegen ze wâre niender baz.“

1881

„Zen herbergen füeren“, sprach aber Volkêr,
„sol man uns die mœre, und rîten danne mêr
gegen âbende, sô des wirdet zît.
Waz, ob diu küneginne den lop den Burgonden gît?“

1882

Dô sâhens einen ritter sô weigerlîchen hie,
daz al der Hiunen getet deheiner nie.
Jâ mohte er in den zîten wol haben herzen trût:
er fuor sô wol gekleidet sam eines edelen ritters brût.

1883

Dô sprach aber Volkêr: „Wie möhte ich daz verlân?
Jener trût der vrouwen muoz ein gebiuze hân.
Ez kunde niemen gescheiden, ez gât im an den lîp.
Jâne ruoche ich, ob ez zürne des künec Etzelen wîp!“

1884

„Nein, durch mîne liebe“, sprach der künec sân,
„ez wîzent uns die liute. Und ob wir si bestân,
ir lât ez heben die Hiunen, daz füeget sich noch baz.“
Dannoch der künec Etzel bî der küneginne saz.

1885

„Ich wil den bûhurt mêren“, sprach dô Hagene,
„Lât die vrouwen schouwen und die degene,
wie wir kunnen rîten! Daz ist guot getân.
Man gît doch lop deheinen des künec Gunthêres man.“

1886

Volkêr der vil snelle den bûhurt wider reit.
Daz wart sît maneger vrouwen vil grœzlîche leit:
er stach dem rîchen Hiunen daz sper durch sînen lîp.
Daz sach man sît beweinen beide maget und wîp.

1887

Vil harte hurteclîche Hagene unde sîne man
mit sehzec sîner degene rîten er began
nâch dem videlære, dâ daz spil geschach.
Etzel unde Kriemhilt ez bescheidenlîchen sach.

1888

Dône wolden die drî künege den ir spileman
bî den vîanden niht âne huote lân.
Dâ wart von tûsent helden vil kreftelîch geriten.
Si tâten, daz si wolden, in vil hôchverteclîchen siten.

1889

Dâ der rîche Hiune ze tôde wart erslagen,
man hôrte sîne mâge wuofen und klagen.
Dô ruofte al daz gesinde: „Wer hât ez getân?“
„Daz hât der videlære, Volkêr, der küene spileman!“

1890

Nâch swerten und nâch schilden riefen dâ zehant
des marcgrâven mâge von der Hiunen lant.
Si wolden Volkêren ze tôde erslagen hân.
Der wirt ûz einem venster vil harte gâhen began.

1891

Dô huop sich von den liuten allenthalben schal.
Die künege unde ir gesinde erbeizten für den sal.
Diu ross ze rucke stiezen die Burgonden man.
Dô kom der künec Etzel. Der hêrre ez scheiden began.

1892

Ein des Hiunen mâge, den er bî im vant,
ein vil starkez wâfen brach er im ûz der hant.
Dô sluoc ers alle widere, wand im was vil zorn.
„Wie hete ich mînen dienest an disen helden verlorn?

1893

Ob ir hie bî mir slüeget disen spilman“,
sprach der künec Etzel, „daz wære missetân.
Ich sach vil wol sîn rîten, dô er den Hiunen stach,
daz ez von einem strûche ân sîne schulde geschach.

1894

Ir müezet mîne geste vride lâzen hân!“
Dô wart er ir geleite. Diu ross, diu zôch man dan
zuo den herbergen. Si heten manegen kneht,
die in mit vlîze wâren zallem dieneste gereht.

1895

Der wirt mit sînen vriunden in den palas gie.
Zorn er mêr deheinen dâ niht werden lie.
Dô rihte man die tische. Daz wazzer man in truoc.
Dâ hete die von Rîne der starken vîande genuoc.

1896

Ê die hêrren gesâzen, des was harte lanc.
Diu Kriemhilde sorge si ze sêre twanc.
Si sprach: „Fürste von Berne, ich suoche es dînen rât,
helfe unde genâde. Mîn dinc mir angestlîchen stât.“

1897

Des antwurte ir Hildebrant, der recke lobelîch:
„Swer sleht die Nibelunge, der tuot ez âne mich,
durch deheines schatzes liebe. Ez mac im werden leit.
Si sint noch unbetwungen, die snellen ritter gemeit.“

1898

Dô sprach in sînen zühten dar zuo hêr Dieterich:
„Die bete lâ belîben, küneginne rîch!
Mir habent dîne mâge der leide niht getân,
daz ich die degen küene mit strîte welle bestân.

1899

Diu bete dich lützel êret, vil edeles fürsten wîp,
daz dû dînen mâgen rætest an den lîp.
Si kômen ûf genâde her in iz lant.
Sîvrit ist ungerochen von der Dieterîches hant.“

1900

Dô si der untriuwe an dem Bernære niene vant,
dô lobte si alsô balde in Blœdelînes hant
eine rîche marke, die Nuodunc ê besaz.
Sît dô sluoc in Dancwart, daz er der gâbe gar vergaz.

1901

Si sprach: „Dû solt mir helfen, hêrre Blœdelîn.
Jâ sint in disem hûse die vîande mîn!
Die sluogen Sîvriden, den mînen lieben man.
Swer mir daz hilfen rechen, dem bin ich immer undertân.“

1902

Des antwurte ir Blœdelîn: „Vrouwe, nû wizzet daz:
jâne getar ich in vor Etzelen gerâten keinen haz,
wande er die dîne mâge, vrouwe, vil gerne siht.
Tæte ich in iht ze leide, der künec vertrüege mir sîn niht.“

1903

„Neinâ, hêrre Blœdelîn: ich bin dir immer holt!
Jâ gip ich dir ze miete silber unde golt
unde eine maget schœne, daz Nuodunges wîp!
Sô maht dû gerne triuten den ir vil minneclîchen lîp.

1904

Daz lant zuo den bürgen wil ich dir allez geben.
Sô maht dû, ritter edel, mit vröuden immer leben,
gewinnestû die marke, dâ Nuodunc inne saz.
Swaz ich dir gelobe hiute, mit triuwen leist ich dir daz.“

1905

Dô der hêrre Blœdelîn die miete dâ vernam,
und daz im durch ir schœne diu vrouwe wol gezam,
mit strîte wânde er dienen daz minneclîche wîp.
Dar umbe muose der recke dô verliesen den lîp.

1906

Er sprach zer künneginne: „Gât wider in den sal!
Ê es iemen werde inne, sô heb ich einen schal.
Ez muoz erarnen Hagene, daz er iu hât getân.
Ich antwurte iu gebunden des künec Gunthêres man.“

1907

„Nû wâfent iuch“, sprach Blœdelîn, „alle mîne man!
Wir suln den vîanden in die herberge gân.
Des wil mich niht erlâzen daz Etzelen wîp.
Dar umbe suln wir helde alle wâgen den lîp.“

1908

Dô diu küneginne Blœdelînen lie
in des strîtes willen, ze tische si dô gie
mit Etzel dem künege unde ouch mit sînen man.
Si hete swinde ræte an die geste getân.

1909

Dô der strît niht anders kunde sîn erhaben,
Kriemhilt ir leit daz alte in ir herzen was begraben,
dô hiez si tragen zen tischen den Etzelen sun.
Wie kunde ein wîp durch râche immer vreislîcher getuon?

1910

Dar giengen an der stunde die Etzelen man.
Si truogen Ortlieben, den jungen künec, dan
zuo der fürsten tische, dâ ouch Hagene saz.
Des muose daz kint ersterben durch sînen mortlîchen haz.

1911

Dô er künec rîche sînen sun ersach,
zuo sînen konemâgen er güetlîche sprach:
„Nû seht ir, vriunt die mîne, daz ist mîn einec sun
und ouch iuwer swester. Daz mac iu allen wesen vrum.

1912

Gevæhet er nâch dem künne, ez wirt ein küene man,
rîch und vil edel, starc unde wolgetân.
Leb ich deheine wîle, ich gip im zwelf lant.
Sô mac iu wol gedienen des edelen Ortliebes hant.

1913

Dar umbe bit ich gerne iuch, liebe vriunde mîn:
swenne ir ze lande rîtet wider an den Rîn,
sô sult ir mit iu füeren iuwerer swester sun,
und sult ouch an dem kinde vil genædeclîchen tuon.

1914

Unde ziehet in zen êren, unz er werde ze man!
Hât iu in dem lande iemen iht getân,
daz hilfet er iu rechen, gewehset im sîn lîp.“
Die rede hôrte ouch Kriemhilt, des künec Etzelen wîp.

1915

„Im solden wol getrûwen dise degene,
gewüehse er zeinem manne“, sô sprach Hagene,
„doch ist der künec junge sô veiclîch getân.
Man sol mich sehen selten ze hove nâch Ortliebe gân.“

1916

Der künec an Hagenen blicte. Diu rede was im leit.
Swie niht dar umbe redete der fürste vil gemeit,
ez betruobete im sîn herze unde beswârete im den muot.
Dône was der Hagenen wille niht ze kurzewîle guot.

1917

Ez tet den fürsten allen mit dem künege wê,
daz Hagene von sînem kinde hete gesprochen ê.
Daz siz vertragen solden, daz was in ungemach.
Sine wessen niht der mære, waz von dem recken sît geschach.

wie Blœdel mit Dancwart an der herberge streit
{ 32 }
Wie Blödel erschlagen wurde.

1918

Blœdelînes recken, die wâren alle gar.
Mit tûsent halspergen huoben si sich dar,
dâ Dancwart mit den knehten ob dem tische saz.
Dâ huop sich under helden der aller grœzeste haz.

1919

Alsô der hêrre Blœdelîn für die tische gie,
Dancwart der marschalc in vlîzeclîche enpfie:
„Willekomen her ze hûse, mîn hêr Blœdelîn!
Jâ wundert mich der mære: waz sol disiu rede sîn?“

1920

„Jâne dürfet ir mich niht grüezen!“ so sprach Blœdelîn,
„Wan diz komen daz mîne, daz muoz dîn ende sîn,
durch Hagenen, dînen bruoder, der Sîvriden sluoc.
Des engiltest dû hie zen Hiunen, und ander degene genuoc.“

1921

„Neinâ, hêrre Blœdelîn!“ so sprach dô Dancwart,
„Sô möhte uns wol balde riuwen disiu hovevart.
Ich was ein wênec kindelîn, dô Sîvrit verlôs den lîp.
Ine weiz niht, waz mir wîzet des künec Etzelen wîp.“

1922

„Jâne weiz ich dir der mære niht ze sagene,
ez tâten dîne mâge, Gunthêr unde Hagene!
Nû wert iuch, vil ellenden! Ir künnet niht genesen.
Ir müezet mit dem tôde pfant daz Kriemhilde wesen.“

1923

„Sône welt ir niht erwinden“, sô sprach Dancwart,
„Sô riuwet mich mîn vlêhen, daz wære baz gespart.“
Der snelle degen küene von dem tische spranc.
Er zôch ein scharpfez wâfen, daz was michel unde lanc.

1924

Dô sluoc er Blœdelîne einen swinden swertes slac,
daz im daz houbet schiere vor den füezen gelac.
„Daz sî dîn morgengâbe“, sprach Dancwart der degen,
„zuo Nuodunges brûte, der dû mit minnen woldest pflegen!

1925

Man mac si morgen mehelen einem anderm man.
Wil er die brûtmiete, dem wirt alsam getân.“
Ein vil getriuwer Hiune hete im daz geseit,
daz im diu küneginne riet sô grôziu leit.

1926

Dô sâhen Blœdelînes man, ir hêrre lac erslagen.
Dône wolden si den gesten niht langer daz vertragen.
Mit ûf erburten swerten si sprungen für diu kint
in grimmigem muote. Daz gerou vil manegen sint.

1927

Vil lûte rief dô Dancwart daz gesinde allez an:
„Ir seht wol, edelen knehte, wie ez wil umbe gân.
Nû wert iuch, vil ellenden! Deiswâr, des gât uns nôt,
swie uns diu edele Kriemhilt sô rehte güetlîch enbôt.“

1928

Die niht swert enheten, die reichten für die banc,
unde huoben von den füezen vil manegen schamel lanc.
Der Burgonden knehte in wolden niht vertragen.
Dâ wart von swæren stüelen durch helme biulen vil geslagen.

1929

Wie grimme sich dô werten diu ellenden kint!
Si triben ûz dem hûse die gewâfenten sint,
doch beleip ir tôt dar inne fünf hundert oder baz.
Dô was daz ingesinde von bluote rôt unde naz.

1930

Disiu starken mære wurden dan geseit
den Etzelen recken. Ez was in grimme leit,
daz erslagen wære Blœdel und sîne man.
Daz hete Hagenen bruoder mit den knehten getân.

1931

Ê ez diu küneginne erfünde, die Hiunen, durch ir haz,
der garte sich zwei tûsent oder dannoch baz.
Si giengen zuo den knehten, daz muose êt alsô wesen,
unde liezen des gesindes niender einen genesen.

1932

Die ungetriuwen brâhten für daz hûs ein michel her.
Die ellenden knehte, die stuonden wol ze wer.
Waz half ir baldez ellen? Si muosen ligen tôt.
Dar nâch in kurzen stunden huop sich ein vreislîchiu nôt.

1933

Hie müget ir hœren wunder bî ungefuoge sagen:
niun tûsent knehte, die lâgen tôt erslagen.
Dar über ritter zwelve der Dancwartes man.
Man sach in alterseine noch bî den vîanden stân.

1934

Der schal der was geswiftet, der dôz der was gelegen.
Dô blicte über ahzel Dancwart der degen.
Er sprach: „Ouwê der vriunde, die ich verlorn hân!
Nû muoz ich leider eine bî mînen vîanden stân.“

1935

Diu swert genôte vielen ûf sîn eines lîp.
Daz muose sît beweinen vil maneges heldes wîp.
Den schilt, den ructe er hôher, den vezzel nider baz.
Dô vrumte er vil der ringe mit bluote vliezende naz.

1936

„Sô wê mir dirre leide!“ sprach Aldrîânes kint,
„Nû wîchet, Hiunen recken! Ir lât mich an den wint,
daz der luft erküele mich sturmes müeden man!“
Dô sach man den recken vil harte hêrlîche gân.

1937

Alsô der strîtes müede ûz dem hûse spranc,
waz iteniuwer swerte ûf sînem helm erklanc!
Die niht gesehen heten, waz wunders tet sîn hant,
die sprungen hin engegene dem von Burgonden lant.

1938

„Nû wolde got“, sprach Dancwart, „möhte ich den boten hân,
der mînen bruoder Hagenen kunde wizzen lân,
daz ich vor disen recken stân in sölcher nôt!
Der hülfe mir von hinnen, oder er gelæge bî mir tôt.“

1939

Dô sprâchen Hiunen recken: „Der bote muostû sîn,
sô wir dich tragen tôten für den bruoder dîn.
Sô siht im êrste leide der Gunthêres man.
Dû hâst dem künege Etzel sô grôzen schaden hie getân.“

1940

Er sprach: „Nû lât daz dröuwen, unde wîchet hôher baz.
Jâ getuon ich etelîchem noch die ringe naz!
Ich wil diu mære selbe hin ze hove sagen,
unde wil ouch mînen hêrren mînen grôzen kumber klagen.“

1941

Er leidete sich sô sêre den Etzelen man,
daz si in mit den swerten torsten niht bestân.
Dô schuzzen si der gêre sô vil in sînen rant,
daz er in durch die swære muose lâzen von der hant.

1942

Dô wânden si in betwingen, dô er niht schildes truoc.
Hey, waz er tiefer wunden durch die schilde sluoc!
Des muose vor im strûchen vil manec küener man.
Dar umbe lop vil grôzen der starke Dancwart gewan.

1943

Ze beiden sînen sîten sprungen si im zuo.
Jâ kom ir ieslîcher in den strît ze vruo.
Dô gie er vor den vîanden, als ein eberswîn
ze walde tuot vor hunden. Wie möhte er küener gesîn?

1944

Sîn vart wart erniuwet von heizem bluote naz.
Jâne kunde ein einec recke gestrîten nimmêr baz
sînen vîanden, danne er hete getân.
Man sach den Hagenen bruoder ze hove hêrlîchen gân.

1945

Truhsæzen unde schenken, die hôrten swerte klanc.
Vil maneger dô daz trinken von der hende swanc
unde eteslîche spîse, die man ze hove truoc.
Dô kom im vor der stiegen der starken vîande genuoc.

1946

„Wie nû, ir truhsæzen?“ sprach der müede degen,
„Jâ soldet ir der geste vil güetlîche pflegen,
unde soldet ir den hêrren guote spîse tragen
unde liezet mich den mînen hêrren diu mære rehte sagen!“

1947

Swelcher im durch sîn ellen für die stiege spranc,
der sluoc er eteslîchem sô grimmen swertes swanc,
daz si durch die vorhte ûf hôher muosen stân.
Ez hete sîn starkez ellen vil michel wunder getân.

wie Dancwart diu mære ze hove sînen hêrren brâhte
{ 33 }
Wie Dankwart seinen Königen die Nachricht brachte.

1948

Alsô der küene Dancwart under die tür getrat,
daz Etzelen gesinde er hôher wîchen bat.
Mit bluote was berunnen allez sîn gewant.
Ein vil starkez wâfen, daz truoc er blôz an sîner hant.

1949

Vil lûte rief dô Dancwart zuo dem degene:
„Ir sitzet al ze lange, bruoder Hagene!
Iu unde got von himele klag ich unser nôt:
ritter unde knehte sint in den herbergen tôt.“

1950

Er rief im hin engegene: „Wer hât daz getân?“
„Daz hete der hêrre Blœdelîn unde sîne man.
Ouch hât ers sêre engolten, daz wil ich iu sagen:
ich hân mit mînen handen im sîn houbet abe geslagen.“

1951

„Daz ist ein schade kleine“, sprach aber Hagene,
„dâ man saget mære von einem degene,
ob er von recken henden verliuset sînen lîp.
In suln deste ringer klagen wætlîchiu wîp.

1952

Nû saget mir, bruoder Dancwart, wie sît ir sô rôt?
Ich wæne, ir von wunden lîdet grôze nôt.
Ist er iender ime lande, der ez iu hât getân,
in enner der übel tiuvel, ez muoz im an sîn leben gân.“

1953

„Dû sihest mich wol gesunden. Mîn wât ist bluotes naz.
Von anderer manne wunden ist mir geschehen daz,
der ich alsô manegen hiute hân erslagen,
ob ich es sweren solde, ine kundez nimmêr gesagen.“

1954

Er sprach: „Bruoder Dancwart, sô hüetet uns der tür,
unde lât der Hiunen einen komen niht der für!
Ich wil reden mit den recken, als uns des twinget nôt.
Unser ingesinde lît vor in unverdienet tôt.“

1955

„Sol ich sîn kamerære“, sprach der küene man,
„alsô rîchen künegen ich gedienen kan,
sô pflige ich der stiegen nâch den êren mîn.“
Den Kriemhilde degenen kunde leider niht gesîn.

1956

„Mich nimt des michel wunder“, sprach aber Hagene,
„waz nû hinne rûnen die Hiunen degene.
Si wæn lîhte des enbæren, der an der tür dâ stât,
und diu hovemære gesaget den Burgonden hât.

1957

Ich hân vernomen lange von Kriemhilde sagen,
daz si ir herzeleide wolde niht vertragen.
Nû trinken wir die minne unde gelten sküneges wîn!
Der junge vogt der Hiunen, der muoz der êrste sîn.“

1958

Dô sluoc daz kint Ortlieben Hagene der helt guot,
daz im gegen der hende ame swerte vlôz dez bluot,
und daz dem künege daz houbet spranc in die schôz.
Dô huop sich under degenen ein mort vil grimmec unde grôz.

1959

Dar nâch sluoc er dem magezogen einen swinden slac
mit beiden sînen henden, der des kindes pflac,
daz im daz houbet schiere vor dem tische nider lac.
Ez was ein jæmerlîchez lôn, daz er dem magezogen wac.

1960

Er sach vor Etzelen tische einen spilman.
Hagene in sînem zorne gâhen dar began.
Er sluoc im ûf der videlen ab die zeswen hant.
„Daz habe dir ze boteschefte in der Burgonden lant!“

1961

„Sô wê mir mîner hende!“ sprach Werbel der spilman.
„Hêr Hagene von Tronege, waz hete ich iu getân?
Ich kom ûf grôze triuwe in iuwerer hêrren lant.
Wie klinge ich nû die dœne, sît ich verlorn hân die hant?“

1962

Hagene geahtete ringe, gevidelte er nimmêr mêr.
Dô vrumte er in dem hûse diu mortgrimmen sêr
an den Etzelen recken, der er sô vil ersluoc.
Dô brâhte er in dem hûse liutes ze tôde genuoc.

1963

Volkêr der vil snelle von dem tische spranc.
Sîn videlboge im lûte an sîner hende erklanc.
Dô videlte ungefuoge Gunthêres spilman.
Hey, waz er im ze vîande der küenen Hiunen gewan!

1964

Ouch sprungen von den tischen die drîe künege hêr.
Si woldenz gerne scheiden, ê daz schaden geschæhe mêr.
sine mohtenz mit ir sinnen dô niht understân,
dô Volkêr unde Hagene sô sêre wüeten began.

1965

Dô sach der vogt von Rîne ungescheiden den strît.
Dô sluoc der fürste selbe vil manege wunden wît
durch die liehten ringe den vîanden sîn.
Er was ein helt zen handen. Daz tet er grœzlîche schîn.

1966

Dô kom ouch zuo dem strîte der starke Gêrnôt.
Jâ vrumte er der Hiunen vil manegen helt tôt
mit einem scharpfen swerte, daz gap im Rüedegêr.
Den Etzelen recken tet er diu grœzlîchen sêr.

1967

Der junge sun vroun Uoten zuo dem strîte spranc.
Sîn wâfen hêrlîchen durch die helme erklanc
den Etzelen recken ûzer Hiunen lant.
Dâ tet vil michel wunder des küenen Gîselhêres hant.

1968

Swie vrum si alle wæren, die künege und alle ir man,
doch sach man vor in allen Gîselhêren stân
gegen den vîanden. Er was ein helt guot.
Er vrumte dâ mit wunden vil manegen vallen in daz bluot.

1969

Ouch werten sich vil sêre die Etzelen man.
Dô sach man die geste houwende gan
mit den vil liehten swerten durch des küneges sal.
Dô hôrte man allenthalben von wuofe grôzen schal.

1970

Dô wolden die dar ûze zir vriunden sîn dar in.
Die nâmen an den türen vil kleinen gewin.
Dô wæren die dar inne vil gerne für den sal.
Dancwart liez ir deheinen die stiegen ûf unde ouch ze tal.

1971

Des huop sich vor den türen vil starker gedranc
unde ouch von den swerten grôzer helme klanc
Des kom der küene Dancwart in eine grôze nôt.
Daz besorgete sîn bruoder, als im sîn triuwe daz gebôt.

1972

Vil lûte rief dô Hagene Volkêren an:
„Seht ir dort, geselle, mînen bruoder stân
vor hiunischen recken under starken slegen?
Vriunt, nert mir den bruoder, ê wir verliesen den degen!“

1973

„Daz tuon ich sicherlîchen“, sprach der spilman.
Er begunde videlende durch den palas gân.
Ein hertez swert im ofte an sîner hende erklanc.
Die recken von dem Rîne im sageten grœzlîchen danc.

1974

Volkêr der küene zuo Dancwarten sprach:
„Ir habt erliten hiute vil grôzen ungemach.
Mich bat iuwer bruoder, durch helfe zuo ziu gân.
Welt ir nû sî dar ûze, sô wil ich innerthalben stân.“

1975

Dancwart der snelle stuont ûzerthalp der tür.
Er werte in ir stiege, swaz ir kom dar für.
Des hôrte man wâfen hellen den helden an der hant.
Sam tet ouch innerthalben Volkêr von Burgonden lant.

1976

Der küene videlære rief über die menege:
„Der sal ist wol beslozzen, mîn vriunt hêr Hagene.
Jâ ist alsô verschranket diu Etzelen tür
von zweier helde handen, dâ gânt wol tûsent rigel für!“

1977

Dô von Tronege Hagene die tür sach sô behuot,
den schilt warf dô ze rucke der mære helt guot.
Dô begunde er êrste rechen, daz im was getân.
Dô heten sine vîande zem lebene deheiner slahte wân.

1978

Dô der vogt von Berne rehte daz ersach,
daz Hagene der starke sô manegen helm brach,
der künec der Amelunge spranc ûf eine banc.
Er sprach: „Hie schenket Hagene daz aller wirsiste tranc.“

1979

Der wirt hete grôze sorge, als im dô daz gezam,
waz man im lieber vriunde vor sînen ougen nam,
wande er vor sînen vîanden vil kûme dâ genas.
Er saz vil angestlîchen. Was half in, daz er künec was?

1980

Kriemhilt diu rîche rief Dieterîchen an:
„Nû hilf mir, ritter edele, mit dem leben dan,
durch aller fürsten tugende, ûzer Amelunge lant!
Wand erreichet mich Hagene, ich hân den tôt an der hant.“

1981

„Wie sol ich iu nû gehelfen?“ sprach hêr Dieterîch,
„edeliu küneginne, nû sorge ich umbe mich.
Ez sint sô sêre erzürnet die Gunthêres man,
daz ich an disen zîten gevriden niemen kan.“

1982

„Neinâ, hêrre Dieterîch, vil edel ritter guot,
lâzâ hiute schînen den tugentlîchen muot,
daz dû mir helfest hinnen, oder ich belîbe tôt!“
Der sorge gie Kriemhilde vil harte grœzlîche nôt.

1983

„Daz wil ich versuochen, ob ich iu gehelfen kan,
wande ich in manegen zîten nie gesehen hân
sô bitterlîch erzürnet sô manegen ritter guot.“
Jâ sach er durch die helme von swerten springen daz bluot.

1984

Mit kraft begunde ruofen der degen ûz erkorn,
daz sîn stimme erlûte alsam ein wisentes horn,
und daz diu burc vil wîte von sîner kraft erdôz.
Diu sterke Dieterîches was unmæzlîche grôz.

1985

Dô gehôrte Gunthêr ruofen disen man.
In dem herten sturme losen er began.
Er sprach: „Dieterîches stimme ist in mîn ôre komen.
Ich wæne, im unser degene im haben etwen hie benomen.

1986

Ich sihe in ûf dem tische. Er winket mit der hant.
Ir vriunt unde mâge von Burgonden lant,
gehabt ûf des strîtes. Lât hœren unde sehen,
waz hie dem degene von mînen mannen sî geschehen.“

1987

Dô der künec Gunthêr bat unde ouch gebôt,
si habten ûf mit swerten in des strîtes nôt.
Daz was gewalt vil grôzer, daz dâ niemen sluoc.
Jâ vrâgete er den von Berne der mære schiere genuoc.

1988

Er sprach: „Vil edel Dieterîch, waz ist iu hie getân
von den mînen vriunden? Willen ich des hân,
buoze unde suone, der bin ich iu bereit.
Swaz iu iemen tæte, daz wære mir inneclîchen leit.“

1989

Dô sprach der hêrre Dieterîch: „Mir ist niht getân.
Lât mich ûz dem hûse mit iuwerem vride gân
von disem herten strîte mit dem gesinde mîn!
Daz wil ich sicherlîchen immer dienende sîn.“

1990

„Wie vlêhet ir sô schiere?“ sprach dô Wolfhart,
„Jâ hât der videlære die tür nie sô verspart,
wir entsliezen sô wîte, daz wir dar für gân!“
„Nû swîget!“ sprach hêr Dieterîch, „Ir habet den tiuvel getân!“

1991

Dô sprach der künec Gunthêr: „Erlouben ich iu wil,
füeret ûze dem hûse lützel oder vil,
âne mîne vîande. Die suln hie bestân.
Si hânt mir zen Hiunen sô rehte leide getân.“

1992

Dô er daz gehôrte, under arme er beslôz
die edelen küneginne. Der sorge, diu was grôz.
Dô fuorte er anderthalben Etzelen mit im dan,
ouch gie mit Dieterîche sehs hundert wætlîcher man.

1993

Dô sprach der marcgrâve, der edel Rüedegêr:
„Sol aber ûzem hûse iemen komen mêr,
die iu doch gerne dienen, daz lâzet uns vernemen!
Sô sol ouch vride stæter den guoten vriunden gezemen.“

1994

Des antwurte Gîselhêr von Burgonden lant:
„Vride unde suone sî iu von uns bekant,
sît ir sît triuwen stæte, ir unde iuwer man.
Ir sult unangestlîchen mit iuwern vriunden hinnen gân.“

1995

Dô Rüedegêr der hêrre gerûmete den sal,
fünf hundert oder mêre im volgeten über al
der von Bechelâren, vriunde unde sîner man.
Von dem künege Rüedegêr schaden grôzen sît gewan.

1996

Dô sach ein Hiunen recke Etzelen gân
bî Dieterîche nâhen. Genozzen wolde er sîn hân.
Dem gap der videlære einen sölchen slac,
daz im vor Etzelen füezen daz houbet schiere gelac.

1997

Dô der wirt des landes kom für daz hûs gegân,
dô kêrte er sich hin widere unde sach Volkêren an:
„Ouwê mir dirre geste! ditze ist ein grimmigiu nôt,
daz alle mîne recken suln vor in ligen tôt.

1998

Âch wê der hôchgezîte!“ sprach der künec hêr.
„Dâ vihtet einer inne, der heizet Volkêr.
als ein eber wilde, unde ist ein spilman.
Ich danke es mînem heile, daz ich dem tiuvel entran.

1999

Sîne leiche lûtent übele, sîne züge, die sint rôt.
Jâ vellent sîne dœne vil manegen helt tôt!
Ine weiz niht, waz uns wîze der selbe spilman,
wand ich gast nie deheinen sô rehte leiden gewan.“

2000

Si heten die si wolden lâzen für den sal.
Dô huop sich innerthalben ein grœzlîcher schal.
Die geste sêre râchen daz in ê geschach.
Volkêr der vil küene, hey, waz er helme zerbrach!

2001

Sich kêrte gegen dem schalle Gunthêr, der künec hêr:
„Hœrt ir die dœne, Hagene, die dort Volkêr
videlt mit den Hiunen, swer zuo den türn gât?
Ez ist ein rôter anstrich, den er ze dem videlbogen hât.“

2002

„Mich riuwet âne mâze“, sô sprach Hagene,
„daz ich ie gesaz in dem hûse vor dem degene.
Ich was sin geselle unde ouch er der mîn,
und kome wir immer wider heim, daz suln wir noch mit triuwen sîn.

2003

Nû schouwe, künec hêre, Volkêr ist dir holt!
Er dienet vlîzeclîche dîn silber und dîn golt.
Sîn videlboge im snîdet durch den herten stâl.
Er brichet ûf den helmen diu liehte schînenden mâl.

2004

Ine gesach nie videlære sô hêrlîchen stân,
als der degen Volkêr hiute hât getân.
Die sînen leiche hellent durch helme und rant.
Jâ sol er rîten guotiu ross unde tragen hêrlîch gewant!“

2005

Swaz der Hiunen mâge in dem sal was gewesen,
der enwas nû deheinere dar inne mê genesen.
Des was der schal geswiftet, daz niemen mit in streit.
Diu swert von handen legeten die küenen recken gemeit.

wie si die tôten abe wurfen
{ 34 }
Wie sie die Toten hinabwarfen.

2006

Die hêrren nâch ir müede sâzen dô ze tal.
Volkêr unde Hagene giengen für den sal.
Sich leinten über schilde die übermüeten man.
Dô wart dâ rede vil spæhe von in beiden getân.

2007

Dô sprach von Burgonden Gîselhêr der degen:
„Jâne müget ir, liebe vriunde, ruowe niht gepflegen!
Ir sult die tôten liute ûz dem hûse tragen.
Wir werden noch bestanden, ich wilz iu wærlîche sagen.

2008

Sine suln uns under füezen hie niht langer ligen.
Ê daz uns die Hiunen mit sturme an gesigen,
wir gehouwen noch die wunden, diu mir sanfte tuot.
Des hân ich“, sprach dô Gîselhêr, „einen stætigen muot.“

2009

„Sô wol mich sölches hêrren!“ sprach dô Hagene,
„Der rât enzæme niemen wan einem degene,
den uns mîn junger hêrre hiute hât getân.
Des müget ir Burgonden alle vil vrœlîche stân.“

2010

Dô volgeten si dem râte und truogen für die tür
siben tûsent tôten wurfen si dar für
vor des sales stiegen. Dâ vielen si ze tal.
Dô huop sich von ir mâgen ein vil klagelîcher schal.

2011

Ez was ir etelîcher sô mæzlîchen wunt,
der sîn sanfter pflæge, er würde noch gesunt,
der vor dem hôhen valle muose ligen tôt.
daz klageten dô ir vriunde. Des gie in wærlîche nôt.

2012

Dô sprach der videlære, Volkêr, ein helt gemeit:
„Nû kiuse ich des die wârheit, als mir ist geseit:
die Hiunen, die sint bœse. Si klagent sam diu wîp.
Nû solden si beruochen der vil sêre wunden lîp.“

2013

Dô wânde ein marcgrâve, er riete ez durch guot:
er sach einen sînen mâc gevallen in daz bluot.
Er beslôz in mit den armen unde wolde in tragen dan.
Den schôz ob im ze tôde der vil küene spileman.

2014

Dô daz die ander sâhen, diu vluht, diu huop sich dan.
Si begunden alle vluochen dem selbem spileman.
Einen gêr er ûf gezucte, vil scharpf unde vil hart,
der von einem Hiunen zuo zim dar ûf geschozzen wart.

2015

Den schôz er kreftelîchen durch die burc dan,
über daz volc vil verre: den Etzelen man
gap er herberge hôher von dem sal.
Sîn vil starkez ellen die liute vorhten über al.

2016

Dô stuonden vor dem hûse vil manec tûsent man.
Volkêr unde Hagene reden dô began
mit Etzel dem künege allen iren muot.
Des kômen sît in sorge die helde küene und guot.

2017

„Ez zæme“, sô sprach Hagene, „vil wol volkes trôst,
daz die hêrren vehten zaller vorderôst,
alsô der mînen hêrren hie ieslîcher tuot.
Die houwent durch die helme, nâch swerten vliuzet daz bluot.“

2018

Etzel was sô küene, er vazzete sînen schilt.
„Nû vart gewerlîche“, sprach vrou Kriemhilt,
„unde bietet ir den recken daz golt über rant,
wande erreichet iuch dort Hagene, ir habt den tôt an der hant!“

2019

Der künec, der was sô küene, er wolde erwinden niht,
daz von sô rîchem fürsten vil selten nû geschiht.
Man muose in bî dem vezzel ziehen wider dan.
Hagene der grimme in aber hœnen began:

2020

„Ez was ein verriu sippe“, sprach Hagene der degen,
„die Etzel und Sîvrit ze samne hete gepflegen.
Er minnete Kriemhilden, ê si ie gesæhe dich.
Künec vil bœse, war umbe rætest an mich?“

2021

Dise rede hôrte des edelen küneges wîp
Des wart in ungemüete der Kriemhilde lîp,
daz er si getorste schelten vor Etzelen man.
Dar umbe si aber râten an die geste began.

2022

Si sprach: „Der mir von Tronege Hagenen slüege
unde mir sîn houbet her für mich trüege,
dem fulte ich rôtes goldes den Etzelen rant.
Dar zuo gæbe ich im ze miete vil guote bürge unde lant.“

2023

„Nûne weiz ich, wes si bîtent“, sprach der spilman,
„ine gesach nie helde sô zagelîchen stân,
dâ man hôrte bieten also hôhen solt.
Jâne sol in Etzel dar umbe nimmêr werden holt!

2024

Die hie sô lasterlîchen ezzent des fürsten brôt
under im nû geswîchent in dere grœzesten nôt,
der sihe ich hie vil manegen vil zagelîche stân,
unde wellent doch sîn vil küene. Si müezens immer schande hân!“

wie Îrinc erslagen wart
{ 35 }
Wie Iring erschlagen wurde.

2025

Dô rief von Tenemarke der marcgrâve Îrinc:
„Ich hân ûf êre lâzen nû lange mîniu dinc
unde hân in volkes stürmen des besten vil getân.
Nû brinc mir mîn gewæfen! Jâ wil ich Hagenen bestân!“

2026

„Daz wil ich widerrâten“, sprach dô Hagene.
„Sô heiz ûf hôher wîchen der Hiunen degene!
Gespringent iuwer zwêne oder drî in den sal,
die sende ich vil ungesunde die stiegen wider hin ze tal.“

2027

„Dar umbe ichz niht lâze“, sprach aber Îrinc,
„ich hân ouch ê versuochet sam sorclîchiu dinc.
Jâ wil ich mit dem swerte dich einen bestân!
Waz hilfet übermüeten, daz dû mit rede hâst getân?“

2028

Dô wart gewâfent balde der degen Îrinc
unde Irnvrit von Düringen, ein küener jungelinc,
und Hâwart der vil starke, wol mit tûsent man.
Swes Îrinc begunde, si woldens alles im gestân.

2029

Dô sach der videlære eine vil grôze schar,
die mit Îringe gewâfent kômen dar.
Si truogen ûf gebunden vil manegen helm guot.
Dô wart der küene Volkêr ein teil vil zornec gemuot.

2030

„Seht ir, vriunt Hagene, dort Îringen gân,
der iuch mit dem swerte lobte eine bestân?
Wie zement helde lügene? Ich wil unprîsen daz.
Ez gânt mit im gewâfent wol tûsent recken oder baz.“

2031

„Nû heizet mich niht liegen!“ sprach Hâwartes man.
„Ich wilz gerne leisten, swaz ich gelobt hân.
Durch deheine vorhte wil ich es ab gân,
swie griulîch sî nû Hagene, ich wil in eine bestân.“

2032

Ze füezen bôt sich Îrinc mâgen und man,
daz si in eine liezen den recken bestân.
Daz tâten si ungerne, wand in was wol bekant
der übermüete Hagene ûzer Burgonden lant.

2033

Dô bat er si sô lange, daz ez sît geschach,
dô daz ingesinde den willen sîn ersach,
daz er warp nâch êren. Dô liezen si in gân.
Dô wart von in beiden ein grimmez strîten getân.

2034

Îrinc von Tenemarke vil hôhe truoc den gêr.
Sich dacte mit dem schilde der triuwer degen hêr.
Dô lief er ûf ze Hagenen vaste für den sal.
Dô huop sich von den degenen ein vil grœzlîcher schal.

2035

Dô schuzzen si die gêre mit krefte von der hant
durch die vesten schilde ûf liehtez ir gewant,
daz die gêrstangen vil hôhe dræten dan.
Dô griffen zuo den swerten die zwêne grimme küene man.

2036

Des küenen Hagenen ellen, daz was starke grôz.
Dô sluoc ouch ûf in Îrinc, daz al daz hûs erdôz.
Palas und türne erhullen nâch ir slegen.
Dône kunde niht verenden des sînen willen der degen.

2037

Îrinc, der lie Hagenen unverwundet stân.
Zuo dem videlære gâhen er began.
Er wânde, er möhte in twingen mit sînen herten slegen.
Dô kunde sich wol beschermen Volkêr der degen.

2038

Dô sluoc der videlære, daz über des schildes rant
dræte daz gespenge von Volkêres hant.
Den liez er dô belîben, ez was ein übel man.
Dô lief er Gunthêren von den Burgonden an.

2039

Dô was ir ietweder ze strîte starc genuoc.
Swaz Gunthêr und Îrinc ûf ein ander sluoc,
daz brâhte niht von wunden daz vliezende bluot.
Daz behuote ir gewæfen, daz was starc unde guot.

2040

Gunthêren er lie belîben und lief Gêrnôten an.
Daz fiuwer ûz den ringen er houwen im began.
Dô hete von Burgonden der starke Gêrnôt
den küenen Îringen erslagen næhelîchen tôt.

2041

Dô spranc er von dem fürsten. Snel er was genuoc.
Der Burgonden viere der helt vil balde sluoc,
des edelen ingesindes von Wormez über Rîn,
dône kunde Gîselhêr nimmêr zorneger gesîn.

2042

„Got weiz, hêr Îrinc“, sprach Gîselhêr daz kint,
„ir müezet mir die gelten, die vor iu tôt sint
gelegen hie ze stunde!“ Dô lief er in an.
Er sluoc den Tenlender, daz er muose dâ bestân.

2043

Er schôz vor sînen handen nider in daz bluot,
daz si alle wolden wænen, daz der helt guot
ze strîte nimmêr mêre geslüege einen slac.
Îrinc doch âne wunden hie vor Gîselhêren lac.

2044

Von des swertes dôze unde von des helmes klanc
wâren sîne witze worden harte kranc,
daz sich der degen küene des lebens niht versan.
Daz hete mit sînen kreften der starke Gîselhêr getân.

2045

Dô im begunde entwîchen von dem houbte der dôz,
den er ê dâ dolte von dem slage grôz,
er dâhte: „Ich bin noch lebende und niender wunt.
Nû ist mir aller êrst daz ellen Gîselhêres kunt.“

2046

Dô hôrte er beidenthalben die vîande stân.
Wisten si diu mære, im wære noch mêr getân.
Ouch hete er Gîselhêren dâ bî im vernomen.
Er dâhte, wie er solde von den vîanden komen.

2047

Wie rehte tobelîche er ûz dem bluote spranc.
Sîner snelheite er mohte sagen danc.
Dô lief er ûz dem hûse, dâ er aber Hagenen vant,
und sluoc im slege grimme mit sîner ellenthafter hant.

2048

Dô dâhte Hagene: „Dû muost des tôdes wesen.
Dich envride der übel tiuvel, dûne kanst niht genesen!“
Doch wunte Îrinc Hagenen durch sînen helmhuot.
Daz tet der helt mit Wasken, daz was ein wâfen alsô guot.

2049

Dô der hêrre Hagene der wunden enpfant,
dô erwagte im ungefuoge daz swert an sîner hant.
Al dâ muose im entwîchen der Hâwartes man
hin nider von der stiegen. Hagene im volgen began.

2050

Îrinc der vil küene den schilt über swanc,
unde wære diu selbe stiege drîer stiegen lanc,
die wîle liez in Hagene nie slahen einen slac.
Hey, waz rôter vanken ob sînem houbte gelac!

2051

Wider zuo den sînen kom Îrinc wol gesunt.
dô wurden disiu mære Kriemhilde rehte kunt,
waz er von Tronege Hagenen mit sînem strîte hete getân.
Des im diu küneginne vil hôhe danken began.

2052

„Nû lôn dir got, Îrinc, vil mære helt guot!
Dû hâst mir wol getrœstet daz herze unde ouch den muot.
Nû sihe ich rôt von bluote Hagenen sîn gewant.“
Kriemhilt nam im selbe den schilt vor liebe von der hant.

2053

„Ir muget im mâzen danken“, sô sprach Hagene,
„wolde erz noch versuochen, daz zæme degene.
Kœme er danne hinnen, so wære er küene man.
Diu wunde vrumt iuch kleine, die ich von im enpfangen hân.

2054

Daz ir von mîner wunden die ringe sehet rôt,
daz hât mich erreizet ûf maneges mannes tôt.
Ich bin aller êrst erzürnet, als ein unverzaget man.
mir hât der degen Îrinc schaden kleinen noch getân.“

2055

Dô stuont gegen dem winde Îrinc von Tenelant.
Er kuolte sich in ringen. Den helm er ab gebant.
Dô sprâchen al die liute, sîn ellen wære guot.
Des hete der marcgrâve einen rîchen hôhen muot.

2056

Aber sprach dô Îrinc: „Mîne vriunde, wizzet daz,
daz ir mich wâfent schiere. Ich wilz versuochen baz,
ob ich noch müge betwingen den übermüeten man.“
Sîn schilt was verhouwen. Einen bezzeren er gewan.

2057

Vil schiere wart der recke dô gewâfent baz.
Einen gêr vil starken nam er durch den haz,
dâ mit er aber wolde Hagenen dort bestân.
Dô warte im vîentlîche der mortgrimmege man.

2058

Sîn mohte niht erbîten Hagene der degen.
Er lief im hin engegene mit schüzzen unde mit slegen
die stiegen ûz an ein ende. Sîn zorn der was grôz.
Îrinc sîner sterke dô vil wênec genôz.

2059

Si sluogen durch die schilde, daz ez lougen began
von fiuwer rôten winden. Der Hâwartes man
wart von Hagenen swerte krefteclîchen wunt
durch schilt und durch die brünne. Des er wart nimmêr mêr gesunt.

2060

Dô der degen Îrinc der wunden enpfant,
den schilt er baz dô ructe über diu helmbant.
Des schaden in dûhte der volle, den er dâ gewan.
Sît tet im aber mêre des künec Gunthêres man.

2061

Hagene vor sînen füezen einen gêr ligen vant.
Er schôz ûf Îringen, den helt von Tenelant,
daz im von dem houbte diu stange ragete dan.
Im hete der recke Hagene den grimmen ende getân.

2062

Îrinc muoste entwîchen zuo den von Tenelant.
Ê daz man dô dem degene den helm ab gebant,
man brach den gêr von houbte. Dô nâhete im der tôt.
Daz weinten sîne mâge. Des gie in wærlîche nôt.

2063

Dô kom diu küneginne über in gegân.
Den starken Îringen klagen si began.
Si weinte sîne wunden. Ez was ir grimme leit.
Dô sprach vor sînen mâgen der recke küene und gemeit:

2064

„Lât die klage belîben, vil hêrlîch wîp!
Waz hilfet iuwer weinen? Jâ muoz ich mînen lîp
verliesen von den wunden, die ich enpfangen hân!
Der tôt wil mich niht langer iu und Etzelen dienen lân.“

2065

Er sprach zuo den Düringen und ze den von Tenelant:
„Die gâbe sol enpfâhen iuwer deheines hant
von der küneginne, ir liehtez golt vil rôt.
unde bestât ir Hagenen, ir müezet kiesen den tôt.“

2066

Sîn varwe was erblichen. Des tôdes zeichen truoc
Îrinc der vil küene. Ez was in leit genuoc.
Genesen niht enkunde der Hâwartes man.
Dô muoste ez an ein strîten von den von Tenemarke gân.

2067

Irnvrit unde Hâwart sprungen für daz gadem
wol mit tûsent helden. Vil ungefüegen kradem
hôrte man allenthalben, kreftec unde grôz.
Hey, waz man scharpfer gêre zuo den Burgonden schôz!

2068

Irnvrit der küene liefe an den spilman,
des er den schaden grôzen von sîner hant gewan.
Der edel videlære den lantgrâven sluoc
durch einen helm vesten. Jâ was er grimme genuoc.

2069

Dô sluoc der hêrre Irnvrit den küenen spilman,
daz im muosen bresten diu ringes gespan,
und daz sich beschutte diu brünne fiuwer rôt.
Doch viel der lantgrâve vor dem videlære tôt.

2070

Hâwart unde Hagene ze samne wâren komen.
Er möhte wunder kiesen, ders hete war genomen.
Diu swert genôte vielen den helden an der hant.
Hâwart muoste ersterben von dem ûzer Burgonden lant.

2071

Dô die Tenen unde die Düringen ir hêrren sâhen tôt,
dô huop sich vor dem hûse ein vreislîchiu nôt,
ê si die tür gewunnen mit ellenthafter hant.
Des wart dâ verhouwen vil manec helm und rant.

2072

„Wîchet!“, sprach dô Volkêr, „unde lât si her în gân.
Ez ist sus unverendet, des si dâ habent wân.
Si müezen drinne ersterben in vil kurzer zît.
Si erarnent mit dem tôde, daz in diu küneginne gît.“

2073

Dô die übermüeten kômen in den sal,
vil manegem wart daz houbt geneiget sô ze tal,
daz er muose ersterben von ir swinden slegen.
Wol streit der küene Gêrnôt. Sam tet ouch Gîselhêr der degen.

2074

Tûsent unde viere kômen in daz hûs.
Von swerten sach man blicken vil manegen swinden sûs.
Sît wurden doch die recken alle drinne erslagen.
Man mohte michel wunder von den Burgonden sagen.

2075

Dar nâch wart ein stille, dô der schal verdôz.
Daz bluot allenthalben durch die löcher vlôz
und dâ zen rigelsteinen von den tôten man.
Daz heten die von Rîne mit grôzem ellen getân.

2076

Dô sâzen aber ruowen die von Burgonden lant.
Diu wâfen mit den schilden leitens ûz der hant.
Dô stuont noch vor den türen der küene spilman.
Er warte, ob iemen wolde noch zuo zin mit strîte gân.

2077

Der künec klagete sêre. Sam tet ouch sîn wîp.
Megede und vrouwen, die quelten dâ den lîp.
Ich wæne des, daz hete der tôt ûf si gesworn.
Des wart noch vil der recken von den gesten dâ verlorn.

wie diu künegîn den sal vereiten liez
{ 36 }
Wie die Königin den Saal anzünden ließ.

2078

„Nû bindet ab die helme!“ sprach Hagene der degen.
„Ich unde mîn geselle, wir suln iuwer pflegen.
Unde wellent ez noch versuochen zuo zuns die Etzelen man,
sô warne ich mîne hêrren, sô ich aller schiereste kan.“

2079

Dô entwâfente daz houbet vil manec ritter guot.
Si sâzen ûf die wunden, die vor in in daz bluot
wâren zuo dem tôde von ir handen komen.
Dâ wart der edelen geste vil übele goum genomen.

2080

Noch vor dem âbende, dô schuof der künec daz
unde ouch diu küneginne, daz ez versuochten baz
die hiunischen recken. Der sach man vor in stân
noch wol zweinzec tûsent. Si muosen dâ ze strîte gân.

2081

Sich huop ein sturm herte zuo den gesten sân.
Dancwart, Hagenen bruoder, der vil snelle man,
spranc von sînen hêrren zen vîanden für die tür.
Man wânde, er wære erstorben. Er kom gesunder wol dar für.

2082

Der herte strît, der werte, unz ez diu naht benam.
Dô werten sich die geste, als guoten helden zam,
den Etzelen mannen den sumerlangen tac.
Hey, waz noch küener degene vor in veige gelac!

2083

Zeinen sunewenden daz grôze mort geschach,
daz diu vrouwe Kriemhilt ir herzeleit errach
an ir næhesten mâgen unde anderem manegem man,
dâ von der künec Etzel vröude nimmêr mêr gewan.

2084

In was des tages zerunnen. Dô gie in sorgen nôt.
Si gedâhten, daz in bezzer wære ein kurzer tôt,
denne lange dâ ze quelne ûf ungefüegiu leit.
Eines vrides si dô gerten, die stolzen ritter gemeit.

2085

Si bâten, daz man bræhte den künec zuo in dar.
Die bluot varwen helde unde ouch harnasch var
trâten ûz dem hûse, die drîe künege hêr.
Sine wessen, wem ze klagene diu ir vil grœzlîchen sêr.

2086

Etzel unde Kriemhilt, die kômen beide dar.
Daz lant, das was ir eigen, des mêrte sich ir schar.
Er sprach zuo den gesten: „Nû saget, waz welt ir mîn?
Ir wænet vride gewinnen. Daz kunde müelîch gesîn

2087

ûf schaden alsô grôzen, als ir mir habt getân.
Ir sult es niht geniezen, unde sol ich mîn leben hân.
Daz kint, daz ir mir sluoget, und vil der mâge mîn!
Vride unde suone sol iu vil gar versaget sîn.“

2088

Des antwurte Gunthêr: „Des twanc uns grôziu nôt.
Allez mîn gesinde lac vof dînen helden tôt
an der herberge. Wie hete ich daz versolt?
Ich kom zuo dir ûf triuwe: ich wânde, daz mir wærest holt.“

2089

Dô sprach von Burgonden Gîselhêr daz kint:
„Ir Etzelen helde, die noch hie lebende sint,
waz wîzet ir mir recken? Waz hân ich iu getân?
Wand ich vriuntlîche in diz lant geriten hân.“

2090

Si sprâchen: „Dîner güete ist al diu burc vol
mit jâmer zuo dem lande. Jâ gunden wir dir wol,
daz dû nie komen wærest von Wormez über Rîn!
Daz lant habt ir verweiset, dû und die bruoder dîn.“

2091

Dô sprach in zornes muote Gunthêr der degen:
„Welt ir diz starke hazzen ze einer suone legen
mit uns ellenden recken, deist beidenthalben guot.
Ez ist gar âne schulde, swaz uns Etzel getuot.“

2092

Dô sprach der wirt zen gesten: „Mîn und iuwer leit,
diu sint vil ungelîche. Diu michel arbeit,
des schaden zuo den schanden, die ich hie hân genomen,
des sol iuwer deheiner nimmêr lebende hinnen komen.“

2093

Dô sprach zuo dem künege der starke Gêrnôt:
„Sô sol iu got gebieten, daz ir vrümeclîchen tuot.
Slaht uns ellenden, und lât uns zuo ziu gân
hin nider an die wîte! Daz ist iu êre getân.

2094

Swaz us geschehen künne, daz lât kürzlîche ergân.
Ir habt sô vil gesunder, und türrens uns bestân,
daz si uns stürme müede lâzent niht genesen.
Wie lange suln wir recken in disen arbeiten wesen?“

2095

Die Etzelen recken, die hetenz nâch getân,
daz si si wolden lâzen für den palas gân.
Daz gehôrte Kriemhilt. Ez was ir harte leit.
Des wart den ellenden der vride ze gâhes verseit.

2096

„Neinâ, Hiunen recken! Des ir dâ habt muot,
ich rât an rehten triuwen, daz ir des niht entuot,
daz ir die mortræzen lâzet für den sal.
Sô müesen iuwer mâge lîden den tôtlîchen val.

2097

Ob ir nû niemen lebte, wan diu Uoten kint,
mîne edele bruoder, unde koment si an den wint,
erkuolent in die ringe, sô sît ir alle verlorn.
Ez enwurden küener degene nie zer werlde geborn.“

2098

Dô sprach der junge Gîselhêr: „Vil schœniu swester mîn,
des trûte ich vil übele, daz dû mich über Rîn
ladetes her ze lande in dise grôze nôt.
Wie hân ich an den Hiunen hie verdienet den tôt?

2099

Ich was dir ie getriuwe, nie getet ich dir leit.
Ûf sölchen gedingen ich her ze lande reit,
daz dû mir holt wærest, vil liebiu swester mîn.
Bedenke an uns genâde, ez mac niht anders nû gesîn!“

2100

„Ine mac iu niht genâden. Ungenâde ich hân.
Mir hât von Tronege Hagene sô grôziu leit getân.
Ez ist vil unversüenet, die wîle ich hân den lîp.
Ir müezet es alle engelten“, sprach dez Etzelen wîp.

2101

„Welt ir mir Hagenen einen her ze gîsel geben,
sône wil ich niht versprechen, ich welle iuch lâzen leben,
wande ir sît mîne bruoder unde einer muoter kint.
Sô rede ich ez nâch der suone mit disen helden, die hie sint.“

2102

„Nûne welle got von himele!“ sprach dô Gêrnôt,
„Ob unser tûsent wæren, wir lægen alle tôt,
der sippen dîner mâge, ê wir dir einen man
gæben hie ze gîsel. Ez wirt êt nimmêr getân.“

2103

„Wir müesen doch ersterben“, sprach dô Gîselhêr.
„Uns scheidet niemen von ritterlîcher wer.
Swer gerne mit uns vehte, wir sîn êt aber hie,
wande ich deheinen mînen vriunt an den triuwen nie verlie.“

2104

Dô sprach der küene Dancwart, im zæme niht ze dagene,
„Jâne stât niht eine mîn bruoder Hagene!
Die hie den vride versprechent, ez mac in werden leit.
Des bringe ich iuch wol innen, daz si iu wærlîch geseit.“

2105

Dô sprach diu küneginne: „Ir helde vil gemeit,
nû gât der stiege nâher, unde rechet mîniu leit.
Daz wil ich immer dienen, als ich von rehte sol.
Der Hagenen übermüete, der gelôn ich im wol.

2106

Lât einen ûz dem hûse niht komen über al!”
Si hiez vieren enden zünde an den sal.
„Sô werdent wol errochen elliu mîniu leit.“
Die Etzelen degene wurden schiere bereit.

2107

Die noch hie ûze stuonden, die tribens in den sal
mit slegen unde mit schüzzen. Des wart vil grôz der schal.
Doch wolden nie gescheiden die fürsten und ir man.
Sine kunden vor ir triuwen ein ander niht verlân.

2108

Den sal, den hiez dô zünden daz Etzelen wîp.
Dô quelte man den recken mit fiuwer dâ den lîp.
Daz hûs von einem winde vil balde allez bran.
Ich wæne, daz volc enheinez grôzer angest nie gewan.

2109

Genuoge ruoften drinne: „Ouwê dirre nôt!
Wir möhten michel gerner sîn in sturme tôt.
Ez möhte got erbarmen, wie sîn wir alle verlorn.
Nû richet ungefüege an uns diu küneginne ir zorn.“

2110

Ir einer sprach dar inne: „Wir müezen ligen tôt.
Waz hilfet uns daz grüezen, daz uns der künec enbôt?
Mir tuot von starker hitze der durst sô rehte wê.
Des wæn mîn leben schiere in disen sorgen zergê.“

2111

Dô sprach von Tronege Hagene: „Ir edel ritter guot,
swen twinge durstes nôt, der trinke hie daz bluot.
Daz ist in sölcher hitze bezzer danne wîn.
Ez enmac an disen zîten êt nû niht bezzer gesîn.“

2112

Dô gie der recken einer, dâ er einen tôten vant.
Er kniete im zuo den wunden. Den helm er ab gebant.
Dô begunde er trinken daz vliezende bluot.
Swie ungewon ers wære, ez dûhte in grœzlîche guot.

2113

„Nû lôn iu got, hêr Hagene!“ sprach der müede man,
„Daz ich von iuwer lêre sô wol getrunken hân.
Mir ist noch vil selten geschenket bezzer wîn.
Lebe ich deheine wîle, ich sol iu immer wæge sîn.“

2114

Dô die ander daz gehôrten, daz ez in dûhte guot,
dô wart ir michel mêre, die trunken ouch daz bluot.
Dâ von gewan vil krefte ir eteslîches lîp.
Des engalt an lieben vriunden sît vil manec wætlîch wîp.

2115

Daz fiuwer viel genôte ûf si in den sal.
Dô leiten siz mit schilden von in hin ze tal.
Der rouch und ouch die hitze in tâten beidiu wê.
Ich wæne, der jâmer immer mêr an helden ergê.

2116

Dô sprach von Tronege Hagene: „Stât zuo des sales want.
Lât niht die brende vallen ûf iuwer helmbant.
Tret si mit den füezen nider in daz bluot!
Ez ist ein übel hôchzît, die uns diu küneginne tuot.“

2117

In sus getânen leiden der naht in doch zeran.
Noch stuont vor dem hûse der küene spileman
unde Hagene sîn geselle, geleinet über rant.
Si warten schaden mêre von den ûz Etzelen lant.

2118

Dô sprach der videlære: „Nû gê wir in den sal!
Sô wænent des die Hiunen, daz wir sîn über al
tôt von dirre quâle, diu an uns ist getân.
Se sehent uns noch begegene in strîte ir etelîchen stân.“

2119

Dô sprach von Burgonden Gîselhêr daz kint:
„Ich wæn, ez tagen welle. Sich hebt ein küeler wint.
Nû lâz uns got von himele ein lieber zît geleben!
Uns hât mîn swester Kriemhilt ein arge hôchzît gegeben.“

2120

Dô sprach aber einer: „Ich kiuse nû den tac.
Sît daz ez uns nû bezzer wesen niht enmac,
sô wâfent ir iuch, helde! Gedenket an den lîp!
Jâ kumt uns aber schiere des künec Etzelen wîp!“

2121

Der wirt, der wolde wænen, die geste wæren tôt
von ir arbeite und von des fiuwers nôt.
Dô lebte ir noch dar inne sehs hundert küener man,
daz nie künec deheiner bezzer degene gewan.

2122

Der ellenden huote hete wol ersehen,
daz noch die geste lebten, swie vil in was geschehen
ze schaden und ze leide, den hêrren unde ir man.
Man sach si in dem gademe noch vil wol gesunde stân.

2123

Man sagete Kriemhilde, ir wære vil genesen.
Dô sprach diu küneginne: „Daz kunde nimmêr wesen,
daz ir deheiner lebte von des fiuwers nôt.
Ich wil des baz getrûwen, daz si alle ligen tot.“

2124

Noch genæsen gerne die fürsten und ir man,
ob noch iemen wolde genâde an in begân.
Diene kunden si niht vinden an den von Hiunen lant.
Dâ râchen si ir sterben mit vil werlîcher hant.

2125

Des tages wider morgen grüezen man in bôt
mit hertem urliuge. Des kômen helde in nôt.
Dô wart zuo zin geschozzen vil manec herter gêr.
Sich werten ritterlîchen die recken küene unde hêr.

2126

Dem Etzelen gesinde erweget was der muot,
daz si wolden daz Kriemhilde guot.
Dar zuo si wolden leisten, daz in der künec gebôt.
Des muose maneger schiere von in kiesen den tôt.

2127

Von geheize unde von gâbe man mohte wunder sagen.
Sie hiez golt daz rôte dar în mit schilde tragen.
Si gap ez, swere sîn ruochte und ez wolde enpfân.
Jâne wart nie grôzer solden mêr ûf vîande getân.

2128

Ein michel kraft der recken dar zuo gewâfent gie.
Dô sprach der küene Volkêr: „Wir sîn êt aber hie.
Ine gesach nie ûf vehten helde gerner komen,
die daz golt des küneges uns ze vâre hânt genomen.“

2129

Dô riefen dâ genuoge: „Nâher, helde, baz,
daz wir dâ suln verdienen, und tuon bezîte daz!
Hie belîbe niemen, wand der doch sterben sol.“
Dô sach man schiere ir schilde stecken gêre schüzze vol.

2130

Waz mac ich sagen mêre? Wol zwelf hundert man,
die versuochtenz vil sêre wider und dan.
Dô kuolten mit den wunden die geste wol ir muot.
Ez mohte niemen gescheiden. Des sach man vliezen daz bluot

2131

von verchtiefen wunden, der wart dâ vil geslagen.
Ieslîchen nâch sînen vriunden hôrte man sêre klagen.
Die biderben sturben alle dem rîchen künege hêr.
Des heten holde mâge nâch in grœzlîchiu sêr.

wie der marcgrâve Rüedegêr erslagen wart
{ 37 }
Wie Rüdiger erschlagen wurde.

2132

Ez heten die ellende wider morgen guot getân.
Wine der Gotelinde kom ze hove gegân.
Dô sach er beidenthalben diu grœzlîchen sêr.
Daz weinte inneclîchen der vil guote Rüedegêr.

2133

„Sô wê mir“, sprach der recke, „daz ich ie den lîp gewan.
Daz disen grôzen jâmer kan niemen understân!
Swie gerne ichz vriden wolde, der künec entuot es niht,
wande er der sînen leide ie mêr und mêr gesiht.“

2134

Dô sande an Dieterîchen der guote Rüedegêr,
ob siz noch kunden wenden an den künegen hêr.
Dô enbôt im der von Berne: „Wer möhte ez understân?
Ez enwil der künec Etzel niemen scheiden lân.“

2135

Dô sach ein Hiunen recke Rüedegêren stân
mit weinenden ougen, unde hete es vil getân.
Der sprach zer küneginne: „Nû seht ir, wie er stât,
der doch gewalt den meisten hie bî Etzelen hât,

2136

und dem allez dienet, liut unde lant!
Wie sô vil der bürge an Rüedegêr gewant,
der er von dem künege vil manege haben mac?
Er gesluoc in disen stürmen nie lobelîchen slac.

2137

Mich dunket, er enruoche, wie ez hie umbe gât,
sît êt er den vollen nâch sînem willen hât.
Man giht im, er sî küener danne iemen müge sîn.
Daz ist in disen sorge worden bôslîche schîn.“

2138

Mit trûrigem muote der vil getriuwe man,
den er daz reden hôrte, der helt, der blicte in an.
Er dâhte: „Dû solt ez erarnen. Dû gihest, ich sî verzaget.
Dû hâst disiu mære ze hove ze lûte gesaget.“

2139

Die fûst begunde er twingen. Dô lief er in an
unde sluoc sô kreftlîche den hiunischen man,
daz er im vor den füezen lac vil schiere tôt.
Dô was aber gemêret des künec Etzelen nôt.

2140

„Hin, dû zage mære!“, sprach dô Rüedegêr.
„Ich hân doch genuoge leit unde sêr.
Daz ich hie niht envihte, zwiu wîzest dû mir daz?
Jâ wære ich den gesten von grôzen schulden gehaz,

2141

unde allez, daz ich möhte, hete ich in getân,
niuwan daz ich die recken her gefüeret hân.
Jâ was ich ir geleite in mînes hêrren lant!
Des ensol mit in niht strîten mîn vil ellendes hant.“

2142

Dô sprach ze dem marcgrâven Etzel, der künec hêr:
„Wie habt ir uns geholfen, vil edel Rüedegêr?
Wand wir sô vil der veigen hie ze lande hân,
wir bedorften ir niht mêre. Ir habt vil übele getân.“

2143

Dô sprach der ritter edele: „Dâ beswærete er mir den muot,
unde hât mir geitewîzet êre unde guot,
des ich von dînen handen hân sô vil genomen.
Daz ist dem lugenære ein teil unstetelîche komen.“

2144

Dô kom diu küneginne, unde hete ez ouch gesehen,
daz von des heldes zorne dem Hiunen was geschehen.
Si klagete ez ungefuoge. Ir ougen wurden naz.
Si sprach ze Rüedegêre: „Wie habe wir verdienet daz,

2145

daz ir mir und dem künege mêret unser leit?
Nû habt ir uns, edel Rüedegêr, allez her geseit,
ir woldet durch uns wâgen die êre und ouch daz leben.
Ich hôrte iu vil der recken den prîs vil grœzlîchen geben.

2146

Ich man iuch der genâden, und ir mir habt gesworn,
dô ir mir ze Etzelen rietet, ritter ûz erkorn,
daz ir mir woldet dienen an unser eines tôt.
Des wart mir armem wîbe nie sô grœzlîche nôt.“

2147

„Daz ist âne lougen, ich swuor iu, edel wîp,
daz ich durch iuch wâgete êre unde ouch den lîp.
Daz ich die sêle verliese, des enhân ich niht gesworn.
Zuo dirre hôchgezîte bat ich die fürsten wol geborn.“

2148

Si sprach: „Gedenke, Rüedegêr, der grôzen triuwe dîn,
der stæte und ouch der eide, daz dû den schaden mîn,
immer woldest rechen und elliu mîniu leit.“
Dô sprach der marcgrâve: „Ich hân iu selten verseit.“

2149

Etzel der vil rîche vlêgen ouch began.
Dô buten si sich ze füezen beide für den man.
Den edelen marcgrâven unmuotes man dô sach.
Der vil getriuwe recke harte jæmerlîchen sprach:

2150

„Ouwê mir gotes armem, daz ich ie ditze gelebet hân!
Aller mîner êren, der muoz ich abe stân,
triuwen unde zühte, der got an mir gebôt.
Ouwê got von himele, daz mich es niht wendet der tôt!

2151

Swelchez ich nû lâze und daz ander begân,
sô hân ich bôslîche unde vil übele getân.
Lâze aber ich si beide, mich schiltet elliu diet.
Nû geruoche mich bewîsen, der mir ze lebene geriet.“

2152

Dô bâten si in genôte, der künec und ouch sîn wîp.
Des muosen sider recken verliesen den lîp
vor Rüedegêres hende, dâ ouch der helt erstarp.
Ir müget daz hie wol hœren, daz er vil jæmerlîchen warp.

2153

Er wiste schaden gewinnen und ungefüegiu leit.
Er hete dem künege vil gerne verseit
und ouch der küneginne. Vil sêre vorhte er daz,
ob er ir einen slüege, daz im diu werlt würde gehaz.

2154

Dô sprach zuo dem künege der vil küene man:
„Hêr künec, nû nemt hin widere al daz ich von iu hân!
Daz lant mit den bürgen, der sol mir niht bestân.
Ich wil ûf mînen füezen in daz ellende gân.“

2155

Dô sprach der künec Etzel: „Wer hülfe danne mir?
Daz lant zuo den liuten, daz gip ich allez dir,
daz dû mich rechest, Rüedegêr, an den vîanden mîn.
Dû solt ein künec gewaltec beneben Etzelen sîn.“

2156

Dô sprach aber Rüedegêr: „Wie sol ichz ane vân?
Heim zuo mînem hûse ich si geladen hân.
Trinken und spîse ich in güetlîchen bôt
und gap in mîne gâbe. Wie sol ich râten in den tôt?

2157

Die liute wænent lîhte, daz ich sî verzaget.
Deheinen mînen dienest hân ich in versaget,
den vil edelen fürsten und den iren man.
Ouch riuwet mich diu vriuntschaft, die ich mit in geworben hân.

2158

Gîselhêr dem degene gap ich die tohter mîn.
Sine kunde in dirre werlde niht baz verwendet sîn
ûf zuht unde ûf êre, ûf triuwe unde ouch ûf guot.
Inde gesach nie künec sô jungen sô tugentlîch gemuot.“

2159

Dô sprach aber Kriemhilt: „Vil edel Rüedegêr,
nû lâ dich erbarmen unser beider sêr,
mîn unde ouch des küneges. Gedenke wol dar an,
daz nie wirt deheiner sô leide geste gewan!“

2160

Dô sprach der marcgrâve wider daz edel wîp:
„Ez muoz hiute gelten der Rüedegêres lîp,
swaz ir und ouch mîn hêrre mir liebes habt getân.
Dar umbe muoz ich ersterben. Daz mac niht langer gestân.

2161

Ich weiz wol, daz noch hiute mîne bürge unde mîniu lant
iu müezen ledec werden von ir etelîches hant.
Ich bevilhe iu ûf genâde mîn wîp unde mîniu kint
und ouch die vil ellenden, die dâ ze Bechelâren sint.“

2162

„Nû lôn dir got, Rüedegêr!“ sprach der künec dô.
Er und diu küneginne, si wurden beide vrô.
„Uns suln dîne liute vil wol bevolhen wesen.
Wol trûwe ich mînem heile: Dû maht selbe genesen.“

2163

Nû liez er an die wâge sêle und lîp.
Dô begunde weinen daz Etzelen wîp.
Er sprach: „Ich muoz iu leisten, als ich gelobt hân.
Ouwê der mînen vriunde, die ich vil ungerne bestân!“

2164

Man sach in von dem künege vil trûreclîchen gân.
Dô vant er sîne recken vil nâhen vor im stân.
Er sprach: „Ir sult iuch wâfen, alle mîne man.
Die küenen Burgonden, die muoz ich leider bestân.“

2165

Si hiezen balde springen, dâ man ir gewæfen vant.
Ez der helm wære oder des schildes rant,
von ir ingesinde wart ez dar getragen.
Sît hôrten leidiu mære die stolzen ellenden sagen.

2166

Gewâfent wart dô Rüedegêr mit fünf hundert man.
Dar über zwelf recken ze helfe er dô gewan,
die wolden prîs erwerben in des sturmes nôt.
Sine wessen niht des, daz in sô nâhete der tôt.

2167

Dô sach man Rüedegêren under helme gân.
Ez truogen swert diu scharpfen die Rüedegêres man,
dar zuo vor ir handen die liehten schilde breit.
Daz sach der videlære. Ez was im grœzlîche leit.

2168

Dô sach der junge Gîselhêr sînen sweher gân
mit ûf gebundem helme. Wie möhte er dô verstân,
waz er dâ meinte, niuwan allez guot?
Des wart der künec edele sô rehte vrœlîch gemuot.

2169

„Nû wol mich sölcher vriunde!“ sprach Gîselhêr der degen,
„die wir han gewunnen ûf disen wegen.
Wir suln mînes wîbes vil wol geniezen hie.
Mir ist liep, ûf mîne triuwe, daz ie diu hîrât ergie.“

2170

„Ine weiz, wes ir iuch trœstet, sprach dô der spilman.
„Wâ gesâhet ir ie durch suone sô manegen helt gân
mit ûf gebunden helmen, die trüegen swert enhant?
An uns wil dienen Rüedegêr sîne bürge und sîniu lant.“

2171

Bedaz der videlære die rede vol gesprach,
Rüedegêren den edelen man vor dem hûse sach.
Sînen schilt den guoten satzte er für den fuoz.
Dô muose er sînen vriunden versagen dienest und gruoz.

2172

Der edel marcgrâve rief in den sal:
„Ir küenen Nibelunge, nû wert iuch über al!
Ir soldet mîn geniezen, nû engeltet ir mîn.
Ê dô wâren wir vriunde. Der triuwen wil ich ledec sîn.“

2173

Dô erschracten dirre mære die nôthaften man,
wande ir deheiner vröuden dâ von niht gewan,
daz mit in wolde strîten, dem si dâ wâren holt.
Si heten von ir vîanden michel arbeit gedolt.

2174

„Nûne welle got von himele“, sprach Gunthêr der degen,
„daz ir iuch genâden sult an uns bewegen
und der vil grôzen triuwe, der wir doch heten muot!
Ich wil iu des getrûwen, daz ir ez nimmêr getuot.“

2175

„Jâne mac ich es niht gelâzen!“ sprach dô der küene man,
„Ich muoz mit iu strîten, wand ich ez gelobt hân.
Nû wert iuch, küenen helde, sô liep iu sî der lîp!
Mich enwolde es niht erlâzen des künec Etzelen wîp.“

2176

„Ir widersaget uns nû ze spâte“, sprach dô der künec hêr.
„Nû müeze iu got vergelten, vil edel Rüedegêr,
triuwe unde minne, die ir uns habt getân,
ob ir ez an dem ende woldet güetlîcher lân.

2177

Wir soldenz immer dienen, daz ir uns habt gegeben,
ich unde mîne mâge, ob ir uns liezet leben.
Der hêrlîchen gâbe, dô ir uns brâhtet her
in Etzelen lant mit triuwen, des denket, edel Rüedegêr!“

2178

„Wie wol ich iu des gunde“, sprach Rüedegêr der degen,
„Daz ich iu mîne gâbe mit vollen solde geben
alsô willeclîchen, als ich des hete wân!
Sône würde mir dar umbe nimmêr schelten getân.“

2179

„Erwindet, edel Rüedegêr“, sprach dô Gêrnôt,
„wand ez wirt deheiner gesten nie erbôt
sô rehte minneclîchen, sô ir uns habt getân.
Des sult ir wol geniezen, ob wir bî lebene bestân!“

2180

„Daz wolde got“, sprach Rüedegêr, „vil edel Gêrnôt,
„daz ir ze Rîne wæret, unde ich wære tôt
mit etelîchen êren, sît ich iuch sol bestân!
Ez enwart noch nie an helden wirs von vriunden getân.

2181

„Nû lôn iu got, hêr Rüedegêr“, sprach aber Gêrnôt,
„der vil rîchen gâbe! Mich riuwet iuwer tôt,
sol an iu verderben sô tugentlîcher muot.
Hie trage ich iuwer wâfen, daz ir mir gâbet, helt guot.

2182

Daz ist mir nie geswichen in aller dirre nôt.
Under sîner ecken lît manec ritter tôt.
Ez ist lûter unde stæte, hêrlîch und guot.
Ich wæne, sô rîcher gâbe ein recke nimmêr mêr getuot.

2183

Unde welt ir niht erwinden, ir enwelt zuo zuns gân,
slaht ir mir iht der vriunde, die ich noch hinne hân,
mit iuwer selbes swerte nim ich iu den lîp!
Sô riuwet ir mich, Rüedegêr, unde iuwer hêrlîch wîp.“

2184

„Daz wolde got, hêr Gêrnôt! Unde möhte daz ergân,
daz aller iuwer wille wære hie getân.
und daz genesen wære iuwerer vriunde lîp!
Jâ sol iu wol getrûwen beide mîn tohter under mîn wîp!“

2185

Dô sprach von Burgonden der schœnen Uoten kint:
„Wie tuot ir sô, hêr Rüedegêr? Die mit mir komen sint,
die sint iu alle wæge. Ir grîfet übel zuo.
Die iuwern schœnen tohter welt ir verwitwen ze vruo.

2186

Swenne ir und iuwer recken mit strîte mich bestât,
wie rehte unvriuntlîche ir daz schînen lât,
daz ich iu wol getrûwe für alle ander man,
dâ von ich zeinem wîbe iuwer tohter mir gewan!“

2187

„Gedenket iuwer triuwe, vil edel künec hêr,
gesende iuch got von hinnen“, sô sprach Rüedegêr.
„Lât die juncvrouwen niht engelten mîn.
Durch iuwer selbes tugende, sô ruochet ir genædec sîn!“

2188

„Daz tæte ich billîchen“, sprach Gîselhêr daz kint.
„Die hôhen mîne mâge, die noch hier inne sint,
suln die vor iu ersterben, sô muoz gescheiden sîn
diu vil stæte vriuntschaft zuo dir und ouch der tohter dîn.“

2189

„Nû müeze uns got genâden!“ sprach der küene man.
Dô huoben si die schilde, alsô si wolden dan
strîten zuo den gesten in Kriemhilde sal.
Dô rief vil lûte Hagene von der stiegen her ze tal:

2190

„Belîbet eine wîle, vil edel Rüedegêr!“
Alsô sprach dô Hagene, „Wir wolden reden mêr,
ich und mîne hêrren, als uns des twinget nôt.
Waz mac gehelfen Etzelen unser ellenden tôt?“

2191

„Ich stân in grôzen sorgen“, sprach aber Hagene,
„den schilt, den mir gap vrou Gotelint ze tragene,
den habent mir die Hiunen zerhouwen vor der hant.
Ich fuorte in vriuntlîche in daz Etzelen lant.

2192

Daz des got von himele geruochen wolde,
daz ich schilt sô guoten noch tragen solde,
sô den dû hâst vor hende, vil edel Rüedegêr!
Sô bedorfte ich in den stürmen deheiner halsperge mêr.“

2193

„Vil gerne ich dir wære guot mit mînem schilde,
torste ich dirn bieten vor Kriemhilde.
Doch nim dû in hin, Hagene, und trag in an der hant.
Hey, soldestû in füeren heim in der Burgonden lant!“

2194

Dô er im sô willeclîchen den schilt ze gebene bôt,
dô wart genuoger ougen von heizen trehen rôt.
Ez was diu leste gâbe, die sît immer mêr
gebôt deheinem degene von Bechelâren Rüedegêr.

2195

Swie grimme Hagene wære und swie herte gemuot,
jâ erbarmte im diu gâbe, die der helt guot
bî sînen lesten zîten sô nâhen hete getân.
Vil manec ritter edele mit im trûren began.

2196

„Nû lôn iu got von himele, vil edel Rüedegêr!
Ez wirt iuwer gelîchen deheiner nimmêr mêr,
der ellenden recken sô hêrlîche gebe.
Got sol daz gebieten, daz iuwer tugent immer lebe.

2197

Sô wê mir dirre mære!“ sprach aber Hagene,
„Wir heten ander swære sô vil ze tragene,
suln wir mit vriunden strîten, daz sî got gekleit.“
Dô sprach der marcgrâve: „Daz ist mir inneclîchen leit.“

2198

„Nû lôn iu got der gâbe, vil edel Rüedegêr!
Swie halt gein iu gebâren dise recken hêr,
daz nimmêr iuch gerüeret in strîte hie mîn hant,
ob ir si alle slüeget, die von Burgonden lant.“

2199

Des neic im mit zühten der guote Rüedegêr.
Si weinten allenthalben, daz disiu herzen sêr
niemen gescheiden kunde. Daz was ein michel nôt.
Vater maneger tugende lac an Rüedegêren tôt.

2200

Dô sprach von dem hûse Volkêr der spilman:
„Sît mîn geselle Hagene den vride hât getân,
den sult ouch ir stæte haben von mîner hant.
Daz habt ir wol verdienet, dô wir kômen in daz lant.

2201

Vil edel marcgrâve, ir sult mîn bote sîn:
dise rôten bouge gap mir diu marcgrâvîn,
daz ich si tragen solde hie zer hôchgezît.
Die müget ir selbe schouwen, daz ir mîn geziuc des sît.“

2202

„Daz wolde got von himele“, sprach dô Rüedegêr,
„daz iu diu marcgrâvinne noch solde geben mêr!
Diu mære sag ich gerne der triutinne mîn,
gesihe ich si gesunde. Des müget ir âne zwîvel sîn.“

2203

Als er im daz gelobte, den schilt huop Rüedegêr.
Des muotes er ertobete. Dône beit er dâ niht mêr.
Dô lief er zuo den gesten einem degen gelîch.
Manegen slac vil swinden sluoc der marcgrâve rîch.

2204

Die zwêne stuonden hôher, Volkêr und Hagene,
wand ez im ê gelobten die küene degene.
Noch vant er alsô küenen bî den türen stân,
daz Rüedegêr des strîtes mit grôzen sorgen began.

2205

Durch mortrâchen willen sô liezen in dar în
Gunthêr und Gêrnôt. Si heten helde sin.
Dô stuont ûf hôher Gîselhêr. Ze wâre ez was im leit.
Er versach sich noch des lebenes, dar umb er Rüedegêren meit.

2206

Dô sprungen zuo den vîanden des marcgrâven man.
Man sach si nâch ir hêrren vil degenlîche gân.
Diu snîdenden wâfen si truogen an der hant.
Des brast dâ vil der helme und manec hêrlîcher rant.

2207

Dô sluogen die vil müeden manegen herten slac
den von Bechelâren, der eben und tiefe wac,
durch die liehten ringe vaste unz ûf daz verch.
Si tâten in dem sturme diu vil hêrlîchen werc.

2208

Daz edel ingesinde was nû komen gar dar în.
Volkêr und Hagene, die sprungen balde hin.
Sine gâben vride niemen wan dem einem man.
Von ir beider handen daz bluot durch helme nider ran.

2209

Wie rehte grimmeclîchen vil manec swert dar inne erklanc!
Vil der schilde spangen ûz den slegen spranc.
Des reis ir schiltgesteine verhouwen in daz bluot.
Si vâhten alsô grimme, daz man ez nimmêr mêr getuot.

2210

Der vogt von Bechelâren gie wider und dan,
alsô der mit ellen in sturme werben kan.
Dem tet des tages Rüedegêr harte wol gelîch,
daz er ein recke wære vil küene und ouch vil lobelîch.

2211

Hie stuonden dise recken, Gunthêr unde Gêrnôt.
Si sluogen in dem sturme vil manegen helt tôt.
Gîselhêr und Dancwart, die zwên ez ringe wac.
Des vrumten si vil manegen unz ûf ir jungesten tac.

2212

Vil wol zeigete Rüedegêr, daz er was starc genuoc,
küene unde wol gewâfent. Hey, waz er helde sluoc!
Daz sach ein Burgonde. Zornes gie im nôt.
Dâ von begunde nâhen des edelen Rüedegêres tôt.

2213

Gêrnôt der starke, den helt ruofte er an.
Er sprach zem marcgrâven: „Ir welt mir mîner man
niht genesen lâzen, vil edel Rüedegêr.
Daz müet mich âne mâze. Ich enkans niht angesehen mêr.

2214

Nû mac iu iuwer gâbe wol ze schaden komen,
sît ir mir mîner vriunde habt sô vil genomen.
Nû wendet iuch her umbe, vil edel küene man!
Iuwer gâbe wirt verdienet, sô ich aller beste kan.“

2215

Ê daz der marcgrâve zuo zim vol kom dar,
des muosen liehte ringe werden missevar.
Dô sprungen zuo ein ander die êre gernde man.
Ir ietwederer schermen für starke wunden began.

2216

Ir swert sô scherpfe wâren, ez enkunde niht gewegen.
Dô sluoc Gêrnôten Rüedegêr der degen
durch helm vlinsherten, daz nider vlôz daz bluot.
Daz vergalt im schiere der ritter küene und guot.

2217

Die Rüedegêres gâbe an hende er hôhe wac.
Swie wunt er zem tôde wære, er sluoc im einen slac
durch den schilt vil guoten unz ûf diu helmgespan.
Dâ von sô muose ersterben der schœnen Gotelinde man.

2218

Jâne wart nie wirs gelônet sô rîcher gâbe mêr.
Dô vielen beide erslagene, Gêrnôt und Rüedegêr,
gelîche in dem sturme von ir beider hant.
Aller êrst erzurnde Hagene, dô er den grôzen schaden vant.

2219

Dô sprach der helt von Tronege: „Ez ist uns übel komen.
Wir haben an in beiden sô grôzen schaden genomen,
den nimmer überwindent ir liute und ouch ir lant.
Die Rüedegêres helde sint unser ellenden pfant.“

2220

„Ouwê mînes bruoder, der tôt ist hie gevrumt!
Waz mir der leiden mære zallen zîten kumt!
Ouch muoz mich immer riuwen der edel Rüedegêr.
Der schade ist beidenthalben, und diu vil grœzlîchen sêr.“

2221

Dô Gîselhêr der hêrre sach sînen sweher tôt,
die dô dar inne wâren, die muosen lîden nôt.
Der tôt der suochte sêre, dâ sîn gesinde was.
Der von Bechelâren dô langer einer niht genas.

2222

Dô Gunthêr unde Gîselhêr, und ouch Hagene,
Dancwart unde Volkêr, die guoten degene,
die giengen, dâ si funden ligen die zwêne man,
dô wart dâ von den helden mit jâmer weinen getân.

2223

„Der tôt uns sêre roubet“, sprach Gîselhêr daz kint.
„Nû lâzet iuwer weinen, und gê wir an den wint,
daz uns die ringe erküelen, uns strîtmüeden man.
Jâ wæn uns got von himele niht lenger hie ze lebene gan!“

2224

Den sitzen, disen leinen, sach man manegen degen.
Si wâren aber müezec. Dâ wâren tôt gelegen
die Rüedegêres helde. Vergangen was der dôz.
Sô lange werte diu stille, daz sîn Etzelen verdrôz.

2225

„Ouwê dirre dieneste!“ sprach des küneges wîp,
„Diene sint sô stæte, daz vîande lîp
müge des engelten von Rüedegêres hant.
er wil si wider bringen in der Burgonden lant.

2226

Waz hilfet, künec Etzel, daz wir geteilet hân
mit im, swaz er wolde? Der helt hât missetân.
Der uns dâ solde rechen, der wil der suone pflegen.“
Des antwurte Volkêr, der vil zierlîche degen:

2227

„Der rede enist niht sô, leider, vil edel küneges wîp.
Getorste ich heizen liegen alsus edelen lîp,
sô het ir tiuvellîchen an Rüedegêren gelogen.
Er und die sînen degene sint an der suone gar betrogen.

2228

Er tet sô volleclîche, daz im der künec gebôt,
daz er unde sîn gesinde ist hie gelegen tôt.
Nû sehet alumbe, Kriemhilt, wem ir gebieten welt.
Iu hât unz ûf den ende gedienet Rüedegêr der helt.

2229

Welt ir des niht gelouben, man solz sehen lân.“
Durch ir herzen leide, sô wart dô daz getân:
man truoc den helt verhouwen, dâ in der künec sach.
Den Etzelen degenen sô rehte leide nie geschach.

2230

Dô si den marcgrâven sâhen tôten tragen,
ez enkunde dehein schrîbære gebrieven noch gesagen
die manege ungebære von wîbe unde ouch von man,
diu sich von herzen jâmer aldâ zeigen began.

2231

Der Etzelen jâmer wart alsô grôz,
als eines lewen stimme der rîche künec erdôz
mit herezeleiden wuofe. Alsam tet ouch sîn wîp.
Si klageten ungefuoge des guoten Rüedegêres lîp.

wie hêrn Dietrîches man alle erslagen wurden
{ 38 }
Wie Dietrichs Recken alle erschlagen wurden.

2232

Dô hôrte man allenthalben jâmer alsô grôz,
daz palas und türne von dem wuofe erdôz.
Dô hôrte ez ouch von Berne ein Dieterîches man.
Durch disiu starken mære wie balde er gâhen began!

2233

Dô sprach er zuo dem fürsten: „Hœrt, mîn hêr Dieterîch,
swaz ich noch her gelebt hân, sô rehte unmügelîch
gehôrte ich klage nie mêre, als ich nû hân vernomen.
Ich wæn, der künec Etzel ist selbe zuo dem schaden komen.

2234

Wie möhtens anders alle haben sölchen muot?
Der künec oder Kriemhilt: ir einez, daz ist tôt
von den küenen gesten durch ir nît gelegen.
Ez weinet ungefuoge vil manec zierlîcher degen.“

2235

Dô sprach der helt von Berne: „Mîne vil lieben man,
nû gâhet niht ze sêre! Swaz hie hânt getân
die ellenden recken, des gât in michel nôt,
unde lât si des geniezen, daz ich in mînen vride enbôt!“

2236

Dô sprach der küene Wolfhart: „Ich wil dar gân
unde wil vrâgen der mære, waz si hânt getân
und wilz iu sagen danne, vil lieber hêrre mîn,
als ich ez dort ervinde, waz diu klage müge sîn.“

2237

Dô sprach der hêrre Dieterîch: „Swâ man zornes sich versiht,
ob ungefüege vrâge danne dâ geschiht,
daz betrüebet lîhte den guoten recken ir vil hôhen muot.
Jâne wil ich niht, Wolfhart, daz ir die vrâge gein in tuot!“

2238

Dô bat er Helpfrîchen vil balde dar gân
und hiez in daz ervinden an Etzelen man,
oder an den gesten selben, waz wære dâ geschehen.
Dône hete man von liuten sô grôzen jâmer nie gesehen.

2239

Der bote begunde vrâgen: „Waz ist hie getân?“
Dô sprach einer drunder: „Dâ ist vil gar zergân,
swaz wir vröuden heten in der Hiunen lant.
Hie lît erslagen Rüedegêr von der Burgonden hant.

2240

Die mit im dar în kômen, der ist einer niht genesen.“
Dône kunde Helpfrîche nimmêr leider wesen.
Jâne gesagete er mære sô rehte ungerne nie.
Der bote zuo Dieterîche vil sêre weinende gie.

2241

„Waz habt ir uns erfunden?“ sprach dô Dieterîch,
„Wie weinet ir sô sêre, degen Helpfrîch?“
Dô sprach der edele recke: „Ich mac wol balde klagen.
Den guoten Rüedegêren hânt die Burgonde erslagen.“

2242

Dô sprach der helt von Berne: „Daz ensol niht wellen got!
Daz wære ein starkiu râche unde ouch des tiuvels spot.
Wâ mit hete Rüedegêr an in daz versolt?
Jâ ist mir daz wol künde, er ist den ellenden holt!“

2243

Des antwurte Wolfhart: „Unde heten siz getân,
sô solt ez in allen an ir leben gân.
Ob wirz in vertrüegen, des wære wir geschant.
Jâ hât uns vil gedienet des guoten Rüedegêres hant!“

2244

Der vogt der Amelunge hiez ez ervinden baz.
Vil harte senelîche er in ein venster saz.
Dô bat er Hildebranden zuo den gesten gân,
daz er an in erfünde, waz dâ wære getân.

2245

Der sturmküene recke, meister Hildebrant,
weder schilt noch wâfen truoc er an der hant.
Er wolde in sînen zühten zuo den gesten gân.
Von sîner swester kinde wart im ein strâfen getân.

2246

Dô sprach der grimme Wolfhart: „Welt ir dar blôzer gân,
sô mac ez an ein schelten nimmêr wol gestân.
Sô müezet ir lasterlîchen tuon die widervart.
Kumt ir dar gewâfent, daz etelîcher wol bewart.“

2247

Dô garte sich der wîse durch des tumben rât.
Ê daz ers innen würde, dô wâren in ir wât
alle Dieterîches recken und truogen swert enhant.
Dem helde was leide. Vil gerne hete erz erwant.

2248

Er vrâgte, war si wolden. „Wir wellen mir iu dar.
Waz, ob von Tronege Hagene deste wirs getar
gein iu mit spotte sprechen, des er wol kan pflegen?“
Dô er daz gehôrte, dâ von gestatte es in der degen.

2249

Dô sach der küene Volkêr wol gewâfent gân
die recken von Berne, die Dieterîches man,
begürtet mit den swerten. Si truogen schilt enhant.
Er sagete ez sînem hêrren ûzer Burgonden lant.

2250

Dô sprach der videlære: „Ich sihe dort her gân
sô rehte vîentlîche, die Dieterîches man,
gewâfent under helme. Si wellent uns bestân.
Ich wæn, ez an daz übele welle uns ellenden gân.“

2251

In den selben zîten kom ouch Hildebrant.
Dô satzte er für die füeze sînes schildes rant.
Er begunde vrâgen die Gunthêres man:
„Ouwê, ir guoten helde, waz hete iu Rüedegêr getân?

2252

Mich hât mîn hêrre Dieterîch her zuo ziu gesant.
Ob erslagen hete iuwer deheines hant
den edelen marcgrâven, als uns daz ist geseit,
wir enkunden überwinden niht diu grœzlîchen leit.“

2253

Dô sprach von Tronege Hagene: „Daz mære ist ungelogen,
wie wol ich iu des gunde, hete iuch der bote betrogen,
durch Rüedegêres liebe, daz noch lebte sîn lîp,
den immer mugen weinen beide man und ouch diu wîp.“

2254

Dô si daz rehte erhôrten, daz er wære tôt,
dô klageten in die recken. Ir triuwe in daz gebôt.
Den Dieterîches recken sach man trehene gân
über berte unde über kinne. In was vil leide getân.

2255

Der herzoge von Berne, Sigestap, dô sprach:
„Nû hât gar ein ende genomen der gemach,
den uns ie gefüegete Rüedegêr nâch unser leide tagen.
Vröude ellender diete lît an Rüedegêr erslagen.“

2256

Dô sprach von Amelungen der degen Wolfwîn:
„Und ob ich hiute sæhe tôt den vater mîn,
mir enwurde nimmêr leider danne umbe sînen lîp.
Ouwê, wer sol nû trœsten des edelen marcgrâven wîp?“

2257

Dô sprach in zornes muote der degen Wolfhart:
„Wer wîset nû die recken sô manege herevart,
alsô der marcgrâve vil dicke hât getân?
Ouwê, vil edel Rüedegêr, daz wir dich sus verlorn hân!“

2258

Wolfprant und Helpfrîch und ouch Helmnôt
mit allen ir vriunden klagten sînen tôt.
Vor sûfte mohte vrâgen niht mêre Hildebrant.
Er sprach: „Nû tuot, ir degene, dar nâch mîn hêrre hât gesant:

2259

Gebt uns Rüedegêren alsô tôten ûz dem sal,
an dem gar mit jâmer lît unser vröuden val!
Lât uns an im dienen, daz er ie hât begân
an uns vil grôze triuwe und an manegem andern man.

2260

Wir sîn ouch ellende, als Rüedegêr der degen.
Wes lâzet ir uns bîten? Lât in uns after wegen
tragen, daz wir nâch tôde lônen noch dem man.
Wir hetenz billîche bî sînem lebene getân.“

2261

Dô sprach der künec Gunthêr: „Nie dienest wart sô guot,
sô den ein vriunt vriunde nâch dem tôde tuot.
Daz heiz ich stæte triuwe, der die kan begân.
Ir lônet im nâch schulden. Er hât iu liebes vil getân.“

2262

„Wie lange suln wir vlêgen?“ sprach Wolfhart der degen.
„Sît unser trôst der beste von iu ist tôt gelegen,
und wir sîn leider mêre mügen niht gehaben,
lât in uns hinnen tragen, daz wir den recken begraben!“

2263

Des antwurte Volkêr: „Niemen in iu gît.
Nemt in in dem hûse, dâ der degen lît
mit starc verchwunden, gevallen in daz bluot!
Sô ist ez ein voller dienest, den ir Rüedegêren tuot.“

2264

Dô sprach der küene Wolfhart: „Got weiz, hêr spilman,
ir endürfet uns niht reizen. Ir habt uns leit getân.
Getorste ich vor mînem hêrren, sô kœmen irs in nôt.
Des müezen wirz lâzen, wand er uns strîten hie verbôt.“

2265

Dô sprach der videlære: „Der vorhte ist gar ze vil,
swaz man im verbiutet, der ez allez lâzen wil.
Daz kan ich niht geheizen rehten heldes muot.“
Diu rede dûhte Hagenen von sînem hergesellen guot.

2266

„Des enlât iuch niht belangen!“ sprach aber Wolfhart.
„Ich entrihte iu sô die seiten, swenne ir die widervart
rîtet gein dem Rîne, daz ir ez wol muget sagen.
Iuwer übermüeten mac ich mit êren niht vertragen!“

2267

Dô sprach der videlære: „Swenne ir die seiten mîn
verirret guoter dœne, der iuwer helmes schîn,
der muoz vil trüebe werden von der mînen hant,
swie halt ich gerîte in der Burgonden lant.“

2268

Dô wolde er zuo zim springen, wande daz in niht enlie
Hildebrant. Sîn œheim in vaste zim gevie:
„Ich wæne, dû woldest toben durch den tumben zorn.
Mînes hêrren hulde hetes dû immer mêr verlorn.“

2269

„Lât abe den lewen, meister! Er ist sô grimme gemuot.
Kumt aber er mir zen handen“, sprach Volkêr, der degen guot,
„hete er die werlt alle mit sîner hant erslagen,
ich slahe in, daz erz widerspel nimmêr mêr darf gesagen.“

2270

Des wart vil harte erzürnet der Bernære muot.
Den schilt gezucte Wolfhart, ein sneller degen guot.
Alsam ein lew wilder lief er vor in dan.
Im wart ein gâhez volgen von sînen vriunden getân.

2271

Swie wîter sprünge er pflæge für des sales want,
doch ergâhte in vor der stiege der alte Hildebrant.
Er enwolde in vor im lâzen niht komen in den strît.
Si funden, daz si suochten, an den ellenden sît.

2272

Dô gespranc zuo Hagenen meister Hildebrant.
Diu swert man hôrte erklingen an ir beider hant.
Si wâren sêre erzürnet, daz mohte man kiesen sint.
Von ir zweier swerten gie fiuwer rôter wint.

2273

Die wurden dô gescheiden in des sturmes nôt.
Daz tâten die von Berne, als in ir kraft gebôt.
Zehant dô wante Hildebrant von Hagenen wider dan.
Dô lief der starke Wolfhart den küenen Volkêren an.

2274

Er sluoc den videlære ûf den helm guot,
daz des swertes ecke unz an die spangen wuot.
Daz vergalt mit ellen der küene spilman.
Dô sluoc er Wolfharten, daz er stieben began.

2275

Des fiuwers ûz den ringen hiuwen si genuoc.
Haz ir iegelîcher dem andern dâ truoc.
Die schiet dô von Berne der degen Wolfwîn.
Ob ez ein helt niht wære, des enkunde niht gesîn.

2276

Gunthêr der recke mit vil willeger hant
enpfie die helde mære von Amelunge lant.
Gîselhêr der hêrre, diu liehten helmvaz,
der vrumte er dâ vil manegez von bluote rôt unde naz.

2277

Dancwart, Hagenen bruoder, was ein grimmec man.
Swaz er dâ vor hete in strîte ie getân
den Etzelen recken, daz was gar ein wint.
Nû vaht vil tobelîche des küenen Aldrîânes kint.

2278

Ritschart unde Gêrbart, Helpfrîch unde Wîchart,
die heten in manegen stürmen vil selten sich gespart.
Des brâhten si wol innen die Gunthêres man.
Dô sach man Wolfpranden in strîte hêrlîche gân.

2279

Dô vaht, alsam er wuote, der alte Hildebrant.
Vil der guoten recken vor Wolfhartes hant
mit tôde muosen vallen von swerten in daz bluot.
Sus râchen Rüedegêren die recken küene unde guot.

2280

Dô vaht der hêrre Sigestap, als im sîn ellen riet.
Hey, waz er in dem strîte guoter helme verschriet
den sînen vîanden, Dieterîches swester sun!
Er enkunde in dem sturme nimmêr bezzers niht getuon.

2281

Volkêr der starke, dô er daz ersach,
daz Sigestap der küene den bluotegen bach
hiu ûzer herten ringen, daz was dem helde zorn.
Er spranc im hin engegene. Dô hete Sigestap verlorn

2282

von dem videlære vil schiere dâ daz sîn leben.
Er begunde im sîner künste alsölchen teil dâ geben,
daz er von sînem swerte muose ligen tôt.
Daz rach der alte Hildebrant, als im sîn ellen daz gebôt.

2283

„Ouwê liebes hêrren“, sprach meister Hildebrant,
„der hie lît erstorben von Volkêres hant!
Nû sol der videlære langer niht genesen!“
Hildebrant der küene, wie kunde er grimmer gewesen?

2284

Dô sluoc er Volkêren, daz im diu helmbant
stuben allenthalben zuo des sales want
von helme und ouch von schilde, dem küenen spileman.
Dâ von der starke Volkêr dô den ende dâ gewan.

2285

Dô drungen zuo dem strîte die Dieterîches man.
Si sluogen, daz die ringe vil verre dræten dan,
und daz man ort der swerte vil hôhe vliegen sach.
Si holten ûz den helmen den heize vliezenden bach.

2286

Dô sach von Tronege Hagene Volkêren tôt.
Daz was zer hôchgezîte sîn aller meistiu nôt,
die er dâ hete gewunnen an mâgen und ouch an man.
Ouwê, we harte Hagene den helt dô rechen began!

2287

„Nûne sol es niht geniezen der alte Hildebrant!
Mîn helfe lît erslagen von des heldes hant,
der beste hergeselle, den ich ie gewan.“
Den schilt er ructe hôher. Dô gie er houwende dan.

2288

Helpfrîch der küene Dancwarten sluoc.
Gunthêre unde Gîselhêre, den was ez leit genuoc,
dô si in vallen sâhen in der starken nôt.
Er hete mit sînen handen vil wol vergolten sînen tôt.

2289

Die wîle gie dô Wolfhart beide wider unde dan,
allez houwende die Gunthêres man.
Er was die dritten kêre komen durch den sal.
Dâ viel von sînen handen vil manec recke ze tal.

2290

Dô rief der hêrre Gîselhêr Wolfharten an:
„Ouwê, daz ich sô grimmen vîant ie gewan!
Edel ritter küene, nû wendet gegen în!
Ich wilz helfen enden. Ez enmac niht lenger gesîn.“

2291

Zuo Gîselhêre kêrte Wolfhart in den strît.
Dô sluoc ietwederer vil manege wunden wît.
Sô rehte krefteclîchen er zuo dem künegte dranc,
daz imez bluot under füezen al über daz houbet spranc.

2292

Mit swinden slegen grimme, der schœnen Uoten kint,
enpfie er Wolfharten, den küenen helt, sint.
Swie starc der degen wære, er enkunde niht genesen.
Ez endorfte künec sô junger nimmêr küener gewesen.

2293

Dô sluoc der Wolfharten durch eine brünne guot,
daz im von der wunden nider vlôz daz bluot.
Er wunte zuo dem tôde den Dieterîches man.
Ez enhete ân einen recken ze wâre niemen getân.

2294

Alsô der küene Wolfhart der wunden dô enpfant,
den schilt, den liez er vallen. Hôher an der hant
huop er ein starkez wâfen, daz was starc genuoc.
Durch helm und durch ringe der helt dô Gîselhêren sluoc.

2295

Si heten beide ein ander den grimmen tôt getân.
Dône lebte ouch niht mêre der Dieterîches man.
Hildebrant der alte Wolfharten vallen sach.
Im wæne vor sînem tôde sô rehte leide nie geschach.

2296

Dô wâren gar erstorben die Gunthêres man
und ouch die Dieterîches. Hildebrant was gegân,
dâ Wolfhart was gevallen nider in daz bluot.
Er besloz mit armen den recken küene und guot.

2297

Er wolde in ûzem hûse mit im tragen dan.
Er was ein teil ze swære. Er muose in ligen lân.
Dô blicte ouch ûz dem bluote der rêwende man.
Er sach wol, daz im gerne sîn neve hete geholfen dan.

2298

Dô sprach der tôtwunde: „Vil lieber œheim mîn,
ir müget an disen zîten mir niht vrum gesîn.
Nû hüetet iuch vor Hagenen, jâ dunket ez mich guot!
Er treit in sînem herzen einen grimmigen muot.

2299

Unde ob mich mâge nâch tôde wellen klagen,
den næhesten und den besten, den sult ir von mir sagen,
daz si nâch mir niht weinen. Daz ist âne nôt.
Vor eines küneges handen lige ich hie hêrlîchen tôt.

2300

Ich hân ouch sô vergolten hier inne mînen lîp,
daz ez wol mugen beweinen der guoten ritter wîp.
Ob iuch des iemen vrâge, sô müget ir balde sagen,
vor mîn eines handen ligent wol hundert erslagen.“

2301

Dô gedâhte ouch Hagene an den spileman,
dem der küene Hildebrant sîn leben an gewan.
Dô sprach er zuo dem degene: „Ir geltet mîniu leit.
Ir habt uns hinne erbunnen vil maneges recken gemeit.“

2302

Er sluoc ûf Hildebranden, daz man wol vernam
Balmungen diezen, den er Sîvride nam,
Hagene der küene, dâ er den helt ersluoc.
Dô werte sich der alte. Jâ was er küene genuoc.

2303

Der recke Dieterîches sluoc ein wâfen breit
ûf den helt von Tronege, daz ouch vil sêre sneit.
Dône kunde er niht verwunden den Gunthêres man.
Dô sluoc aber in Hagene durch eine brünne wol getân.

2304

Dô der alte Hildebrant der wunden enpfant,
dô vorhte er schaden mêre von der Hagenen hant.
Den schilt warf über rucke der Dieterîches man.
Mit der starken wunden der helt dô Hagenen entran.

2305

Dâ was niemen lebende aller der degene
niuwan die einen zwêne, Gunthêr und Hagene.
Mit bluote gie berunnen der alte Hildebrant.
Er brâhte leidiu mære, dâ der Dieterîchen vant.

2306

Dô sach er trûreclîche sitzen hie den man.
Der leide michel mêre der fürste dô gewan.
Er sach ouch Hildebranden in sîner brünne rôt.
Dô vrâgete er der mære, als im diu sorge gebôt:

2307

„Nû sagt mir, meister Hildebrant, wie sît ir sô naz
von dem verchbluote, oder wer tet iu daz?
Ich wæne, ir mit den gesten zem hûse habt gestriten.
Ich verbôt ez iu sô sêre. Ir het ez billîche vermiten.“

2308

Dô sagte er sînem hêrren: „Ez tet Hagene.
Der sluoc mir dise wunden in dem gademe,
dô ich von dem recken wolde wenden dan.
Mit dem mînem lebene ich dem tiuvel vil kûme entran.“

2309

Dô sprach der Bernære: „Vil rehte ist iu geschehen,
dô ir mich vriuntschefe den recken hôrtet jehen,
daz ir den vride brâhtet, den ich in hete gegeben.
Hete ich es niht immer schande, ir soldet verliesen daz leben.“

2310

„Nû zürnet niht sô sêre, mîn hêr Dieterîch,
an mir und mînen vriunden der schade ist al ze rîch.
Wir wolden Rüedegêren getragen haben dan.
Des enwolden uns niht gunnen des künec Gunthêres man.“

2311

„Sô wê mir dirre leide! Ist Rüedegêr doch tôt!
Daz muoz mir sîn ein jâmer vor aller mîner nôt.
Gotelint diu edele ist mîner basen kint.
Âch wê der armen weisen, die dâ ze Bechelâren sint!

2312

Triuwen unde leides mant mich sîn tôt.“
Er begunde starke weinen. Des gie dem helde nôt.
„Ouwê getriuwer helfe, die ich verlorn hân!
Jâne überwinde ich nimmêr des künec Etzelen man!

2313

Müget ir mir, meister Hildebrant, diu mære rehte sagen,
wer der recke wære, der in dâ habe erslagen?“
Er sprach: „Daz tet mit kreften der starke Gêrnôt.
Vor Rüedegêres henden ist ouch der helt gelegen tôt.“

2314

Er sprach ze Hildebrande: „Nû sagt mînen man,
daz si sich balde wâfen, wand ich wil dar gân,
unde heizet mir gewinnen mîn liehtez wîcgewant.
Ich wil selbe vrâgen die helde ûzer Burgonden lant.“

2315

Dô sprach meister Hildebrant: „Wer sol zuo ziu gân?
Swaz ir habt der lebenden, die seht ir hie bî iu stân.
Daz bin ich alterseine. Die andern, die sint tôt.“
Dô erschracte er dirre mære. Des gie im wærlîche nôt,

2316

Wand er leit sô grôzez zer werlde nie gewan.
Er sprach: „Unde sint erstorben alle mîne man,
sô hât mîn got vergezzen, ich armer Dieterîch.
Ich was ein künec hêre, vil gewaltec und rîch.

2317

Wie kunde ez sich gefüegen“, sprach hêr Dieterîch,
„daz si all sint erstorben, die helde lobelîch,
von den strîtmüeden, die doch heten nôt?
Wande durch mîn ungelücke, in wære vremde noch der tôt.

2318

Sît daz es mîn unsælde niht langer wolde entwesen,
sô sagt mir: ist der geste noch iemen genesen?“
Dô sprach meister Hildebrant: „Daz, weiz got, niemen mêr
niuwan Hagene aleine unde Gunthêr, der künec hêr.“

2319

„Ouwê, lieber Wolfhart, sol ich dich hân verlorn,
sô mac mich balde riuwen, daz ich ie wart geborn,
Sigestap und Wolfwîn, und ouch Wolfprant!
Wer sol mir danne helfen in der Amelunge lant?

2320

Helpfrîch der vil küene, und ist mir der erslagen,
Gêrbart und Wîchart, wie solde ich die verklagen?
Daz ist an mînen vröuden mir der leste tac.
Ouwê, daz vor leide niemen sterbene mac.“

wie Gunthêr unde Hagene unde Kriemhilt wurden erslagen
{ 39 }
Wie Gunther, Hagen und Kriemhild erschlagen wurden.

2321

Dô suochte der hêrre Dieterîch selbe sîn gewant.
Im half, daz er sich wâfente, meister Hildebrant.
Dô klagete alsô sêre der kreftige man,
daz daz hûs erdiezen von sîner stimme began.

2322

Dô gewan er wider rehten heldes muot.
In grimme wart gewâfent dô der helt guot.
Einen schilt vil vesten nam er an die hant.
Si giengen dannen balde, er unde meister Hildebrant.

2323

Dô sprach von Tronege Hagene: „Ich sihe dort her gân
hêrren Dieterîchen. Der wil uns bestân
nâch sînem starkem leide, daz im ist hie geschehen.
Man sol daz hiute kiesen, wem man des besten müge jehen.

2324

Jâne dunket sich von Berne der hêrre Dieterîch
nie sô starc des lîbes und ouch sô griuwelîch,
und wil erz an uns rechen, daz im ist getân“
also redete Hagene, „Ich tar in rehte wol bestân!“

2325

Dise rede hôrte Dieterîch und ouch Hildebrant.
Er kom, dâ er die recken beide stênde vant
ûzen vor dem hûse, geleinet an den sal.
Sînen schilt den guoten, den satzte Dieterîch ze tal.

2326

In leideclîchen sorgen sprach dô Dieterîch:
„Wie habt ir sô geworben, Gunthêr, künec rîch,
wider mich ellenden? Waz hete ich iu getân?
Alles mînes trôstes, des bin ich hie eine bestân.

2327

Iuch endûhte niht der volle an der grôzen nôt,
dô ir uns Rüedegêren den helt sluoget tôt.
Nû habet ir mir erbunnen aller mîner man.
Jâne hete ich iu helden sölcher leide niht getân!

2328

Gedenket an iuch selben unde an iuwer leit,
tôt der iuwern vriunde und ouch diu arbeit,
ob ez iu guoten recken beswæret iht den muot.
Ouwê, wie rehte unsanfte mir tôt der Rüedegêres tuot!

2329

Ez geschach ze dirre werlde nie leider manne mêr.
Ir gedâchtet übele an mîn und an iuwer sêr.
Swaz ich vriunde hete, die sint von iu erslagen.
Jâne kan ich nimmêr mêre die mînen mâge verklagen!“

2330

„Jâne sîn wir niht sô schuldec!“ sprach dô Hagene,
„Ez giengen zuo disem hûse iuwer degene
gewâfent wol ze vlîze, mit einer schar sô breit.
Mich dunket, daz diu mære iu niht rehte sîn geseit!“

2331

„Waz sol ich gelouben mêre? Mir seite ez Hildebrant,
dô mîne recken gerten von Amelunge lant,
daz ir in Rüedegêren gæbet ûz dem sal,
dô but ir niuwan spotten den küenen helden her ze tal.“

2332

Dô sprach der künec von Rîne: „Si jâhen wolden tragen
Rüedegêren hinnen. Den hiez ich in versagen,
Etzelen ze leide und niht den dînen man,
unz daz dô Wolfhart dar umbe schelten began.“

2333

Dô sprach der helt von Berne: „Ez muoste êt alsô sîn.
Gunthêr, künec edele, durch die zuht dîn,
ergetze mich der leide, die mir von dir sint geschehen,
und süene ez, ritter küene, daz ich des künne dir gejehen!

2334

Ergip dich mir ze gîsel, dû und ouch dîn man,
sô wil ich behüeten, sô ich aller beste kan,
daz dir zen Hiunen niemen niht entuot.
Dûne solt an mir niht vinden niuwan triuwen und guot.“

2335

„Daz enwelle got von himele“, sprach dô Hagene,
„daz sich dir ergæben zwêne degene,
die noch werlîche gewâfent gegen dir stânt
und noch sô ledeclîche vor ir vîanden gânt!“

2336

„Ir ensult ez niht versprechen“, sô redete Dieterîch,
„Gunthêr unde Hagene. Ir habt beide mich
sô sêre beswæret, daz herze und ouch den muot,
welt ir mich ergetzen, daz ir ez vil billîche tuot.

2337

Ich gibe iu mîne triuwe und sicherlîche hant,
daz ich mit iu rîte heim in iuwer lant.
Ich leite iuch nâch den êren, oder ich gelige tôt,
und wil durch iuch vergezzen der mînen grœzlîchen nôt.“

2338

„Nûne muotet sîn niht mêre!“ sprach aber Hagene,
„Von uns zimt daz mære niht wol ze sagene,
daz sich iu ergæben zwêne alsô küene man.
Nû siht man bî iu niemen wan eine Hildebranden stân.“

2339

Dô sprach meister Hildebrant: „Got weiz, hêr Hagene,
der iu den vride biutet mit iu ze tragene,
ez kumt noch an die stunde, daz ir möhtet nemen
die suone mînes hêrren möht ir iu lâzen gezemen.“

2340

„Jâ næme ich die suone“, sprach aber Hagene,
“ê ich sô lasterlîche ûze einem gademe
vlühe, meister Hildebrant, als ir hie habt getân!
Ich wæne, daz ir kundet baz gein vîanden stân!“

2341

Des antwurte Hildebrant: „Zwiu verwîzet ir mir daz?
Nû, wer was, der ûf einem schilde vor dem Waskensteine saz,
dô im von Spânje Walthêr sô vil der vriunde sluoc?
Ouch habt ir noch ze zeigen an iu selben genuoc!“

2342

Dô sprach der hêrre Dieterîch: „Ez enzimt niht helde lîp,
daz si suln schelten sam diu alten wîp.
Ich verbiut iu, Hildebrant, daz ir niht sprechet mêr.
Mich ellenden recken twingent grœzlîchiu sêr.

2343

Lât hœren“, sprach Dieterîch, „recke Hagene,
waz ir beide spræchet, snellen degene,
dô ir mich gewâfent zuo ziu sâhet gân.
Ir jâhet, daz ir eine mit strîte woldet mich bestân.“

2344

„Jâne lougent iu des niemen“, sprach Hagene der degen,
„Ine wellez hie versuochen mit den starken slegen,
ez ensî daz mir zebreste daz Nibelunges swert!
Mir ist zorn, daz unser beider ist ze gîsel hie gegert!“

2345

Dô Dieterîch gehôrte den grimmen Hagenen muot,
den schilt vil balde zucte der snelle degen guot.
Wie balde gein im Hagene von der stiege spranc!
Nibelunges swert daz guote vil lûte ûf Dieterîche erklanc.

2346

Dô wesse wol hêr Dieterîch, daz der küene man
vil grimmes muotes wære. Schermen im began
der hêrre von Berne vor angestlîchen slegen.
Wol erkande er Hagenen, den vil zierlîchen degen.

2347

Ouch vorhte er Balmungen, ein wâfen starc genuoc.
Under wîlen Dieterîch mit listen wider sluoc,
unz daz er Hagenen mit strîte doch betwanc.
er sluoc im eine wunden, diu was tief unde lanc.

2348

Dô dâhte der hêrre Dieterîch: „Dû bist in nœten erwigen.
Ich hâns lützel êre, soltû tôt vor mir geligen.
Ich wilz sus versuochen, ob ich ertwingen kan
dich mir ze einem gîsel.“ Daz wart mit sorgen getân.

2349

Den schilt, den liez er vallen. Sîn sterke, diu was grôz.
Hagenen von Tronege mit armen er beslôz.
Des wart dô betwungen von im der küene man.
Gunthêr der edele dar umbe trûren began.

2350

Hagenen bant Dieterîch und fuorte in, dâ er vant
die edelen küneginne, und gap ir bî der hant
den küenesten recken, der ie swert getruoc.
Nâch ir vil starkem leide dô wart si vrœlîch genuoc.

2351

Vor liebe neic dem degene daz Etzelen wîp
„Immer sî dir sælic dîn herze und ouch der lîp!
Dû hâst mich wol ergetzet aller mîner nôt.
Daz sol ich immer dienen, mich ensûme danne der tôt.“

2352

Dô sprach der hêrre Dieterîch: „Ir sult in lân genesen,
edeliu küneginne, und mac daz noch gewesen,
wie wol er iuch ergetzet, daz er iu hât getân.
Er ensol des niht engelten, daz ir in seht gebunden stân.“

2353

Dô hiez si Hagenen füeren an sîn ungemach,
dâ er lac beslozzen, und dâ niemen sach.
Gunthêr, der künec edele, rüefen dô began:
„War kom der helt von Berne? Der hât mir leide getân!“

2354

Dô gie im hin engegene der hêrre Dieterîch.
Daz Gunthêres ellen, daz was vil lobelîch.
Dône beit ouch er niht mêre. Er lief her für den sal.
Von ir beider swerten huop sich ein grœzlîcher schal.

2355

Swie vil der hêrre Dieterîch lange was gelobt,
Gunthêr was sô sêre erzürnet und ertobt,
wand er nâch starkem leide sîn herzevîent was.
Man sagt ez noch ze wunder, daz dô hêr Dieterîch genas.

2356

Ir ellen und ir sterke beider wâren grôz.
Palas und türne von den slegen dôz,
dô si mit swerten hiuwen ûf die helme guot.
Ez hete der künec Gunthêr einen hêrlîchen muot.

2357

Sît twanc in der von Berne, sam Hagenen ê geschach.
Daz bluot man durch die ringe dem helde vliezen sach
von einem scharpfen swerte, daz truoc Dieterîch.
Dô hete gewert hêr Gunthêr nâch müede lobelîche sich.

2358

Der hêrre wart gebunden von Dieterîches hant,
swie künege niene solden lîden sölchiu bant.
Er dâhte, ob er si lieze, den künec unde sînen man,
alle, die si fünden, die müesen tôt von in bestân.

2359

Dieterîch von Berne, der nam in bî der hant.
Dô fuorte er in gebunden, dâ er Kriemhilde vant.
Dô was mit sînem leide ir sorgen vil erwant.
Si sprach: „Willekom, Gunthêr ûzer Burgonden lant!“

2360

Er sprach: „Ich solde iu nîgen, vil liebiu swester mîn,
ob iuwer grüezen möhte genædeclîcher sîn.
Ich weiz iuch, küneginne, sô zornec gemuot,
daz ir mich unde Hagenen vil swache grüezen getuot.“

2361

Dô sprach der helt von Berne: „Vil edeles küneges wîp,
ez enwart gîsel mêre sô guoter ritter lîp,
als ich, vrouwe hêre, iu an in gegeben hân.
Nû sult ir die ellenden mîn vil wol geniezen lân.“

2362

Si jach, si tæte ez gerne. Dô gie hêr Dieterîch
mit weinenden ougen von den helden lobelîch.
Sît rach sich grimmeclîchen daz Etzelen wîp:
Den ûz erwelten degenen nam si beiden den lîp.

2363

Si lie si ligen besunder durch ir ungemach,
daz ir sît deweder den andern nie gesach,
unz si ir bruoder houbet hin für Hagenen truoc.
der Kriemhilde râche wart an in beiden genuoc.

2364

Dô gie diu küneginne, dâ si Hagenen sach.
Wie rehte vîentlîche si zuo dem helde sprach:
„Welt ir mir geben wider, daz ir mir habt genomen,
sô müget ir wol lebende heim zen Burgonden komen.“

2365

Dô sprach der grimme Hagene: „Diu rede ist gar verlorn,
vil edeliu küneginne. Jâ hân ich des gesworn,
daz ich den hort iht zeige! Die wîle daz si leben,
deheinder mîner hêrren, sô sol ich in niemene geben.“

2366

„Ich bringez an ein ende“, sô sprach daz edel wîp.
Dô hiez si ir bruoder nemen sînen vil schœnen lîp.
Man sluoc im ab daz houbet. Bî dem hâre si ez truoc
für den helt von Tronege. Dô wart im leide genuoc.

2367

Alsô der ungemuote sînes hêrren houbet sach,
wider Kriemhilde dô der recke sprach:
„Dû hâst ez nâch dînem willen vil gar zeinem ende brâht,
und ist ouch iu ergangen, als ich mir hete gedâht.

2368

Nû ist von Burgonden der edel künec tôt,
Gîselhêr der junge unde ouch hêr Gêrnôt.
Den schatz, den weiz nû niemen wan got, âne mîn.
Der sol dich, vâlandinne, immer verborgen sîn!“

2369

Si sprach: „Sô habt ir übele geltes mich gewert.
Sô wil ich doch behalten daz Sîvrides swert.
Daz truoc mîn holder vriedel, dô ich in jungest sach,
and dem mir herzeleide von iuwern schulden geschach.“

2370

Si zôch ez von der scheiden. Daz kunde er niht erwern.
Dô dâhte si den recken des lîbes wol behern.
Si huop im ûf daz houbet. Mit dem swerte siz ab sluoc.
Daz sach der künec Etzel. Dô was im leide genuoc.

2371

„Wâfen!“ sprach der fürste, „Wie ist nû tôt gelegen
von eines wîbes handen der aller beste degen,
der ie kom ze sturme oder ie schilt getruoc!
Swie vîent ich im wære, ez ist mir leide genuoc.“

2372

Dô sprach der alte Hildebrant: „Jâ geniuzet si des niht,
daz si in slahen torste! Swaz mir dâ von geschiht,
swie er mich selbe bræhte in angestlîche nôt,
iedoch sô wil ich rechen des küenen Tronegæres tôt.“

2373

Hildebrant mit zorne zuo Kriemhilde spranc.
Er sluoc der küneginne einen swæren swertswanc.
Jâ tet ir diu sorge von Hildebrande wê.
Waz mohte si gehelfen, daz si grœzlîchen schrê?

2374

Dô was gelegen aller dâ der veigen lîp.
Ze stücken was gehouwen dô daz edele wîp.
Dieterîch und Etzel weinen dô began.
Si klagten inneclîche beide mâge und man.

2375

Diu vil michel êre was gelegen tôt.
Die liute heten alle jâmer unde nôt.
Mit leide was verendet des küneges hôchgezît,
als ie diu liebe leide zaller jungeste gît.

2376

Ine kan iu niht bescheiden, waz sider dâ geschach,
wan: ritter und vrouwen weinen man dâ sach,
dar zuo die edelen knehte, ir lieben vriunde tôt.
Dâ hât daz mære ein ende. Diz ist der Nibelunge NÔT.

Fassungen des Nibelungenliedes
Handscrift A:	Hohenems-Münchener Handschrift um 1280
Handscrift B:	St. Galler Handschrift um 1250
Handscrift C:	Hohenems-Laßbergische Handschrift um 1230
Ausgabe von Karl Bartsch:	Leipzig 1870/80

Das Nibelungenlied

(Normalisiert)

Deus vult !	— Þeedrich ( Inscriptio electronica : Theedrich@harbornet.com )
	Dies immutationis recentissimæ : die Mercurii, 2018 Augusti 18